I Saan We Iyol Er U Lu Wan Ishima Keghen Yehova Ne
U NGU veren ashe keghen shighe u Yehova una va kar a hanma iferkwagh cii kera shi una hide a er akaa cii a he la kpa? (Mpa. 21:1-5) U ngu veren ashe je ka u henen a hen ga! Nahan kpa, ka hanma shighe i lun se zange u wan ishima keghen Yehova ga, hemban je yô shighe u se tagher a mbamtaver yô. Ka sea keghen kwagh man una er hen shighe u se ver ishima la ga yô, iyol i kpe se.—Anz. 13:12.
Nahan kpa, Yehova soo ér se wa ishima se kegh un. Una kure awashima na hen shighe u a ver la. Er nan ve a soo ér se kegh unu? Ka nyi ia wase se ve a saan se iyol er se lu keghen Yehova nee?
ER NAN VE YEHOVA A SOO ÉR SE KEGH UNU?
Bibilo kaa ér: “TER yô, Una kegh, sha u eren a ven dedoo, ka nahan man A kende iyol Na sha, sha u Una zungwe ne mhôônom ye; gadia TER, ka Aôndo u ôron ijir je; saan mba ve keghen Un la cii iyol!” (Yes. 30:18) Yange lu Mbayuda mba taver ityou mbara Yesaia ôr mkaanem man a ve ye. (Yes. 30:1) Kpa mbagenev ken Mbayuda mbara lu civir Aôndo sha mimi nahan mkaanem man gema na ve ishimaverenkeghen. Nyian ne kpa, mkaanem man na mba ve lu civir Yehova sha mimi yô ishimaverenkeghen.
Nahan gba u se wa ishima se kegh sha ci u Yehova kpa ngu wan ishima keghen. A ver shighe u va karen a botar ne kera, nahan ngu wan ishima keghen shighe u iyange man ihwa la ia kuma yô. (Mat. 24:36) Hen shighe la, ikyav a tese wang ér kwagh u Diabolo yange wa Yehova man mbacivir un iyol la ka mimi ga. Nahan Yehova a tim Satan kua hanma or u nan suen un cii, kpa una gema a “zungwe [se] mhôônom.”
Alaghga hegen ne Yehova una kar a atsan ase kera ga, kpa a na se vangertiôr ér a fatyô u saan se iyol er se lu wan ishima keghen ne. A fatyô u saan se iyol shighe u se lu wan ishima keghen ma kwagh u dedoo yô, vough er Yesaia yange nger nahan. (Yes. 30:18) a Kpa se er nan ve a saan se iyolo? Akaa a nyiin ne aa fatyô u wasen se.
KWAGH U SE ER VE A SAAN SE IYOL SHIGHE U SE LU KEGHEN YEHOVA NE
Hemba veren ishima sha akaa a dedoo a a er u la. Tor Davidi yange tagher a akaa a vihin ken uma na kpishi. (Ps. 37:35) Nahan cii kpa a nger ér: “Tema gir gir sha ishigh ki TER, ver ashe sha a Na sha ishima i wan; ishima i̱ de vihin we sha ci u or u nan zough a mkpeyol sha gbenda u nan, u nan eren atseregh la, ga.” (Ps. 37:7) Davidi iyol na yange dondo kwaghwan la sha u suur sha Yehova ér a yima un. Shi yange a wuese akaa a dedoo a Yehova er sha ci na yô. (Ps. 40:5) Aluer se hemba veren ishima sha akaa a dedoo a Yehova a eren sha ci wase la, se kera yem veren ishima sha akaabo a a er se la ga yô, a hemba lun se zange u wan ishima keghen Yehova.
Wuese Yehova hanma shighe cii. Davidi u ikyav i tese ér lu un nger pasalmi 71 la, yange kaa a Yehova ér: “Me ver ishima me kegh gbem, me seer a seer wuese We.” (Ps. 71, 14) Lu u una wuese Yehova nena? Una wuese un sha u ôron mbagenev kwagh na shi wan atsam wuese un. (Ps. 71:16, 23) Shighe u se lu keghen Yehova yô, a fatyô u saan se iyol er Davidi nahan. Ka se wuese un zum u se dugh kwaghpasen man shighe u se lu lamen a azende ase sha kwagh na, kua shighe u se lu wan atsam a wuese un yô. Nahan kwagen u lu wan icam i Tartor yô, ver ishima zulee sha asember a icam shon man er kwagh u i er ker la a ne i saan we iyol yô.
De anmgbianev ou mba nomso man mba kasev ve taver we ishima. Davidi yange ôr a Yehova shighe u tagher a mbamtaver la ér: “Me ver ashe sha iti You kpaa-gadia i dio-sha ishigh ki mba i doo U a ve la.” (Ps. 52:9) Se kpa, ka shighe u se ze mbamkombo shin se due kwaghpasen vea anmgbianev asev mba nomso man mba kasev tseegh se zuan a ishimataver ga, kpa ka se zua a ishimataver hen a ve shighe u se dugh ahumbe a man vea a ve kpaa.—Rom. 1:11, 12.
Taver ishimaverenkeghen you. Pasalmi 62:5 kaa ér: “Ka her Aôndo tseegh ú ver ashe ving ye, we uma wam, gadia ka hen a Na man ishimaverenkeghen yam i lu ye.” Gba hange hange u se lu a ishimaverenkeghen taveraa hemban je yô, aluer mkur u tar ne va hen shighe u yange se hen ser una va la ga yô. A gba u se lu a jighjigh u nan ser hanma kwagh u Yehova a ôr cii una kure sha mi, aluer kwagh la tôô shighe nan nan je kpaa. Se fatyô u taver jighjigh wase sha u henen Mkaanem ma Aôndo. Ikyav i tesen yô, hen sha akaa a Bibilo i tsenga ôron a a kur sha mi la, man akaa a mbangeren Bibilo kposo kposo ve nger kpa a gbe zwa môm la, kua akaa a ve ôr sha kwagh u Yehova la kpaa. (Ps. 1:2, 3) Shi gba u se za hemen u ‘eren msen sha tahav mbu icighan jijingi’ sha er se za hemen u lun kôôsôô a Yehova er se lu keghen shighe u una va kure ityendezwa na i nan se uma u tsôron la.—Yuda 20, 21.
Lu a vangertiôr er Tor Davidi nahan wer Yehova nengen sha mba ve keghen Un la, shi tesen ve dooshima na u a geman ga la. (Ps. 33:18, 22) Yô za hemen u wan ishima keghen Yehova sha u hemban veren ishima sha akaa a dedoo a a er u la, man sha u wuese un man sha u zuan a ishimataver hen anmgbianev asev shi lu a ishimaverenkeghen you her taveraa.
a Ishember i i gem ér “keghen” la, inja na yô ka u “veren ishima keghen kwagh.” Man kwagh ne tese ér ka kwaghbo u se veren ishima ser Yehova a va kar a mbamzeyol asev kera ga.
