1-2. Yehova bugh gbenda u se fatyô u lun ken tsombor na sha ci u nyi, man a er kwagh ne nena?

YEHOVA lôhô se ér se va lu ken tsombor u mba ve civir un la. Kwagh ne ka kwagh u doon kpen kpen! Ior mba ken tsombor wase ne ka mba ve tsegh ayol a ve sha ci u Aôndo shi ve ne nagh ku ipaan ku Wan u Aôndo la jighjigh yô. Tsombor ne ka tsombor u i saan u iyol yô. Uma ngu se a inja hegen, shi aluer se mba veren ashe u va lun uma gbem sha won ken Paradiso shin tar, shin ka u va yemen sha kpa, ishimaverenkeghen la ka kwagh u doon se tsung.

² Er se doo Yehova ishima kpishi yô, a bugh gbenda u se fatyô u lun ken tsombor na yô. Kpa cii ve Yehova a er kwagh ne yô, yange gba u una kimbi kwagh u vesen. (Yoh. 3:16) I ‘yam se sha ishe je.’ (1 Kor. 6:20) Nagh ku ipaan kura na yô, Yehova bugh gbenda u se fatyô u yan ikyar a na kôôsôô yô. Se mba a ian i icivirigh i yilan Or u hemban sha won cii la ser Ter wase. Man er yange se hen ken ngeren u karen la nahan, Yehova ka Ter u hemban doon sha won cii.

3. Ka mbampin mba nyi nahan alaghga se pine? (Nenge ngeren u kiriki u a lu a itinekwagh ér “Yehova Fama?” la kpaa.)

³ Alaghga se pine mpin er ngise orngeren Bibilo ugen pine nahan. Yange pine ér: “Ka nyi me na TER sha ci u akaa a Na a dedoo a A erem cii laa?” (Ps. 116:12) Mlumun yô, mayange se fatyô u kimbin Ter wase u sha la ga. Nahan kpa er se doo un ishima yô, kwagh ne na se kpa se soo un. Apostoli Yohane yange nger ér: “Se mba tesen dooshima, sha ci u a vande tesen se dooshima.” (1 Yoh. 4:19) Nahan ka sha igbenda i nyi se fatyô u tesen Ter wase u sha la ser a doo se ishima?

4. Yakobu 4:8 tese ér gba u se nôngo kwagh kpoghuloo se ya ikyar a Yehova sha ci u nyi?

⁴ Yehova soo ér se lu azende a na shi se lamen a na kpaa. (Ôr Yakobu 4:8.) A kaa a vese ér se ‘taver ishima sha msen u eren,’ shi a ver a ver shighe u keghen ato a vese ga. (Rom. 12:12) Mayange una ngee a akaa a eren shin una vôr u keghen ato a vese ga. Se di ka se gema se ungwa imo na sha u ôron Bibilo i i lu Mkaanem nam la, kua ityakerada i wasen se u kaven Bibilo. Shi se fatyô u ungwan imo na sha u keghen ato zulee ken mbamkombo mba Mbakristu. Mbayev ka vea lamen vea mbamaren vev hanma shighe yô, ve lu kôôsôô a ve, nahan se kpa ka sea lamen vea Yehova hanma shighe yô, kwagh la a wase se u lun kôôsôô a na.

5. Se er mbamsen asev nena ve vea hemba doon Yehova?

⁵ Mbamsen mba u eren hen Yehova la ka ve lu nena? Yehova soo ér sea eren msen yô, se bugh asema a ase, se ôr un mbamhen asev kua er i lu se ken ishima la. (Ps. 62:8) Nahan doo u se pine ayol a ase ser: ‘Ka m kimbir mbamsen av zan zan yô, ve hingir mo icama, shin ka m er ve sha mimi shi ve due ken ishima yam jighilii?’ Yehova doo u ishima kpishi, shi u soo wer ikyar i u ye a na la i lu her taveraa je ka u henen a hen ga. Man ka er u lamen a na hanma shighe la ve ikyaryan shon ia lu seer taver ye. Pase un akaa a ou aa alaghga u fatyô u ôron mbagen ga la. Pase un akaa a nga a na i saan we iyol kua a nga a na u ishimavihin la cii. Lu a vangertiôr wer u fatyô u keren iwasen hen a na sha hanma ian cii.

