1-2. Ka nyi se lu timen sha mi ken ngeren nee?

AKAV nga kpishi a a tese ér hegen se hemba mban ken mkur u ayange a masejime a tar ne cii yô. Ica a gba ga tsô, Yehova man Yesu Kristu vea tim ugomoti mba ve lu hendan a Tartor u Aôndo la cii kera. Kpa cii man shighe la yô, tor u ken imbusutarimese man tor u ken imbusutariyan vea za hemen u nôngon ityav ayol a ve, shi vea za hemen u tan num sha ior mba Aôndo.

² Se lu timen sha kwaghôron u profeti u i nger ken Daniel 11:40–12:1 la ken ngeren ne. Se fa gomoti u a lu tor u ken imbusutarimese la, shi se lu timen sha ityôkyaa i i ne ve i doo u ishima ia nyian se ga, kpa se suur sha Yehova ser aluer ka nyi je ia va er kpa una yima se yô.

3-4. Ka an nan lu tor u ken imbusutarimese sha ayange nee? Ta iwanger.

³ Yange ityar i i kohol i yilan ér Soviet Union la ngi paven ngi yemen kwagh u i ken inyom i 1991 la yô, ior mba Aôndo mba hen haregh la zua a “aniwasen kpeghee,” inja na yô, ve zua a ian i eren kwagh sha ishima ve. (Dan. 11:34) Yange mba zough a ian ne yô, ve fatyô u pasen kwagh gbar gbar, nahan ica gba ga je iyenge i mbapasenkwagh ken ityar i ngise lu Soviet Union la yem nyôr udubu deri imôngo. Kure kure maa tar u Russia kua ityar igen i i suen u la kar hingir tor u ken imbusutarimese. Er i pase ken ngeren u a kar la nahan, cii man gomoti a lu tor u ken imbusutarimese shin tor u ken imbusutariyan yô, saa gomoti shon una er akaa a atar ne. Saa (1) una hemen ityar i ior mba Aôndo kpishi ve lu ker yô, shi una ta num shin a er ve ican kpaa, (2) una tese sha ieren na  ér un kôr Yehova man ior nav ihyom, (3) una lu nôngon kwagh shin tagher ikyor a tor ugen la.

⁴ Nenge ase atôôkyaa a a ne ve se kaa ser Russia man ityar i i suen un la ka tor u ken imbusutarimese u sha ayange ne yô. (1) Ugomoti mban hemen ken ityar i ior mba Aôndo ve lu ker kpishi yô, shi ve ta num sha a ve kpaa; ve cir tom u pasen kwagh shi ve tôv anmgbianev asev mba nomso man mba kasev udubu deri imôngo mba ve lu hen haregh u ve hemen la a ican. (2) Ieren ve la tese ér ve kôr Yehova man ior nav ihyom. (3) Mba nôngon shin hendan kwagh a tor u ken imbusutariyan u i lu Tahav mbu Tar u Amerika vea Ingila Ve Lu a Mi sha Tar Cii La. De ase se nenge akaa a Russia man ityar i i suen un la ve er man er kwagh shon a tese ér ka ve ve lu tor u ken imbusutarimese yô.

5. Ka nyi Daniel 11:40-43 a ôrô?

⁵ Ôr Daniel 11:40-43. Vegher u kwaghôron u profeti ne cii tsengaôron ka kwagh u shighe u mkur ne. A ôr kwagh u num u tor u ken imbusutarimese man tor u ken imbusutariyan vea lu nôngon shin hendan kwagh ayol a ve la. Ken shighe u mkur ne, tor u ken imbusutariyan man tor u ken imbusutarimese vea lu ‘nôngon num’ er Daniel tsengaôron nahan.—Dan. 11:40.

