1. Yehova yange kaa ér ka nyi ia er sha shighe wase nee?

YEHOVA yange tsengaôron kwagh u shighe wase ne nahan ér: “Iorov pue ken akuraior a hanma zwa cii vea kôr mkaikyondo u Oryuda, vea kaa er: Sé za a ven imôngo, gadia se ungwa ser, Aôndo ngu a ven.” (Sek. 8:23) “Oryuda” ne tile sha ityough ki mbara mba Aôndo a shigh ve mkurem shin a tsegh ve sha icighan jijingi la. I yila ve kpaa ér “Iserael u Aôndo.” (Gal. 6:16) “Iorov pue” mbara di tile sha ityough ki mba ve lu a ishimaverenkeghen i va lun uma gbem sha won shin tar la. Ve fa er Yehova a tsough annongo u mba i shigh ve mkurem la yô, shi ka ve kwagh u icivirigh u civir Yehova a ve imôngo.

2. “Iorov pue” mbara mba ‘zan’ a mba i shigh ve mkurem la “imôngo” nena?

² Er i lu u se fatyô u fan iti i hanma or u i shigh nan mkurem u nan lu shin tar nyian ga nahan kpa, * mba ve lu a ishimaverenkeghen i va lun uma sha tar la, vea fatyô u ‘zan’ a mba i shigh ve mkurem la “imôngo.” Vea za a ve imôngo nena? Bibilo kaa ér “iorov pue” mbara vea ‘kôr mkaikyondo u Oryuda, vea kaa er: Sé za a ven imôngo, gadia se ungwa ser, Aôndo ngu a ven.’ Ivur Bibilo la hii kaan ér Oryuda. Kpa ken vegher u masen la di i kaa ér a “ven,” u tesen ér ka kwagh u or môm tseegh i lu ôron ga. Kwagh ne tese ér Oryuda ne ka or môm tsô ga, kpa a tile sha ityough ki annongo u mba i shigh ve mkurem la cii. Mba i shigh ve mkurem ga la mba civir Yehova imôngo vea mba i shigh ve mkurem la. Nahan kpa mba nengen mba i shigh ve mkurem la ér mba mbahemenev  vev ga. Ve fa ér ka Yesu a lu Orhemen ve ye.—Mat. 23:10.

3. Ka mbampin mba nyi ngeren ne una na mlumun sha mi?

³ Er Mbakristu mba i shigh ve mkurem mbagen ve lu her a ior mba Aôndo imôngo nyian yô, alaghga mbagen vea pine ér: (1) Doo u mba i shigh ve mkurem la vea nengen ayol a ve nena? (2) Doo u se eren kwagh a mba ve ye beredi shi ve me wain sha iyange i M-umbur la nena? (3) Aluer ingyegh ki mba ve ye beredi shi ve me wain la ki seer a seer yô, doo u ishima ia za se iyol sha kwagh shono? Se zua a mlumun sha mbampin mban ken ngeren ne.

4. Ka icin i nyi i te ken 1 Mbakorinte 11:27-29 i i gbe u mba i shigh ve mkurem vea nenge i beelee ga, man ka sha ci u nyi?

⁴ Doo u mba i shigh ve mkurem la vea nenge icintan i ken 1 Mbakorinte 11:27-29 la beelee ga. (Ôr.) Kpa a er nan ve or u i shigh nan mkurem je kpa nana ya bredi shi nana ma wain sha shighe u M-umbur man yô, a lu zum u ‘nan kera kom u eren nahan ga’? Nana lu yan beredi shi man wain sha imba gbenda la aluer nan kera ngu dondon atindi a Yehova ken uma u nan ga yô. (Heb. 6:4-6; 10:26-29) Mba i shigh ve mkurem la ve fa wang nahan ér saa vea za  hemen u tilen sha mimi ve vea zua a ‘iyua i yemen sha, i Aôndo a lu yilan ve sha mi ken Kristu Yesu la’ ye.—Fil. 3:13-16.

