1. Ka nyi ica a gba ga tsô Yesu una ere?

 SE MBA hen shighe u akaa a vesen a lu eren yô! Ica a gba ga tsô Yesu una ôr hanma or sha tar cii ijir. Yesu yange pase kwagh u una er sha tar cii ve una mase va ôron ior ijir yô. Yange pase mbahenen nav kwagh u una lu “ikyav” i tesen ér ngu vea vese imôngo “shi mkur u tar ne zurum” yô. (Mat. 24:3) I nger kwaghôron u profeti ne ken Mateu ityough 24 man 25, kua ken Marku ityough 13 man Luka ityough 21.

2. Ka nyi se lu timen sha mi ken ngeren nee, man kwagh ne una wase se sha ci u nyi?

² Yesu yange wa se kwagh ken anzaakaa agen atar. Ka injakwagh i iyôngo man ivo, man i anuunaukase a fan kwagh man a lanen kwagh, kua injakwagh i utalenti la. Hanma injakwagh ken anzaakaa ne yô, wase se u fan ér Yesu una va ôr hanma or ijir sha akaa a nan eren la. Se lu timen sha anzaakaa ne ken ngeren ne, nahan se nenge akaa a se fatyô u henen ken a yô. Injakwagh i hiihii i se time sha mi yô, ka i sha kwagh u iyôngo man ivo la.

IYÔNGO MAN IVO

3. Ka hanma shighe Yesu una ôr ior ijiri?

³ Ken injakwagh i sha kwagh u iyôngo man ivo la, Yesu pase gbenda u a ôr mba ve zough a ian i ungwan loho u dedoo hegen shi suen anmgbianev nav mba i shigh ve mkurem la ijir yô. (Mat. 25:31-46) Hen shighe u “zegecan” la una ôr ve ijir nahan una fa mba ve lu iyôngo man ivo la cii ve Armagedon una va ye. (Mat. 24:21) Yesu una pav mba ve lu suen mbadondon un mba i shigh ve mkurem la kposo a mba ve  vende u suen ve la er orkuranilev ka nan pav iyôngo kposo a ivo nahan.

4. Sha kwagh u Yesaia 11:3, 4 a ôr yô, er nan ve se na jighjigh ser Yesu una ôr ior ijir sha mimi? (Shi nenge foto u sha igbende kpaa.)

⁴ Bibilo kaa ér Yesu una va ôron ijir sha ci u Yehova yô, una ôr sha perapera man sha mimi. (Ôr Yesaia 11:3, 4.) Ngu nengen gbenda u ior ve eren kwagh, man er ve lamen shi ve henen kwagh, kua gbenda u ve eren kwagh a anmgbianev nav mba i shighe ve mkurem la. (Mat. 12:36, 37; 25:40) Yesu una fa mba yange ve sue anmgbianev nav mba i shigh ve mkurem la kua tom ve yô. a Gbenda môm u vesen u mba ve lu iyôngo la ve suen anmgbianev mba Kristu yô, ka u wasen ve ken tom u pasen kwagh la. Mba ve eren nahan yô, a ôr ve ijir ér mba “mbaperapera” shi vea lu a ishimaverenkeghen i va zuan a “uma u tsôron” shin tar. (Mat. 25:46; Mpa. 7:16, 17) Nenge injar i vesen i i lu keghen mba ve tile sha mimi zan zan ne sha wono! Aluer ve tile sha mimi zan zan shighe u zegecan la bee, shi ve zan hemen u tilen sha mimi yô, ati a ve aa lu ken “takeda u uma la” her.—Mpa. 20:15.

5. Ka nyi se hen ken injakwagh i iyôngo man ivo la, man ka unô i gbe u vea hemba veren ishima sha injakwagh shono?

⁵ Lu or u jighjigh man or u mimi. Jighilii yô, injakwagh i Yesu i sha kwagh u iyôngo man ivo la, ngi ôron kwagh u mba ve lu a ishimaverenkeghen i va lun uma shin tar yô. Ka ve tese ér ve na jighjigh sha u suen anmgbianev mba Kristu ken tom u pasen kwagh la man sha u dondon hemen u annongo u anmgbianev mba i shigh ve mkurem mba Yesu a tsough la. (Mat. 24:45) Nahan kpa, mba ve lu a ishimaverenkeghen i yemen sha la kpa gba u vea dondo kwaghwan u a lu ken injakwagh ne la. Sha ci u nyi? Sha ci u Yesu ka a ver ishima sha kwagh u ve eren la man iliam kua gbenda u ve henen kwagh la kpaa. Gba u ve kpa vea za hemen u tilen sha mimi. Jighilii yô, Yesu yange ôr anzaakaa ahar sha kwagh u mba i shighe ve mkurem la. Shi se zua a anzaakaa ne ken Mateu ityough 25. Nahan de se time sha injakwagh i anuunaukase a fan kwagh man a lanen kwagh la.