6. Ikyav tese ér ator ahar ne za hemen u nôngon num ayol a ve nena?

⁶ Tor u ken imbusutarimese man u ken imbusutariyan za hemen u nôngon num ayol a ve sha ci u hanmô ve nan soo u lun gomoti u hemban tahav sha tar. Ikyav i tesen yô, yange Ityav mbi Tar Cii Mbi sha Uhar mbira mbi been yô, ityar i ngise i zom i yilan ér Soviet Union la kua ityar igen i i suen un yô, hingir u lun a tahav sha ajiir kpishi ken Yuropa, nahan lu kwagh u za hemen je ne. Tor u ken imbusutariyan la lumun ér ushoja nav ve gema eren kwagh ken mzough vea ushoja mba ityar igen sha er vea nôngo kwagh a tor u ken imbusutarimese yô. I yilan mzough ne ér NATO. Tor u ken imbusutarimese vea tor u ken imbusutariyan cii ve za hemen u vihin inyaregh kpishi sha er ushoja vev vea lu a ikyav mbi utyaav tsembelee yô. Tor u ken imbusutarimese za hemen u wasen mbaihyomov mba tor u ken imbusutariyan ityav, tor u ken imbusutariyan di kpaa za hemen u suen mbaihyomov mba tor u ken imbusutarimese ken uitya. Ve lu wasen ityar i ken Afrika man Ashia man i ken Latin America. Ken anyom a karen ne, tar u Russia kua ityar igen i i lu suen u la hingir u lun a tahav kpishi sha tar. Shi ka ve eren tom a ukômputa sha u nôngon ityav a tor u ken imbusutariyan. Tor u ken imbusutarimese ka a er tom a akaa a sha kômputa ér una na inyaregh ki tor u ken imbusutariyan la ki saa shi gomoti na kpaa a gba, tor u ken imbusutariyan di kpaa a eren kwagh ne a u ken imbusutarimese la. Tor u ken imbusutarimese la za hemen u tan num sha ior mba Aôndo er kwaghôron u profeti u ken takerada u Daniel vande ôron nahan.—Dan. 11:41.

7. Ka nyi i lu “Tar u icivirigh” laa?

⁷ Daniel 11:41 kaa ér, tor u ken imbusutarimese la una nyôr ken “Tar u icivirigh la kpaa.” Ka tar u han la? Sha ayange a tsua la, tar u Iserael lu tar u u “hemba ityar igen cii mdoom” yô. (Esek. 20:6) Lu ken tar ne ior civir Yehova ye, man lu kwagh u na ve u lu tar u doon kpishi je la. Kpa hii sha iyange i Pentekosti u ken inyom i 33 la je, “tar” la kera lu ma ijiir kpôô kpôô sha tar ga, shi ka kwagh u ua fatyô u lun hen ma ijiir i môm tseegh ga sha ci u ior mba Yehova samber sha tar sha ajiir wue wue hegen. Kpa hegen ne “Tar u icivirigh” la kohol cii ka ityom i ior  mba Yehova ve eren sha tar cii yô, amba er u zan mbamkombo za civir Yehova man u duen kwaghpasen nahan.

8. Tor u ken imbusutarimese la nyôr ken “Tar u icivirigh” sha nyi gbenda?

⁸ Ken ayange a masejime ne, tor u ken imbusutarimese la nyôr ken “Tar u icivirigh” la kwa kimbir kimbir. Ikyav i tesen yô, shighe u Mbanazi mba ken tar u Jamani hingir tor u ken imbusutarimese, hemban je yô, shighe u i lu nôngon ityav mbi tar cii mbi sha uhar la, tor la yange nyôr ken “Tar u icivirigh” la sha u tôvon ior mba a Aôndo a ican shi wuan ve. Yange mba nôngon Ityav mbi Tar Cii Mbi sha Uhar la mba been yô, ityar i yange i kohol cii i yilan ér Soviet Union la maa hingir tor u ken imbusutarimese la. Tor ne yange nyôr ken “Tar u icivirigh” la sha u tôvon ior mba Aôndo a ican shi yemen a ve uikyangen.

9. Ka sha nyi gbenda nahan Russia kua ityar i i suen un la cii i nyer ken “Tar u icivirigh” ken anyom a karen nee?

⁹ Ken anyom a karen ne, tar u Russia nyôr ken “Tar u icivirigh” la. Sha nyi gbenda? Ken inyom i 2017 la, tar u u lu tor u ken imbusutarimese hegen ne cir tom u ior mba Yehova, shi u wuhe anmgbianev asev mba nomso man mba kasev mbagen ken purusu. U venda ér ityakerada yase i de kera lun ken tar la ga, kua Bibilo i New World Translation la kpaa. Heela tseegh ga, u kôr afishi a branci wase a ken tar la u ngohol, shi u ngohol Ayou a Tartor ase kua Ayou a Mkohol ase kpaa. Ngu eren akaa ne cii yô, Mbahemenev mba Shin Itine ôr ken inyom i 2018 la ér, Russia kua ityar i i suen un la cii mba tor u ken imbusutarimese. Nahan kpa, aluer ma gomoti u uumace ngu tôvon ior mba Yehova a ican kpoghuloo je kpa, mayange ka u ior mba Yehova vea yem nôngon ityav a na, shin vea yem nôngon ér a hungwa sha ikyôn kera gomoti ugen a kar a tema ga. Kwagh u ka ve er yô, ka ve dondo kwaghwan u Bibilo u a kaa ér se eren msen sha ci u “mbahemenev cii” la, hemban je yô shighe u ambaaior ne a soo u eren kwagh u alaghga una yange ior u civir Aôndo gbar gbar yô.—1 Tim. 2:1, 2.

