NGEREN U TIMEN SHA MI 23
“I Tsegha Iti You.”
‘Yehova, iti You yô, ka i tsôron gbem sha won’—PS. 135:13.
ICAM 10 Wuese Yehova Aôndo Wase!
KWAGH U I TIM SHA MI KEN NGEREN NE YÔ *
1-2. Ka atineakaa a nyi nahan a gbe Mbashiada mba Yehova kwagh yumu?
NYIAN ne se cii se tagher a ikyaa i hementor u Aôndo man kwagh u tseghan iti na shi karen a ilyahan sha iti shon kera la. Er se lu Mbashiada mba Yehova yô, ka i doo se u lamen sha atineakaa a injaa ne. Nahan kpa, se mba kaan ser hementor u Aôndo man u tseghan iti na la ka akaa kposo kposo, aa zough ga yôô? Ei, ka nahan ga cii.
2 Se cii se nenge er i gbe hange hange u a tsegha iti i Aôndo yô. Shi se vande henen ken Bibilo fan er i gbe u hanmaor nana kav er hemen u Yehova shin gbenda u a hemen la u hembe doon yô. Akaa ne nga se tamen kwagh je gande.
3. Iti i Yehova la wa nyi man nyi kere?
3 Jighilii yô, iti i Yehova la wa hanma kwagh u Aôndo cii ker, kua gbenda u a hemen la kpaa. Nahan aluer se kaa ser u tseghan iti i Yehova, been a ilyahan shin ityuhwanev sha i la ka kwagh u hemban cii yô, tese ér se mba kaan kpaa ser gba u ior vea kav er gbenda u Yehova a hemen la kpa u hembe doon yô. Iti i Yehova la zua vea gbenda u Tor u Hembanagee cii ne a hemen la.—Nenge ngeren u kiriki u a lu a itinekwagh ér “ Akaa Agen a ken Ikyaa i Vesen La” la.
4. Pasalmi 135:13 ôr kwagh u iti i Aôndo ér nyi, man ka mbampin mba nyi se lu nan mlumun sha mi ken ngeren nee?
4 Iti i Yehova la ngi kposo a hanma iti igen cii. (Ôr Pasalmi 135:13.) Er nan ve iti i Aôndo i lu a inja yumu? Yange i hii vihin Aôndo iti nena? Aôndo tsegha iti na nena? Man se di se wase u paase iti na iyol nena? De se na mlumun sha mbampin mban.
ER ITI I LU A INJA YÔ
5. Ka nyi alaghga mbagen vea hen shighe u i kaa ér i tsegha iti i Aôndo laa?
5 “I tsegha iti you.” (Mat. 6:9) Yesu yange tese ér kwagh u vesen u i doo u se er shighe u se lu eren msen yô, ka u sônon ser i tsegha iti i Aôndo. Kpa inja i kwagh u Yesu ôr ne ér nyi? Inja i u tseghan kwagh yô, ka u nengen wer kwagh la ngu wang shin ngu a acôghor iyol ga. Kpa alaghga mbagen vea pine ér, ‘I vande tseghan iti i Yehova, ngi wang man a acôghor shio ga zee?’ Cii man se na mlumun sha mpin ne yô, gba u se fa kwagh u a lu iti jimin cii yô.
6. Er nan ve iti i lu kwagh u injaa yumu?
6 Iti i or hemba di u kohol asangaabaacaa ngeren sha pipa, shin yilan a duen sha gbungur gbungur la. Bibilo kaa ér: “Iti i doon yô, ka kwagh u tsuwan je, hemba inyaregh ki ngeen.” (Anz. 22:1; Orpa. 7:1) Er nan ve iti i lu a inja yum nahana? Ityôkyaa yô, ka a yilan iti i or je, ior ve yem henen sha kwagh u or u nan ye iti shon shin er ior ve nengen nan la. Sha nahan yô, ka gbenda u i nger iti i or shin i yer i la i hembe lun kwagh u vesen ga; kpa kwagh u vesen yô, ka kwagh u ngu a va mbagenev ken ishima zum u ve nenge a or shon, shin ve ongo i yer iti i nan la.
7. Ior nôngo ér vea vihi Aôndo iti nena?
7 Shighe u ior ve lu wan Yehova mbaaie iyol yô, ka ve soo ér vea na mbagenev ve nenge Aôndo ér ka or u bo. Ior ka vea ôron akaabo sha iyol i Aôndo yô, i lu iti na i dedoo la je ve nôngon ér vea vihi i ye. Kwa u hiihii u yange or hii wan Aôndo aie iyol, shi nan nôngo ér mbagen kpa ve nenge ér Aôndo ka or u bo yô, lu ken sule u Eden. Nenge ase kwagh u se hen ken kwagh u za hemen la yô.
