“Iyange igen la, m hii num vea anmgbian wam ugen, maa m sende un ave hen ikyer m gba kamen. Yange m soo u wuan un.”—Paul.

“Yange mea lu hen ya yô, m ngôôr vihin ishima ga, man ashighe agen je yô i lu sha ityôkyaa i injaa kpaa ga. Yange m vihi akaa ken iyou côu côu, hanma kwagh u m gese uwegh m zough a mi cii m hembe.”—Marco.

Alaghga se kpishi se vihi ishima er iorov mba uhar mban nahan ga. Nahan kpa se cii ashighe agen ka i taver se u kôron iyol tsaha. Kwagh ngu nahan sha ci u se ya dyako u isholibo hen Adam, or u yange i hii gban la. (Rom. 5:12) Ior mbagen ishima ka i vihi ve i kar ikyaa inya er Paul man Marco nahan. Mbagen di alaghga akaa a ve soo u henen sha mi ga la ka a zer van ve ken ishima. Ikyav i tesen yô, alaghga vea shi henen sha akaa a cier ve iyol gayô a aa na iyol ia kpe ve yô. Shi mbagen di yô, alaghga a taver ve u kighir isharen i eren idya shin man ikyôhô karen ikyaa inya, gayô man mcimbim ma bom la.

Ior mba ve fetyô u kôôm mbamhen vev shin kighir asaren a ve kua akaa a ve eren la ga yô, ka ve saa uma ve ishe. Kpa se fatyô u palegh kwagh ne. Se er kwagh ne nena? Se er kwagh ne sha u kôron iyol yase tsaha. De se time sha mbampin utar mba vea wase se u eren kwagh ne yô: (1) Ka nyi i lu u kôron iyol tsaha? (2) Er nan ve i gbe hange hange u se kôron iyol tsaha? (3) Se er nan ve se lu a ieren i i lu vegher u “ityamegh ki jijingi” nee? (Gal. 5:22, 23) Se been yô, maa se time sha kwagh u se ayol a ase se fatyô u eren sha ashighe a se kera fetyô u kôron iyol tsaha ga yô.

Or u nan ker iyol tsaha yô, nan eren hanma kwagh u a ve nan ken ishima cii ga. Ka nan palegh u ôron shin eren kwagh u una vihi Aôndo ishima yô.

Yesu yange tese se kwagh u a lu u kôron iyol tsaha yô. Bibilo kaa ér: “Zum u i lu lahan un la, a laha mba ve lu lahan un la ga. Zum u lu yan ican la kpaa, ta hwa ga, kpa wa iyol na sha ikyev i Un u a ôron ijir sha perapera la.” (1 Pet. 2:23) Yesu yange tese imba iyolkôrontsaha ne zum u mbaahendanev lu nahan un tar shighe u i mande un sha kon la. (Mat. 27:39-44) Shi yange vande tesen iyolkôrontsaha shighe u mbahemenev mba kwaghaôndo mba vihin tu nôngo ér vea kôr un a ikyaa zwa la. (Mat. 22:15-22) Shi yange ver ikyav i dedoo zum u Mbayuda mba vihin asema tôô awen ér vea ta un la! Yesu yange ker u oron iyev ga; kpa “Yesu ôso teghelee, due ken tempel kera.”—Yoh. 8:57-59.

Se fatyô u dondon ikyav i Yesu la kpa? Se fatyô sha avegher agen. Apostoli Peteru yange nger ér: “Kristu je kpa yange ya ican sha ci wen, a ver ne ikyav sha u ne̱ zaan sha angahar a na vough vough.” (1 Pet. 2:21) Shin er se lu mbaasorabo nahan kpa, se fatyô u dondon ikyav i Yesu i kôron iyol tsaha la ikyua ikyua. Kpa er nan i lu hange hange u se er kwagh nee?

Aluer se soo ser Yehova a lumun a vese yô, saa se kôron iyol tsaha. Aluer se civir Yehova sha mimi anyom ngee kpa se kera wa ikyo sha kwagh u se eren shi se ôron ga yô, ieren la ia vihi ikyar i se ye vea na la.

Nenge ase ikyav i Mose, u yange lu “or u ishima legh legh je zua ga, hemba hanma or sha won cii” sha shighe na la. (Num. 12:3) Mose yange wa ishima a ivever i Mbaiserael anyom ngee. Kpa iyange igen la yô, Mose kera kôr iyol tsaha ga. Yange mba ngur gban ahon ér mngerem ma ga yô, Mose vihi ishima a ve. A lam a ve dang dang, a kaa ér: “Ungwa nen ase, ne mbahembanato mban; sé due a mngerem ken vande ne, sé na ne zee?”—Num. 20:2-11.

Mose yange kera kôr iyol na tsaha ga. Yange wuese Yehova ér ka un a er ivande sha u nan ve mngerem ga. (Ps. 106:32, 33) Kwagh la na yô, Yehova lumun ér a nyôr ken Tar u Ityendezwa la ga. (Num. 20:12) Alaghga Mose yange una vaa afanyô sha kwagh u ishimavihin na la zan zan ku na.—Dut. 3:23-27.

