1. Er i tese ken 3 Yohane 3, 4 nahan, ka nyi ka i na i saan se iyolo?

SHIGHE u apostoli Yohane ungwa ér ior mba yange un wase ve u fan mimi la za hemen u civir Yehova sha mimi yô, saan un iyol kpen kpen je! Yange Mbakristu mban tagher a mbamzeyol kpishi, kpa Yohane lu nôngon kpoghuloo sha er una taver jighjigh ve u nan yô; gadia Mbakristu mban lu un er ka ônov nav nahan. Se kpa ka sea nenge ônov asev shin mba se wase ve u fan mimi la, vea tsegha ayol a ve sha ci u Yehova, shi vea za hemen u civir un nahan i doo se kpen kpen.—Ôr 3 Yohane 3, 4.

2. Awashima u uwashika mba Yohane nger la lu nyi?

² Ken inyom i 98 la nahan, a shi nan kpa Yohane lu ken Efese gayô lu ikyua a Efese. Alaghga tsô lu shighe u i dugh un ken purusu ken icile i Patemo la, yem ken Efese ye. Lu shighe la icighan jijingi u Yehova mgbegha un ve nger uwashika mba utar mban ye. Awashima na u ngeren uwashika mban yô, lu u wasen Mbakristu mba mimi u taver jighjigh u ve ne Yesu la, shi zenden ken mimi.

3. Ka mbampin mba nyi se na mlumun sha mi?

³ Ken mbaapostoli cii, lu Yohane tswen mase shin uma hen shighe la ye, man ishima za un iyol sha gbenda u ior lu nyôron a atesen a aiegh ken tiônnongo la. * (1 Yoh. 2:18, 19, 26) Mbavendan mimi mbara yange ve senge ér ve fa Aôndo, kpa ve lu kuran atindi a Yehova ga. De se time sha kwaghwan u jijingi mgbegha Yohane wa ior la. Shi se na mlumun sha mbampin mba utar mban: Inja i u zenden ken mimi la ér nyi? Ka nyi ia fatyô u yangen se u zenden ken mimi? Se wase ayol a ase u zenden ken mimi her nena?

4. Sha kwagh u 1 Yohane 2:3-6 man 2 Yohane 4, 6 a er yô, inja i u zenden ken mimi la ér nyi?

⁴ Saa se fa mimi u ken Mkaanem ma Aôndo la ve se zende ken mimi ye. Heela tseegh ga, gba u se “kuran atindi a” Yehova, inja na yô, ka u dondon atindi shon je la. (Ôr 1 Yohane 2:3-6; 2 Yohane 4, 6.) Yesu ver se ikyav i vough sha u ungwan imo i Yehova. Nahan gbenda u vesen môm u se ungwa imo i Yehova yô, ka sha u dondon ikyav i Yesu la sha afatyô wase cii.—Yoh. 8:29; 1 Pet. 2:21.

5. Ka nyi i gbe u se lu a vangertiôr sha mi?

⁵ Kwagh una wase se ve se za hemen u zenden ken mimi yô, saa se na jighjigh ser Yehova ka Aôndo u mimi, shi hanma kwagh u a ôr se ken Mkaanem nam cii, ka u mimi. Shi gba u se na jighjigh ser Yesu ka Mesiya u yange i tôndozwa ér ngu van la. Ior kpishi nyian lumun ér ka Yesu Yehova a tsegh un ér a lu Tor u Tartor u Aôndo ga. Yohane yange ta icin ér; “mbatsughunior kpishi” due mba vea fatyô u tsumen a ior mba ve ne mimi u i tese sha kwagh u Yehova man Yesu la jighjigh taveraa ga yô. (2 Yoh. 7-11) Yohane nger ér: “Ka an nan lu oraie? Ka or u nan venda u lumun ér Yesu ka Kristu la gaa?” (1 Yoh. 2:22) Kwagh u una wase se ve a tsugh se ga yô, ka u henen Mkaanem man Aôndo. Ka er se er nahan la ve, se fa Yehova kua Yesu ye. (Yoh. 17:3) Shi ka cii kwagh u se er ve, se lu a vangertiôr ser se mba ken mimi je ne.

