1. Ka nyi yange i na ve Yehova gba akaa a uma?

SHA hiihii la Yehova lu tswen. Kpa mayange huan un ga cii. U ngu wer lu tswen yô, lu keren or u nana lu vea na sha er a saan un iyol ga. Nahan cii kpa, Aôndo soo ér mbagen kpa ve lu, shi i saan ve iyol kpaa. Lu dooshima mgbegha Yehova maa hii u gban akaa ye.—Ps. 36:9; 1 Yoh. 4:19.

2. Yange lu Yesu man mbatyomov ken ishima nena zum u Yehova gba akaa agen laa?

² Yehova yange hii gban Wan na Yesu. Maa er tom vea Wan na u ‘gban akaa agen cii’ kua mbatyomov umiliôn imôngo. (Kol. 1:16) Yange doo Yesu u eren tom imôngo vea Ter na. (Anz. 8:30) Mbatyomov kpa yange ve ember. Mbatyomov yange ve lu her shighe u Yehova man Orfantom na, Yesu, lu gban usha man tar la. Nahan mbatyomov mban tese ér kwagh ne doo ve nena? Yange ve “ger amo sha iember” zum u i gba tar la, man ikyav tese ér, ve za hemen u ember sha akaa agen a Yehova lu gban la, hemban je yô, shighe u gba uumace la. (Yobu 38:7; Anz. 8:31) Akaa a Yehova a gbe la cii tese dooshima man kwaghfan na.—Ps. 104:24; Rom. 1:20.

3. Er i pase ken 1 Mbakorinte 15:21, 22 nahan, nagh ku ipaan ku Yesu kura bugh se gbenda u eren nyi?

³ Yehova yange wa ishima ér tsombor u uumace cii u lu uma gbem sha tar u doonashe u a gba la. Kpa Adam man Ifa va hemba Aôndo ato, nahan kera lu u vea lu uma gbem sha won ga. Hingir u ve man ônov vev cii vea kpeen. (Rom. 5:12) Nahan Yehova er nena? Fese je Yehova pase er una yima uumace yô. (Gen. 3:15) Lu u Yehova una na Wan na Yesu a hingir ipaan, sha er una yima ônov mba Adam man Ifa sha ikyev i isholibo man ku kera yô. Nahan hanma or nana tsua a ishima i nan u civir Un  sha er nana zua a iyua i lun uma gbem sha won yô.—Yoh. 3:16; Rom. 6:23; ôr 1 Mbakorinte 15:21, 22.

4. Ka mbampin mba nyi se lu timen sha mi ken ngeren nee?

⁴ Nahan kpa mbampin mba kpishi mba alaghga se lu a mi sha ityendezwa i Aôndo a er ér una va nder mbakpenev la yô. Ikyav i tesen yô, a va nder ior shin ku nena? Shighe u a nder ior asev mba doon se ishima shin ku la, se nenge a ve nahan se fa vee? Ka sha igbenda i nyi nahan, mnder u shin ku la una lu kwagh u iemberegh? Man aluer se tôô shighe se mba henen sha kwagh u mnder u shin ku yô, kwagh la una wase se, se seer kaven dooshima u Yehova kua kwaghfan man ishimawan na nena? De se time ase nen sha mbampin mban môm môm.

5. Er nan ve i lu sha inja u nan jighjigh ér a va nder ior shin ku kure kure shi a er kwagh ne nzughul nzughul ga?

⁵ Shighe u Yehova una va nder ior umiliôn umiliôn sha ikyev i Wan na la, adooga a kohol ior cii a nder ve hen icin i môm ga. Er nan a kohol a nder ior icin i môm ga? Ka sha ci u aluer i nder ior nahala yô, ior vea hembe kpugh, nahan a hingir nzughul nzughul. Man mayange Yehova eren kwagh na nzughul nzughul ga. A nenge ér gba u a er kwagh sha inja sha inja sha er bem una lu yô. (1 Kor. 14:33) Yehova Aôndo yange er kwagh sha kwaghfan shi wa ishima shighe u lu gban tar vea Yesu imôngo la; yange ve er hanma kwagh sha tar cii ve, ve mase gban uumace ye. Yesu kpa una va dondo ieren i Yehova ne shighe u Hemen u Anyom Dubu, a una lu eren tom imôngo vea mba vea war Armagedon la. Vea sôr tar ne sha er a ngohol mba a nder ve shin ku la doo doo shi a nenge sha a ve kpaa yô.