5. Doo u Mbakristu mba i tsough ve u yemen sha la vea nengen ayol a ve nena?

⁵ Icighan jijingi u Yehova ka a wase mbacivir un sha er vea lu mbahiden a iyol ijime, vea lu mba kenden a iyol sha ga yô. (Ef. 4:1-3; Kol. 3:10, 12) Sha nahan yô, mba i tsegh ve la mba nengen ér ve hemba ior mbagen ga. Ka ve fa nahan ér, Yehova hembe nan ve icighan jijingi a mbacivir un mbagen keng ga. Shi mba nengen ér ve hemba fan Bibilo a hanma orgen cii ga. Shi mba kaan a or ér nan kpa i tsegha nan nahan nana hii u yan beredi shi man wain shighe u M-umbur ga. Kpa ve kav wang er i lu Yehova tseegh a tsuan ior u yemen sha yô.

6. Sha kwagh u 1 Mbakorinte 4:7, 8 a er yô, doo u Mbakristu mba i shigh ve mkurem la vea eren kwagh nena?

⁶ Er mba i tsough ve la ve nengen kwagh u i yer ve u yemen sha la ér ka kwagh u icivirigh kpishi nahan kpa, mba keren ér mbagen ve tôôn ve gede gede shin ve eren kwagh a ve kposo ga. (Fil. 2:2, 3) Shi ka ve fa kpaa ér, shighe u Yehova shighe ve mkurem la, yange yôô ér hanma or nana fa ga. Sha nahan yô, zum u mbagen ve ne or u i tsegh nan la jighjigh fese ga kpa, ka kpiligh nan iyol ga. Ka nan fa er Bibilo i kaa a vese ér se de gbe nan hanma or u nan kaa ér Aôndo tsua nan u eren ma tom u icivirigh cii jighjigh fese ga yô. (Mpa. 2:2) Orkristu u i shigh nan mkurem nan keren ér i fa nan shin nana va nyôr hen ijiir yô, ior ve fa ér via va nyôr ve ga; sha nahan yô nan zough a ior maa nan kaan a ve ér nan ngu or u i shighe nan mkurem ga. Shi nan timin akende sha mbagen sha ci u i tsegha nan yum ga.—Ôr 1 Mbakorinte 4:7, 8.

7. Ka nyi i gbe u mba i shigh ve mkurem la vea palegh u erene, man ka sha ci u nyi?

⁷ Mbakristu mba i shigh ve mkurem mba nengen ér gba u vea luun vea Mbakristu mbagen mba i shigh ve mkurem tseegh, inja er mba ken ma mzough ga. Mba keren mba i shigh ve mkurem mbagen sha er vea ôr er yange i shighe ve mkurem shin vea kohol imôngo vea henen Bibilo ga. (Gal. 1:15-17) Aluer mba i shigh ve mkurem la ve er ambaakaa ne yô, tiônnongo una lu ken mzough ga cii. Vea lu eren kwagh u hendan a icighan jijingi u a wasen ior mba Aôndo u lun ken bem shi eren kwagh ken mzough la.—Rom. 16:17, 18.

8. Er nan i gbe u se wa ikyo sha gbenda u se eren kwagh a mba ve ye beredi shi ve me wain sha iyange i M-umbur laa? (Shi nenge ngeren u shin kpe la.)

⁸ Doo u se eren kwagh a anmgbianev mba nomso man mba kasev mba i shigh ve mkurem la nena? Doo u soon kwagh u or za karen ikyaa inya ga, aluer ka or u i shigh nan mkurem nan lu anmgbian u Kristu je kpaa. (Mat. 23:8-12) Bibilo ka ia ôr kwagh u mbatamen yô, i taver se ishima ér se ‘dondo ikyav i jighjigh ve u nan’ la, i kaan a vese ér se gema orumace nana hingir orhemen wase ga. (Heb. 13:7) Ka mimi Bibilo kaa ér ior mbagenev ve “kuma icivir kpishi je.” Kpa i ôr nahan ka sha ci u mba “hemen sha gbenda u dedoo” shi mba “eren tom kpoghuloo sha u lamen shi tesen,” ka sha ci u i shighe ve mkurem mba yemen sha ga. (1 Tim. 5:17) Aluer se mba wuese mba i shigh ve mkurem ka ngeen yum shi tôôn ve gede gede yô, adooga se na vea hee. * Man u hemban vihin je yô, alaghga se na vea hii u moron iyol. (Rom. 12:3) Or wase môm kpa nana soo ér nana er kwagh u una na môm ken anmgbianev mba Kristu mba i shigh ve mkurem la nana hingir u eren kwagh u vihin tsung nahan ga!—Luka 17:2.