ER YANGE I HII VIHIN AÔNDO ITI YÔ
8. Ka nyi Adam man Ifa yange ve fa sha kwagh u Aôndo, man ka mbampin mba nyi nahan alaghga se pine?
8 Adam man Ifa yange ve fa er iti i Aôndo i lu Yehova yô. Shi yange ve fa akaa a vesen agen sha kwagh na. Ikyav i tesen yô, yange ve fa er lu un gba ve, na ve uma, shi na ve Paradiso u doonashe u lu ya ve la shi er ve uhar cii ve kuma vough, ivese ve lu a mshi ga ye. (Gen. 1:26-28; 2:18) Nahan kpa, yange ve za hemen u henen sha akaa a Yehova er sha ci ve la je he? Yehova yange za hemen u doon ve ishima shi ve za hemen u wuese un sha akaa a er a ve la je kpa? Mlumun u sha mbampin mban yange due wang zum u orihyom u Aôndo kar ve yô.
9. Sha kwagh u Genese 2:16, 17 man 3:1-5 a er yô, Yehova yange kaa a Adam man Ifa ér nyi, man Satan di va goom a mimi la nena?
9 Ôr Genese 2:16, 17 man 3:1-5. Satan yange nyôr ken iyô za pine Ifa ér: “Ka mimi je, Aôndo kaa er, né de ye atam a ma kon u ken sule ne gaa?” Mpin u Satan pine Ifa la lu aa aie ker u lu inja er ka megh nahan yô. Jighilii yô, Aôndo yange na ve ian i yan ikyon igen la cii, lu di kon môm tseegh venda ér ve de ye ga ye. Yange ikyon i doon lu atô kposo kposo i Adam man Ifa vea fatyô u yan yô. (Gen. 2:9) Sha mimi yô, Yehova ne kwagh mgbeghaa. Nahan cii kpa, atam a kon ugen la yô Aôndo ta Adam man Ifa icin ér ve de ye ga. Mpin u Satan pine Ifa la yange goom a mimi la. Satan yange soo ér ve nenge Aôndo ér ka or u wan bo. Alaghga tsô Ifa lu henen ken ishima na nahan, ér ‘Ma kwagh u doon ngu u Aôndo a lu yeren mo a mi shinii?’
10. Satan yange vihi Aôndo iti nena, man lu nyi i due kere?
10 Shighe u Satan pine Ifa kwagh la, Ifa lan er lu Yehova lu Orhemen na ga. Yange ôr Satan kwagh u Aôndo kaa ve la wang. Je yô, Ifa shi seer ér, ave tsô kpa i kaa ér ve de benden sha mi ga. Yange fa er aluer or venda u ungwan icintan shin nan hemba Aôndo ato ve, nana kpe yô. Kpa Satan kaa a na ér: “Né kpe je ga.” (Gen. 3:2-4) Hen shighe ne Satan kera ôr kwagh kukuku ga. Satan lu vihin Aôndo iti jighilii, kaan a Ifa ér Yehova ka oraie. Sha nahan yô, Satan maa hingir diabolo shin ormsende. Satan yange tsugh Ifa, maa Ifa na un jighjigh je. (1 Tim. 2:14) Ifa yange hemba nan Satan jighjigh a Yehova. Kwagh la na yô, taver Ifa u tsuan kwagh u vihin u tsua la ga cii. A hemba Yehova ato. Ifa maa ya ityamegh ki kon u Yehova ta un icin ér a de ye ga la. Shi va na Adam kpa ya.—Gen. 3:6.
11. Adam man Ifa yange ma ve fatyô u eren nyi, kpa ve kanshio u eren nyi?
11 Hen ase sha kwagh u Ifa yange ma kaa a Satan yô. Tôô ase wer yange ôr kwagh nahan, ér: “M fa u ga, kpa m fa Yehova, ka Terem, a doom ishima shi m na un jighjigh. Mo man Adam cii ka un a ne se akaa a se lu a mi ne ye. Er nan u cihi u er kwagh u vihin imba ne sha a na nahana? Yem heen kera!” Yange una er kwagh nahan u tesen ér ter na Yehova doo un ishima sha mimi yô, ma doo Yehova u ungwan mkaanem ma wan na u kwase ne je ma zua ga! (Anz. 27:11) Nahan kpa Yehova doo Ifa ishima sha mimi ga cii, man Adam kpa lu nahan. Er Aôndo doo ve ishima ga yô, Adam man Ifa kanshio u paase iti i Ter ve iyol.
