SE CII se fa er Yehova a lu hemen ior nav shi a lu nan ve kwaghyan u ken jijingi sha “ayange a masejime” ne yô. (2 Tim. 3:1) Nahan kpa gba u se cii se ungwan imo i Yehova. Se fatyô u tôôn mlu wase karen sha mlu u Mbaiserael shighe u ve lu ken taaikyôngo la. Yange i gba u shighe u ve ungwa imo i kakaki yô vea kar a kar.

Yehova yange kaa a Mose ér a var ukakaki mba sha azurfa uhar ve lu “kwagh u yilan ior a mi, man u yôôn sha er i̱ hembe hen afo i̱ yem hemen yô.” (Num. 10:2) Yange i gba u upristi vea tôngon ukakaki mban sha igbenda kposo kposo i tesen ior kwagh u vea er yô. (Num. 10:3-8) Nyian ne, ior mba Aôndo mba zuan a kwaghwan sha igbenda kpishi. Se lu timen sha igbenda ne itiar, shi se tôô i se kar sha ukakaki mba i tôngon sha ayange a tsuaa ken Iserael la. Nyian ne, ka i lôhô ior mba Aôndo mbamkombo mba vesen, shi i tsaase mbatamen, shi i nyôôso gayô i sôr gbenda u i eren kwagh ken atôônanongo la jimin cii.

Yehova yange una soo ér “ior cii ve̱ kohol” hen hunda u tabernakel, vegher u sha ityoughkitaregh la yô, upristi ve tôngo ukakaki. (Num. 10:3) Yange Mbaiserael cii haa afo kase tabernakel la, ve pav ker ikwe inyiin, kpa hanmaor nan ungwa imo i kakaki la. Ikyav tese ér yange i tôô mba ve haa afo ikyua a hunda u tabernakel la miniti kpuaa tseegh u nyôron her. Mba ve haa afo ica la di i gba u vea seer nôngon kwagh shi a wa tôôn ve shighe u van. Yange vea lu ikyua shin vea lu ica kpa, Yehova a soo ér hanmaor nana va shi nana va ungwa akaawan a na.

Nyian ne, se mba kohol hen tabernakel ga, kpa ka i yila se sha ajiir a ior mba Aôndo ve kohol yô. Ka i lu sha mbamkohol mba vesen kua mbamkombo mba injaav mbagen; ka sea za yô i wa se akaa a hange hange shi i tese se er i doo u se eren akaa yô. Hanma tar u ior mba Yehova ve lu ker cii, ka kwagh shon môm ka ve hen ye. Ior mba ka ve za mbamkombo mban cii ka ve kohol ve lu nongoior u i saan u iyol yô. Mbagen ajiir a ve nga a gba ica i hemba a mbagen. Kpa mba ka ve za cii ka ve nenge er iniôngon ve la i saa ishe ga yô.

Kpa gema ior mba ve lu ken iniongo i kiriki shi ve lu ica a ijiir i i lu eren mbamkombo mba vesen mban la di ye, ka ve zua a mtsera kpa? Iwavaren i sha ayange ne wase kpishi, nahan ambaaior ne kpa ka a fatyô u zuan a mtsera ken mbamkombo mban, shi i lu ve inja er ve kpa ve za nahan. Ikyav i tesen yô, yange ortamen u sôron branci sha ityough ki Mbahemenev mba Shin Itine ugen va sôr branci u tar u Benin, nahan branci la nôngo sha er anmgbianev mba hen geri u Arlit, tar u Niger ape i dughun akaa shin inya hen haregh u Sahara Desert la kpa ve nenge porogeram shon sha televishen yô. Yange iorov mba kuman ikyundukarmôm nahan, Mbashiada utaan kua  iorov mbagen puetaratar kohol hen ijiir la. Shin er ve lu ica nahan kpa, ve lu ken mzough a anmgbianev 44,131 mba ve lu hen zege mkohol ne la. Anmgbian ugen nger ér: “Se sugh ne kpishi er ne wase se, se nenge porogeram ne nahan. Kwagh ne tese se er kwagh wase a gbe ne ishima tsung yô.”

Upristi mba Iserael yange vea tôngo kakaki môm tseegh yô, i lu “mbahemenev, ka uityombaiorov” shin mba hemen ior dubu je la, tseegh i gba u vea za kohol hen hunda u tenti ye. (Num. 10:4) Ka her ve za ngohol kwaghwan sha ikyev i Mose shi a tsaase ve ye. Ityesen la yange i wase ve u za eren ityom i i wa ve sha ikyev ken ikwe ve la. Yange we a lu môm ken uityombaiorov mbara nahan, ú nôngo sha afatyô wou cii ú za mbamkombo mbara sha er u zua a iwasen kpa?

