1. Se mba ne ikyar ken mkombo sha ci u nyi?

 SE MBA ze mbamkombo mba tiônnongo sha ci u nyi? Ityôkyaa i vesen yô, ka i lu u za wuese Yehova. (Ps. 26:12; 111:1) Shi ka se za mkombo ser se za taver ayol a ase asema ken ashighe a ican ne. (1 Tes. 5:11) Aluer se mba kenden uwegh ken mkombo shi nan ikyar yô, se mba eren akaa a ahar ne cii.

2. Ka aan a nyi nahan se lu a mi a nan ikyar ken mbamkombo aseva?

² Hanma kasua yô, ka se lu a aan a nan ikyar ken mbamkombo. Ikyav i tesen yô, ka a lu sha iyange i Lahadi yô, se fatyô u nan ikyar ken mkombo u Iyoukura i Henen. Shighe u se ze mkombo u ken atô u kasua yô, se fatyô nan ikyar ken vegher u Akaainjaa a ken Bibilo la, man Bibilo i Henen ken Tiônnongo, kua akaaôron a i we mbaungwan ker yô.

3. Ka nyi ia na ve alaghga a taver se u nan ikyar ken mkombo, man kwagh u i ôr ken Mbaheberu 10:24, 25 la una wase se nena?

³ Se soo ser se wuese Yehova, shi se taver mba ve civir Yehova a vese imôngo la asema. Se fatyô u tagher a mbamtaver shighe u se soo u nan ikyar yô. Alaghga a lu se ape nan ikyar kpa ishima ia lu tan se kwe. Alaghga a sar se u nan ikyar kwa imôngo, kpa a lu nan se uwegh fele fele er i sar se la ga. Shighe u se tagher a mbamtaver mban yô, ka nyi ia wase se? Kwagh u Paulu yange nger ken washika na hen Mbaheberu la una wase se u zuan a mlumun sha mpin ne. Paulu gbe pasen er i doo u se kohol imôngo yô, a kaa ér se hemba veren ishima sha u “taver hanma wase ishima.” (Ôr Mbaheberu 10:24, 25.) Aluer se umbur ser, sea pase jighjigh u nan wase tiônôô tseegh kpa, kwagh la una taver mbagenev ishima yô, a hemba maan se iyol u kenden uwegh nan ikyar. Shi aluer mba nan se uwegh fele  fele ga kpa, a saan se iyol sha ci u mbagenev ken tiônnongo kpa, vea zua a ian i nan ikyar.—1 Pet. 3:8.

4. Ka atôakaa a vesen a nyi se lu timen sha mi ken ngeren nee?

⁴ Ken ngeren ne, se hii timen sha igbenda i se fatyô u taver hanma wase ishima, aluer tiônnongo u se lu her la ka u cuku shi mbanan ikyar mba kpuaa tseegh yô. Maa se time sha igbenda i se fatyô u taver hanma wase ishima, aluer tiônnongo u se lu her la ka u vesen shi mbanan ikyar mba kpishi yô. Se been yô, se mase timen sha kwagh u se er ve akaa a se ôr ken ikyar yase la aa taver mbagenev ishima sha mimi yô.

5. Aluer ior mba ken mkombo kpuaa tseegh yô, se taver hanma wase ishima nena?

⁵ Ka a lu tiônnongo u a lu a ior kpuaa tseegh shin annongo yô, mbanan ikyar ve lu kpishi mba orhemen Iyoukura una naan ve ave ga. Nahan ashighe agen yô, ka i gba u una wa tamber cii ve, or a va kende uwegh u nan ikyar ye. Ka a lu nahan yô, i lu inja er mkombo la due ishima nahan, shi ior ve zua a ishima taver ga. Sha nahan yô, de gbe uwer u kenden uwegh ga. Aluer u ngu eren nahan yô, mbagenev kpa vea soo u kenden uwegh kwa imôngo.

6-7. Aluer ishima ngi tan se kwe shighe u se soo u nan ikyar ken mkombo yô, ka nyi se er ve kwagh la una de?

⁶ Aluer ishima ngi tan we kwe je, u nenge wer u fatyô u nan ikyar ga yô, ka nyi ia wase u we? Kape ior kpishi ishima ka i taan ve kwe je la. Nahan kpa, nôngo ker igbenda i ishima ia de u tan we kwe, sha er u na ikyar ken mkombo, u hemba taver anmgbianev ou mba nomso man mba kasev ishima yô. U er kwagh nena?