6. Ka nyi ia fatyô u yangen agumaior a a lu Mbakristu la u zenden ken mimi?

⁶ Gba u Mbakristu cii vea a wa ikyo sha er ior vea a tsumen a ve sha kwaghfan u uumace ga yô. (1 Yoh. 2:26) Ka Mbakristu mba ve lu agumaior la je i gbe u vea hemba wan ikyô sha hôn ne ye. Anmgbian u kwase ugen ken tar u France u a lu anyom 25 yô, mba yer un ér Alexia. * A kaa ér: “Shighe u m lu ken makeranta la, m hen ityesen i i kaa ér akaauma cii gba duen tsô la, kua atesen agen a a har sha mhen u taregh yô. Atesen ne na yô, m hingir u lun a akperan sha akaa a mimi a Bibilo i tese la. Ashighe agen atesen la yange a doom. Kpa m nenge mer, aluer m lumun a hanma kwagh u i tesem ken makeranta la, m gema m venda kwagh u Bibilo i tese yô, a lu shami ga.” Alexia yange hen takeda wase u i yer ér Life—How Did It Get Here? By Evolution or by Creation?  la, nahan ukasua kar kpishi ga je, akperan a yange lu a mi la bee. Alexia kaa ér: “M mase kaven mer ka Bibilo i er kwagh u mimi ye. Shi m nenge mer, aluer m ngu dondon ityesen i Bibilo yô, me zua a bem man iember.”

7. Ka nyi i doo u se wa ikyo sha mi, man ka sha ci u nyi?

⁷ Gba u Mbakristu, mbaganden kua mbayev cii vea wa ikyo sha er vea lu nguhar môm ken tiônnongo, kugen ken tar ga yô. Yohane pase wang ér, se fatyô u lun mba zenden ken mimi kua mba eren akaa a dang hen shighe môm ga. (1 Yoh. 1:6) Aluer se soo ser i saan Yehova iyol a vese yô, gba u hanma shighe cii se umbur ser, Yehova nengen hanma kwagh u se eren yô. Jighilii yô, aluer ior nenge akaa a se eren ken myer la ga kpa, Yehova yô, kwaghmôm ngu myer sha ishigh nagh ga.—Heb. 4:13.

8. Ka nyi i gbe u se palegh vindi vindi?

⁸ Gba u se lu a mnenge u ior i tar ne i nengen isholibo la ga. Apostoli Yohane nger ér: “Aluer se kaa ser, ‘Se mba a isholibo ga’ yô, se mba tsughun ayol a ase shi mimi ngu ken a vese ga.” (1 Yoh. 1:8) Sha ayange a Yohane la, mbavendan mimi ve kaa ér or a fatyô u eren isholibo sha apera, kpa nana lu kôôsôô a Aôndo her. Nyian ne kpa se mba ken tar u ior ve lu a imba mnenge ne yô. Ior kpishi senge ér mba civir Aôndo, kpa ve lumun a gbenda u Yehova a nengen isholibo la ga. Hemban cii je yô, sha kwagh u yaven a or la. Aeren a Yehova a nenge ér ka a bo la, ior mban ka ve kaa ér aluer or soo ambaakaa la yô, nana fatyô u eren, ka kwaghbo ga cii.

9. Er nan ve i doo u agumaior a eren kwagh u Bibilo i tese ér ka u vough laa?

⁹ Ka i hemba taver agumaior a a lu Mbakristu la u lun a mnenge u vough sha kwagh u yaven a or la, zum u mba ve lu kelase môm a ve, gayô ve eren tom ijiir i môm la ve zer zan ve iyol ér ve gema mnenge ve yô. Lu kwagh u er Aleksandar je la. A kaa ér: “Mbayevkasev mbagen ken makeranta yange ve shi zan mo  iyol ér m yav a ve. Yange ve kaa ér, er m lu a ishiôr ga yô, m ngu nomsoor u yaven a nomso.” Alaghga we kpa u tagher a imba kwagh ne. Kpa aluer u dondo kwagh u Bibilo i kaa ér ka u vough la yô, u lu a icivir shi u kura iyol you, shi imoshima you ia lu wang shi u hemba lun kôôsôô a Yehova. Hanma shighe u u hembe imeen i eren kwaghbo yô, a hemba lun we ican ga u eren kwagh u vough. Shi umbur kpaa wer, mnenge u tar u lu a mi sha kwagh u yaven a or la due ka hen Satan. Hanma shighe u u vende u eren kwagh er ior i tar ne yô, u “hemba Iferor ityav.”—1 Yoh. 2:14.