10. Tor u ken imbusutarimese la una hemba u ken imbusutariyan laa? Ta iwanger.

¹⁰ Kwaghôron u profeti u ken Daniel 11:40-45 la hemba ôron ka kwagh u tor u ken imbusutarimese. Nahan kwagh ne tese ér tor shon una hemba tor u ken imbusutariyan laa? Ei. Tor u ken imbusutariyan la una lu “uma” her shighe u Yehova vea Yesu vea lu timin ugomoti mba uumace cii sha ityav mbi Armagedon la. (Mpa. 19:20) Er nan se fe nahana? Nenge ase kwagh u kwaghôron u profeti u Daniel man Mpase ve tese ne.

11. Ka nyi Daniel 2:43-45 a lu ôron? (Nenge foto u a lu sha igbende la.)

¹¹ Ôr Daniel 2:43-45. Profeti Daniel ôr kwagh u zegeue ugen u i er un sha akaa atô kposo kposo yô. Alegh a iyolough a eev mbun tile sha ityough ki ugomoti kposo kposo mba yange ve hemen ityar i ior mba Aôndo lu ker kpishi yô. Ugomoti mban hemen sha ashighe kposo kposo. I er angahar a eev mbun sha iyôgh man inyatyuu. Angahar ne tile sha ityough ki gomoti u masetyô ken ugomoti mban, ka tar u Britain man Amerika je la. Kwaghôron u profeti la tese ér, Britain man tar u Amerika vea lu hemen her zan zan shighe u Tartor u Aôndo ua va u timin ugomoti mba uumace cii kera la.

12. Ityough ki sha utaankaruhar ki inyamkyume la tile sha ityough ki nyi, man er nan ve i lu hange hange u se fa kwagh ne?

¹² Apostoli Yohane kpa yange ôr kwagh u ugomoti kposo kposo mba yange ve hemen ken ityar i ior mba Yehova lu ker yô. Ken kwaghôron u profeti u Yohane la, i tôô ugomoti mban i kar sha inyamkyume i lun a mtom mtaankarmhar. Ityough ki sha utaankaruhar ki inyamkyume ne la tile sha ityough ki Tahav mbu Tar  u Amerika vea Ingila Ve Lu a Mi sha Tar Cii La. Kwagh ne ka kwagh u vesen sha ci u i kera tese ér ityough ki gen shi due seer sha mtom man ga. Ityough ki sha utaankaruhar ki inyamkyume ne kia lu hemen zan zan shighe u Kristu vea akumautya a sha aa va u va timin ki kera kua mtom magenem cii la. *—Mpa. 13:1, 2; 17:13, 14.

13-14. Ka an nan lu “Gogi, u ken tar u Magogi” laa, man ka nyi alaghga ia na una mough a ta num sha ior mba Aôndo?

¹³ Kwaghôron u profeti u i nger ken Esekiel la wase se u kaven kwagh u alaghga una er zum u a shi kpuaa u a tim tor u ken imbusutarimese man u ken imbusutariyan la yô. Ka inja ér kwaghôron u profeti u ken Esekiel 38:10-23 man Daniel 2:43-45; 11:44–12:1 kua Mpase 16:13-16, 21 la cii mba ôron ka kwaghmôm nahan. Aluer ka nahan yô, ka kwagh u se hen ser una va er je ne.

¹⁴ Zegecan una va hiin shighe a karen yô, “utor mba sha tar cii” vea zom a kohol imôngo. (Mpa. 16:13, 14; 19:19) Mzough la maa una hingir kwagh u Ruamabera a yer ér “Gogi, u ken tar u Magogi” la. (Esek. 38:2) Mzough u akuraior la una mough a ta num sha ior mba Aôndo cii shi una nôngo ér una tim ve vindi vindi. Ka nyi ia na ve vea mough a ta num sha ior mba Aôndo? Apostoli Yohane yange tsengaôron kwagh u shighe la nahan ér, awombo a vesen osough sha aôndo haa sha mbaihyomov mba Aôndo. Awombo a sha injakwagh ne alaghga a lu loho u ijirigh u tseen u ior mba Yehova vea lu pasen hen shighe shon la. Alaghga tsô a lu loho la ua na ishima ia vihi Gogi u Magogi ker maa una mough a ta num sha ior mba Aôndo a awashima u timin ve sha tar cii ye.—Mpa. 16:21.

