Cii ve Yesu mase sulen yô, er nan yange ôr mkaanem ma Davidi ma i nger ken Pasalmi 22:1 laa?

Mkaanem ma gen ma Yesu ôr cii ve mase kpen yô, ka ma i nger ken Mateu 27:46 la, ér: “Aôndo wam, Aôndo wam, er nan u undumu?” Yesu yange ôr mkaanem man u kuren kwaghôron u orpasalmi Davidi u i nger ken Pasalmi 22:1 la. (Mar. 15:34) Aluer se kure ikyaa ser Yesu yange ôr mkaanem man sha ci u Yehova va un ahenge shin kera na Aôndo jighjigh hen anshighe la ga yô, a lu sha mi ga cii. Yesu yange fa ityôkyaa i gba u una kpe la tsembelee shi kegh a kegh iyol u kpen. (Mat. 16:21; 20:28) Shi yange fa ér shighe u una lu kpen la, Yehova una kera “wan un igyar” shin una kura un ga. (Yobu 1:10) Sha nahan yô, Yehova yange de u kuran Yesu sha er Yesu una tese ér hanma shighe cii una fatyô u tilen sha mimi aluer un ngu kpen ku u nyoon nan nan je kpaa.—Mar. 14:35, 36.

Nahan er nan ve Yesu yange ôr mkaanem ma ken pasalmi mana? Er se fe i kom se ga nahan kpa, de se time sha atôakyaa a alaghga na ve ôr mkaanem man yô. *

Alaghga Yesu ôr mkaanem man sha u pasen wang ér Yehova una er kwagh sha u yangen ku na ga. Yange gba u Yesu una na nagh ku ipaan kura tswen a iwasen i Yehova shio. Yange lu orumace shi gba u una kpe sha er una “kpe sha ci u ior cii” yô.—Heb. 2:9.

Alaghga Yesu ter mkaanem ma ken pasalmi mara kpuaa sha ci u soo ér ior ve hen sha kwagh u pasalmi la jimin cii. Sha ayange la Mbayuda ve  hen upasalmi mban ve kôr ken ityou. Sha nahan yô, yange vea ungwan di ivur i pasalmi la i môm je maa ve hii u henen sha pasalmi shon jimin cii. Aluer lu awashima u Yesu la yô, kwagh la yange una wase mbadondon un mba ve lu Mbayuda la, u umbur akaaôron a profeti kpishi a i ôr ken pasalmi shon sha kwagh u ku na la. (Ps. 22:7, 8, 15, 16, 18, 24) Heela tseegh ga, avur a masetyô a pasalmi shon wuese Yehova shi a yila un ér ngu Tor u tar sha won cii.—Ps. 22:27-31.

Alaghga Yesu ôr mkaanem ma Davidi man u tesen ér un ngu a ishô. Cii ve i wua Yesu yô, yange i ôr un ijir sha mimi ga, shi i na un ibo ér ka or u tuhwan Aôndo. (Mat. 26:65, 66) Yange Sanhederin tema ijir la ngôôr ga man lu tugh, shi ve ôr ijir la aa u dondon atindi a ijirigh shio. (Mat. 26:59; Mar. 14:56-59) Shighe u Yesu pine ér “Aôndo wam, Aôndo wam, er nan u undumu?” la, alaghga lu kaan ér un er kwaghbo môm ga nahan ityôkyaa lu i wuan un ga.

Alaghga Yesu shi yange ôr mkaanem man u umbur mbagenev ér, er Aôndo de ér Davidi u nger pasalmi ne la a ya ican nahan kpa, kwagh la tese ér Yehova yange venda un ga. Mpin u Davidi pine ne tese ér a kera na Aôndo jighjigh ga ze. Yange pinen mpin la been yô kaa ér, un na jighjigh ér Yehova una fatyô u yiman ior nav, shi Yehova za hemen u veren un. (Ps. 22:23, 24, 27) Sha nahan yô, shin er Yesu “wan u Davidi” lu yan ican sha kon nahan kpa, kwagh la tese ér Yehova kera lumun un ga ze.—Mat. 21:9.

Alaghga Yesu ôr mkaanem mara sha u tesen ican i lu yan tsung yô, gadia Yehova yange de u kuran un sha er i kar mtil sha mimi na yô. Yehova yange wa ishima ér Wan na a ya ican shi a kpe ga. Yange va gba hange hange u kwagh a lu nahan shighe u Adam man Ifa hemba ato la. Yesu yange er kwaghbo môm môm ga, kpa gba u una ya ican shi una kpe sha u nan mlumun sha mbampin mba Satan pine la shi nan nagh ku ipaan sha u kimbin kwagh u Adam yange ta kera la. (Mar. 8:31; 1 Pet. 2:21-24) Man lu u saa Yehova una de u kuran Yesu sha anshighe kpuaa ve a fatyô u eren kwagh ne ye, shi lu hiin je Yehova er kwagh nahan ne.

Alaghga Yesu yange ôr mkaanem man u wasen mbadondon un u henen sha ityôkyaa i i ne ve, Yehova a de ér una kpe sha kon la. * Yesu yange fa je ér ku u i gbe u una kpe sha kon er ka iferor ne, ua na mbagenev kpishi gbeev mbu nôngon. (1 Kor. 1:23) Kpa aluer mbadondon un ver ishima sha ityôkyaa i i ne ve, i gbe u una kpe sha imba gbenda la yô, vea hemba kaven inja i ku na la. (Gal. 3:13, 14) Sha nahan yô, vea nenge un ér ngu iferor ga, kpa ngu Oryiman ve.

A lu nyi je Yesu lu a mi ken ishima ve ôr mkaanem mara kpa, yange kav er ku u un lu kpen sha kon la i lu ishima i Yehova un lu eren yô. Yesu yange ôron mkaanem ma ken pasalmi man been yô maa a kaa ér: “Bee ve!” (Yoh. 19:30; Luka 22:37) Er Yehova yange de u wasen Yesu sha anshighe kpuaa yô, Yesu maa er hanma kwagh u i tindi un ér a va er shin tar la cii bee. Kwagh la na yô, a kure hanma kwagh u i nger sha kwagh na “ken Atindi a Mose man ken ityakeda i Uprofeti kua Upasalami la cii.”—Luka 24:44.