10. Kwagh u i nger ken 1 Yohane 1:9 la wase se u civir Yehova a a imoshima i wang nena?

¹⁰ Se fa ser ka Yehova a lu a ian i ôron se kwagh u a lu isholibo la ye. Ka se nôngo sha a fatyô wase cii sha er se er isholibo ga yô. Kpa ka sea er isholibo yô, se pase i hen Yehova ken msen. (Ôr 1 Yohane 1:9.) Ka sea er isholibo i vesen yô, se ker iwasen hen mbatamen mba Yehova a tsough ér ve kuran se la. (Yak. 5:14-16) Nahan cii kpa, mayange se zer henen sha akaa a yange se er sha lan la ga. Sha ci u nyi? Sha ci u Ter wase u se doo un ishima la, na se nagh ku ipaan sha Wan na, sha er a de se a asorabo ase yô. Er Yehova a kaa ér una de se asorabo ase aluer se gema ishima sha mimi yô, una er nahan kpee a bunde ga. Sha nahan yô, ma kwaghmôm ngu una yange se u civir Yehova a a imoshima i wang ga.—1 Yoh 2:1, 2, 12; 3:19, 20.

11. Se er nan ve se kura asema a ase sha atesen a aiegh aa fatyô u vihin jighjigh wase laa?

¹¹ Gba u se palegh atesen a mbavendan mimi. Hii shighe u i ver tiônnongo u Mbakristu la je, Diabolo ngu nôngon kpoghuloo ér una vihi jighjigh u mba ve lu civir Aôndo sha mimi la, a de kera taver ga. Sha nahan yô, gba u se fa mkposo u kwagh u mimi kua mbaaie. *  Alaghga mbaihyomov asev vea wa se mbaaie iyol sha Intanet man sha ajiir agen a lamen a ior her. Awashima ve yô, ka u vea na jighjigh u se ne Yehova kua anmgbianev asev mba doon se ishima la, a de kera taver ga. De lumun mbaaie mbara ga, ka hen Satan ve dugh ye!—1 Yoh. 4:1, 6; Mpa. 12:9.

12. Doo u se taver jighjigh u se ne ser ka mimi je se fe ne sha ci u nyi?

¹² Aluer se soo u hendan a uhôn mba Satan yô, gba u se taver jighjigh u se ne Yesu kua tom u a lu eren sha u kuren awashima u Aôndo la. Shi gba u ior mba Yehova a lu eren tom a ve nyian sha u hemen nongo na la kpa se na ve jighjigh. (Mat. 24:45-47) Aluer se mba henen Mkaanem ma Aôndo hanma shighe yô, jighjigh wase una seer taver. Shi jighjigh wase una lu er kon u u we amise a yem shin atô inya nahan. Paulu yange ôr imba kwagh ne shighe u lu ngeren washika hen tiônnongo u ken Kolose la. A kaa ér: “Er ne ngohol Kristu Yesu Ter yô, za nen hemen u zenden ken mzough vea na, wa nen amise shi i maa ne ken a na, tile nen her dông sha jighjigh u nan.” (Kol. 2:6, 7) Aluer Orkristu nan nôngo tsung nan taver jighjigh u nan yô, Satan kua mbatomov nav vea nôngo nan nan kpa, vea fatyô u yangen nan u zenden ken mimi ga.—2 Yoh. 8, 9.

13. Ka nyi i doo u se ver ishima ser ia ere, man ka sha ci u nyi?

¹³ Doo u se fa ser ka keng tar ua kôr se ihyom. (1 Yoh. 3:13) Yohane umbur se ér “tar cii ngu sha ikyev i Iferor.” (1 Yoh. 5:19) Er tar ne u lu yemen u za kuusu yô, ishima i hemba vihin Satan ker cii. (Mpa. 12:12) Ngu eren akaa a a hembe di u meen se ér se er idya shin se kegh ato a mbaaie mba ior mbavendan mimi la. Ka a ta num sha a vese noon je kpaa. Satan fa je ér un shi a shighe kpuaa tseegh u yangen tom u pasen kwagh shin vihin jighjigh wase. Sha nahan yô, kera kpiligh se iyol er i pande i yange tom wase sha ajiir agen shin i cir tom wase kuaa ken ityar igen la ga. Nahan cii kpa, anmgbianev asev mba sha ajiir ne mba wan ishima her. Anmgbianev mban mba tesen ér nyityô kwagh i Satan a ve a mi sha a vese cii kpa, se fatyô u hemban!