6. Ka nyi i gbe u se er ve se za hemen u lun kôôsôô a Ter wase u sha la?

⁶ Aluer se soo u lun kôôsôô a Ter wase u sha la her yô, a gba u se wuese un. Se lumun a mkaanem ma Orpasalmi yange nger ne, wener: “TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa; kwagh u á kar un sha a We yô, kera ngu ga. Shin er i sarem u pasen ve, ôron kwagh ve nahan kpaa, ve ngee gande u ôron.” (Ps. 40:5) Gba u se lu a iwuese yase ken ishima tsô ga, kpa gba u se tesen iwuese la sha ieren yase man sha kwaghôron wase. Kwagh ne ka a na se due kposo a ior kpishi nyian. Se mba ken tar u ior ve wuese kwagh môm môm u Aôndo a er a ve ga yô. Jim je yô, môm ken akaa a a tese ér se mba ken “ayange a masejime yô,” ka ieren i ior ve lun a ishughun ga la. (2 Tim. 3:1, 2) Mayange se soo u lun a imba ieren ne ga!

7. Yehova soo ér se er nyi, man ka sha ci u nyi?

⁷ Mbamaren mba soon ér ônov vev ve saa nôngon num ga, kpa ka ve soo ér ve luun ken bem. Kape Yehova kpa a soo ér ônov nav ve luun bem bem ayol a ve je la. Jim je yô, dooshima u a lu hen atô wase la ngu a tese ér se mba Mbakristu mba mimi. (Yoh. 13:35) Se kpa se fatyô u lumun a kwagh u orpasalmi ngise nger la, a kaa ér: “Nenge, aluer anmgbianev vea tema imôngo, ishima ve ia lu i môm yô, á doo yum á hôm kpaa.” (Ps. 133:1) Anmgbianev asev mba nomso man mba kasev ka vea doo se ishima yô, se tese Yehova je ser a doo se ishima. (1 Yoh. 4:20) Doo se kpishi er se lu ken tsombor u anmgbianev mba nomso man mba kasev mba ve ‘eren a hanmô ve kundu kundu shi ve zungwen ayol a ve mhôônom tsung’ yô!—Ef. 4:32.

8. Sha kwagh u 1 Yohane 5:3 a er yô, ityôkyaa i vesen i se ongo imo i Yehova yô ka nyi?

⁸ Yehova ver ishima ér mbayev ve ungwan imo i mbamaren vev, shi a ver ishima ér se kpa se ungwan imo na. (Ef. 6:1) A kuma u se ungwa imo na sha ci u ka Un a gbe se ye, ka Un a koson se ye, shi hemba ngun a mfe a hanma ormaren cii. Kpa ityôkyaa i vesen i i ne ve se  ongo imo i Yehova yô, ka sha ci u a doo se ishima. (Ôr 1 Yohane 5:3.) Er atôakyaa a lu kpishi a se ungwan imo i Yehova nahan kpa, mayange kighir se ér se ungwa un ga. A na se ian i tsuan kwagh u se soo la, nahan ka sea tsua u ungwan imo na sha ci u a doo se ishima yô, i saan un iyol.

9-10. Er nan i gbe hange hange u se fa atindi a Aôndo shi se kuran a?

⁹ Mbamaren mba soon ér kwagh a er ônov vev ga. Ka nahan ve ka ve wa mbayev vev atindi ér a kuran ve ye. Mbayev ka vea dondon atindi la yô, ve tese ér ve na mbamaren vev jighjigh shi mba ne ve icivir kpaa. Nahan hemba doon u se hen atindi a Ter wase u sha la shi se kuran a kpaa. Aluer se er nahan yô, se tese ser a doo se ishima shi se mba ne un icivir. Heela tseegh ga, se zua a mtsera kpaa. (Yes. 48:17, 18) Kpa ior mba ve vende u kuran atindi a Yehova yô, kwagh ka a tser ve.—Gal. 6:7, 8.

¹⁰ Ka sea eren kwagh sha ishima i Yehova yô, kwagh la a kura se sha igbenda kposo kposo. Ka i kpe se iyol shi se zua a mmem ken ishima, shi se ya ikyar vea Yehova kôôsôô. Yehova fa kwagh u a hembe doon sha ci wase yô. Kwase ugen ken tar u Amerika iti na ér Aurora. A kaa ér: “M fa tsembelee je mer ka sea ungwan imo i Yehova yô, uma wase a hemba doon cii.” Se cii se fatyô u lumun ser kwagh u a er la ka mimi. We u dondo akaa a Yehova a we se sha dooshima la nahan u zua a mtsera nena?

11. Msen wasen se nena?

¹¹ Msen ngu a wase se u ungwan imo i Yehova, aluer ka shighe u i taver u ungwan imo na  je kpaa. Ashighe agen ka i taver se u ungwan imo i Yehova sha ci u se mba mbaasorabo, nahan kpa gba hange hange u se za hemen u nôngon sha er se hemba un ato ga yô. Orpasalmi yange zamber a Aôndo kaa ér: “Wasem m kegh a kegh iyol u ungwan imo you.” (Ps. 51:12, NWT) Anmgbian ugen u a lu pania i yer iti na ér Denise yô kaa ér: “Ma tindi u Yehova ka una taver mo u kuran yô, m sôn un mer a nam tahav sha er me er kwagh u dedoo yô.” Se fa ser Yehova una ungwa imba msen la keng.—Luka 11:9-13.

