1, 2. (a) Er nan ve se fe ser uumace vea fatyô u lun azende a Aôndo? (b) Se lu henen nyi ken ngeren nee?

KA A mar se je maa se soo ser i tese se dooshima zan zan se kar kpen. Uumace soo ér vea ya ikyar a mbagenev kôôsôô shi i tesen ve dooshima, i de lu di dooshima u kwase a nom la tsô ga. Kpa kwagh u hemban cii yô, se soo ser Yehova a tesen se dooshima. Ior kpishi na jighjigh ér uumace vea fatyô u yan ikyar kôôsôô a Aôndo ga, sha ci u a hemba agee shi mba nengen a na ga yum. Kpa se fa mimi ne!

² Bibilo pase se kwagh u uumace mba yange ve lu azende a Aôndo yô. Doo u se hen kwagh ken ikyav i ve ver la. Sha ci u nyi? Sha ci u u yan ikyar a Aôndo la ka kwagh u hemban lun a inja cii u i gbe u u tsua u eren ken uma wou yô. Nahan de se time ase nen sha ikyav i Aberaham la. (Ôr Yakobu 2:23.) Yange er nan ve hingir ijende  i Aôndo? Jighjigh u nan yange wase Aberaham ya ikyar kôôsôô a Aôndo, nahan i yila un ér, ‘ter u mba ve ne jighjigh la cii.’ (Mbaromanu 4:11) U nguren timen sha ikyav na la yô, pine iyol you wer, ‘Me fatyô u kaven jighjigh u Aberaham shi taver ikyar i m ye a Yehova la nena?’

3, 4. (a) Pase kwagh u a shi nan kpa hemba karen jighjigh u Aberaham cii la. (b) Aberaham yange kegh iyol u nan naagh sha Isaka sha ci u nyi?

³ Tôô ase wer u nenge a Aberaham shighe u lu anyom 125 la, ngu unden uwo kure kure. ^[1] (Nenge ngeren u shin kpe u a lu sha peeji 8 la.) Wan na Isaka, u nôngo u kuman anyom 25 la, gema tôô ikyon, cir un ijime. Aberaham di tôô ihyô man akaa agen a keer usu a mi. Alaghga tsô lu zende u ican tsung u Aberaham lu a vande eren ken uma na ga yô. Kpa lu sha ci u bee iyol ve zende ne taver un ga. Yange lu a agee iyol her kpishi. Zende ne lu u taver sha ci u Yehova kaa ér a za na un naagh sha Wan na!—Genese 22:1-8.

⁴ A shi nan kpa, lu kwagh u hemban taver cii u Aberaham tagher a mi u karen jighjigh na je la. Ior mbagenev kaa ér, er Aôndo yange kaa a Aberaham ér a na un naagh sha wan na yô, tese ér Aôndo vihi tu shi a wa tswam kpishi. Mbagenev di kaa ér Aberaham yange kegh iyol u eren kwagh ne sha ci u soo wan na ga. Ior ka ve ôr akaa nahan sha ci u ve ban a jighjigh, shi ve fa kwagh u a lu jighjigh u nan u mimi man er ka a er tom la kpaa ga. (1 Mbakorinte 2:14-16) Nahan kpa, Aberaham gbaa ungwan imo i Aôndo tumbuluu tsô ga. Yange ungwan imo i Aôndo sha ci u lu a jighjigh u nan u mimi. A fa ér mayange Yehova a kaa ér una er ma kwagh u una va un a ican gbem sha won ga. Aberaham fa ér aluer un ungwa imo i Yehova yô, Yehova una ver un kua wan na doo doo. Ka nyi gba u Aberaham a lu a mi ve una lu a jighjigh u nan taveraa? Yange gba u una lu a mfe shi una hen kwagh ken akaa a a er un la.

