Paulu nger wener: “Atindi na yô, m kpe sha kwagh u tindi, sha er me gema me lu uma sha ci u Aôndo yô.”—Gal. 2:19.

Mbakristu mbagenev ken atôônanongo a yange lu ken tiôntar u Galatia u ken Roma la, lu dondon atesen a aiegh. Mbatesen mbaaiev mban lu kaan a ior ér, saa vea kuran Atindi a Mose, er tindi u icôngo la nahan ve, vea zua myom ye. Kpa Paulu yange fa er kera lu hange hange u Mbakristu vea tsôngo ga yô. Yange pase ve er atesen la a lu a mimi ga yô, shi wase anmgbianev mbara u seer nan nagh ku Yesu Kristu kura jighjigh. (Gal. 2:4; 5:2) Lu shighe u Paulu lu pasen var var ér ityôkyaa kera ngi i kuran Atindi a Mose ga la, yange nger mkaanem ma ken Mbagalatia 2:19 man ye.

Paulu kaa ér un “kpe sha kwagh u tindi.” Kwagh u ôr ne inja na ér nyi? Bibilo pase wang ér, or ka nana kpe yô nan fa kwagh môm ga. (Orpa. 9:5) Nahan Paulu lu kaan ér un kera ngu sha ikyev i Tindi u Mose la ga. Yange lu a vangertiôr ér, jighjigh u un ne nagh ku ipaan la na yô, un ngu “uma sha ci u Aôndo.”

Nahan kpa Tindi la yange wase Paulu u sôron mlu na. Sha nena yô? Paulu pase wener, “or ngu perapera ka sha atindi a kuran ga, kpa ka sha u nan Yesu Kristu jighjigh tseegh.” (Gal. 2:16) Nahan cii kpa, Tindi la yange er tom u injaa. Paulu pase Mbakristu mba ken Galatia la ér: “Lu sha ci u ior ve̱ fa kwagh u a lu tindi u peren yô, zan zan wan la a kar van, un u i tôndo zwa a na la.” (Gal. 3:19) Tindi la tese wang ér, uumace mba ve yen ne vea fatyô u kuran Tindi shon vough a mshi shio ga, nahan gba u a na nagh ku vough ku masetyô sha u paan ve. Sha nahan yô, Tindi la yange wase ior u fan ér “wan” u i er kwagh na la ka Yesu. Nahan aluer or na Yesu Kristu jighjigh yô, Aôndo una fatyô u yilan nan ér nan ngu orperapera. (Gal. 3:24) Tindi la yange wase Paulu u nan Yesu jighjigh, nahan hingir orperapera. Sha nahan yô, Paulu “kpe sha kwagh u tindi” maa gema hingir “uma sha ci u Aôndo.” Tindi la maa kera lu a tahav sha a na ga, kpa lu Aôndo lu a tahav sha a na ye.

Paulu shi yange ôr imbakwagh ne, shighe u nger washika hen Mbakristu mba ken Roma la. A kaa wener: “Anmgbianev av, ne kpa yange iyol i Kristu na ne lu kpenegh sha kwagh u Atindi . . . Se kera mba sha ikyev i Atindi ga, sha ci u se mba kpenegh sha kwagh u yange kange se la.” (Rom. 7:4, 6) Avur ne man ivur i Mbagalatia 2:19 la cii tese ér, Paulu lu ôron kwagh u kpen kpôô kpôô er orsholibo u Tindi a tese ér nan kuma ku nahan ga. Kpa lu ôron kwagh u kera lun ken kpan ga. Nahan Tindi kera lu a tahav sha a na ga, kua mbagenev er un nahan. Ve na nagh ku ipaan ku Kristu kura jighjigh, nahan ve kera lu ken kpan ga.