⁷ Igbenda i i tese ken Iyoukura mba i sember gberen la ia fatyô u wase we, aluer u hide u ôr yô. b Ikyav i tesen yô, vande wan iyol sha ngeren u i gbe u a hen la ken ya tsembelee. (Anz. 21:5) Aluer u fa kwagh u i tim sha mi ken ngeren la tsembelee yô, a hemba lun we ican ga u kenden uwegh nan ikyar. Shi de ne ikyar gôgônan ga. (Anz. 15:23; 17:27) Ka wea na ikyar tiônôô yô, ishima i za u iyol kpishi ga. Aluer u na ikyar tiônôô, u ôr kwagh u mem kwa môm shin kwa har yô, a hemba lun anmgbianev ou mbanomso man mbakasev ican ga u kaven kwagh u u ôr la, aa u nan gôgô ikyar ôron akaa kpishi la. Aluer u na ikyar ken mkaanem ou tiônôô yô, kwagh la una tese ér u wa iyol tsembelee shi u kav kwagh u i tim sha mi ken ngeren la kpaa.

8. Yehova ka una nenge sea nôngon kwagh sha afatyô wase cii nahan, a nenge iniôngon yase la nena?

⁸ Aluer u dondo akaawan ne agen, kpa ishima ngi tan we kwe her, u ngu fantyô u nan ikyar ken mkombo hemban kwa môm shin kwa har ga ye? Fa wer Yehova una wuese we, er u lu nôngon kpoghuloo eren kwagh u u fetyô la cii yô. (Luka 21:1-4) Yehova keren ér se er kwagh i hemba agee ase ken inya ga. (Fil. 4:5) Sha nahan yô, kange ishima u eren kwagh u u hen wer u fatyô yô, shi tsua u eren kwagh shon, shi er msen sha er u kundu ishima u er kwagh shon yô. U fatyô u tsuan wer, u hii sha u nan ikyar i môm tiônôô ken hanma mkombo.

9. Alaghga a taver u nan ikyar hen tiônnongo u lun a ior kpishi sha ci u nyi?

⁹ Aluer tiônnongo wou ngu a mbapasenkwagh kpishi yô, u fatyô u tagher mtaver ugen. Adooga anmgbianev mba nomso man  mba kasev kpishi ka ve kende ave u nan ikyar, je yô wea kenden uwegh kpa i naan we ga. Ikyav i tesen yô, anmgbian u kwase ugen iti na ér Danielle, ka i doo un u nan ikyar ken mkombo kpishi. c A nenge ér ikyar i nan ken mkombo ka gbenda u civir Yehova shi taver mbagenev asema, shi kwagh ne ka a wase un u seer nan jighjigh a kwagh u Bibilo i tese yô. Kpa yange va moughon yemen hen tiônnongo u lun a mbapasenkwagh kpishi yô, kera zuan a ian i nan ikyar ken mkombo kwa kimbir kimbir ga. Shighe ugen je yô, kwa môm kpa a zua a ian i nan ikyar ken mkombo ga. A kaa ér: “Yange iyol kpen. Lum er kwagh u icivirigh ngu karen mo nahan. Kwagh ne ka una er u kwa imôngo yô, i lu u er mba nan we uwegh ga sha apera nahan.”