6. Aerenakaa 24:15 tese ér, ka unô kpaa vea lu ken mba Yehova una nder ve laa?

⁶ Tom u hemban cii u ior mba vea war Armagedon la vea lu eren yô, a lu u tesen mba  a lu nderen ve shin ku la kwagh u Tartor u Aôndo kua akaa a Yehova a soo ér mbacivir un ve eren yô. Sha ci u nyi? Ityôkyaa yô, ior mba hemban iyenge ken atô u mba a nder ve la, a lu mba Bibilo i yer ve ér “mbaperapera ga” la. (Ôr Aerenakaa 24:15.) A gba u ior mban vea gema aeren a ve shi vea sôr inja sha er vea zua a mtsera ken nagh ku Kristu yô. Sha mimi yô, tom u tesen ior umiliôn umiliôn mimi u sha kwagh u Aôndo la a lu zegetom u numben a mi ga, sha ci u a lu ior mba ve fe kwagh môm sha kwagh u Yehova ga yô. Nahan a gba u hanmaor nana lu a or u tesen nan kwagh u Yehova er ka se henen Bibilo a ior nyian nahana? A gba u a tese mba a nder ve mban atôônanongo a vea zaan mkombo ker, shi a tsaase ve sha er ve di vea gema a tese ior mbagen mba a lu nderen zan yôô? A gba u se kegh tsô se va nenge er a za yô. Nahan kpa kwagh u se fe yô, shighe u Hemen u Anyom Dubu u Kristu ua bee la, “tar ua mgbough a mfe u TER.” (Yes. 11:9) Sha mimi yô, anyom dubu la a lu shighe u eren tom u sagher iyol kpishi!

7. Ior mba Aôndo vea lu eren kwagh sha mhôôn zum u vea lu tesen mba a nder ve shin ku la sha ci u nyi?

⁷ Shighe u Kristu una lu Hemen Anyom Dubu la, a gba u mbayev mba Yehova mba shin tar cii, vea za hemen u sôron anza kua aeren a ve sha er vea er ishima na yô. Sha nahan yô, ve cii vea lu zungwen ayol a ve mhôônom sha mimi er ve lu wasen mba i lu nderen ve shin ku la u hemban mbamhen mbabov kua asaren a bo, geman dondon atindi a Yehova la. (1 Pet. 3:8) Kwagh ne una na yô, a sar mba a nder ve shin ku la u civir Yehova a ior nav imôngo, sha ci u vea nenge ér ka ior mba hiden a iyol ijime mba ve lu ‘eren akaa a van ve a myom’ yô.—Fil. 2:12.

8. Er nan se fatyô u kuren ikyaa ser a va nder ior asev kua azende a ase yô, se nenge a ve se fa?

⁸ Atôakyaa nga kpishi a a ne ve se fatyô u kuren ikyaa ser ior mba vea lu keghen mba a nder ve shin ku gbenda la, vea fatyô u fan ior vev mba a nder la yô. Ikyav i tesen yô, gbenda u ngise Yehova nder ior shin ku la tese ér se fatyô u veren ishima ser Yehova una va nder ior sha gbenda u a nenge a ve yô, a fa ve shi iliam ve kua mhen ve cii una lu vough er yange ve lu cii ve, ve mase kpen la nahan. Umbur wer, Yesu yange tôô ku kar sha mnyam ma yaven, man mnder u shin ku di kar sha u or nderen ken mnya. (Mat. 9:18, 24; Yoh. 11:11-13) Or ka nana yaven, man nana za nder yô, ka wea nenge a nan je u fa, shi iliam i nan kua mhen u nan cii kahan ga. Nenge ase ikyav sha kwagh u Lasaru. Yange kpe ayange kar anyiin, nahan hii u hôôn. Nahan kpa shighe u Yesu nder un la, yange anmgbianev mba Lasaru mbakasev mbara fa un, shi ikyav tese ér Lasaru kpa yange fa ve.—Yoh. 11:38-44; 12:1, 2.