12. Satan yange na Ifa hingir u lun a akperan ken ishima nena, man ka nyi Adam man Ifa yange ve kanshio u erene?
12 Er se vande ôron nahan, Satan yange na Ifa vande hiin u lun akperan ken ishima. Yange soo ér Ifa a hii u henen ér Yehova ngu Ter u dedoo ga. Adam man Ifa hure mbaaie mba Satan mban kera sha er vea paase iti i Yehova iyol ga. Ve de Satan wa ve kwagh shi ve ungwa imo na, nahan ve hemba Ter ve ato. Nyian kpa Satan ngu eren ayom ne her. Ngu a ta num sha Yehova sha u wan un mbaaie iyol. Ior mba ve lumun a mbaaie mba Satan la cii, mba ngôôr geman ijime a hemen u Yehova u perapera la ga.
YEHOVA TSEGHA ITI NA
13. Esekiel 36:23 la sav loho u Bibilo jimin cii nena?
13 Yehova kenger di ilyahan la man ungwa ato a u eren kwagh u paase iyol na shio? Mayange ga cii! Loho u Bibilo cii hemba pasen kwagh u Yehova a er sha u paase iti na sha ityuhwanev mbi yange í va a mi sha iyol na ken sule u Eden la. (Gen. 3:15) Jighilii yô, se fatyô u saven loho u Bibilo jimin cii nahan, ser: Yehova una tsegha iti na sha ikyev i Tartor u Wan na a lu hemen la, sha er a gema eren perapera shin tar shi bem una lu yô. Bibilo pase kwagh u a wase se u kaven er Yehova una tsegh iti na yô.—Ôr Esekiel 36:23.
14. Yehova er kwagh sha ahendan a yange hii ken sule u Eden la u tseghan iti na nena?
14 Satan nôngo sha afatyô na cii sha ér una yange Yehova u kuren awashima na la. A er kwagh ne acin imôngo kpa a kanshio. Bibilo pase kwagh u Yehova a er sha ikyaa la, man er a tese ér un ngu Ter u lun a dooshima, shi ka un tswen un kom u hemen yô. Ka mimi ahendan a Satan la kua mba ve te ikyaa a na la cii na ishima vihi Yehova tsung. (Ps. 78:40) Nahan kpa orti nenge sha ikyaa ne sha kwaghfan man sha ishimawan, shi kure i sha mimi kpaa. Heela tseegh ga, shi tese tahav nav mbu hembancii la sha igbenda kpishi. Kpa u hemban cii yô, a tese dooshima na ken hanma kwagh u er la cii. (1 Yoh. 4:8) Man zan zan nyian kpa, Yehova ngu eren tom her sha u tseghan iti na.
Satan yange va tsugh Ifa, a er mbaaie sha iyol i Yehova, shi ken anyom uderi imôngo a a kar ne kpa Diabolo ngu a mem u vihin Aôndo iti ga (Nenge ikyumhiange i sha 9-10, 15) *
15. Satan ngu vihin Aôndo iti nyian nena, man ka nyi i due kere?
15 Nyian ne kpa Satan ngu vihin Aôndo iti her. Ngu tsughun ior ér ve hen ér Aôndo ngu a tahav ga, shi eren kwagh sha mimi ga shi kwaghfan yina un shi ior doo un ishima kpaa ga. Ikyav i tesen yô, Satan ngu a nôngo ér una tsugh ior ve na jighjigh ér ka Aôndo a gbe akaa ga. Ior ka vea lumun ér Aôndo ngu je kpa, Satan shi a nôngo ér una mee ve, ve nenge ér Aôndo ka or u a we tsoko shi a eren a ior sha inja ga, shi a neer atindi a wan, ingin ingin kpa ngu a yange yô. Shi ngu a tese ior kpaa ér Yehova ngu a feer ga, a wa tswam ishar i de; ngu a nande ior ken usu je kpaa. Ior ka vea naan jighjigh a mbaaie mban je, kwagh u dondon yô, ve hii u vendan hemen u Yehova u perapera la fese je. Man er Yehova a lu a tim Satan kera ga ne, kape Satan una za hemen u vihin un iti je la, shi we kpa una nôngo ér u de u civir Yehova. U de wer Satan a hemba?
KWAGH U I GBE U Ú ER SHA IKYAA I VESEN NE YÔ
16. Ka nyi u fatyô u eren i Adam man Ifa yange ve kanshio u erene?
16 Yehova na uumace mba ve yen ne ian i wasen u tseghan iti na. Nahan u fatyô u eren kwagh u Adam man Ifa kanshio u eren la. Er se lu ken tar u ior kpishi ve vihin Aôndo iti shi ka ve lamen sha a na dang ne nahan kpa, u fatyô u paase iti i Yehova iyol sha u ôron kwagh u a lu u mimi la wer, Aôndo ka u perapera man a mgbough a erdoo kua dooshima shi ngu icighan kpaa. (Yes. 29:23) U fatyô u tesen wer u soo wer a lu Orhemen wou. Shi u fatyô u wasen ior u fan ér ka Yehova tseegh hemen na u lu u perapera ye, shi ka u tseegh ua na akaa a a gbe a la cii aa lu ken bem shi a saan a iyol ye.—Ps. 37:9, 37; 146:5, 6, 10.