Nyian ne mbatamen mba ken tiônnongo ka “uityombaiorov” ga, shi mba eren tahav sha iyôngo i Aôndo a we ve sha ikyev la ga. (1 Pet. 5:1-3) Kpa ka ve nôngo sha afatyô ve cii u kuran iyôngo i Aôndo. Sha nahan yô, ka a yila ve sha u a za seer tsaase ve yô ve kar a kar. Ashighe agen ka i lu ken Makeranta u Tsaase Mbatamen man Udiakon. Ka i tese mbatamen er vea hemba nengen sha akaa a ken tiônnongo tsembelee yô. Ityesen ne ka i wase mbatamen kua mba ken tiônnongo cii u taver ken jijingi. Wea vande zan makeranta ne môm ga kpa, u ngu zuan a iwasen hen mba ve vande zan u yô.

Ashighe agen upristi mba ken Iserael yange ve tôngo kakaki puusu puusu. Yange vea tôngon nahan yô i lu u kaan ér Yehova soo ér ve hembe ve gba mi yemen. (Num. 10:5, 6) Zum u vea hemben hen afo u yemen yô, ve er kwagh sha inja sha inja man i lu zege tom. Alaghga ashighe agen yange mbagen ve soo u moughon ga. Sha ci u nyi?

Alaghga mbagenev vea nenge ér i tôngon kakaki u tesen ér kuma u moughon la fele fele shin a gba imo aburabur yum. “Shighe gen yô, iyange i been nahan, ibeenegh ki lu her zan zan sev mbu av.” Ashighe agen yô i ‘lu ayange ahar, shin uwer’ jimin shin i hemba nahan cii ve, ve mough ye. (Num. 9:21, 22) Lu kwa me nahan gba u Mbaiserael vea hembe hen afo vea mough? Numeri ityough 33 ter ajir kposo kposo 40 a yange Mbaiserael haa afo her yô.

Ashighe agen Mbaiserael yange ve za haa afo ape mule a lu yô. Yange vea za haa afo hen ape mule a lu yô i kpe ve iyol sha ci u ajir la lu “zegedeserti u cier iyol.” (Dut. 1:19) Ashighe agen yange i lu ve inja er aluer ve mough ve yem ape gen yô, vea za hemba yan ican her nahan.

Yange a kuma u vea a mough yô, i gba u mbagen vea wa ishima vea kegh shighe ve u moughon. Yange a tôngo kakaki puusu puusu yô hanmaor nan ungwa, kpa i lu u ve cii vea mough hen shighe môm ga. Yange a tôngo kakaki la puusu puusu kwa u hiihii yô, i lu kaan ér, mba ve haa afo vegher u sha Ityoughkitaregh la; ka kwe u Yuda man u Isakar man u Sebulon je la, ve cii i gba u vea mough. (Num. 2:3-7; 10:5, 6) Yange vea moughon cii yô, upristi shi ve tôngo kakaki puusu puusu sha kwa har u tesen ér ikwe i itiar i í lu vegher u ken imbusutariyan la kuma u ia mough. Kape upristi mbara ve er zan zan ikwe la cii i kar moughon been je la.

Alaghga we kpa ashighe agen ka i taver we u lumun a ma kwagh u nongo u Yehova u ser yô. Adooga u nenge wer i sôr akaa ngee yum. Gayô gbenda u yange i eren ma kwagh la hemba doon we nahan u soo wer ma i gem u ga. A lu nyi ityôkyaa je kpa, alaghga sha hiihii la taver we u ungwan ato ving dondon kwagh u he la. Alaghga shighe kar cii ve va mase hoghol we a mi ye. Nahan kpa, aluer se nôngo sha afatyô wase cii u dondon gbenda u i ser ma kwagh yô, se mase kaven er i lu sha ci u mkpeyol wase yô, shi Aôndo kpa una ver se doo doo.

Yehova yange hemen nomso man kasev man mbayev umiliôn imôngo kar a ve ken taaikyôngo sha ayange a Mose la. Luun er Aôndo kura ve shi tese ve ikyo i wan gayô, yange ma ve war ga. Nyian kpa, ka sha iwasen i Yehova se lu uma ken jijingi her ye. Ka sha iwasen na se lu kôôsôô a na shi jighjigh wase a taver her ye! Sha nahan yô, se cii se kange ne ishima u lun er Mbaiserael mba jighjigh mbara nahan. Zum u kakaki a gbe imo yô, se timbir ga, se kar a kar!