1-2. Ipaan ka nyi, man er nan yange gba u a paa se?

SHIGHE u Adam or u vough la er isholibo la yange gema ian i lun uma gbem sha won la ta kera, man lu un tseegh ga, lu u mbayev mba una va mar ken hemen la kpa vea kera lu uma gbem sha won ga. Adam yange lu a ibo sha kwagh u er la. Yange er isholibo sha apera. Nahan kpa mbayev nav di ye? Yange ve lu uwegh ken isholibo i Adam er la ga. (Rom. 5:12, 14) Adam yange kuma ku sha kwagh u er ne. Kpa kwagh lu u a er u waren mbayev nava? Een! Adam yange eren isholibo kera yô, ica i gba ga je Yehova hii u pasen kwagh u una er sha u yiman ônov mba Adam umiliôn umiliôn sha ikyev i isholibo man ku yô. (Gen. 3:15) Lu u a va kuman sha shighe u Yehova soo la vough yô, una tindi Wan na shin tar sha u va “nan uma na sha u paan ior kpishi.”—Mar. 10:45; Yoh. 6:51.

² Ipaan ka nyi? Ruamabera u Mbakristu u ken Zwa Grika pase ér ipaan ka injar i Yesu yange kimbi sha uma na, sha u paan kwagh u Adam ta kera la. (1 Kor. 15:22) Yange gba u a paa se sha ci u nyi? Lu sha ci u Tindi u Yehova sha kwagh u ijirôron i mimi yange tese ér gba u a kimbin uma sha uma. (Eks. 21:23, 24) Adam yange ta uma na u vough, u lu a mshi ga la kera. Yange gba u a er kwagh sha tindi u Aôndo la vough. Nahan Yesu va na nagh sha uma na u lu a mshi ga la. (Rom. 5:17) Sha nahan yô, a hingir “Ter u Tsôron” u mbara mba ve ne nagh ku ipaan kura jighjigh cii.—Yes. 9:6; Rom. 3:23, 24.

3. Sha kwagh u Yohane 14:31 man 15:13 a er yô, er nan ve Yesu yange kegh a kegh iyol u nan uma na u vough laa?

³ Yesu yange kegh a kegh iyol u va nan nagh sha uma na sha ci u Ter na u sha la man se cii se doo un ishima tsung. (Ôr Yohane 14:31; 15:13.) Dooshima la yange mgbegha un kange ishima u  tilen sha mimi ken uma na cii shi kuren awashima u Ter na. Yesu yange tile sha mimi zan zan ku na. Sha nahan yô, lu u awashima u Yehova lu a mi sha hiihii ve gba uumace man tar ne la una va kure. Se lu timen sha kwagh u hii ve Aôndo de ér Yesu a ya ican kpishi cii ve una kpe la ken ngeren ne. Shi se time sha kwagh u orngeren Bibilo ugen kpase, u yange wuese nagh ku ipaan kura tsung yô. Maa se mase timen sha gbenda u se fatyô u tesen ser se wuese nagh ku ipaan kura yô, man er se seer lun a iwuese sha kwagh u Yehova man Yesu ve er sha ci wase la yô.

4. Pase er Yesu yange kpe la.

⁴ Hen ase sha kwagh u yange er sha iyange i masetyô i Yesu lu uma cii ve i wua un la. Shin er lu u una fatyô u yilan akum a mbatyomov ér ve va kura un nahan kpa, Yesu de ér ushoja mba Mbaroma ve kôr un, ve gbidye un côu côu. (Mat. 26:52-54; Yoh. 18:3; 19:1) Yange ve gbidye un sha akpa u tôndo un avav iyol côu côu yô. Yange ve na un kon u yuhwan tôô, shi u kighir un sha avav a a tôndo un ken ijime la. Yesu tôô kon la, ngur nôngon a mi u yemen ape a za mande un la yô, ushoja mba Mbaroma mbara kighir orgen u tile her yô, er a tôô kon shon. (Mat. 27:32) Yesu za nyer ape a wua un la yô, shoja mbara mande un sha kon. Yange ve mande un kusa sha ave man shin angahar kar kôr ken kon shon. Mba moughon a kon la sha yô, myohom ma iyol na cii mase shin sha ukusa mbara, nahan ajiir a i mande un ukusa la lu anden seer a seer. Yange azende a na zungwe kpishi shi ngô na kpa vaa. Nahan kpa, mbahemenev mba Mbayuda yô, ve lu nahan Yesu tar. (Luka 23:32-38; Yoh. 19:25) Yesu yange ya ican ahwa imôngo. Gbenda u i mande un la na yô, huhu man ishima na er tom fele fele gande nahan lu ôôn sha ican. Yesu yange fa er un tile sha mimi zan zan yô. Shi cii ve a mase kpen yô, a er msen u masetyô hen Yehova. A suwa ityough inya, maa a sule. (Mar. 15:37; Luka 23:46; Yoh. 10:17, 18; 19:30) Yesu yange ya ican kure kure zan zan kar kpen ku u kunya, u nyoon tsung!