10. Se er nan ve se seer zuan a aan a nan ikyar ken mbamkombo?

¹⁰ I lu nahan kwagh u yange er Danielle ne er u vee? Una er u yô, alaghga lu u er u de kera kenden uwegh ga, u tema u gbaa ungwan a ungwa mkombo tsô yô. Kpa de gbe uwer u nôngon wer u na ikyar ken mkombo ga. Ka nyi u fatyô u erene? Aluer u vande wan iyol u nan ikyar sha mbampin imôngo cii u za mkombo yô, kwagh la una wase u. Aluer i hii kwaghhenen man u ngu kenden uwegh kpa mba nan we ga kpa, er i lu henen kwagh yemen la, u va zua a ian i nan ikyar ken hemen. Shighe u u lu wan iyol sha ngeren u i lu henen ken Iyoukura la yô, hen er hanma ikyumhiange i zough sha itinekwagh i ngeren la yô. Aluer u er nahan yô, u fatyô u nan ikyar i dedoo sha hanma mpin ken kwaghhenen la. Shi kwagh ugen yô, u fatyô u vanden wan iyol i nan ikyar sha mbampin mba sha akumahiange aa a ôr akaa a mimi a zan shimi, a a hembe taver u pasen la. (1 Kor. 2:10) Sha ci u nyi? Sha ci u alaghga a lu ior kpuaa tseegh vea kende ave u nan ikyar sha mbampin mbara nahan ye. Aluer u dondo akaawan ne, man u za mbamkombo imôngo, kpa u zua a ian i nan ikyar ga ye? U fatyô u za kohol orhemen mkombo u Iyoukura la shighe u mkombo shon a lu a hii ga yô, tesen un mpin u u soo wer u nan ikyar sha mi yô.

11. Mbafilipi 2:4 taver se ishima ér se er nyi?

¹¹ Ôr Mbafilipi 2:4. Yange Aôndo kaa a  apostoli Paulu ér a taver Mbakristu ishima ér, ve keren mtsera u mbagenev kpaa. Se dondo kwaghwan la ken mbamkombo asev nena? Gba u se umbur ser, mbagenev kpa sar ve u nan ikyar ken mbamkombo er se nahan.

12. Ka sha gbenda u dedoo u nyi se fatyô u taver mbagenev asema ken mbamkombo aseva? (Shi nenge foto kpaa.)

¹² Shi hen sha kwagh ne sha gbenda ne kpaa. Aluer u ngu lamen vea azende ou nahan, u lam je u na ve ian i ôron kwagh kpishi gaa? Ei, u er nahan ga! Sha ci u u soo wer ve kpa ve lam. Kape ken mbamkombo asev kpa i lu je la; ka se soo ser mbagenev kpa ma ve lam. Jighilii yô, gbenda môm ken igbenda i hemban doon, i se fatyô u taver anmgbianev asev mba nomso man mba kasev asema yô, ka sha u nan ve ian ser, ve pase jighjigh ve u nan. (1 Kor. 10:24) De se nenge er se fatyô u eren kwagh ne yô.

13. Se er nan ve ior kpishi vea zua a ian i nan ikyar ken mkombo?

¹³ Gbenda môm u se er kwagh ne yô, se fatyô u ôron kwagh tiônôô, nahan nan mbagenev ian ser ve kpa ve wa zwa. Mbatamen kua mbapasenkwagh mba ve vie yô, vea fatyô u veren ikyav i dedoo sha gbaa ne. Aluer u ngu nan ikyar i tiônôô kpa, de lamen sha atôakaa kpishi ga. Aluer u lam sha hanma kwagh u a lu ken ikyumhiange yô, mbagenev vea kera zua a ian i wan zwa ga. Ikyav i tesen yô, ken ikyumhiange ne, i ter akaa ahar a i doo u se er yô. Hiihii yô, ôr kwagh tiônôô. Sha uhar yô, de lamen sha atôakaa kpishi ga. Nahan aluer ka we i hii yilan ér we u na ikyar sha mpin u sha ikyumhiange ne yô, nôngo sha afatyô wou cii lam sha kwagh môm tseegh ken akaa a ahar ne.

14. Ka nyi ia wase se u fan shighe u i doo u se kende uwegh? (Shi nenge foto kpaa.)

¹⁴ Fa shighe u i doo u u kende uwegh yô. Aluer se kende uwegh fele fele yum yô, kwagh la una na orhemen mkombo la una yila se kwa kimbir kimbir, aluer mbagenev mba a lam ga je kpaa. Nahan iyol ia kpe mbagenev, vea kera soo u kenden uwegh ga.—Orpa. 3:7.

15. (a) Aluer i yila se ken mkombo ér se na ikyar ga kpa, gba u se er nena? (b) Mbahemen kwaghhenen vea tese ér ve wa hanma or ikyo nena? (Nenge ngeren u kiriki u a lu a itinekwagh ér, “ Shighe u Ú Lu Hemen Kwaghhenen Yô” la.)