ANUUNAUKASE A FAN KWAGH MAN A LANEN KWAGH

6. Anuunaukase a ataan la yange tese ér mba mbafankwagh nena? (Mateu 25:6-10)

⁶ Ken injakwagh i anuunaukase la, Yesu ôr kwagh u anuunaukase a pue a yange due u za keghen orkwasehe gbenda yô. (Mat. 25:1-4) Ve cii yange ve wa ishima ér vea nyôr vea orkwasehe la ken iniongo i ivesegh. Yesu yange ôr kwagh u mbagen utaan ken a ve ér ka “mbafankwagh” man mba utaan mbagenev mbara di ér ka “mbalanenkwagh.” Anuunaukase a fan kwagh la yange wa iyol kegh a kegh shi lu kuran kpaa. Yange ve wa iyol u keghen orkwasehe zan zan, aluer a va nyôr atôutu je kpaa. Nahan ve va a amenger a haan mkurem sha er vea nenge iwanger shighe u ime i we yô. Shi yange ve va a mkurem magen sha er vea seer ken amenger a ve aluer orkwasehe va fele ga je kpaa. Yange ve wa iyol tsembelee sha er amenger a ve a pir ga yô. (Ôr Mateu 25:6-10.) Orkwasehe la va nyer yô, anuunaukase a fan kwagh la nyôr ken iniongo i ivesegh la vea na. Kape mba i shighe ve mkurem mba ve wa iyol ve lu keghen a kegh sha u lun tsevaa shi tilen sha mimi zan zan shighe u Kristu una va la pa vea zua a injar i nyôron vea Yesu u a lu orkwasehe la ken Tartor na u sha  la je la. b (Mpa. 7:1-3) Kpa gema anuunaukase a lanen kwagh la di ye?

7. Ka nyi yange i er anuunaukase ataan a lanen kwagh la, man ka sha ci u nyi?

⁷ Shighe u orkwasehe va nyôr la, anuunaukase a lanen kwagh la wa iyol kegh a kegh er a fan kwagh la nahan ga. Amenger a ve lu nôngon u pirin man ve lu a mkurem magen ga. Mba fe ér kera shi ica ga u orkwasehe una va nyôr yô, maa ve yem u za yamen mkurem. Ve lu a hide ga tsô maa orkwasehe va nyôr. Hen shighe la “anuunaukase a yange wa iyol lu keghen a kegh la nyôr vea na ken iyou i iniongo i ivesegh la, maa i wuhe hunda.” (Mat. 25:10) Anuunaukase a lanen kwagh la nga za hidi ér vea nyôr yô, orkwasehe la kaa a ve ér: “M fa ne ga.” (Mat. 25:11, 12) Anuunaukase la yange wa iyol tsembelee u keghen orkwasehe zan zan una kar van ga. Ka nyi i gbe u mba i shigh ve mkurem la vea hen ken kwagh ne?

8-9. Ka nyi mba i shigh ve mkurem la vea fatyô u henen ken injakwagh i anuunaukase laa? (Shi nenge foto kpaa.)

⁸ Tese wer u wa iyol u ngu keghen a kegh shi u ngu kuran. Yesu yange lu kaan ér mba i shigh ve mkurem la vea lu iniongo ihiar, mbagen vea wa iyol vea kegh a kegh man mbagen vea wa iyol ga ze. Kpa a pase kwagh u una er mba i shigh ve mkurem la aluer ve wa iyol ve kegh a kegh u wan ishima zan zan mkur ga yô. Aluer ve er nahan ga yô, vea zua a injar ve la ga. (Yoh. 14:3, 4) Mimi yô, kwagh ne ka kwagh u kiriki ga! Aluer se mba a ishimaverenkeghen i yemen sha shin va lun uma shin tar kpa, gba u se cii se ver ishima sha icintan i sha injakwagh i anuunaukase la. Gba u hanma wase nana za hemen u kuran shi nana wa iyol nana kegh a kegh u wan ishima zan zan mkur.—Mat. 24:13.

⁹ Yesu yange ôr injakwagh i anuunaukase la u tesen er i gbe hange hange u se wa iyol se keghen a kegh shi se lu tsevaa la been yô, a ôr injakwagh sha kwagh u utalenti. Injakwagh la pase er i lu a inja u eren tom kpoghuloo yô.

