NGEREN U TIMEN SHA MI 10
Aluer Yehova Doo U Ishima shi U Ngu a Iwuese yô, Kwagh la Una Mgbegha U u Eren Batisema
“Ka nyi ia yangem u eren batisema?”—AER. 8:36.
ICAM 37 Me Civir Yehova a Uma Wam Cii
KWAGH U I TIM SHA MI KEN NGEREN NE YÔ *
1-2. Er i tese ken Aerenakaa 8:27-31, 35-38 nahan, ka nyi yange i mgbegha Oretiopia u eren tom ken ya u tor la u eren batisema?
U SOO u eren batisema hingir orhenen u Kristu? Dooshima man iwuese mgbegha ior mbagen kpishi er kwagh nahan. Nenge ase ikyav sha kwagh u orgen u eren yange tom hen ya u torkwase u Mbaetiopia yô.
2 Oretiopia la yange kaven er Ruamabera a tese ér gba u una er batisema yô, a kera timbir ga je maa a er. (Ôr Aerenakaa 8:27-31, 35-38.) Lu nyi i mgbegha un u eren kwagh ne? Ikyav tese wang ér Mkaanem ma Aôndo gba un kwagh. Or ne yange lu ôron avur a ruamabera a ken takerada u Yesaia la yemen shin ikyekye na. Shi Filibu va lamen a na yô, or ne lu a iwuese kpishi sha kwagh u Yesu a er sha ci na yô. Kpa lu nyi i na ve ortom u ken ya u tor ne za ken Yerusalem? Lu sha ci u Yehova vande doo un ishima. Er nan se fe nahana? Or ne za civir Yehova ken Yerusalem. A shi nan kpa or ne de kwaghaôndo u i mar un ker la, gema za kohol ikyurior i lu i tseegh i tsegha i sha ci u Aôndo u mimi la. Er Yehova doo un ishima yô, dooshima la shi mgbegha un u eren kwagh u injaa ugen kpaa; a er batisema hingir orhenen u Kristu.—Mateu 28:19.
3. Alaghga ka nyi nahan ia yange or u eren batisema? (Nenge ngeren u kiriki u a lu a itinekwagh ér “ Ishima You Ngi Inja Nena?” la.)
3 Aluer Yehova doo u ishima yô, kwagh la una mgbegha u u eren batisema. Nahan kpa alaghga dooshima shi una fatyô u yangen we u eren batisema. Se ôr nahan se ver ishigh ser nyi? De se tese akav kpuaa. Alaghga ior ou mba hen tsombor kua azende a ou doo u ishima tsung, nahan adooga ishima ngi zan we iyol ér aluer u er batisema yô, vea kôr u ihyom. (Mat. 10:37) Shin alaghga aeren agen doo u ishima kpishi man ka aeren a Yehova a ker a ihyom yô, man gema ka taver we kpishi u den aeren shon. (Ps. 97:10) Gayô, alaghga i mar u je u eren uiniongo shin akaa agen a a zough a kwaghaôndo u aiegh yô. Alaghga ka wea hide a umbur akaa a yange ne er sha uiniongo mbara yô, i doo u. Nahan kwagh la na yô, ka taver we u den uiniongo shin akaa shon a a vihi Yehova ishima la. (1 Kor. 10:20, 21) Nahan a gba u u pine iyol you wer, “Ka nyi shin ka an nan hembe doon mo ishima?”
OR U I GBE U NANA HEMBA DOON WE ISHIMA LA
4. Ka nyi i lu kwagh u vesen u una mgbegha u u eren batisema?
4 Akaa nga kpishi a aa fatyô u doon we ishima shi aa gba u kwagh yô. Ikyav i tesen yô, cii man u va hen Bibilo vea Mbashiada mba Yehova yô, alaghga u vanden nan Bibilo icivir kpishi. Shi alaghga Yesu kpa vande doon we ishima. Hegen u u va fe Mbashiada mba Yehova ne, alaghga u soo u lun a ve imôngo. Nahan kpa aluer akaa a doon a se ter ne doo u ishima tsô maa tese ér kwagh la una mgbegha u u tseghan iyol you sha ci u Yehova shi eren batisema ga. Kwagh u vesen u una mgbegha u u eren batisema yô, saa Yehova Aôndo iyol na una doo u ishima. Aluer Yehova hemba doon we ishima a hanma kwagh ugen cii yô, u de wer kwagh môm shin or môm nana yange u u civir un ga. Aluer Yehova doo u ishima yô, dooshima la una bugh u gbenda u eren batisema shi una lu inja er ka igyar i kuran we sha er u za hemen u civir Aôndo nahan.