Ka nyi se hen ken kwagh laa? Aluer se mba ken mimi shighe lihe kpa mayange doo u se lam a or dang shin sha ilyahan sha ci u nan er kwagh u nyoon se iyol shin gba u a kôôm nan ga. (Ef. 4:32; Kol. 3:12) Ka mimi ka sea zaan ayange yô, i hemban taver se u wan ishima cii. Nahan kpa umbur kwagh u Mose la. Mayange se soo ser se vihi ikyar i dedoo i se ye vea Yehova la sha ci u se kanshio u kôron iyol tsaha ga. Nahan se er nena ve se lu a ieren injaa i i gbe kpee u se lu a mi nee?

Er msen sôn icighan jijingi. Gba u se er nahan sha ci u nyi? Sha ci u iyolkôrontsaha ka vegher u ityamegh ki jijingi u Aôndo, man Yehova ne mba ve sen un cii jijingi ne. (Luka 11:13) Yehova una fatyô u nan se agee sha ikyev i jijingi ne sha er se fatyô u kôron iyol tsaha yô. (Fil. 4:13) Shi una fatyô u wasen se u lun a aeren agen a ityamegh ki jijingi la, er dooshima nahan; man dooshima una wase se u seer kôron iyol tsaha.—1 Kor. 13:5.

Palegh nyityôkwagh i ia na a taver we u kôron iyol tsaha cii. Ikyav i tesen yô, palegh ajiir a sha Intanet kua iemberyolough i i tesen aeren a dang yô. (Ef. 5:3, 4) Jighilii je yô, gba u se palegh hanma kwagh u una na se hingir u za eren kwaghbo cii. (Anz. 22:3; 1 Kor. 6:12) Ikyav i tesen yô, aluer or ngu lun a isharen i nyôron iyol ken aeren a ijimbagh yô, a gba u nana palegh u ôron ityakerada i i ôr akaa ne la, kua ufiim mba ve tese ambaakaa ne la kuaa.

 Alaghga a lu se ican u dondon kwaghwan ne. Nahan kpa, aluer se nôngo kpoghuloo se er nahan yô, Yehova una na se agee a wasen se u kôron iyol tsaha. (2 Pet. 1:5-8) Una wase se, nahan se fatyô u tsuan a tsua akaa a se henen ken ishima yase yô, shi se wa ikyo sha iliam yase shi se kôron iyol tsaha sha akaa a se eren la. Ka kwagh u Paul man Marco mba se hii ôron kwagh ve la kpa er je la. Yange ve hen u kôron iyol tsaha, nahan ve de u eren kwagh sha tswam. Shi nenge ase kwagh u anmgbian ugen u ashighe kpishi ngu a nyoon ishima a aderaba agen shighe u a lu nahan mato yô. Ashighe agen ka a nyoon ishima je a er ayôôso a ve shin ve zôhô je kpaa. Anmgbian ne er nena sha kwagh nee? A kaa ér: “Ka m er msen hanma iyange. Shi m time sha ngeren mba ve ôr kwagh u iyolkôrontsaha yô, shi m kôr avur a Bibilo a aa fatyô u wasen mo yô ken ityo. Er m hii u nôngon a zayol ne anyom a ngee hegen nahan kpa, hanma iyange yô, ka m kange ishima mer me vihi ishima ga. Shi ka a gba u me za mape yô, m mough faa sha er me hingir ayem ayem ga yô.”

Ashighe agen se kera fatyô u kôron iyol tsaha ga. Shighe u kwagh a er nahan yô, alaghga kunya ua kôr se u eren msen hen Yehova. Kpa ka shighe u i doo u se hemba eren msen je ne. Nahan er msen fese hen Yehova. Zamber un a de u a isholibo shi ker iwasen hen a na, shi kange ishima wer u kera kimbir eren kwagh u u er la ga. (Ps. 51:9-11) De henen wer u er msen sha mimi u zamber Yehova wer a zungwe u mhôônom yô, una kegh ato ga ze. (Ps. 102:17) Apostoli Yohane umbur se ér i “kire isholibo yase kera cica cii” sha awambe a Wan u Aôndo. (1 Yoh. 1:7; 2:1; Ps. 86:5) Umbur wer Yehova kaa a uumace mba civir un ér ve deen ior kwaghbo kwa kimbir kimbir. Nahan se na jighjigh ser, se kpa una er a vese nahan.—Mat. 18:21, 22; Kol. 3:13.

Shighe u Mose kera fatyô u kôron iyol tsaha ga ken taaikyôngo la, ishima kera doo Yehova a na ga. Nahan kpa Yehova shi de un kwaghbo. Shi Mkaanem ma Aôndo kaa ér Mose lu or u na Aôndo jighjigh taveraa u i doo u se dondo ikyav na la yô. (Dut. 34:10; Heb. 11:24-28) Yehova yange lumun ér Mose a nyôr ken Tar u Ityendezwa la ga. Nahan kpa, una va na Mose ian i nyôron ken Paradiso shi lun uma shin tar gbem sha won. Se kpa aluer se mba nôngon ser se kôron iyol tsaha yô, se lu veren ashe u va lun uma gbem sha won ken paradiso.—1 Kor. 9:25.