5. Ka nyi yange i hemba vihin Yesu a gbenda u i wua un laa?

⁵ Yesu yô, gbenda u lu u a wua un sha mi la, lu kwagh u hemba vihin un la ga. Kwagh u hemba vihin Yesu yô, lu mbaaie shin akaa a i wa un iyol la, man lu ityôkyaa i ve kaa ér a kuma ku je la. Yange ve wa un aie iyol ér ngu or u lahan Aôndo shi ne iti i Aôndo icivir kpaa ga. (Mat. 26:64-66) Akaa a i lu ôron sha a na dang dang la na yô, ishima za un iyol kpishi. Lu un er Ter na ma a yange un u nyôron ken imba ihyeen la nahan. (Mat. 26:38, 39, 42) Er nan ve Yehova yange de ér Wan na u ishima ishima la a ya ican shi a kpe? De se nenge atôakyaa atar.

6. Er nan ve yange gba u a mande Yesu sha kono?

⁶ Hiihii yô, yange gba u a mande Yesu sha kon sha er una yima Mbayuda sha ifyan i i wa ve la yô. (Gal. 3:10, 13) Yange i wa ve ifyan ne sha ci u ve tôndo zwa ér vea kuran Atindi a Aôndo, kpa ve lu kuran a ga. Yange gba u vea kpe sha ci u ve lu ônov mba Adam tsô ga, kpa shi lu sha ci u ifyan la kôr ve. (Rom. 5:12) Atindi a Aôndo yange wa Mbaiserael la tese ér aluer or er isholibo i kuman ku yô, i wua nan. Ashighe agen yange a wuan nan yô, i tôô ikyom i nan i za mande sha kon. * (Dut. 21:22, 23; 27:26) Er i mande Yesu sha kon yô, lu u una fatyô u yiman Mbayuda sha ifyan i i wa ve la. Shi lu u nagh ku na la ku a fatyô u wasen ve shin er ve venda un nahan kpaa.

7. Ka ityôkyaa i sha uhar i nyi yange i na ve Aôndo de ér Wan na a ya icana?

⁷ Nenge ase ityôkyaa i sha uhar i yange i na ve Aôndo de ér Wan na a ya ican yô. Yange gba u  Yesu una va hingir se Pristi u Vesen nahan lu tsaase un sha ci u tom la. Yesu yange nenge er ka i taver or kpishi u ungwan imo i Aôndo shighe u i lu karen nan yô. Er yange ameen la ngee un yô, a er msen “genger genger a mliam ashe” ér Aôndo a wase un. Sha mimi yô, er Yesu iyol na kpa ya ican kpishi shighe u i kar un la yô, a fa er ka i lu se la nahan “ngu a fatyô u wasen” se shighe u “i lu karen” se yô. Se wuese Yehova kpishi er a ne se Pristi u Vesen u a zungwen mhôônom u una fatyô u “zungwen a vese sha mbamyen asev la” yô!—Heb. 2:17, 18; 4:14-16; 5:7-10.

8. Ityôkyaa i sha utar i Aôndo de ér Yesu a ya ican tsung yô lu nyi?

⁸ Kwagh u sha utar yô, Yehova yange de ér Yesu a ya ican tsung sha u nan mlumun sha mpin u vesen ugen, ér: Uumace vea fatyô u civir Yehova sha mimi aluer i kar jighjigh ve u nan tsung kpa? Satan yange kaa ér kwagh a fatyô u lun nahan ga! A kaa ér uumace mba civir Aôndo sha ci u mtsera ve tseegh. A senge wener ve soo Yehova a ishima ve i môm ga, er ter ve Adam nahan. (Yobu 1:9-11; 2:4, 5) Yehova yange lu a vangertiôr ér Wan na una tile sha mimi, nahan de ér i kar Yesu sha hanma gbenda cii. Yesu yange tile sha mimi nahan tese ér Satan ka oraie.