5. Ka nyi se lu timen sha mi ken ngeren nee?
5 Yesu yange kaa ér gba u Yehova una doo se ishima a ishima yase cii man a uma wase cii man a mhen wase cii kua a agee a ase cii. (Mar. 12:30) U er nan ve u hen u soon Yehova shi nan un icivir imba la nahana? Aluer u gbidye kwar u nenge er se doo Yehova ishima tsung yô, kwagh la una mgbegha u u we kpa soon un. (1 Yoh. 4:19) Ken ngeren ne, se lu timen sha akaa a a wase u u soon Yehova yô. Shi se time sha akaa a Yehova una doon we ishima je, or a kighir we ga kpa, we iyol you u er yô. *
6. Er i pase ken Mbaroma 1:20 nahan, ka gbenda môm u nyi nahan u fatyô u henen kwagh u Yehova?
6 Hen kwagh u Yehova ken akaa a a gbe la. (Ôr Mbaroma 1:20; Mpa. 4:11) Gbidye kwar nenge imendenev kua annyamev mba Yehova a gbe la, nahan nenge er akaa la a tese kwaghfan na yô. Shi tôô shighe kpuaa hen sha gbenda u kpilighyol u Yehova a er iyol yase la. (Ps. 139:14) Shi hen sha tahav mbu Yehova a er iyange i lu a mi la, man nenge ase yô, iyange ka di ishan i môm ken asan ubiliôn imôngo a Yehova a gbe tsô. * (Yes. 40:26) Aluer u tôô shighe u hen sha akaa a Yehova a gbe la yô, u seer nan un icivir. Nahan kpa, u fan di tsô wer Yehova ngu a kwaghfan kpishi shi ngu a agee la tseegh yô, ka di u tôôn a tôô angahar sha u yan ikyar a na tsô. Cii man Yehova a doo u ishima tsung yô, a gba u u seer henen kwagh na.
7. Cii man Yehova a doo se ishima tsung yô, gba u se hii lun a vangertiôr ser nyi?
7 Gba u u na jighjigh vangertiôr wer u doo Yehova ishima tsung. Ka i taver we u nan jighjigh wer Or u a gbe sha man tar cii la fa u, shi u doo un ishima? Aluer ka nahan yô, umbur wer Yehova ngu “ica a hanmô wase ga.” (Aer. 17:26-28) Yehova “tev asema cii,” shi a tôndozwa a we ér, “aluer ú ker Un yô, ú zua a Na.” (1 Kron. 28:9) Jighilii yô, ityôkyaa i u lu henen Bibilo hegen yô, ka di vough er Yehova a kaa nahan, ér: “M udugh we” m va a mi hen a mo. (Yer. 31:3) Aluer u ngu fan akaa a Yehova a er sha ci wou la seer a seer yô, kape un kpa una lu seer doon we ishima je la.
8. U fatyô u tesen iwuese sha dooshima u Yehova la nena?
8 Gbenda môm u se fatyô u tesen iwuese sha dooshima u Yehova la yô, ka u lamen a na ken msen. Aluer u ngu ôron Yehova mbamzeyol ou kua akaa a nan we ishimanyian la shi sughun un sha hanma kwagh u a er a we yô, una seer doon we ishima. Shi aluer u nenge er Yehova a lu ungwan mbamsen ou yô, kwagh la kpa una seer taver ikyar i u ye vea na la. (Ps. 116:1) Nahan u hingir u lun a vangertiôr je wer Yehova fa u tsembelee. Kpa cii man u seer lun ikyua a Yehova yô, a gba u u hen u fa er i hii ve ngu a soo akaa agen shi a venda agen kua er i hii ve ngu a er akaa agen yô. Shi a gba u u fa kwagh u a soo ér we u eren la. Man gbenda ngu môm tseegh u u kar ve u fa akaa ne yô; gbenda shon yô, ka u henen Mkaanem nam, ka Bibilo je la.
Gbenda u hemban doon u se lu ikyua a Aôndo shi se fa kwagh u a soo ér se er yô, ka sha u henen Bibilo (Nenge ikyumhiange i sha 9) *
9. U tese wer Bibilo gba u kwagh nena?
9 Nôngo Bibilo i i lu Mkaanem ma Aôndo la i gba u kwagh. Ka Bibilo tseegh i pase mimi sha kwagh u Yehova kua akaa a a we ishima u eren sha ci wou la ye. U tese wer Bibilo gba u kwagh sha u ôron i hanma sev shi wan agoyol sha kwaghhenen wou cii ve or u henen Bibilo a we la nana va u henen kwagh a we ye; shi dondon kwagh u u lu henen la. (Ps. 119:97, 99; Yoh. 17:17) U sôr ian u ver i ôron Bibilo sha tseeneke wou hanma sev kpa? U er Bibilo sha aan shon a u ver la vough vough kpa?