9. Er nan ve a nder ior shin ku a mhen kua iyol i lun a myen shio ga?

⁹ Yehova tôndozwa ér or môm ken Paradiso nana kaa ér: “Kwagh nyoon mo, ga.” (Yes. 33:24; Rom. 6:7) Sha nahan yô, mba a nder ve shin ku la, a nder ve a iyol i dedoo i lun a angev shio. Nahan kpa myen yô, a bee a mi ave ave ga. Aluer kera mba a myen shin mshi ga yô, ior vev kua azende a ve vea kera fa ve ga. Ka inja er myen u uumace la cii una lu been kera kure kure ken atô u anyom Dubu aa Hemen u Kristu la nahan. Ka zum u anyom dubu la aa bee kera la, Yesu una hide a Tartor la una na Ter na ye. Hen shighe la, Tartor la ua kure awashima u Yehova vindi vindi, ua bee a myen u uumace la kpaa cii.—1 Kor. 15:24-28; Mpa. 20:1-3.

10. Shighe u a nder ior shin ku la, a lu u nena?

¹⁰ Hen ase er u va nenge a or wou u a nder nan shin ku la ve, a lu u yô. A saan we iyol je u lu sen shin u lu vaanaa? A saan we iyol je yô, u wa atsam sha u wuese Yehova? Kwagh u se fe keng yô, Teru u sha la man Wan na vea seer doon we ishima tsung, er ve we u ikyo shi ve ne i hingir u a nder ior ou shin ku nahan.

11. Mkaanem ma Yesu ma i nger ken Yohane 5:28, 29 la tese ér, ka nyi ia va er mba ve ongo imo i Aôndo laa?

¹¹ Nenge ase er mba a nder ve shin ku la kpa a saan ve iyol tsung yô. A doo ve tsung u eren or ve u tse la kera, geman dondon atindi a Yehova a perapera la sha er vea eren ishima na yô. Mba vea gema anza kua aeren a ve nahan la, Yehova a de ve vea lu uma gbem sha won ken Paradiso. Nahan kpa, mba vea venda u eren ishima i Aôndo la yô, mayange a de ve ér ve lu her ve nzughul kwagh ken Paradiso ga.—Yes. 65:20; ôr Yohane 5:28, 29.

12. Ka sha nyi gbenda nahan Yehova una ver ior mba sha tar cii doo doo?

¹² Shighe u Tartor la ua lu hemen shin tar la, ior mba Aôndo cii vea nenge a mimi u kwagh u i ôr ken Anzaakaa 10:22 ne, ér: “Iveren i TER ngi ve a inyaregh, tom u nyoonyol seer ma kwagh sha i ga.” Er jijingi u Yehova una lu a ior mba Aôndo yô, vea hingir yôughyôugh ken jijingi, inja na yô, vea lu hingir er Kristu nahan seer a seer, zan zan myen ve la una kar been. (Yoh. 13:15-17; Ef. 4:23, 24) Hanma sev vea nder yô, iyol ve i seer taver, shi ve seer lun ior mba injaav. Sha mimi yô, uma una lu kwagh u saan iyol hen shighe la tsung je! (Yobu 33:25) Nahan aluer se tôô shighe se mba henen sha kwagh u mnder u shin ku yô, kwagh la una wase se hegen nena?