 UTALENTI

10. Ikpan i ihiar la yange er kwagh a orvesen ve sha mimi nena? (Mateu 25:19-23)

¹⁰ Yesu yange ôr kwagh u ikpan i ihiar ken injakwagh i utalenti la, i yange i er kwagh a orvesen ve sha mimi yô, kua kwagh u kpan ugen u er kwagh a orvesen na sha mimi ga yô. (Mat. 25:14-18) Ikpan i ihiar la yange i er tom kpoghuloo sha er ia seer zuan a mtsera sha inyaregh ki orvesen ve yange na ve la. Cii ve a yem zende ken tar ugen yô, yange na ve utalenti man inyaregh kin lu zege inyar. Ikpan i ihiar la yange i lu ior mba eren tom kpoghuloo, nahan ve er kwagh a inyaregh ki i na ve la sha inja. Nahan lu nyi i due kere? Orvesen ve za hidi yô, ve seer mtsera sha inyaregh ki na ve la. Orvesen ve la yange wuese ve, kaa a hanma ve ér, “ember a orvesen wou imôngo.” (Ôr Mateu 25:19-23.) Kpa kpan u sha utar la di ye? Yange er nyi a inyaregh ki orvesen na, na un laa?

11. Yange i er a kpan u “wan hwev” la nena, man lu sha ci u nyi?

¹¹ Yange i na kpan u sha utar la talenti môm, kpa lu kpan u “wan hwev.” Orvesen na yange soo ér a er kasua a inyaregh kira a zua a mtsera sha mi. Kpa a time ihungwa, a yer ki shimi. Orvesen la yange za hidi yô, kpan la na un talenti môm la tseegh. Kpan ne yange lu a inja i dedoo ga cii. Er yange er kwagh a inyaregh kira u zuan a mtsera sha mi ga yô, ma zamber a orvesen na, kpa a er nahan ga, a gema a kaa ér orvesen na “ngu or u taver kwagh.” Kpan ne yange zua a ian i ember vea orvesen na imôngo ga. Heela tseegh ga, yange i ngohol talenti la hen a na kera shi i zenda un ér a due hen ya u orvesen na kera.—Mat. 25:24, 26-30.

12. Ikpan i ihiar i yange i er kwagh a orvesen ve sha mimi la, tile sha ityough ki unô nyiana?

¹² Ikpan i ihiar i yange i er kwagh a orvesen ve sha mimi la, tile sha ityough ki Mbakristu mbajighjigh mba i shigh ve mkurem mbara. Orvesen ve Yesu kaa a ve ér, ve “ember a [na] imôngo.” I na ve injar i yemen sha, ka mnder u shin ku u hiihii la je la. (Mat. 25:21, 23; Mpa 20:5b) Kpa ikyav i kpan u wan hwev la ka icintan kpaa hen Mbakristu mba i shigh ve mkurem la. Sha ci u nyi?

13-14. Ka nyi Mbakristu mba i shigh ve mkurem mbara ve hen ken injakwagh i utalenti laa? (Shi nenge foto kpaa.)

¹³  Tese wer u ngu or u eren tom kpoghuloo. Injakwagh i Yesu ôr sha kwagh u utalenti kua i anuunaukase la tese ér lu tsengan kaan ér mba i shigh ve mkurem la vea lu mba wan hwev ga. Kpa lu pasen kwagh u una za hemen aluer kera mba a gbashima ga yô. Sha nahan yô, “kwagh u i yer [ve] shi i tsough [ve] sha u [ve̱] lu la, una kar [ve],” nahan a kera na ve ian i nyôron sha Tartor u Aôndo ga.—2 Pet. 1:10.

¹⁴ Injakwagh i Yesu ôr sha kwagh u anuunaukase man i utalenti la tese wang ér gba u Mbakristu mba i shigh ve mkurem la cii vea wa iyol vea kegh a kegh shi vea kuran shi vea lu mba eren tom kpoghuloo. Kpa Yesu yange ôr kwagh ugen u a lu icintan hen Mbakristu mba i shigh ve mkurem yôô? Een! I nger icintan ne ken takeda u Mateu 24:40, 41.

KA AN A “KUA A” NANA?

15-16. Mateu 24:40, 41 tese er i gbe u mba i shigh ve mkurem la vea kuran la nena?

¹⁵ Cii ve Yesu a ôr anzaakaa a atar ne yô, yange pase ijirôron i a ôr mba i shigh ve mkurem la, sha er a fa or u nana kuma u yan dyako la yô. Yange ôr kwagh u iorov uhar mba vea lu eren tom ken ityev man kasev uhar mba vea lu wuan kwagh sha nase yô. Ka inja er iorov mba uhar mbara kua kasev mba uhar mbara cii vea lu eren kwagh môm nahan, kpa Yesu kaa ér “a kua a u môm, a undu ugen” la. (Ôr Mateu 24:40, 41.) Man a kaa a mbadondon un ér: “kuran nen, gadia ne fa iyange i Ter wen Una va la ga.” (Mat. 24:42) Man lu kwagh u Yesu vande ôron shighe u ôr injakwagh i sha kwagh u anuunaukase la je la. (Mat. 25:13) Akaa a Yesu ôr ne zua je kpa? A zua. Ka Mbakristu mbajighjigh mba i shigh ve mkurem la tseegh Yesu “a kua” a ve, a yem a ve ken Tartor u sha la ye.—Yoh. 14:3.

