Avur la ter aeren ataankaranyiin aa i gbe u Orkristu nana lu a mi yô: “Ityamegh ki Jijingi yô, ka dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” Nahan cii kpa, gba u se nenge ser ka cii aeren a dedoo a jijingi u Aôndo una fatyô u wasen se u lun a mi ne ga.

Er nan se fe nahana? Se fa nahan sha ci u cii man apostoli Paulu a ter aeren a a kohol a lu ityamegh ki jijingi la yô, a nger wener: “Aeren a iyolough . . . yô ka, idya, man mlu u wang ga man ieren i ndôhôrshima, man eev mbu civir man akombo a sôron man ihyom i kôron man ayôôso man iyuhwe man ishimanyoon, man anyiman a gban man u van a mbampav man u paven iniongo, man kwaghtômon man msôrom ma hunden, man uiniongo mba i eren dang her la, kua ambaakaa la nahan.” (Gal. 5:19-21) Paulu yange kure kwaghôron na la ér “kua ambaakaa la nahan,” a kera yem teren hanma kwagh u a lu ken “aeren a iyolough” er a i ter ken Mbakolose 3:5 la nahan sha ati ati ga. Kape zum u ter aeren a ataankaranyiin a dedoo la kpa er je la. A mase kaan ken ivur i sha 23 la ér, “Tindi môm yange ambaakaa ne ga.” Sha nahan yô, Paulu yange ter aeren a dedoo a icighan jijingi una fatyô u wasen se u lun a mi la cica cii ga.

Aluer se tôô aeren a a lu ityamegh ki jijingi la se kar sha aeren a a lu ityamegh ki iwanger a Paulu ôr kwagh u a zum u nger washika hen tiônnongo u ken Efese la yô, se nenge a kwagh ne wang. A kaa ér: “Ityamegh ki iwanger ki a hanma ieren i dedoo man i perapera man i mimi.” (Ef. 5:8, 9) Aluer se nenge yô, “ieren i dedoo” man perapera kua mimi cii mba ken “ityamegh ki iwanger,” nahan cii kpa ieren la ngi i môm ken aeren a a lu “ityamegh ki Jijingi” la.

Heela tseegh ga, se fatyô u nengen a kwagh ne ken aeren a ateratar a injaa a Paulu kaa a Timoteu ér a lu a mi la. Yange taver Timoteu ishima ér a ‘nôngo kpoghuloo a eren kwagh u perapera shi a civir Aôndo shi a lu a jighjigh u nan, shi a tesen dooshima shi a taver ishima shi a lu ishima legh legh.’ (1 Tim. 6:11, NWT) Ka aeren atar ken aeren a Paulu ter la tseegh (jighjigh man dooshima kua ishima i legh legh) i ter a ken aeren a a lu “ityamegh ki Jijingi” la ye. Nahan kpa ka keng yange Timoteu una soo ér jijingi a wase un u lun a aeren a agen la kpaa, ka perapera man u lun or u civir Aôndo man ishimataver.—Nenge Mbakolose 3:12; 2 Peteru 1:5-7.

Nahan kwagh ne tese wang ér Mbagalatia 5:22, 23 ôr aeren a i gbe u Mbakristu vea lu a mi la cica cii ga. Jijingi u Aôndo una fatyô u wasen se u lun a aeren a ataankaranyiin a a lu “ityamegh ki Jijingi” la. Nahan kpa se nguren vian ken jijingi seer yô, aeren agen kpaa nga a a gba u se lu a mi yô, shi se haa “or u he iyol, u i gbe un sha awashima u Aôndo ken perapera u mimi man ieren i mimi la.”—Ef. 4:24.