 ¹⁵ Aluer mba henen kwagh man ior kpishi mba kenden ave yô, alaghga se zua a ian i nan ikyar kwa imôngo er se soo la ga. Ashighe agen yô, orhemen kwaghhenen la una fatyô u yilan se ér se na ikyar ga zan zan a kar been. Shighe u kwagh a er nahan yô, ka i nyoon se kpishi. Aluer i yila se ér se na ikyar ga kpa, ishima i de vihin se sha kwagh la ga.—Orpa. 7:9.

16. Se fatyô u taver mbagenev mba ve ne ikyar ken mkombo la ishima nena?

¹⁶ Aluer u fatyô u nan ikyar ken mkombo kwa kimbir kimbir er i sar u la ga kpa, shighe u mbagenev ve lu nan ikyar yô, kegh ato zulee. Nahan a va duen mkombo yô, wuese ve sha ikyar ve la. Aluer u wuese anmgbianev ou mba nomso man mba kasev nahan yô, kwagh la una taver ve ishima vough er ikyar i ma u ne kpa i yer u ga la nahan. (Anz. 10:21) U wuese mbagenev la ka gbenda môm u se fatyô u taver hanma wase ishima yô.

17. (a) Mbamaren vea wase mbayev vev u wan iyol i nan ikyar sha mbampin mba ve kom sha a ve la nena? (b) Ter akaa anyiin a vidio la i tese ér gba u se er shighe u se lu wan iyol sha ikyar i se za na ken mkombo yô. (Nenge ngeren u shin kpe la kpaa.)

¹⁷ Ka gbenda ugen u nyi nahan, se fatyô u taver hanma wase ishima ken mbamkombo aseva? Aluer u ngu ormaren yô, wase mbayev ou  ve wa iyol i nan ikyar sha mbampin mba ve kom sha a ve yô. (Mat. 21:16) Ashighe agen ka a henen kwagh yô, i lam sha atôakaa a vesen, er mbamzeyol mba ken ivese shin kwagh u aeren a wang nahan. Kpa akumahiange agen ka ôr akaa a mbayev vea fatyô u lamen sha mi yô. Nahan wase mbayev ou ve fa er i hii ve a fatyô u yilan ve hanma shighe u ve kende uwegh ga yô. Aluer u pase ve kwagh ne wang yô, shighe u ve kende uwegh man i yer orgen kpa, a kera vihi ve ga.—1 Tim. 6:18. d

18. Shighe u se lu nan ikyar yô, se er nan ve se ôr kwagh wase a za kar ikyar inya ga? (Anzaakaa 27:2)

¹⁸ Se cii se fatyô u wan iyol za nan ikyar i dedoo i ia va Yehova a icivir shi ia taver anmgbianev asev mba ken tiônnongo ishima yô. (Anz. 25:11) Shighe u se lu nan ikyar sha kwagh u a er se kpôô kpôô yô, gba u se palegh u ôron kwagh wase za karen ikyar inya. (Ôr Anzaakaa 27:2; 2 Kor. 10:18) Kpa se nôngo sha afatyô wase cii, se hemba ôron kwagh u Yehova, man mkaanem nam kua ior nav jimin cii. (Mpa. 4:11) Nahan kpa, aluer mpin u sha ma ikyumhiange kaa ér, se ôr kwagh wase iyol yase yô, doo u se er nahan. De se nenge ikyav ken ikyumhiange i i dondo ne.

19. (a) Aluer se tese ser, hanma or u nan ze mkombo cii kwagh u nan gba se ishima yô, ka nyi ia due kere? (Mbaroma 1:11, 12) (b) Ka nyi i doo u sha kwagh u nan ikyar ken mkombo laa?

¹⁹ Er i we a wa atindi sha kwagh u nan ikyar ken mkombo ga nahan kpa, se cii se fatyô u nôngon kpoghuloo nan ikyar sha gbenda u taver hanma wase ishima. Se fatyô u eren kwagh ne sha u nôngon nan ikyar ken hanma mkombo u se ze yô, shin tesen ser saan se iyol er mbagenev kpa ve zough a ian i nan ikyar ken mkombo yô. Aluer se hemba veren ishima sha mtsera u mbagenev ken mbamkombo mba tiônnongo yô, se cii se fatyô u “taver ayol a ase asema.”—Ôr Mbaroma 1:11, 12.