13. Pasalmi 139:1-4 tese ér Yehova fa hanma wase nan je, man mnder u shin ku una tese ér kwagh la ka mimi nena?

¹³ Er se vande nengen ken ngeren ne nahan, shighe u Yehova una lu nderen ior la, una hide ve a mhen ve her vough kua aeren a ve, er ngise i fa ve la nahan. Hen ase sha kwagh la zulee yôô. U doo Yehova ishima zan zan je yô, a fa mbamhen ou shi ka u vea hungur un ga, kua er ishima ka i lu ker la man iliam you kua aeren a ou cii. Sha nahan yô, aluer gba u una nder u yô, a taver un u nderen we a aeren a ou a se ter ne vough ga cii. Tor Davidi ngise fa er Yehova a fe hanma wase cii vindi vindi yô. (Ôr Pasalmi 139:1-4.) Er se fe ser Yehova fa hanma wase cii vindi vindi yô, doo u a lu se nena?

14. Ka sea tema a hen er Yehova a fe se vindi vindi nahan, i lu se nena?

¹⁴ Ka sea tema a hen er Yehova a fe se tsembelee nahan, ishima i za se iyolo? Gba u a lu nahan ga cii. Umbur wer se doo Yehova ishima tsung shi we se ikyo. Hanma wase yô, kwagh u nan gba un ishima. Ngu a ver ishima a fa kwagh u a er hanma wase ken uma, shin a ne se lu imbaor i se lu la yô. Kwagh ne ka kwagh u kundun iyol kpen kpen! Mayange doo u se nenge ser se mba tswen ga. Yehova kenden se miniti môm kpaa ga; ngu a keren ian i wasen se hanma shighe cii.—2 Kron. 16:9.

15. Kwagh u Yehova a we ishima u va nderen ior shin ku la tese kwaghfan nena?

¹⁵ Ior ka ve cia ku ve nyôr inya, nahan mbaihyomov vev ka ve kighir ve ér ve er akaa a sha mar ve yô, vea er ga yô, sha ci u vea venda yô, a wua ve. Mba Satan a hemen ve la ka ve cier ior a ku sha u ve de kera eren kwagh a azende a ve sha mimi ga, shi ve er kwagh u ve  fe dedoo ér ka u vough ga yô. Kpa se yô, vea fatyô u eren kwagh la a vese ga. Se fa ser aluer mbaihyomov asev wua se je kpa, Yehova una va nder se. (Mpa. 2:10) Se mba a vangertiôr nahan ser, kwaghmôm u vea er ve se de u civir Yehova je kpa ngu ga. (Rom. 8:35-39) Nenge imba er Yehova a er kwagh sha kwaghfan ne sha wono; A na se ishimaverenkeghen i mnder u shin ku! Yehova bee se a mciem ma mbadondon Satan ve cier se a ku ér vea wua se aluer se er ishima ve ga la vindi vindi; a gema a na se taver ishima er ka vande nahan, sha u civir un sha mimi.

16. Ka mbampin mba nyi i doo u u pine iyol youwe, man mbamlumun mba u na sha mi la vea wase u u fan er u suur sha Yehova nena?

¹⁶ Aluer mbaihyomov mba Yehova mba cier we ér vea wua u nahan, u lu a vangertiôr wer Yehova una va nder u kpa? U er nan ve u fa wer u ngu a vangertiôr laa? Gbenda môm yô, pine iyol you wer, ‘Akaa a kiriki a m eren ken uma wam hanma sev la tese ér m suur sha Yehova kpa? (Luka 16:10) Kwagh ugen yô, pine iyol you wer, ‘Gbenda u m vihin inyaregh kua shighe wam la tese ér m na jighjigh a ityendezwa i Yehova a er wener una nenge sha mbamgbe av aluer m ngu keren Tartor na hiihii la kpa? (Mat. 6:31-33) Aluer mlumun wou sha mbampin mban ka een yô, kwagh la tese ér u ngu suur sha Yehova, shi u wa agoyol sha nyityôkwagh i karen jighjigh wou i u tagher a mi cii.—Anz. 3:5, 6.