12. Sha kwagh u Mbaefese 5:1 a er yô, ka nyi i doo u se ere?

¹² Ôr Mbaefese 5:1. Er se lu “ônov” mba Yehova “mba doon un ishima” yô, ka se nôngo sha afatyô wase cii u kaven un. Ka se kav un sha u soon mbagen shi eren a ve kundu kundu shi den ve kwaghbo. Alaghga shighe u mba ve fe Aôndo ga ve nenge a aeren a ase a dedoo la yô, kwagh la una na vea seer henen kwagh na. (1 Pet. 2:12) Doo u Mbakristu mba ve lu mbamaren yô vea eren a ônov vev er Yehova kpa a eren a vese nahan. Aluer ve er nahan yô, alaghga mbayev mbara kpa vea soo u yan ijende a Yehova.

13. Gba u se hemba veren ishima sha nyi?

¹³ Mbayev mba te ave vanger a uter vev, shi ka i saan ve iyol u ôron kwagh ve kpen kpen. Se kpa kape se te ave vanger a Ter wase u sha Yehova je la, shi se soo ser mbagenev kpa ve va hen ve fa kwagh na. Ka i lu se ken ishima er ngise lu Tor Davidi nahan, yange nger ér: “Ka ken TER uma wam a te ihyagh ye.” (Ps. 34:2)  Nahan kpa aluer kunya ngu kôron se u ôron ior kwagh u Yehova di ye? Se er nan ve se hemba mciem mara? Aluer se hemba veren ishima sha msaanyol u Yehova una zua a mi zum u se lu ôron mbagenev kwagh na la yô, se hemba mciem. Yehova una na se lu a vangertiôr. Yange wase anmgbianev asev mba sha ayange a mbaapostoli la, nahan se kpa una wase se.—1 Tes. 2:2.

14. Ka atôakyaa a nyi a ne ve i gbe hange hange u se eren tom u geman ior hingir mbahenen laa?

¹⁴ Yehova sangen a sange ga, shi ka una nenge sea tesen ior mba ve dugh sha hanma ijiir cii dooshima yô, i doo un kpishi je. (Aer. 10:34, 35) Gbenda môm u hemban doon u se tese mbagen dooshima yô, ka u pasen ve loho u dedoo. (Mat. 28:19, 20) Ka nyi ia fatyô u duen ken tom laa? Mba ve ongo loho wase la yô, uma ve una seer doon, shi vea lu a ishimaverenkeghen i va lun uma gbem sha won ken hemen.—1 Tim. 4:16.

15-16. Ka nyi man nyi ia na a saan se iyolo?

¹⁵ Yehova ngu Ter u ônov nav ve doo un ishima yô, nahan a soo ér i saan tsombor na iyol. (Yes. 65:14) Er se lu tagher a mbamtaver nahan je kpa se mba a atôakyaa kpishi a se fatyô u lun saan saan hegen yô. Ikyav i tesen yô, se fa wang nahan ser se doo Ter wase u sha la ishima tsung. Se zua a mfe u vough u ken Bibilo i i lu Mkaanem ma Aôndo la. (Yer. 15:16) Shi se kpa se mba ken tsombor u u lu kposo a icombor igen cii yô, ka tsombor u ior mba ve soo Yehova kua atindi a a we sha kwagh u aeren a wang la shi ve soo ayol a ve yô.—Ps. 106:4, 5.

¹⁶ Shi se fatyô u zan hemen u lun saan saan sha ci u se mba a ishimaverenkeghen ser mlu wase u ken hemen la una va doo, shi ishimaveren la ka i gbilinigh ga cii. Se fa nahan kpaa ser ica a gba ga tsô Yehova una tim mbaaferev cii shi Tartor na ua kar ua hemen shi ua gema tar ne a hingir Paradiso. Heela tseegh ga, se mba a ishimaverenkeghen nahan ser a va nder mba ve kpe la vea hide a lu imôngo a ior vev. (Yoh. 5:28, 29) A lu kwagh u saan iyol kpen kpen je! U hemban cii yô, se mba a vangertiôr ser ica a gba ga tsô, hanma or u nan lu sha kua shin tar cii nana na Ter wase u se doo un ishima tsung la icivir man iwuese shi nana lu civir un tswen, vough er i gbe u a lu nahan.