5. Alaghga tsô Aberaham hen kwagh u Yehova nena, man mfe la wase un nena?

 ⁵ Mfe. Aberaham yange vese hen gar u i yilan ér Ur la. Ior mba hen gar la civir mbaaôndo mba aiev, ter na kpa eren nahan. (Yosua 24:2) Tsô Aberaham hen kwagh u Yehova nena? Bibilo tese ér Shem, wan u Noa la, lu anmgbian u Aberaham, shi lu uma zan zan Aberaham nôngo u kuman anyom 150 nahan. Shem lu a jighjigh u nan taveraa, nahan a shi nan kpa, ôron anmgbianev nav kwagh u Yehova. Se fa jighilii ga kpa, alaghga tsô lu sha ikyev na Aberaham hen kwagh u Yehova ye. Kwagh u Aberaham hen la na yô, Yehova doo un ishima, shi mfe la wase un u lun a jighjigh u nan taveraa.

6, 7. Akaa a yange er Aberaham la taver jighjigh na nena?

⁶ Akaa a a er un la. Akaa a yange er Aberaham la taver jighjigh u na Yehova la nena? Mbagenev kaa ér ka mbamhen man mbamnenge asev ka ve mgbegha se u eren kwagh ye. Akaa a Aberaham hen sha kwagh u Aôndo la mgbegha un, nahan hingir u nan “TER Aôndo Uhembansha u A gbe Sha man tar” la icivir tsung. (Genese 14:22) Bibilo yila imba icivir i a na Aôndo tsung la ér “mcieaôndo.” (Mbaheberu 5:7) Aluer se soo u yan ikyar a Aôndo kangenaa yô, gba u se cian un. (Pasalmi 25:14) Lu ieren ne i mgbegha Aberaham u ungwan imo i Yehova ye.

⁷ Aôndo yange kaa a Aberaham man Sara ér ve undu ya ve u lu hen gar u Ur la, ve mough ve yem ken tar u ve fe u ga yô. Hen shighe ne ve bee iyol, shi gba u vea lu tsan ken utenti sha ayange a uma ve cii. Er Aberaham fa ér una tagher a akaabo kpishi nahan kpa, a kange ishima u ungwan imo i Yehova. Er ungwan imo i Aôndo yô, Aôndo na un iveren shi kura un. Ikyav i tesen yô, shighe u i ngohol Aberaham kwase u doo ishima tsung, i yilan un ér Sara, shi uma u Aberaham lu sha zongo la, Yehova er ivande sha u kuran un kua kwase na hemba icin i môm. (Genese 12:10-20; 20:2-7, 10-12, 17, 18) Akaa a yange er Aberaham ne seer taver jighjigh na.

8. Se zua a mfe man akaa a a wase se u taver ikyar i se ye vea Yehova la nena?

⁸ Se fatyô u yan ijende a Yehova kôôsôô kpa? Se fatyô yum! Gba u se hen kwagh u Yehova, er Aberaham nahan. Shi se fatyô u zuan a kwaghfan man mfe u kwagh a gbe se a mi la. Se mba a akaa nyian a wasen se hemba Aberaham ica je. (Daniel 12:4; Mbaromanu  11:33) Bibilo pase kwagh u “Un u A gbe sha man tar la” vindi vindi. Kwagh u ka se hen la ngu a na Yehova a doo se ishima, shi a wase se u nan un icivir kpishi. Er Aôndo a doo se ishima shi se ne un icivir yô, kwagh ne ka a mgbegha se u ungwan imo na. Ka sea er nahan yô, se nenge er a kuran se shi a veren se yô, man kwagh ne ka a na se mkav u ka a seer taver jighjigh wase la. Aluer se mba civir Yehova a ishima yase cii yô, se zua a mkom man bem man msaanyol. (Pasalmi 34:8; Anzaakaa 10:22) Aluer se seer zuan a mfe man kwaghfan yô, ikyar i se ye vea na la i hemba taver cii.

9, 10. (a) Ka i gba u or a er nyi ve ikyar i nan ye a orgen la ia tavera? (b) Ka nyi i tese ér Aberaham yange kura ikyar i ya a Yehova la shi i gba un kwagha?

⁹ Ikyar i kôôsôô ngi er ma kwagh u injaa nahan. (Ôr Anzaakaa 17:17.) Ngi er kwagh u taver ishe u i ver ér i doo ior u kenger tseegh nahan ga. Kpa ngi er faluwa u doonashe u i gbe u a urun un mngerem shi a ver ishima sha a na ve una vese nahan. Aberaham yange za hemen u kuran ikyar i ya vea Yehova la shi i gba un kwagh kpaa. A er kwagh ne nena?