10. Ka nyi i ne Bibilo i lu kposo a ityakerada igen ciilii?
10 Kwagh ugen u i lu Bibilo tseegh i lu a mi yô, i ôr kwagh u Yesu u i lu ior mba yange ve nenge a na sha ashe a ve, ve nger yô. Ka Bibilo tseegh i lu takerada u u pase kwagh u Yesu yange er sha ci wou la vough kwagh a shi sha mi ga ye. Aluer u hen akaa a Yesu yange ôr shi er la yô, ka keng kwagh la una mgbegha u, u soo u lun ijende na.
11. U hen u soon Yehova nena?
11 Hen u soon Yesu nahan Yehova una seer doon we ishima. Sha ci u nyi? Ka sha ci u Yesu sua a sua Ter na. (Yoh. 14:9) Sha nahan yô, er u lu seer henen kwagh u Yesu la, u hemba fan kwagh u Yehova shi soon un. Hen ase sha mhôônom ma yange ma kôr Yesu a ior mba mbagenev nengen ve ér ve gba kwagh ga la, er mbaatsanev man mbauangev kua mba ve lu a mpe iyol ga la nahan. Shi hen ase sha akaawan a Yesu a we u ér u dondon ayange ayange la, man er u dondo akaawan shon ve aa wase u ken uma wou yô.—Mat. 5:1-11; 7:24-27.
12. Er u lu henen kwagh u Yesu la, kwagh la una mgbegha u u eren nyi?
12 Aluer u hen sha kwagh u nagh ku ipaan ku Yesu yange va na sha u i de se a asorabo la zulee yô, Yesu una seer doon we ishima keng je. (Mat. 20:28) Zum u u kav er Yesu yange kegh a kegh iyol u kpen sha ci wou yô, kwagh la una mgbegha u u geman ishima shi sônon Yehova wer a de u asorabo. (Aer. 3:19, 20; 1 Yoh. 1:9) Yesu man Yehova vea doon we ishima yô, ior mbagen mba ve soo Yehova kua Yesu la kpa vea gba doon we ishima.
13. Ka nyi Yehova a ne we?
13 Hen u soon tsombor u Yehova. Adooga mba hen tsombor wou man azende a ou a a civir Yehova ga la vea fa ityôkyaa i i ne ve u soo u tseghan iyol you sha ci u Yehova ga. Alaghga je yô vea lu hendan a we. Yehova una na yô, mba ve civir un a we imôngo la vea hingir er ka tsombor wou nahan. Aluer u ngu kôôsôô a ve yô, vea tese u dooshima shi vea na u iwasen i kwagh a gbe u a mi la kpaa. (Mar. 10:29, 30; Heb. 10:24, 25) Shighe a karen yô, alaghga mba hen tsombor wou vea va kohol we ne hingir u civir Yehova imôngo shi dondon akaawan a na kpaa.—1 Pet. 2:12.
14. Er i ôr ken 1 Yohane 5:3 nahan, ka nyi u va mase kaven sha kwagh u atindiakaa a Yehova?
14 Hen u soon akaawan a Yehova shi dondon a. Cii ve u va fa Yehova yô, alaghga yange u eren kwagh er u nenge i doo u shin u soo cii. Kpa hegen u nenge er atindi a Yehova a hemba doon yô. (Ps. 1:1-3; ôr 1 Yohane 5:3.) Hen ase sha akaa a Bibilo i we noov man kasev kua mbamaren man mbayev la. (Ef. 5:22–6:4) U dondo kwaghwan la nahan, u nenge wer hemba saan tsombor wou iyolo? U nenge wer er u lu dondon kwaghwan u Yehova sha kwagh u tsuan azende la kwagh shon wase u we? U nenge wer hemba saan we iyolo? (Anz. 13:20; 1 Kor. 15:33) A shi nan kpa u na mlumun sha mbampin mban wer, een.
15. Aluer u soo u zuan a iwasen er u kar ve u dondo akaawan a Bibilo yô, ka nyi u fatyô u erene?
15 Ashighe agen yô, alaghga a taver we u fan er u dondo akaawan a Bibilo a u lu henen la yô. Ka nahan ve Yehova a ne ityakerada i pasen Bibilo sha ikyev i nongo na i ia wase u u paven kwagh u dedoo a u bo ye. (Heb. 5:13, 14) Aluer u ngu henen ityakerada ne yô, u nenge er i ôr akaa jighilii a a fatyô u wasen we yô, shi kwagh la una na a sar u u we kpa lun ken nôngo u Yehova.
