1. Ka sha gbenda môm u nyi Yobu yange seer fan Yehova?

 YOBU yange lam vea ior kpishi ken uma na, kpa iliam na vea Yehova la i hemba cii. Ken iliam ve la, Yehova kaa a Yobu ér a kenger akaa agen a kpilighyol a Un gbe yô. Kwagh ne yange wase Yobu nenge er Yehova a lu a kwaghfan kpishi, shi a lu a tahav mbu nan mbacivir Un akaa a kwagh a gbe ve a mi la cii yô. Ikyav i tesen yô, Aôndo umbur Yobu er Un koson annyamev yô, nahan una fatyô u nengen sha Yobu kpaa. (Yobu 38:39-41; 39:1, 5, 13-16) Er Yobu hen sha akaa a Aôndo a gbe la yô, a kav akaa kpishi sha kwagh u aeren a Aôndo na.

2. Ashighe agen ka i taver se u timen sha akaa a Yehova a gbe la sha ci u nyi?

² Se kpa aluer se mba henen sha akaa a Aôndo wase a gbe la yô, kwagh la una wase se u seer fan un. Nahan kpa, ashighe agen yô, alaghga a lu se ican u eren kwagh ne. Aluer se mba hen zege geri yô, se fatyô u nengen a akaa a Yehova a gbe la kpishi hanma iyange ga. Aluer se mba ken agar je kpa, alaghga se nenge ser se mba a shighe u kenger akaa a igbetar shi henen sha mi ga. Sha nahan yô, de ase se nenge er i hii ve i doo u se tôôn shighe shi se nôngon kpoghuloo se kenger akaa a Aôndo a gbe la yô. Se time se fa er Yehova man Yesu yange ve tese ikyav sha akaa a igbetar ken ityesen ve, kua kwagh u se er ve se seer henen kwagh ken akaa a igbetar yô.

3. Ka nyi i tese ér Yehova yange soo ér i saan Adam iyol sha akaa a Un gbe laa?

³ Yehova yange soo ér i saan uumace mba hiihii mbara iyol sha akaa a Un gbe la. Yange Aôndo gbe Adam yô, a na un  paradiso u doonashe ér a lu ker, shi na un tom ér a nengen sha paradiso shon shi a samber a mi. (Gen. 2:8, 9, 15) Hen ase er Adam yange una nenge ishamakaa ia mende shi ufaluwa vea mondo ve, i saan un iyol yô. Tom u nengen sha sule u Eden u i na Adam la lu kwagh u icivirigh kpishi! Yehova shi kaa a Adam ér a ii annyamev ati. (Gen. 2:19, 20) Yehova yange ma tsua hanma iti iyol na; kpa gema tom la na Adam. Ka keng Adam yange una kenger annyamev zulee, una nenge anza a ve man aeren a ve cii ve, una mase fan er una yila hanma annyam ye. Shi ka keng yange a maa Adam iyol u eren tom ne. Kwagh ne yange wase un u nengen er Yehova a fe kwagh kpishi, man er akaa a a gbe la a dooashe shi a doo kenger kpaa yô.

4. (a) Ka sha ityôkyaa i môm i nyi i doo u se kenger akaa a igbetar zulee? (b) Ka akaa a igbetar a nyi nahan a hembe doon we?

⁴ Ityôkyaa i môm i i doo u se kenger akaa a igbetar zulee yô, ka sha ci u Yehova soo ér se er nahan. A kaa a vese ér: “Kende nen ashe a en sha, nenge nen.” Maa a pine ér: ‘Ka an nan gbe akaa ne?’ (Yes. 40:26) Akaa a sha man a shin tar kua a shin zegemnger cii ka Yehova a gbe a ye, man a cii nga tesen se kwagh na. (Ps. 104:24, 25) Shi hen ase sha gbenda u Aôndo a gbe se la. A gba se ér se nengen akaa a igbetar a doonashe la i doon se. Shi a gba se sha gbenda u se fatyô u nengen shi ungwan iov man ihyuma, shi benden a kwagh kaven, shi fan mnyohom ma kwagh yô. A gba se sha imba gbenda ne sha er a saan se iyol sha hanma kwagh ken akaa kposo kposo a a gbe la cii yô.