¹⁰ Aberaham yange za hemen u cian Yehova shi ungwan imo na. Ikyav i tesen yô, shighe u yem vea tsombor na kua mbashiren un ken tar u Kanaan la, a za hemen u suur sha Yehova ér a hemen un sha hanma kwagh u un lu eren cii, a lu u vesen shin u kiriki kpaa. Shighe u Aberaham lu anyom 99, inyom mase karen i môm maa i mar Isaka la, Yehova kaa a na ér a tsôngo hanma nomsoor u hen ya na. Aberaham yange ta akperan shin ker ityôkyaa i una kôr ave sha mi, una er kwagh u Yehova kaa un la gaa? Ei, a suur sha Yehova shi a ungwa imo na “sha iyange la je.”—Genese 17:10-14, 23.

11. Ishima yange i za Aberaham iyol sha kwagh u Sodom man Gomora sha ci u nyi, man Yehova wase un nena?

¹¹ Er Aberaham ungwan imo i Yehova hanma shighe kua sha akaa a kiriki je kpaa yô, ikyaryan ve hemba taver cii. Yange nenge ér una fatyô u lamen a Yehova sha hanma kwagh cii, shi ker iwasen hen a na shighe u akaa agen tsume un kpishi la je kpaa. Ikyav i tesen yô, shighe u Yehova kaa ér un ngu timin gar u Sodom man Gomora la, ishima za Aberaham iyol. Ér nyi? Lu cian ér a tim ior mba dedoo a mbaaferev imôngo. Alaghga ishima za un iyol sha kwagh u anngô na Loti kua tsombor na, u u lu ken gar u Sodom la. Aberaham na Yehova, “Orjirigh u tar cii” la jighjigh, nahan a hide a iyol ijime a ôr Yehova kwagh u za un iyol la. Yehova wa ishima a ijende na ne, shi tese un er un zungu  mhôônom yô. Yehova pase ér ka una va a mtim sha ior je kpa, un ker mba ve lu mbadedoo la, un yima ve.—Genese 18:22-33.

12, 13. (a) Mfe u Aberaham man akaa a er un la yange va wase un nena? (b) Ka nyi i tese ér Aberaham yange na Yehova jighjighi?

¹² Ikyav tese wang ér mfe kua akaa a a er Aberaham la wase un u taver ikyar i ya vea Yehova la. Sha nahan yô, shighe u Yehova va kaa a Aberaham ér a na un naagh sha wan na la, Aberaham fa er Yehova a we ishima shi a zungu mhôônom shi a kom u a suur sha a na shi a kor ior nav hanma shighe yô. Aberaham lu a vangertiôr ér Yehova una gba geman kwa môm kpoo hingir or u wan tswam shin vihin tu ga! Se ôr nahan sha ci u nyi?

¹³ Cii man Aberaham a undu mbatomov nav yô, a kaa a ve ér: ‘Lu nen heen a jaki, mo vea wanakiriki ne sé za shara, sé za civir Aôndo man sé hide sé va kohol ne ye.’ (Genese 22:5) Aberaham lu kaan ér nyi? Lu eren aie, sha ci u fa dedoo ér un ngu za nan naagh sha Isaka shinii? Ei. Bibilo kaa ér Aberaham fa er Yehova una fatyô u nderen Isaka shin mbakpenev yô. (Ôr Mbaheberu 11:19.) Yange fa ér ka Yehova a ne un agee a maren wan, shin er un man Sara ve bee iyol nahan kpaa ye. (Mbaheberu 11:11, 12, 18) Sha nahan yô, a kav er kwagh môm u hemban Yehova a lu ga yô. Aberaham yange fa kwagh u una za hemen sha iyange la ga. Kpa na jighjigh ér Yehova una fatyô u nderen wan na, sha er uityendezwa nav cii vea kure sha mi yô. Ka nahan ve i yer Aberaham ér ‘ter u mba ve ne jighjigh la cii’ ye.