9. Ka ikyav i nyi apostoli Yohane a ver se?

⁹ Ityesen i sha kwagh u nagh ku ipaan la taver jighjigh u Mbakristu mbagen kpishi. Mbakristu kpishi yange ve tagher a ahendan kua atsan atô kposo kposo, nahan cii kpa ve za hemen u pasen kwagh shi wan ishima zan zan ve kar been iyol, sha ci u ityesen i sha kwagh u nagh ku ipaan kura taver jighjigh ve u nan. Nenge ase ikyav i apostoli Yohane ne. Ikyav tese ér yange pase mimi u sha kwagh u Kristu man kwagh u nagh ku ipaan la hemba anyom 60. Shighe u zurum anyom 100 la je kpa, gomoti u Tartor u Roma nenge ér ngu bo-or nahan ve yem a na uikyangen ken icile i Patemo. Ka nyi kwaghbo yange ere? Lu sha ci u “lu ôron kwagh u Aôndo shi eren shiada sha kwagh u Yesu.” (Mpa. 1:9) Mimi yô, Yohane yange ver ikyav i dedoo i jighjigh u nan man ishimawan.

10. Ityakeda i Yohane nger la tese ér yange lu a iwuese kpishi sha nagh ku ipaan kura nena?

¹⁰ Yohane pase er Yesu a doo un ishima tsung shi un lu a iwuese sha nagh ku yange va na la ken ityakeda i Bibilo i a nger la. Yohane ter kwagh u nagh ku ipaan kura shin mbamtsera mba nagh ku ipaan shon ken ityakeda i Bibilo i a nger la hemba kwa 100. Ikyav i tesen yô, Yohane nger ér: “Aluer or er ma isholibo yô, se mba a orwasen u a lu vea Ter yô, ka Yesu Kristu je la, un ka u perapera.” (1 Yoh. 2:1, 2) Yohane shi pase ken ityakeda i a nger la er i gbe hange hange u “eren shiada sha kwagh u Yesu” yô. (Mpa. 19:10) Kwagh ne tese wang ér Yohane yange wuese nagh ku ipaan kura kpishi. Kpa se di se er nan ve se tese ser se wuese nagh ku ipaan kura?

11. Ka nyi ia wase se, se hendan a imeene?

¹¹ Hendan a imeen i eren isholibo. Aluer mimi je, se mba a iwuese sha nagh ku ipaan kura yô, doo u se kaa ser: ‘Se er isholibo se bee tsô se zamber ser i de se a mi, shin se kaa ser ityôkyaa ngi i se hendan a imeen i eren kwaghbo ga ze.’ Kpa, zum u i lu meen se ér se er kwaghbo yô, se kaa ser: ‘Ei! A er nan ve me er imba kwagh ne nahana? Nenge kwagh u Yehova man Yesu ve er sha ci wam ne sha wono!’ Aluer se mba a imba ishima la yô, se fatyô u sônon Yehova ser a na se agee. Se zamber a na ser: ‘De deen wer imeen i hembam ga.’—Mat. 6:13.

12. Se dondo kwaghwan u ken 1 Yohane 3:16-18 la nena?

¹² Anmgbianev ou mbanomso man mbakasev ve doo u ishima. Aluer anmgbianev asev doo se ishima yô, ngula kpa ka gbenda ugen u tesen ér  se mba a iwuese sha nagh ku ipaan kura. Se ôr nahan sha ci u nyi? Ityôkyaa yô, Yesu yange na uma na sha ci wase tseegh ga, kpa kua sha ci u anmgbianev asev mbanomso man mbakasev kpaa. Aluer yange kegh a kegh iyol u kpen sha ci ve yô, kwagh la tese wang ér ve gba un kwagh kpishi. (Ôr 1 Yohane 3:16-18.) Ka se tese ser anmgbianev asev mbanomso man mbakasev doo se ishima sha gbenda u se eren kwagh a ve la. (Ef. 4:29, 31–5:2) Ikyav i tesen yô, zum u ve gbe angev shin ve lu tagher a atsan a vihin tsung yô, ka se wase ve. Ka a lu shighe u akaa a vihin a er nahan akaa a ve a saa ishe kpa se wase ve. Nahan kpa, zum u anmgbian u nomso shin u kwase nan ôr shin nan er kwagh u vihin se yô, se er nena?

13. Er nan i doo u se deen mbagenev kwaghbo?

¹³ Ashighe agen ka i taver we u den anmgbian u nomso shin u kwase kwaghbo? (Lev. 19:18) Aluer ka nahan yô, dondo kwaghwan ne. A kaa ér: “Waan nen ishima a mbagenev shi deen nen mbagenev kwaghbo sha mimi hanma shighe cii, aluer or er kwagh a orgen doo nan ga je kpaa. Er Yehova a den ne kwaghbo sha mimi nahan, ne kpa gba u ne eren nahan vough.” (Kol. 3:13) Hanma kwa u se de anmgbian u nomso shin u kwase a kwaghbo yô, se mba tesen Ter wase u sha la ser, se wuese nagh ku ipaan kura. Nahan kpa, se er nan ve se za hemen u seer lun a iwuese sha iyua i Aôndo a ne se nee?