17. (a) Mnder u shin ku tese ér Yehova we ishima nena? (b) Se tese ser se mba a iwuese sha ishimawan i Yehova la nena?

¹⁷ Yehova vande veren iyange man ihwa i una tim botar ne yô. (Mat. 24:36) Nahan una gba nuren eren kwagh ga, saa shighe la una kuma ve una kure awashima na ye. Er i sar un u nderen mbakpenev nahan kpa, ngu wan ishima. (Yobu 14:14, 15) Yehova ngu keghen zan zan shighe a kuma vough ve una nder ior shin ku ye. (Yoh. 5:28) Gba u se sughun Yehova er a lu wan ishima her nahan. Nenge ase yô, ka er Yehova a we ishima ne ve, se kua ior mbagen kpishi se zough a ian “i geman ishima” ye. (2 Pet. 3:9) Yehova soo ér ior kpishi ve zua a uma u tsôron. Nahan yô, se tese iwuese sha ishimawan na ne. Se er kwagh ne nena? Se er kwagh ne sha u keren ior mba ve “lu a ishima i mimi i zuan a uma u tsôron la” sha gbashima, shi wasen ve u soon Yehova shi civir un. (Aer. 13:48) Aluer se er nahan yô, ve kpa vea zua a mtsera ken ishimawan i Yehova la er se nahan.

18. Er nan ve i doo u se waan ishima a ior mbageneve?

 ¹⁸ Yehova shi una va za hemen u wan ishima a vese zan zan anyom dubu la a a kar been cii ve una nenge ér kuma u myen wase una bee ye. Cii ve shighe la yô, Yehova kegh a kegh iyol u den se a asorabo a ase. Sha nahan yô, se dondo nen ikyav na la sha u hemban veren ishima sha aeren a dedoo a mbagen la shi wan ishima a ve. Nenge ase ikyav i anmgbian u kwase u nom na yange tagher a akaa nan un ishimanyian tsung shi de u zan mbamkombo yô. A kaa ér: “Kwagh ne yange taver mo kpishi. Uma wase yange kôr gema kwa môm, nahan se kera fatyô u eren akaa a se wa ishima u eren la ga.” Ken imba shighe u taver ne nahan kpa, kwase u nom na doo un ishima yum ne lu wan ishima a nom na her. Yange suur sha Yehova, mayange yina ishima ga. Yange hemba veren ishima sha aeren a nom na a dedoo la er Yehova kpa a eren nahan. Kwase la kaa wener, “Orya wam ngu a aeren a dedoo, shi ngu nôngon sha afatyô na cii sha er una hemba ishimanyian na ne kure kure yô.” Gba hange hange u se waan ishima a mba hen tsombor wase man mba ken tiônnongo mba ve lu nôngon a mbamtaver mba vihin tsung la!

19. Doo u se kange ishima u eren nyi?

¹⁹ Yange saan Yesu man mbatyomov iyol zum u i gba tar la. Nahan kpa, hen ase er a saan ve iyol shighe u vea nenge tar cii ua iv a ior mba lun vough mba ve soo Yehova shi ve lu civir un la kpaa yô. Nenge er a saan mba vea yem sha u za hemen vea Kristu la iyol u nengen er tom u ve lu eren la ua lu wasen uumace yô. (Mpa. 4:4, 9-11; 5:9, 10) Kpa ka cii la ga, shi hen ase er mliam ma mnyoon man angev man ijungwen kua ku maa kar kera gbem sha won, se lu masen vaan mliam ma iemberegh tseegh la. (Mpa. 21:4) Kpa cii man shighe la yô, kange ishima u dondon ikyav i Ter u dooshima man u fan kwagh, u a we ishima kpaa la. Aluer u er nahan yô, wea tagher a nyi je i karen jighjigh wou kpa, a za hemen u saan we iyol. (Yak. 1:2-4) Doo se kpishi er Yehova a er ityendezwa ne a vese nahan, ér “Aôndo ngu va nderen [ior] shin ku” yô!—Aer. 24:15.