1. Ka akaa a nyi nahan se kpishi se lu nôngon ser se er kpa se lu fantyô ga?

 I LU nahan u tsua u eren ma kwagh sha ci u Yehova kpa taver we u eren vee? b Aluer ka nahan yô, ka we tseegh ga. Ikyav i tesen yô, anmgbian ugen iti na ér Philip, yange soo ér una seer fan u eren msen, shi una gema eren msen hanma shighe, kpa lu taver un u zuan a shighe u eren msen. Anmgbian u kwase ugen iti na ér Erika, yange soo ér una zaan mkombo u duen kwaghpasen sha shighe, kpa hanma shighe yô, a gba leti. Anmgbian ugen di iti na ér Tomáš, yange nôngo acin imôngo ér una ôr Bibilo jimin cii. A kaa ér: “Yange i maam iyol u ôron Bibilo ga cii. M nôngo kuma acin atar, kpa hanma shighe yô, m ôr m za kighir ken Levitiku maa m de.”

2. Aluer se mba nôngon ser se er kwagh u se we ishima u eren la man se mba fantyô ga kpa, doo u iyol ia kpe se ga sha ci u nyi?

² Aluer u ngu nôngon wer u er kwagh u u we ishima u eren sha ci u Yehova la kpa u ngu fantyô ga yô, iyol i de kpen we ga. Kwagh u kiriki je kpa ka wea nôngon wer u er yô, i tôô u shighe, shi i gba u u nôngo kwagh kpoghuloo ve u fatyô ye. Er u soo wer u kure awashima wou la yô, tese je ér ijende i u ye vea Yehova la ka u kwagh u vesen kpishi, shi u soo wer u civir un sha afatyô wou cii. Iniôngon you la gba Yehova kwagh kpishi. Nahan kpa, fa wer, Yehova veren ishima ér we u er kwagh i hemba kwagh u u fatyô u eren la ga. (Ps. 103:14; Mika 6:8) Nahan shighe u u lu tsuan kwagh u u soo u eren yô, i lu kwagh u u fatyô  u eren yô. U tsuan kwagh la cii yô, u er nan ve u er kwagh shono? De se time sha akaa agen a aa fatyô u wasen we yô.

3. Isharen ka kwagh u vesen sha ci u nyi?

³ Saa u lu a isharen i eren kwagh u u we ishima la taveraa ve u fatyô u eren ye. Aluer u ngu a isharen taveraa yô, u nôngo kpoghuloo u er kwagh u u we ishima la. Se fatyô u tôôn isharen karen sha ahumbe a ka a wasen tso u yemen ape a lu zan la. Aluer ahumbe la za hemen u mgbeghan tso la yô, ortsoo una yem a nyôr ape a lu zan la. Shi aluer ahumbe la taver je yô, una hemba nyôron hen ijiir la fele cii. Nahan se kpa, aluer se mba a isharen taveraa yô, se hemba kôron cio u eren akaa a se we ishima u eren la. Anmgbian ugen ken tar u El Salvador, iti na ér David, a kaa ér: “Ka wea lu a isharen yô, u hemba nôngon kwagh kpoghuloo. Ka u nôngon wer ma kwagh môm a de yangen we u eren kwagh u u we ishima u eren la ga.” Nahan u er nan ve u seer lun a isharene?

4. Ka nyi se fatyô u eren msen sha mini? (Mbafilipi 2:13) (Shi nenge foto kpaa.)

⁴ Sôn Yehova a na u seer lun a isharen. Yehova una fatyô u mgbeghan we sha jijingi na, sha er u lu a isharen i eren kwagh u u we ishima u eren la yô. (Ôr Mbafilipi 2:13.) Ashighe agen yô, ka se tsua u eren ma kwagh sha ci u se fa ser gba u se er nahan, shi u eren nahan la ka kwagh u dedoo. Kpa alaghga se lu a isharen i eren kwagh shon ga. Kape kwagh u anmgbian u kwase ugen ken tar u Uganda kpa a lu je la, iti na ér Norina. Yange tsua ér una hen Bibilo a or, kpa lu a isharen taveraa i eren kwagh ne ga, sha ci u lu henen ér un fa ityesen ga. Ka nyi yange i wase unu? A kaa ér: “Yange m hii u eren msen hen Yehova hanma iyange, sônon un mer a na me seer lun a isharen i henen Bibilo a or. Shi m er kwagh sha msen wam la, m nôngo kpoghuloo mer me seer fan u tesen ior. Iwer ngi karen kpuaa yô, m nenge isharen yam seer. Ken inyom shon la je, m hii u henen Bibilo a iorov uhar.”

5. Ka akaa a nyi nahan se fatyô u henen sha mi sha er se seer lun a isharen i eren kwagh u se we ishima u eren laa?

⁵ Hen sha akaa a Yehova a vande eren sha ci wou la. (Ps. 143:5) Apostoli Paulu yange hen sha erdoo u sha mhôôn u Yehova tese un la, nahan seer lun a isharen i eren tom kpoghuloo sha ci u Yehova. (1 Kor. 15:9, 10; 1 Tim. 1:12-14) We kpa aluer u ngu henen sha akaa a Yehova a vande eren sha ci wou la yô, kape u seer lun a isharen i eren kwagh u u we ishima u eren la je la. (Ps. 116:12) Nenge ase kwagh u yange wase anmgbian u kwase ugen ken tar u Honduras, kure awashima na u lun pania u keke la yô. A kaa ér: “Yange m hen sha akaa a a tese ér m doo Yehova ishima kpishi yô. A wasem u fan nongoior na. Ngu nengen sha a mo shi kuran mo. Er m hen sha akaa ne yô, Yehova seer doon mo ishima, nahan m seer lun a isharen.”