14. Ka gbenda môm u nyi se seer tesen ser se mba a iwuese sha nagh ku ipaan kura?

¹⁴ Sughun Yehova sha nagh ku ipaan kura. Anmgbian u kwase ugen u lun anyom 83, u a lu ken tar u India, i yer un ér Joanna yô, kaa ér: “M nenge mer hanma iyange yô, doo u me ter kwagh u nagh ku ipaan ken mbamsen av shi me sugh Yehova sha kwagh u ipaan shon.” Hanma iyange wea eren mbamsen ou yô, u fatyô u ôron Yehova akaa a u er ken iyange shon shami ga la, shi sônon un wer a de u a akaabo shon. Nahan kpa, aluer u er ka isholibo i vesen yô, a gba u u ker iwasen hen mbatamen. Vea kegh ato a we shi vea wa u kwagh kundu kundu ken Mkaanem ma Aôndo. Vea er msen vea we, vea sôn Yehova ér a de u a kwaghbo wou la sha ci u nagh ku Yesu Kristu kura ‘sha er a bee u angev’ mbu u gbe ken jijingi mbura yô.—Yak. 5:14-16.

15. Gba u se tôô shighe se ôr kwagh u nagh ku ipaan kura shi se hen sha mi zulee sha ci u nyi?

¹⁵ Henen sha kwagh u nagh ku ipaan kura zulee. Anmgbian u kwase ugen u lun anyom 73, u i yer iti na ér Rajamani yô kaa ér, “ka mea ôr  kwagh u atsan a Yesu yange ya la yô, mliam ma ivim ashe.” Aluer u hen sha ican i Wan u Aôndo yange ya la tsembelee yô, we kpa alaghga kwagh la una kôr u ken ishima tsung. Nahan kpa, aluer u seer henen sha nagh ku Yesu yange na la zulee yô, Yesu man Ter na vea seer doon we ishima. Nahan aluer u soo u henen sha kwagh u nagh ku ipaan kura zulee yô, tôô shighe time sha kwagh u nagh ku ipaan kura tsembelee ken kwaghhenen wou u sha tseeneke.

16. Aluer se mba tesen mbagenev kwagh u nagh ku ipaan kura yô, kwagh la una wase se nena? (Nenge foto u sha igbende.)

¹⁶ Tesen mbagenev kpaa kwagh u nagh ku ipaan kura. Hanma shighe u se pase mbagenev kwagh u nagh ku ipaan kura yô, ka se seer lun a iwuese sha nagh ku shon. Se mba a ikyav mbi tomov mbi injaav kpishi mbi mbi a wase se u tesen ior er yange hii ve Yesu va kpe sha ci wase yô. Ikyav i tesen yô, se fatyô u eren tom a antakeda u Loho u Dedoo U Ú Dugh hen Aôndo La! iaven i sha 4 la. Itinekwagh i iaven la ér, “Ka An Nan Lu Yesu Kristu?” Shin u fatyô u nengen ken takeda u Bibilo Tese Se Nyi? la, ityough ki sha 5. Itinekwagh i ityough kira ér, “Ipaan Ka Iyua I Hemban Cii I Aôndo A Ne Se Yô.” Shi hanma inyom yô, ka se seer tesen iwuese yase sha nagh ku ipaan kura sha u zan Mkombo u Umbur Ku u Yesu la man sha u lôhôn ior mbagenev kpaa ser ve va Umbur Ku u Yesu a vese imôngo. Sha mimi yô, Yehova na se ian i icivirigh kpen kpen i tesen mbagenev kwagh u Wan na!

17. Nagh ku ipaan kura ka iyua i hemban cii i Aôndo a ne uumace yô sha ci u nyi?

¹⁷ Sha mimi yô, se mba a ityôkyaa i injaa i lun a iwuese tsung sha nagh ku ipaan kura. Er se yen nahan kpa, nagh ku ipaan kura bugh se gbenda u se fatyô u yan ijende a Yehova kôôsôô yô. Heela tseegh ga, shi nagh ku ipaan kura bugh gbenda u a va vihi ityom i Diabolo la kera vindi vindi yô. (1 Yoh. 3:8) Kpa ka cii la ga, Yehova una va kure awashima na u yange lu a mi hiihii ve gba tar la, man a lu sha ci u nagh ku ipaan kura. Tar ne jimin cii ua hingir paradiso. Hanma or u u zough a nan hen shighe la yô, a lu or u Yehova a doo nan ishima shi nan civir un yô. Yô, hanma iyange cii se keren igbenda i se seer tesen iwuese sha nagh ku ipaan ku ku lu iyua i hemban cii i Aôndo a ne uumace la!