IOR kpishi fa wuee nahan ér, ngise la Papiru lu kwagh u ior mba ken Igipiti ngeren kwagh sha mi yô. Yange Mbagrika man Mbaroma kpa ngeren kwagh sha papiru. * Nahan kpa, ior kpishi kera fa er yange i eren utso kpaa sha papiru ga.

Profeti Yesaia yange nger kwagh ugen anyom kar hegen hemba 2,500 nahan wener, ior mba ve lu “yande uifi mba Kushi” shin Etiopia la, tindi “mbatyomov sha zegemnger, sha utso mba ikenaika [‘papiru,’ NWT] sha mnger.” Shi cii man shighe ne yô, tertamen Yobu yange kaa ér ugafa ka ve kar fefa er “utso mba i er ve sha ikenaika [‘papiru,’ NWT] nahan.”—Yes. 18:1, 2; Yobu 9:26.

Ka Aôndo a ne i nger Bibilo ye, ka nahan ve, akaa a mbadughunakaa shin inya ve zough a mi a tesen ér, mimi je, yange i eren utso sha papiru sha ayange a i ngeren Bibilo la, i lu kwagh u kpiligh mba henen Bibilo iyol ga ye. (2 Tim. 3:16) Ka nyi ve zough a mi? Mbadughunakaa shin inya zua a akav a a tese vighe vighe ér, yange i eren utso sha papiru ken Igipiti yô.

Akaakperan kua akaa a i maa sha ukpekpe mba iwar i ken Igipiti yô, tese er ior yange ve za gber papiru, ve va eren utso a mi yô. Yange ior ve za gber papiru, ve kange aile aile, maa ve tôô aile la ve kange a imôngo. Adenga a papiru ka a lu ipye. Sha nahan yô, ka a kangen a imôngo kpene kpene yô, a zua iyol shi a taver kpaa. Takeda ugen u u ôr kwagh u yiase i Igipiti yô kaa ér, utso mba sha papiru mban yange ve lihe i kuma angahar 55 (umita 17) nahan, maa ian i lu i una fatyô u lun a iniaha 10 shin 12 nahan, vegher u keen man kera cii.

Papiru yange de ishar shin pev u Ifi u Nil la. Heela tseegh ga, utso mba sha papiru mban yange ve lu ican u eren yum ga. Shi shighe u ior va hii u gban utso mba vesen sha ikyon la je kpa, ikyav tese ér mbakôronishu man mbatatoo za hemen u eren ikpande i zenden a mi sha mnger kua utso mba kiriki sha papiru.

Yange ior za hemen u eren tom a utso mba ngise i eren sha papiru mban shighe lihe. Sha kwagh u Orgrika u ngeren akaa ugen, u sha ayange a mbaapostoli la a ôr yô, sha shighe la kpa ior zenden a utso mba sha papiru mban.