14. Ka mbamtaver mba nyi u lu tagher a mi, er u lu civir Yehova ne, man ikyav i Aberaham la ia fatyô u wasen we nena?

¹⁴ Nahan kpa nyian yô, Yehova kaan a vese ér se na un naagh sha ônov asev ga, kpa a kaa ér se kuran atindi a na. Ashighe agen yô, se fa ityôkyaa i i ne ve a we atindi ne ga, shin alaghga je yô, a taver se u kuran a. Kape ka i lu u laa? Mbagen yô, tom u pasen kwagh ka u taver ve kpishi. Alaghga ka sha ci u mba cie ashe, nahan ka i taver ve u lamen a ior mba ve fe ve ga yô. Mbagenev yô, soo u duen kposo a ior mba ve eren tom ijiir i môm shin ve ze makeranta môm a ve la ga. (Ekesodu 23:2; 1 Mbatesalonika 2:2) Nahan kpa, shighe u i kaa ér u er kwagh u a taver we tsung yô, hen sha ikyav i doon tsung i jighjigh u nan u Aberaham man ishimataver na la. Ka sea gbidye kwar sha ikyav i nomso man kasev mba jighjigh ve ver la yô, kwagh la a mgbegha se u kaven ve shi seer kporom ikyua a Yehova u a lu Ijende yase la.—Mbaheberu 12:1, 2.

15. Se fatyô u kaan ser Aberaham yange vaa afanyô er un ongo imo i Yehova ga sha ci u nyi?

¹⁵ Aberaham yange vaa afanyô er un ongo imo i Yehova yôô? Ei. Bibilo kaa  ér Aberaham “tsa sha won man a mase kpen ye, hingir tamenor, bee iyol.” (Genese 25:8) Shighe u Aberaham lu anyom 175 la, lu u una fatyô u hiden henen sha gôgô shighe u lu uma la shi zuan a mkom. Sha ci u nyi? Sha ci u ikyar i ya vea Yehova la hemba lun un kwagh u vesen. Nahan kpa, ka sea ôr ken Bibilo ér Aberaham yange “hingir tamenor, bee iyol” yô, maa tese ér yange tsa sha won kuma un, kera sar un u va lun uma ken hemen ga ze.

16. Ka akaa a nan msaanyol a nyi Aberaham una va zua a mi ken Paradiso?

¹⁶ Bibilo kaa ér Aberaham “lu keghen gar u a lu a imagh, u Aôndo A lu Orkaren man Ormaan un la.” (Mbaheberu 11:10) Aberaham na jighjigh ér yange sev a hungwa a av yô, una nenge a gar la, ka Tartor u Aôndo je la, ua lu hemen sha tar. Man una va nenge a mi kpaa! Hen ase er a va saan Aberaham iyol u lun uma ken paradiso shin tar, shi zan hemen u taver ikyar na vea Yehova yô. A saan un iyol kpishi u fan er ikyav na i jighjigh la yange i wase mbacivir Aôndo anyom udubu imôngo yô! Shighe u una lu ken paradiso la, una mase kaven er naagh ku sha Uwo u Moria la, lu ikyav i kwagh u vesen ugen yô. (Mbaheberu 11:19) Shi una fa ér, er yange nyoon un tsung u nan naagh sha wan na Isaka nahan kpa, kwagh la gema wase mbajighjigh umiliôn imôngo u kaven er yange nyoon Yehova tsung shighe u na naagh sha Wan na Yesu Kristu, sha u paan uumace la yô. (Yohane 3:16) Ikyav i Aberaham la i wase se cii u seer lun a iwuese sha iyua i naagh, i i lu dooshima u hemban cii la!

17. U kange ishima u eren nyi, man se lu timen sha nyi ken ngeren u dondon laa?

¹⁷ Se cii se kange nen ishima u dondon ikyav i jighjigh i Aberaham la. Gba u se zua a mfe shi se hen kwagh ken akaa a a er se la, er un nahan. Aluer se za hemen u henen kwagh u Yehova shi ungwan imo na yô, se nenge er a veren se shi a kor se kpaa yô. (Ôr Mbaheberu 6:10-12.) Yô, Yehova a lu Ijende yase gbem sha won! Ken ngeren u dondon la, se lu timen sha ikyav i mbajighjigh mbagenev utar mba yange ve ya ikyar a Aôndo kôôsôô yô.