5. Mbaroma 1:20 tese ér aluer se mba kenger akaa a Yehova a gbe la zulee yô, kwagh la una wase se nena?

⁵ Bibilo pase ityôkyaa i vesen igen i i doo u se kenger akaa a Aôndo a gbe la yô. Akaa shon ka a tese se aeren a Yehova a lu a mi yô. (Ôr Mbaroma 1:20.) Ikyav i tesen yô, kenger akaa a Yehova a gbe la, nahan nenge er a er a sha gbenda u kpilighyol yô. Akaa ne tese ér Aôndo ngu a kwaghfan kpishi. Shi nenge akaayan atô kposo kposo a ka se yaan la. Akaayan la cii tese wang er uumace ve doo Aôndo ishima kpishi yô. Ka sea nenge a aeren a Aôndo ken akaa a a gbe la yô, se hemba fan un tsembelee, shi i sar se u kporom hen a na. Hegen se time sha igbenda igen i Yehova a tese ikyav sha akaa a a gbe la u wasen uumace ve hen akaa a vesen yô.

6. Ka nyi se fatyô u henen sha kwagh u annyonov mba ka se nenge ve karen sha aôndo ve yemen ajiir agen laa?

⁶ Yehova ver ashighe. Hanma inyom yô, hii shighe u uwer u Febewari ka u va zurum u  been la zan zan ken atô u uwer u Mei, Mbaiserael yange ve nenge annyonov mba i yer ér ôô-ôô la ve karen sha kwavaôndo ken tar la, ve yemen vegher u ken imbusutarimese. Aôndo kaa a Mbaiserael ér, “ôô-ôô u sha aôndo . . . fa ashighe na.” (Yer. 8:7) Er Aôndo a ver annyonov mban ashighe nahan, kape ashighe a na a ôron ijir kpa a ver je la. Nyian ne, ka sea nenge annyonov vea karen sha aôndo vea yemen ajiir agen yô, kwagh la a umbur se ér se fatyô u nan jighjigh ser Yehova ver “shighe na” u va karen a tar u ifer ne kera.—Hab. 2:3.

7. Gbenda u inyon i vesen i purugh la tese se nyi? (Yesaia 40:31)

⁷ Yehova ne mbacivir un agee. Yehova yange tôndo zwa sha ikyev i Yesaia ér Una na ior Nav agee shighe u ve vôr shin iyol i kpe ve yô, vea “kôndo sha sha akper er ugafa nahan.” (Ôr Yesaia 40:31.) Mbaiserael yange ve nenge ugafa ve purugh ve gbidyen akper kpishi ga kpa, ve yem sha aôndo war war, ken tulugh u kôndon sha. Kwagh ne ka a umbur se ér Yehova una fatyô u nan se agee, er ka a na annyonov mban agee nahan. Aluer u nenge inyon i vesen ngi kôndon sha aôndo war war a u gbidyen akper shio yô, umbur wer Yehova una fatyô u nan we agee a wan ishima a mbamzeyol ou.

8. Yobu yange hen sha akaa a Aôndo a gbe la nahan, kwagh la wase un u fan nyi, man kwagh la tese se nyi?

⁸ Yehova kuma u se na un jighjigh. Yehova yange wase Yobu seer nan un jighjigh. (Yobu 32:2; 40:6-8) Shighe u Aôndo lu lamen vea Yobu la, yange ter akaa kpishi a un gbe yô, kua asan man abeen man inyiar. Yehova shi ôr kwagh u annyamev, er yar man nyinya nahan. (Yobu 38:32-35; 39:9, 19, 20) Akaa ne cii tese er Aôndo a lu a tahav kpishi la tseegh tsô ga, kpa a tese er se doo un ishima, man er a lu a kwaghfan kpishi kpaa yô. Iliam i Aôndo vea Yobu ne na yô, Yobu hen akaa kpishi sha kwagh u Aôndo, nahan na Aôndo jighjigh je hemba ave a tse. (Yobu 42:1-6) Se kpa aluer se kenger akaa a Aôndo a gbe la yô, kwagh la una umbur se er kwaghfan u Yehova a hembe u wase ica, shi tahav nav kpa mbu gande ave yô. Heela tseegh ga, una fatyô u karen a mbamzeyol ase cii kera, shi una er nahan kpaa. Mfe u mimi ne una wase se u seer nan un jighjigh.

9-10. Iyange man ura tese se nyi sha kwagh u Yehova?