9. Se na Mbakristu mba Yehova a shigh ve mkurem la icivir nena?

⁹ Se na mba Yehova a shigh ve mkurem la icivir nena? Doo u se pine ve ser ve ôr se er yange i shighe ve mkurem ga. Ngula ka kwagh ve, kwagh u orgen ngu sha mi ga, nahan gba u se fa ga. (1 Tes. 4:11; 2 Tes. 3:11) Shi doo u se gba tôôn tsô ser nom shin kwase u or u i shigh nan mkurem la gayô mbamaren mba nan shin mbagen hen tsombor u nan kpa i shighe ve mkurem ga. Ishimaverenkeghen i yemen sha la ka kwagh u sha tsombor ga. Ka Aôndo ngu a na or ye. (1 Tes. 2:12) Shi gba u se palegh u pinen mbampin mba vea fatyô u nan mbagen ishimavihin la. Ikyav i tesen yô, doo u se pine kwase u anmgbian u i shigh nan mkurem ser nan ngu veren ashe u va lun uma gbem sha won a nom u nan shio nahan ka nan nena, ga. Se fatyô u lun a vangertiôr ser ken tar u he la, Yehova una ‘na hanma kwagh u uma sha isharen na, a kuma un.’—Ps. 145:16.

10. Se er nan ve se kura ayol a ase sha kwagh u “kuhwan ior” shin soon kwagh u ior karen ikyaa inya laa?

¹⁰ Aluer se mba eren kwagh a mba i shigh ve mkurem la inja er ve hemba mbagen ga yô, se kpa kwagh la una kura se. Sha ci u nyi? Bibilo kaa a vese ér alaghga mbagen mba i shigh ve mkurem la vea kera tile sha mimi ga. (Mat. 25:10-12; 2 Pet. 2:20, 21) Nahan kpa aluer se palegh u “kuhwan ior” shin soon kwagh u ior karen ikyaa inya yô, mayange se yem dondon ior ga, aluer ka ior mba i shigh ve mkurem shin ka ior mba ve civir Yehova ica i gbe shin i fe ve wuee je kpaa. (Yuda 16, ngeren u shin kpe.) Aluer se er nahan yô, zum u ve va kera til sha mimi ga, shin ve undu tiônnongo kpa, mayange se de u suur sha Yehova shin se de u civir un ga.

11. Ka nyi i lu zan hemen sha kwagh u iyenge i mba ve ye beredi shi ve me wain sha shighe u Umbur Ku u Yesu laa?

¹¹ Ken anyom a karen la, iyenge i mba yan beredi shi man wain sha shighe u Umbur Ku u Yesu la, lu panden. Kpa semberee ne yô, hanma inyom iyenge la ka i seer. Doo u ishima ia za se iyol sha kwagh nee? Ei. De se nenge ase atôakyaa a a ne ve i gbe u ishima ia za se iyol ga yô.

12. Er nan ve i gbe u ishima ia za se iyol sha kwagh u iyenge i mba ve ye bredi shi ve me wain shighe u Umbur Ku u Yesu la ga?

¹² “Yehova fa mba ve lu mba nav yô.” (2 Tim. 2:19) Anmgbianev mba ka ve ôr iyenge i ior mba ve ye beredi shi ve me wain shighe u Umbur Ku u Yesu la mba er Yehova nahan ga. Mba fe or u i shigh nan mkurem mimi, shin i  shigh nan mimi ga ze. Nahan iyenge i ka ve ôr la ka i kua ior mba ve hen ér ve kpa i shighe ve mkurem kpa jighilii yô, i shigh ve ga la kpaa cii. Ikyav i tesen yô, mbagen yange ve yaan kpa shighe kar yô, ve de. Mbagen di kwagh za ve iyol ken ityo nahan ve hen ér mba yemen sha vea za hemen vea Kristu. Kwagh ne tese wang je ér se fa ingyegh ki mba i shigh ve mkurem mba ve shi sha tar la jighilii ga.

