Ka se lu a shighe kpishi u henen kwagh sha tseeneke wase ga. Nahan se er kwagh a shighe u se lu a mi u henen kwagh la nena ve a hemba wasen se? Hiihii yô, tôô shighe time sha kwagh u lu ôron la. Aluer u tôô shighe u time ken an-ngeren u kpuaa yô, kwagh la una hemba wasen we, a u ôron ngeren u lihen kpishi ayem ayem la.

U been yô, maa tsua akaa a u nenge wer hemba ngan hange hange u henen la. (Ef. 5:15, 16) Nenge akaa a u er ve a wase u yô:

• Ôron Bibilo hanma iyange. (Ps. 1:2) Aluer u hii sha mtom ma Bibilo ma ka i ôr ken hanma mkombo u ken atô u kasua la yô, kwagh la una wase u kpishi.

• Waan iyol sha Iyoukura i henen man sha mkombo u ken atô u kasua la. Wa iyol tsembelee sha er u fatyô u nan ikyaa ken mkombo yô.—Ps. 22:22.

• Aluer u ngu a shighe yô, nôngon u ôron umagazin asev, shi nengen uvidio kua ngeren mbagenev sha jw.org, mba i sember duen a mi yô.

• Time sha itinekwagh i u soo u seer henen yô. U fatyô tôvon sha ma zayol u u lu a mi, shin mpin, gayô ma kwagh u Bibilo i ôr, u u soo u seer zuan a iwanger sha mi yô. Wea soo u fan er u er kwagh ne yô, za sha jw.org/tiv, ape i nger er, “Akaa a U Fatyô u Henen ken Bibilo Yô” la.