14. Ka gbenda môm u nyi se fatyô u wasen anmgbianev asev sha er vea za hemen u lun ken mimi?

¹⁴ Aluer se soo u wasen anmgbianev asev ser ve za hemen u lun ken mimi her yô, saa se zungwen ve mhôônom. (1 Yoh. 3:10, 11, 16-18) Gba u anmgbianev asev vea doo se ishima sha shighe u doon kua shighe u mbamzeyol ve lu kpaa. U tesen ikyav yô, u fa ma or u ku u er nan u i gbe u a sur nan ishima shin a wase nan sha gbenda ugen yôô? Shin u ungwa wer aahe er hen ijiir i anmgbianev asev ve lu, man gba u a wase ve u hiden maan Ayough a Tartor shin uyaav veve? Ka se tese ser anmgbianev asev doo se ishima tsung shi mhôônom kôr se a ve sha iliam yase tseegh ga, kpa ka se er kwagh kpôô kpôô u wasen ve.

15. Er i pase ken 1 Yohane 4:7, 8 nahan, ka nyi i gbe u se ere?

¹⁵ Ka sea tesen mbagenev dooshima yô, se lu kaven Ter wase u sha la. (Ôr 1 Yohane 4:7, 8.) Gbenda u vesen u se tese mbagen dooshima yô, ka u den ve kwaghbo. Ikyav i tesen yô, adooga or er se kwagh u vihin tsung, kpa shi nan hide nan va zamber. Se tese dooshima sha u den nan a kwaghbo la shi hungur a mi. (Kol. 3:13) Anmgbian ugen u yer un ér Aldo yô, yange tagher a imba kwagh ne shighe u ungwa anmgbian u un naan un icivir kpishi yô, lam sha ityô na geseghee yô. Aldo kaa ér: “Yange m er msen hen Yehova  kpoghuloo mer a wasem sha er me hen akaa a vihin sha anmgbian ne ga yô.” Kpa Aldo shi er kwagh ugen kpaa. Yange kaa a anmgbian la ér vea due kwaghpasen imôngo. Er ve lu eren tom imôngo la, Aldo pase anmgbian la er kwagh u a ôr sha ityô na la a vihi un yô. Aldo kaa ér, “yange m er anmgbian la er kwagh u ôr la a vihim yô, a vaa afanyô tsung. Ken iliam na je, m kav er vaa afanyô sha mimi yô. Nahan se hungur a zayol la, se za hemen u lun azende a dedoo.”

16-17. Gba u se kange ishima u eren nyi?

¹⁶ Yange anmgbianev mba apostoli Yohane doo un ishima tsung shi soo ér jighjigh u nan ve a taver. Yange tese ér anmgbianev nav doo un ishima shi kwagh ve gba un ishima sha gbenda u wa ve kwagh ken uwashika mba utar mban la. Se kpa doo se kpishi er nomso man kasev mba vea hemen sha vea Yesu la kpa, ve lu ior mba lun a dooshima man ikyo i wan nahan!—1 Yoh. 2:27.

¹⁷ Yô se dondo nen kwaghwan u se tim sha mi ken ngeren ne la. Se kange nen ishima u zenden ken mimi, shi ungwan imo i Yehova sha hanma kwagh u se eren ken uma wase cii. Henen Mkaanem nam, shi na ma jighjigh. Na Yesu jighjigh. De lumun kwaghfan u uumace kua atesen a mbavendan mimi la ga. Mayange de lun or u civir Aôndo shi hamben nguhar ken tar ga, shi de keghen ato a mba ve ze u iyol ér u er isholibo la ga. Dondon atindi a Yehova. Shi se wase nen anmgbianev asev ve za hemen u tilen dông, sha u den mba ve er se kwaghbo la a isholibo ve shi wasen mba ve lu ken ibanave la. Aluer se er nahan yô, sea tagher a nyityô ican kpa, se za hemen u zenden ken mimi her.