13. Bibilo ôr se iyenge i mba i shigh ve mkurem mba vea lu shin tar shighe u zegecan una hii laa?

¹³ Mba i shigh ve mkurem la vea lu sha ajiir kposo kposo sha tar shighe u Yesu una va u va yemen a ve sha la. (Mat. 24:31) Bibilo kaa ér ken ayange a masejime ne, asande a mba i shigh ve mkurem la aa lu shin tar her. (Mpa. 12:17) Kpa Bibilo kera ôr se iyenge i mba i shigh ve mkurem mba vea lu shin tar shighe u zegecan una hii la ga.

14. Er i pase ken Mbaroma 9:11, 16 nahan, ka nyi i gbe u se kav sha kwagh u gbenda u i shighen ior mkurem laa?

¹⁴ Yehova ka a tsua mba i shigh ve mkurem la sha shighe u a soo yô. (Rom. 8:28-30) Yehova yange hii u shighen ior mkurem zum u i nder Yesu kera la. Ka inja er sha ayange a mbaapostoli la Mbakristu mba mimi cii lu mba i shigh ve mkurem nahan. Ken anyom a a dondo la, ior kpishi mba ve senge ér mba Mbakristu la kera lu dondon Kristu sha mimi ga. Nahan je kpa, Yehova shighe ior kpuaa mba ve lu Mbakristu mba mimi la mkurem ken anyom la. Yange ve lu inja er ka alakema u Yesu kaa ér una vese vea ishamtoho la nahan. (Mat. 13:24-30) Ken ayange a masejime ne kpa Yehova za hemen u tsuan ior mba vea lu ken mba 144,000 la yô. * Nahan aluer Aôndo tsua u shighen  mbagen mkurem cii ve mkur una mase van kpa, ityôkyaa ngi i se gba ahon ser a er kwagh sha kwaghfan ga ze. (Ôr Mbaroma 9:11, 16.) * Gba u se wa ikyo sha er se palegh u eren kwagh er mbatomov mba Yesu ôr kwagh ve ken injakwagh na igen la yô. Yange mbatomov mbara gba ahon sha gbenda u orvesen ve er kwagh a ior mba ve hii tom ken ihwa i masetyô la.—Mat. 20:8-15.

15. Ka mba i shigh ve mkurem la cii ve lu “wanakiriki u jighjigh man u fan kwagh” u i er kwagh na ken Mateu 24:45-47 la yee? Ta iwanger.

¹⁵ Ka mba ve lu a ishimaverenkeghen i yemen sha la cii ve lu “wanakiriki u jighjigh man u fan kwagh” la ga. (Ôr Mateu 24:45-47.) Nyian kpa Yehova vea Yesu mba koson ior kpishi shin tesen ve sha ikyev i anmgbianev kpuaa er sha ayange a mbaapostoli la kpa lu nahan. Lu Mbakristu mba i shigh ve mkurem mba sha ayange a mbaapostoli la kpuaa tseegh ve nger Ruamabera u Mbakristu u ken Zwa Grika la ye. Nyian ne kpa, ka Mbakristu kpuaa tseegh ken mba i shigh ve mkurem la i we ve tom u nan ior mba Aôndo ‘kwaghyan sha shighe vough’ la sha ikyev ye.

16. Ka nyi u hen ken ngeren nee?

¹⁶ Ka nyi se hen ken ngeren nee? Yehova tsua u nan mbacivir un mba hemban ingyegh uma u tsôron shin tar, shi a tsua mbagenev kpuaa u yemen sha, za hemen vea Yesu. Hanma or u nan civir Yehova yô, una na nan injar. Una na “Oryuda” kua “iorov pue” mbara cii injar, shi a soo ér ve cii ve kuran atindi a na shi ve za hemen u civir un sha mimi. A wa ve atindi kposo kposo ga. Gba u ve cii vea hiden a iyol ijime. Gba u ve cii vea civir un imôngo shi vea lu ken mzough. Shi gba u ve cii vea nôngo tsung sha er bem una za hemen u lun ken tiônnongo yô. Er mkur a lu hemban mgbôghom ne, se cii se za nen hemen u civir Yehova shi dondon Kristu er “iyôngo” i i lu “ikyum i môm” nahan.—Yoh. 10:16.