¹⁶ Tese wer u ngu kuran. Hanma or u i shigh nan mkurem kpa nan ze hemen u kuran ga cii, nana lu ken “mba a tsough” ve la ga. (Mat. 24:31) Nahan gba u ior mba Aôndo cii, aluer mba a ishimaverenkeghen i yemen sha shin lun shin tar kpa, vea nenge kwagh u Yesu kaa ér se za hemen u kuran shi tilen sha mimi la ér ka kwaghwan u i gbe u vea dondo yô.

17. Aluer Yehova tsua or hegen ér nana yem sha kpa, er nan ve i doo u ishima ia vihi se ga?

¹⁷ Er se va hingir u fan Yehova tsembelee yô, se na jighjigh ser hanma kwagh u a eren cii ka u vough. Nahan Yehova ka una tsua u shighen mbajighjigh mbagen mkurem hegen ér ve lu mba yemen sha kpa, kwagh la ze se iyol ga. c Se umbur injakwagh i Yesu ôr sha kwagh u ior mba ve yar ahwa ataan aikighe, shighe u lu ôron kwagh u sule u wain la. (Mat. 20:1-16) Mbagen mba yange i mase yilan ve ér ve va er tom ken sule u wain la kpa i na ve injar vough er i na mba ve hii yaren ken sule shon la nahan. Kape aluer i shighe or mkurem ica gba, shin i sember shighen nan mkurem man nan za hemen u civir Yehova sha mimi ve, nana zua a injar i yemen sha je la.

DONDO AKAAWAN LA

18-19. Ka nyi se hen ken anzaakaa nee?

¹⁸ Ka nyi se hene? Injakwagh i iyôngo man ivo la tese er i gbe hange hange u mba ve lu a ishimaverenkeghen i va lun shin tar la, vea za hemen u civir Yehova sha mimi shi eren un tom kpoghuloo hegen man hen shighe u zegecan una va la yô. Hen shighe la, Yesu una kaa a mba ve til sha mimi la ér ve kuma u zuan a “uma u tsôron.”—Mat. 25:46.

¹⁹  Shi se time sha anzaakaa ahar a a lu icintan hen mba i shighe ve mkurem la yô. Yesu yange ôr ken injakwagh na i sha kwagh u anuunaukase a fan kwagh man a lanen kwagh la ér ve mbagen utaan vea lu mba fan kwagh. Yange ve wa iyol ve lu kuran shi ve lu keghen orkwasehe zan zan kar van. Kpa mba lanen kwagh mbara yô, wa iyol tsembelee ga. Nahan orkwasehe la venda ér ve de nyer ken iniongo na i ivesegh la ga. Se kpa gba u se wa iyol se kegh zan zan shighe u Yesu una kar van a mkur sha botar ne la. Shi se time sha kwagh u ikpan ihiar i Yesu ôr kwagh u i ken injakwagh na i utalenti, i yange i er kwagh a orvesen ve sha mimi shi i lu mba eren tom kpoghuloo la. Yange ve er tom kpoghuloo sha ci u orvesen ve, nahan orvesen ve lumun ve. Nahan kpa, yange venda kpan u wan hwev la. Ka nyi se hene? Gba u se za hemen u eren Yehova tom kpoghuloo zan zan mkur. Se mase henen fan er i gbe u mba i shigh ve mkurem la vea za hemen u kuran sha er Yesu una “kua a” ve, vea zua a injar i yemen sha la yô. Mba i shigh ve mkurem la mba veren ashe keghen shighe u Yesu una ‘kohol ve cii vea za lu vea na imôngo’ sha la. Ityav mbi Armagedon mbira mbia been yô, vea lu kwasehe u Yesu ken ivese i Waniyôngo la.—2 Tes. 2:1; Mpa. 19:9.

20. Yehova una er a mba ve lu dondon icintan na la nena?

²⁰ Shighe u Yesu una ôr tar ne ijir la zurum, nahan kpa ityôkyaa ngi i se cia ga. Aluer se za hemen u civir Yehova sha mimi yô, Ter wase u sha u se doo un ishima la una na se “agee a a gande a orumace” la sha er se “va tile sha ishigh ki Wan u or yô.” (2 Kor. 4:7; Luka 21:36) Aluer se mba a ishimaverenkeghen i yemen sha shin va lun uma shin tar kpa, se mba dondon akaawan a ken anzaakaa a Yesu ôr la yô, a saan Ter wase u sha la iyol a vese. Shi er Yehova a zungwen mhôônom yô, una “nger” ati a ase cii “ken ruamabera” u uma la.—Dan. 12:1; Mpa. 3:5.