16. Yehova kohol ior nav sha inja nena?
16 Hen u soon nongo u Yehova shi suen u. Yehova kohol ior nav vough vough ken atôônanongo; Wan na Yesu di gema ngu ityough, shin ngu hemen ve cii. (Ef. 1:22; 5:23) Yesu tsua ior mbagen kpuaa mba i shigh ve mkurem yô, sha u ve hemen ken tom u a soo ér i er nyian ne la. Yesu yila nomsombaiorov mbara ér “wanakiriki u jighjigh man u fan kwagh,” shi ve kpa mba numbu sha tom u i we ve u koson shi kuran we sha er kwagh môm a de paven we a Aôndo ga la ze. (Mat. 24:45-47) Gbenda môm u wanakiriki u jighjigh la a nengen sha a we yô, a tsua ior mba ve kom yô, a ver ve mbatamen sha er vea hemen we shi vea kuran we yô. (Yes. 32:1, 2; Heb. 13:17; 1 Pet. 5:2, 3) Mbatamen mban ka ve kegh a kegh iyol u nan ayol a ve a iyoltangen shio sha ci wou, sha er vea surun we ishima shi vea wasen we u seer lun kôôsôô a Yehova yô. Nahan kpa, kwagh ugen môm u hange hange u vea fatyô u eren sha ci wou yô, ka u wasen we sha er we kpa u tese mbagen kwagh u Yehova yô.—Ef. 4:11-13.
17. Er i pase ken Mbaroma 10:10, 13, 14 nahan, er nan ve se ôron mbagen kwagh u Yehova?
17 Wase mbagen ve hen u soon Yehova. Yesu yange kaa a mbadondon un ér ve tesen mbagenev kwagh u Yehova. (Mat. 28:19, 20) Alaghga se lu kuran tindi la sha ci u se nenge ser ka kwagh u i gbe u se er yô. Nahan kpa, er Yehova a lu doon we ishima seer la, we kpa a lu u er ngise lu apostoli Peteru man Yohane nahan. Yange ve kaa ér: “Se fatyô u den u ôron akaa a se ongo man a se nenge la ga.” (Aer. 4:20) Ka sea wase or nana hingir u va fan Yehova yô, kwagh la a na se zua a msaanyol u kwagh ugen môm una na se ga yô. Hen ase sha iember i orivangeli Filibu yange una zua a mi shighe u wase Oretiopia la u henen mimi u ken Ruamabera shi eren batisema yô! We kpa aluer u dondo ikyav i Filibu la sha u eren sha tindi u Yesu a we ér se za pase kwagh la yô, u lu tesen wer u soo u hingir Orshiada u Yehova. (Ôr Mbaroma 10:10, 13, 14.) Alaghga maa we kpa hen shighe la u fatyô u pinen mpin u yange Oretiopia la pine la, wer: “Ka nyi ia yangem u eren batisema?”—Aer. 8:36.
18. Ka nyi se lu timen sha mi ken ngeren u a dondo nee?
18 Aluer u tsua wer u er batisema yô, a lu kwagh u injaa u hemban cii u tsough ken uma wou ye. Er kwagh ne i lu kwagh u iniumbe ga yô, a gba u u time sha inja i kwagh ne zulee. Ka nyi i gbe u u fa sha kwagh u batisemaa? Ka nyi i gbe u u er cii ve u er batisema, man u er batisema kera yô, ka nyi a gba u u za hemen u erene? A na mlumun sha mbampin mban ken ngeren u dondon ne.
ICAM 2 Yehova Ka Iti You
^ par. 5 Ior mbagen Yehova doo ve ishima, kpa ve nenge ér ka a kuma u vea er batisema vea hingir Mbashiada mba Yehova ga. Aluer we kpa kape i lu u la yô, ngeren ne una wase u u hiden gbidyen kwar sha akaa agen a u er jighilii ve aa mgbegha u u eren batisema yô.
^ par. 5 Ior mba kposo kposo, nahan alaghga mbagen vea tsua u eren akaa a i nger ken ngeren ne la sha adondo adondo er i nger nahan ne ga.
^ par. 6 Wea soo u seer nengen akav agen yô, ôr antakerada u ken zwa buter u Was Life Created? (I Gba a Gba Akaaumaa?) kua u The Origin of Life—Five Questions Worth Asking (Mbampin Utaan mba i Doo u Se Pine sha Kwagh u Mhii u Uma Yô) la.
^ par. 61 NGEREN U PASEN FOTO: Anmgbian u kwase ugen ngu nan gumkwase ugen trak ken kasua.
