Ikyav tese ér Yesu yange hingir Pristi u Vesen shighe u i er un Batisema ken inyom i 29 la. Er nan ve se fe nahana? Shighe u i er Yesu Batisema la, yange tese ér un kegh a kegh iyol u nan uma na sha atse a nanden nagh a sha injakwagh, a á tile sha ityough ki u eren “ishima i” Aôndo la. (Gal. 1:4; Heb. 10:5-10) Er atse a nanden nagh a sha injakwagh la yange hingir u lun, hii shighe u i er Yesu Batisema la yô, a shi nan kpa, lu shighe shon i ver zege tempel u ken jijingi u a til sha ityough ki hanma kwagh u i eren ken mcivir u Yehova u wang, u a har sha nagh ku ipaan ku Yesu kura ye. Atse a nanden nagh la, ka vegher u vesen u tempel u ken jijingi la.—Mat. 3:16, 17; Heb. 5:4-6.

Yange gba u zege tempel u ken jijingi la una lu a pristi u vesen her. Sha nahan yô, Yehova ‘tsegha Yesu sha icighan jijingi shi na un tahav’ ér a lu pristi u vesen la. (Aer. 10:37, 38; Mar. 1:9-11) Nahan cii kpa, er nan se fe ser yange i tsua Yesu ér a lu Pristi u Vesen cii ve kpe shi i nder unu? Ikyav i Aron kua upristi mba ve va ken ijime na la, ia wase se u zuan a mlumun sha mpin ne.

Tindi u Mose la yange kaa ér, ka pristi u vesen tseegh a lu a ian i nyôron ken Icighankpar u ken tabernakel la kua ken Icighankpar u Hemban cii u ken tempel, shighe u i va maa tempel la ye. Yange i ta ikyondo i yisan hen atô u Icighankpar u Hemban cii la, a Icighanjiir. Yange i lu sha Iyange i nan Iwom la tseegh pristi u vesen a kar hen ikyondo i yisan la, a nyôr shin Icighankpar u Hemban cii la ye. (Heb. 9:1-3, 6, 7) Er yange Yehova tsegha Aron kua mbagen mba ve va ken ijime na la, ve hingir upristi mba vesen cii ve, ve kar hen ikyondo i yisan la ve nyôr ken Icighankpar u Hemban cii la nahan, kape Yesu kpa yange a tsegha un una hingir Pristi u Vesen cii ve una kpe, sha u karen “ken ikyondo i yisan la, ka iyol na je la” nyôron ken uma u sha je la. (Heb. 10:20) Lu kwagh u na ve apostoli Paulu ôr kwagh u Yesu ér, a va “sha inja i pristi u vesen” shi a kar “a nyôr ken tenti u a hembe lun a inja shi a hembe lun vough, u i er un sha ave ga” la, maa nyôr “sha kpôô kpôô” je la.—Heb. 9:11, 24.

Nahan iyange i Aôndo lumun ikyuryan i he la ngi kposo a iyange i ikyuryan shon hii u eren tom la ga. Er nan ve se fe? Se fa nahan sha ci u cii man Yehova a lumun ikyuryan i he la yô, yange gba hange hange u a er akaa a agen atar. Shi lu akaa a atar shon kpaa gba u a er keng cii ve ikyuryan la ia hii u eren tom ye. Akaa atar shon lu nyi man nyi?

Hiihii yô, yange gba u Yesu una za tile sha ishigh ki Yehova. Sha uhar yô, gba u Yesu una zamber Yehova ér a lumun nagh ku sha uma na u vough la. Sha utar yô, a gba u Yehova una lumun shin una ngohol nagh ku Yesu kura. Shighe u i lu a er akaa ne ga la, ikyuryan i he la lu a iwasen ga.

Bibilo ôr se shighe u Yehova ngohol shin lumun nagh ku Yesu la jighilii ga. Sha nahan yô, se fatyô u fan shighe u Yehova lumun ikyuryan i he la man iyange i ikyuryan shon hii u eren tom la jighilii ga. Nahan cii kpa, kwagh u se fe yô, Yesu yange kôndo yem sha kuma ayange pue cii ve iyange i Pentekosti la ye. (Aer. 1:3) Lu ken atô u ayange a pue la, za a nagh ku sha uma na u vough la za na Yehova ye, shi Yehova kpa lumun shin ngohol ku. (Heb. 9:12) Kwagh u za hemen sha iyange i Pentekosti u inyom i 33 la tese ikyav i kwagh ne wang. (Aer. 2:1-4, 32, 33) Lu kwagh u tesen je ér i lumun ikyuryan i he la shi ngi eren tom kpaa, je lu ashe tugh ga.

Kohol cii yô, se kaa ser yange i lumun ikyuryan i he la shi i hii u eren tom sha iyange i Yehova ngohol nagh ku Pristi u Vesen, Yesu, u a lu Orhimen u ikyuryan shon la, na sha awambe a na la.—Heb. 7:25; 8:1-3, 6; 9:13-15.