17. Yesu yange pase iti i Ter na nena?
17 Shighe u se paase iti i Yehova yô, se mba dondon ikyav i Yesu Kristu. (Yoh. 17:26.) Yesu yange pase ior iti i Ter na lu di sha u yilan iti shon tsô ga, kpa pase ve or u Yehova a lu jim la kpaa. Ikyav i tesen yô, Mbafarishi yange ve tese sha igbenda kpishi ér Yehova ka Aôndo u vihin tu shi kwagh kom un ga shi ngu ica a ior shi mhôônom kpa ma ker un a or ga. Kpa Yesu di tese kwagh ugen kposo. Yange wase ior u fan er Ter na a we ior ikyo shi a we ishima a ve shi ior ve doo un ishima shi a den ve kwaghbo yô. Yesu maa eren kwagh a ior vough er Ter na nahan. Ieren na la gema wase mbagenev u fan or u Yehova a lu la.—Yoh. 14:9.
18. Se tese ser akaa a i er sha iyol i Yehova sha u vihin un iti la cii ka mbaaie nena?
18 Se kpa se fatyô u ôron ior kwagh u Yehova u se fe la er Yesu nahan. Se er nahan yô, vea fa er iti i Yehova la i lu icighanti yô, shi vea na i icivir kpaa. Se tese ve ve fa er Yehova a lu Aôndo u dooshima shi a eren a ior kundu kundu yô. Aluer se mba eren nahan yô, se lu paase iti i Yehova iyol sha mbaaie mba i we un iyol sha u vihin un iti la. Shi se fatyô u kaven Yehova kpaa. Se fatyô u kaven un shin er se yen nahan kpaa. (Ef. 5:1, 2) Shighe u se tese ior or u Yehova a lu jim jim la sha iliam yase man ieren yase yô, se lu wasen u tseghan iti i Yehova. Heela tseegh ga, ka se tsegha iti la sha u wasen ior u fan mimi sha kwagh u Aôndo. Shi se tese ser uumace mba ve yen ne kpa vea fatyô u civir Aôndo sha mimi.—Yobu 27:5.
Se soo ser se wase mba se henen Bibilo a ve la ve fa er Yehova a eren kwagh kundu kundu man sha dooshima yô (Nenge ikyumhiange i sha 18-19) *
19. Yesaia 63:7 wase se u fan ser gba u awashima wase u tesen ior mkaanem ma Aôndo jighilii yô, a lu nyi?
19 Kwagh ugen kpa ngu u se fatyô u eren sha u tseghan iti i Yehova yô. Ka sea tesen mbagenev mimi u ken Bibilo yô, se ôr ve kwagh u hemen u Aôndo var var nahan ser, ka Yehova tswen a kom u hemen sha won cii ye, man kape i lu vough je la. Shi er i doo u a tese ve atindi a Aôndo hange hange nahan kpa, awashima wase jighilii yô, ka u wasen ve u soon Ter wase Yehova shi ve ungwan imo na sha mimi. Sha nahan yô, a gba u se ôr ve kwagh u aeren a Yehova a doon tsung la var var shi se pase ve Or u Yehova a lu jim jim la a kôr inya. (Ôr Yesaia 63:7.) Aluer se mba tesen ior sha imba gbenda ne yô, se wase ve Yehova una doo ve ishima tsung, nahan kwagh la una mgbegha ve u ungwan imo na sha ci u ve soo u civir un sha mimi.
20. Ka nyi se lu timen sha mi ken ngeren u dondon nee?
20 Kpa se er nan ve ieren yase man gbenda u se tesen ior la ua na vea soo kwagh u Yehova zum u ve ongo iti na, shi vea soo u va civir unu? Ngeren u dondon ne una na mlumun sha mpin la.
ICAM 2 Yehova Ka Iti You
^ par. 5 Ka ikyaa i vesen i nyi uumace kua mbatyomov ve tagher a mi? Er nan ve i lu ikyaa i vesen yumu, man se kpa kwagh ne kua se ker nena? Aluer se zua a mlumun sha mbampin mban kua mbagen mba ve gbe ve zough sha ikyaa ne yô, kwagh ne una wase se se seer lun a Yehova kôôsôô.
^ par. 61 NGEREN U PASEN FOTO: Diabolo yange vihi Aôndo iti, a kaa a Ifa ér Aôndo ka oraie. Ken anyom uderi imôngo a a kar ne, Satan za hemen u samber a atesen a aiegh amba er Aôndo vihi tu kpishi shi ka Un a gbe uumace ga.
^ par. 63 NGEREN U PASEN FOTO: Anmgbian ugen ngu henen Bibilo a or, nahan ngu pasen nan aeren a Aôndo vie vie.