15-16. (a) Alaghga tsô ka nyi Daniel 11:44, 45 lu ôron? (b) Ka nyi ia er tor u ken imbusutarimese la vea akuraior agen a vea kohol a lu Gogi u Magogi laa?

¹⁵ Alaghga a lu loho u ua tsee yum ne kua num u mbaihyomov mba Aôndo ne yange i tsengaôron ken Daniel 11:44, 45 kpaa ye. (Ôr.) Daniel yange tsengaôron ken avur la ér “igwa i sha ityoughkitaregh man i ken imbusutarimese” ia ta tor u ken imbusutarimese la mciem iyol, maa una due a “ishima i nyoon tsung.” Awashima u tor u ken imbusutarimese la yô ka  u “timin ior kpishi.” Ikyav tese ér “ior kpishi” mba i er kwagh ve heen ne, ka ior mba Yehova. * Alaghga tsô Daniel lu ôron lu kwagh u num u masetyô u a va ta sha ior mba Aôndo la.

¹⁶ Num u tor u ken imbusutarimese una mough vea ugomoti mba tar ne cii vea va ta sha ior mba Aôndo ne, ua na ishima ia vihi Aôndo Uhembanagee la ker, maa ityav mbi Armagedon mbia pev. (Mpa. 16:14, 16) Shighe la, a tim tor u ken imbusutarimese kua akuraior agen a a kohol a lu Gogi u Magogi la cii, shi “ma or nana wase un kpaa ga.”—Dan. 11:45.

17. “Ortaregh” u i er kwagh na ken Daniel 12:1 la ka ana, man una er nyi?

¹⁷ Ivur i i dondo sha avur shon ken kwaghôron u profeti u Daniel la seer ôron er a tim tor u ken imbusutarimese kua ugomoti mba ve suen un mbara cii yô, man er a yima se la kpaa. (Ôr Daniel 12:1.) Inja i kwagh u ivur la i ôr la ér nyi? Mikael ka iti igen i i yer Tor wase, Kristu Yesu yô. Hii ken inyom i 1914 shighe u i ver Tartor sha la je, ngu “nengen sha” ior mba Aôndo. Shi ica a gba ga tsô, una “mough á tile sha,” shin una tim mbaihyomov nav shighe u ityav mbi Armagedon la. Ityav mbira mbia lu kwagh u masetyô u Daniel kaa ér una er sha shighe u “ican” i hemban vihin cii i ia er uumace la yô. Kwaghôron u profeti u Yohane u i nger ken Mpase la yila shighe u a nyôr ker cii ve ityav mbi shon la ér “zegecan.”—Mpa. 6:2; 7:14.

18. Se fatyô u veren ashe keghen kwagh u a lu van ken hemen la vangertiôr sha ci u nyi?

¹⁸ Se fatyô u veren ashe keghen kwagh u a lu van ken hemen la vangertiôr sha ci u Daniel man Yohane cii kaa ér mba ve civir Yehova shi ve eren Yesu tom yô, vea war shighe u ican la. Daniel kaa ér mba vea war la, a lu mba i “nger” ati ve “ken ruamabera” la yô. (Dan. 12:1) Nahan se er nena ve a nger ati a ase ken ruamabera laa? Gba u se tese sha ieren yase wang ser se na Yesu u a lu Waniyôngo u Aôndo la jighjigh. (Yoh. 1:29) Gba u se tsegha ayol a ase sha ci u Aôndo shi se er batisema. (1 Pet. 3:21) Shi gba hange hange u se sue Tartor u Aôndo sha u wasen mbagen er se fetyô la cii u henen kwagh u Yehova.

19. Ka nyi i gbe u se er hegene, man ka sha ci u nyi?

¹⁹ Ka hegen i gbe u se hen u suur sha Yehova a ishima yase cii kua nongo na u mba ve civir un sha mimi ne ye. Ka hegen i lu shighe u se sue Tartor u Aôndo ye. Aluer se er nahan yô, a va yima se shighe u Tartor u Aôndo ua tim tor u ken imbusutarimese kua tor u ken imbusutariyan la.