⁹ Yesu fa akaa a Aôndo a gbe la tsembelee. Er lu “or u fan tom” yô, lu sha ian i icivirigh i eren tom vea Ter na shighe u lu gban sha man tar la. (Anz. 8:30) Shighe kar yô, Yesu tese mbahenen nav kwagh u Ter na ken akaa a a gbe la, shighe u lu shin tar la. Nenge akaa kpuaa a yange tese yô.

¹⁰ Yehova tesen hanma or dooshima. Ken Ityesen i sha Uwo la, Yesu lam a mbahenen nav sha kwagh u iyange man ura. Ior kpishi mba henen sha kwagh u akaa ne ga. Man saa akaa ne aa lu keng ve akaauma cii aa za hemen u lun ye. Yehova una soo yô ma a vende u nan uumace mba ve civir un ga la akaa ne. Kpa er ior cii ve doo un ishima yô, ka a er iyange i ta shi ura u nôô sha ci u hanma or. (Mat. 5:43-45) Yesu yange tese ikyav ne sha u wasen mbahenen nav u fan er Yehova a soo ér se tesen hanma or dooshima yô. Nahan shighe u se nenge iyange i lu miren shin se nenge ura u lu nôôn, i kundu se iyol yô, se fatyô u umbur er ior cii ve doo Yehova ishima, shin a sangen a sange ga yô. Ikyav na ne ia mgbegha se u tesen imba dooshima la sha u pasen hanma or kwagh.

11. Aluer se mba kenger annyonov yô, kwagh la una taver se ishima ci u nyi?

¹¹ Yehova ne se akaa a i gbe u se lu a mi yô. Yesu shi ôr ken Ityesen i sha Uwo la ér: “Nenge  nen dedoo sha kwagh u inyon i purugh; ngi lôôn iyiav ga, shi ngi sundan shin ngi kohol iyiav ken ayou kpaa ga. Kpa Ter wen u sha la koson i.” A shi nan kpa, mbahenen mba Yesu nenge annyonov lu karen sha kwavaôndo hen ijiir i ve tema la, maa Yesu pine ve ér: “Ne hemba gban kwagh a i gaa?” (Mat. 6:26) Kwagh u Yesu ôr sha dooshima ne wase se u nengen wang er i lu u Yehova una nenge sha a vese keng a bunde ga yô. (Mat. 6:31, 32) Nyian kpa, kwagh u injaa u a lu ken ityesen i sha kwagh u igbetar ne la ngu taver mba ve civir Aôndo sha mimi la ishima her. Yange iyol kpe gumkwase ugen ken tar u Ishpania, u a lu pania yô, sha ci u lu zuan a ijiir i injaa i una tsaan her ga. Kpa va nenge annyonov lu yan ishamakaa shi susen atam a ikyon agen, maa ishima hide taver un. A kaa ér: “Kwagh u annyonov mbara yange umbur mo ér Yehova koson ve, nahan mo kpa una nenge sha a mo.” Ica kera gba ga je maa, anmgbian u kwase la zua a ya.

12. Ka nyi i ôr ken Mateu 10:29-31 sha kwagh u mbaatsator, man kwagh la tese se nyi sha kwagh u Yehova?

¹² Hanma wase nan gba Yehova kwagh. Yesu yange wa mbaapostoli nav kwagh ér ve de cie mbahendan a ve ga, cii mase tindin ve ér ve za pase kwagh ye. (Ôr Mateu 10:29-31.) Yange er kwagh ne sha u ôron kwagh u annyon ugen u Mbaiserael kpishi fa kwagh na yô. Ka annyon u i yer ér atsator la. Sha ayange a Yesu la, annyonov mbara gba ishe ga cii. Kpa Yesu kaa a mbahenen nav ér: “Mô ve môm una gba hen inya a mfe u Ter wen u sha la shio ga.” Maa shi a kaa ér: “Ne gba kwagh hemba mbaatsator imôngo.” Inja na yô, Yesu lu kaan a mbahenen nav ér Yehova nengen hanma ve ér nan gba kwagh, nahan ityôkyaa ngi i vea cia mbatôvon ve a ican ga. Ka keng mbahenen yange vea nenge a mbaatsator hen agar a vesen man a kiriki shighe u ve lu pasen kwagh yô, ve umbur mkaanem ma Yesu man. Shighe u u nenge a annyon u cuku yô, umbur wer u gba Yehova kwagh, sha ci u we kpa “[u] gba kwagh hemba mbaatsator imôngo.” Ngu wasen we, nahan shighe u i lu hendan a we je kpa, de cian ga.—Ps. 118:6.

13. Ka nyi ia wase se u henen kwagh ken akaa a Aôndo a gbe laa?

¹³ Se fatyô u seer henen akaa agen kpishi sha kwagh u Yehova ken akaa a a gbe la. Se er kwagh ne nena? Hiihii yô, gba u se tôô shighe se kenger akaa a igbetar. Se eren nahan cii yô, a gba u se hen sha kwagh u akaa la a tese se sha kwagh u Yehova yô. Ashighe agen alaghga a taver se u eren akaa a ahar ne. Anmgbian u kwase ugen ken tar u Cameroon iti ne ér Géraldine, a kaa ér, “M vese hen zege geri, nahan yange i gba u saa me nôngo kwagh kpoghuloo ve me fatyô u kenger akaa a igbetar ye.” Ortamen ugen iti na ér Alfonso, a kaa ér, “M nenge mer gba u me ver ashighe a me luun mo tswen, me kenger akaa a Yehova a gbe la shi me henen sha kwagh u akaa shon a tesem sha kwagh na yô.”

14. Davidi yange a hen sha akaa a Aôndo a gbe la nahan, kwagh la a tese un nyi?

 ¹⁴ Davidi yange hen sha akaa a Aôndo a gbe la za shimi. A ôr a Yehova ér: “Er m veren ishima sha akaa a sha aôndo a a lu tom u u ahôaveegh Ou, ka uwer man asan a U ver a yô, or ngu nyi ve U umbur nana?” (Ps. 8:3, 4) Sha kpôô yô, Davidi yange una kenger asan a sha kwavaôndo tugh yô, i lu sha ci u doo un u kenger a tseegh tsô ga. Yange a hen sha kwagh u asan a tese un sha kwagh u Aôndo la kpaa. Kwagh la a wase un u nengen er Yehova a hembe sha won cii yô. Ashighe agen Davidi a hen er yange un vese ken yav mbu ngô na yô. Yange una hen sha gbenda u kpilighyol u Aôndo a er iyol na la yô, a seer wuese Yehova er a lu a kwaghfan kpishi yô.—Ps. 139:14-17.

15. Pase igbenda i u nenge a aeren a Yehova ken akaa a a gbe la yô. (Pasalmi 148:7-10)

¹⁵ Er yange i lu Davidi ican ga u zuan a ma kwagh u igbetar henen sha mi zulee nahan, kape se kpa a lu se ican u zuan a mi ga je la. Akaa a igbetar nga kpishi a aa wase se u seer fan kwagh u Yehova yô. Ikyav i tesen yô, u fatyô u nengen a tahav mbu Yehova shighe u iyange i te u yô. (Yer. 31:35) Shighe u u nenge annyon a lu wan iya yô, hen sha kwaghfan u Aôndo a lu a mi la. Aluer u nenge aniwa u cuku hide ngu zendan tsa na iyol na yô, hen er Yehova a gbe ambaakaa la sha u hômon kwagh yô. Shi aluer u nenge ngô nan ngu numben a wan u sha ikyum yô, wuese Yehova er se doo un ishima yô. Se mba a aan kpishi a henen kwagh u Yehova sha ci u akaa a a gbe la cii; a vesen man a kiriki, man a a lu ikyua a vese kua a a lu ica la cii, nga wuese un.—Ôr Pasalmi 148:7-10.

16. Ka nyi i gbe u se kange ishima u erene?

¹⁶ Aôndo u a gbe se la ngu a kwaghfan man dooshima man tahav kpishi, shi akaa a a gbe la cii, hanma yô dooashe. Se fatyô u nengen a aeren ne kua agen kpishi ken akaa a igbetar a a kase se la, aluer se kenger a zulee yô. Se cii se tôôn nen shighe se kenger nen akaa a igbetar shi se henen sha kwagh u akaa shon a tese se sha kwagh u Yehova yô. Aluer se mba eren nahan yô, se hemba kporom hen Aôndo u a gbe se la cii. (Yak. 4:8) Ken ngeren u a dondo la, se nenge er mbamaren vea tese mbayev vev akaa a igbetar sha u wasen ve u kporom hen Yehova yô.