6. Ka nyi igen kpa ia wase se u seer lun a isharene?

⁶ Hemba veren ishima sha akaa a dedoo a aluer u er kwagh u u we ishima la ve, u zua a mi la. Nenge ase kwagh u yange wase Erika u se vande teren kwagh na la ve, hii u zan  mbamkombo sha shighe, er wa ishima la yô. A kaa ér: “Yange m nenge mer m ngu zan mkombo u duen kwaghpasen la sha shighe ga nahan kwagh ngu karen mo kpishi. Kpa aluer m ngu zan mkombo ne faa yô, me fatyô u sughun anmgbianev mba nomso man mba kasev shi lamen vea ve. Shi me fatyô u ungwan akaawan a injaa a aa wasem me hemba fan u eren tom u pasen kwagh la yô.” Erika hemba veren ishima sha iwasen i aluer un ngu zan mkombo u duen kwaghpasen la sha shighe ve una zua a mi la. Nahan kwagh ne wase un gema zan mbamkombo mban sha shighe er wa ishima la. Ka akaa a dedoo a nyi nahan u fatyô u hemban veren ishima sha mini? Aluer u ngu a awashima wer u ôron Bibilo shin u eren msen yô, hen er kwagh ne una wase u u seer lun vea Yehova kôôsôô yô. (Ps. 145:18, 19) Aluer awashima wou ka u nôngon lun a ieren i Orkristu yô, hen er kwagh ne una wase u u hemba lun vea mbagenev doo doo yô. (Kol. 3:14) U fatyô u ngeren atôakyaa a u soo u kuren awashima wou la shin takeda. Nengen atôakyaa a u nger la hanma shighe. Tomáš u se vande teren kwagh na la kaa ér: “Ka mea lu a atôakyaa kpishi a eren kwagh u m we ishima yô, m nôngo m er kwagh shon.”

7. Ka nyi yange i wase Julio vea kwase na ve fatyô u eren kwagh u ve wa ishima laa?

⁷ Luun vea mba vea na u seer lun a isharen yô. (Anz. 13:20) Nenge kwagh u yange wase anmgbian ugen vea kwase na ve, ve fatyô u kuren awashima ve u seer eren tom u pasen kwagh la yô. Iti i anmgbian ne ér Julio, a kaa ér: “Yange se ya ijende a ior mba vea taver se ishima u eren kwagh u se wa ishima u eren la yô, nahan se lu lamen sha kwagh shon vea ve. Mbagenev kpishi ken a ve vande eren kwagh shon, nahan ve lu ôron se akaa a aa wase se yô. Azende ase ne yange a pine se er i lu zan yô, shi ve taver se ishima shighe u i gbe u vea er nahan yô.”

8. Aluer ka u se fatyô u eren kwagh u se we ishima u eren la shighe u se lu a isharen tseegh yô, ka nyi ia ere? (Shi nenge foto kpaa.)

⁸ Nahan kpa, u ôron kwagh sha mimi yô, se cii ayange agen ka se lu a isharen ga. Nahan tese ér se fatyô u kuren awashima wase la gaa? Se fatyô. De se tese ikyav: Ahumbe ka a lu a tahav je a fatyô u daan tso yemen ape a lu zan la. Kpa ahumbe ka a kar kwagen i taver, kwagen di i taver ga. Man ayange agen je yô, alaghga ahumbe aa lu ga kuaa. Shighe u kwagh a lu nahan yô, ornahan tso una kera fatyô u yemen a tso ken hemen gaa? Una fatyô. Ikyav i tesen yô, utso mbagen ka ve lu a injin, mbagenev di ve lu a naha. Nahan ornahan tso una fatyô u yemen a tso la sha ingin la shin sha naha la, ape a lu zan la. Se fatyô u tôôn isharen yase karen sha ahumbe; ayange agen ka se hemba lun a isharen a ayange agen. Man ayange agen di yô, alaghga se lu a isharen i eren kwagh u se we ishima la ga kuaa. Nahan aluer ka u se er kwagh u se we ishima la shighe u se lu a isharen tseegh yô, mayange se fatyô u kuren awashima wase la ga. Kpa er ornahan tso ka nan ker igbenda igen i nana fatyô u yemen nyôron ape nan lu zan la nahan, se kpa se fatyô u nôngon eren kwagh u se we ishima la, shighe u isharen i lu ga je kpaa.  Kwagh ne una lu zange u eren ga, kpa aluer u nôngo u er kwagh u u we ishima la yô, a saan we iyol. Kpa cii man se lam sha kwagh u se fatyô u eren la yô, de se na mlumun sha mpin ugen u a dugh yô.

9. Aluer se mba a isharen i eren kwagh u se tsough u eren sha ci u Yehova la ga kpa se za hemen u nôngon eren kwagh shon yô, ka kwaghbo? Ta iwanger.

⁹ Yehova soo ér se tsua a ishima yase u civir un, shi se civir un saan saan. (Ps. 100:2; 2 Kor. 9:7) Nahan aluer se mba a isharen i eren kwagh u se tsough u eren sha ci u Yehova la ga kpa, se gbaa nôngon her tsôô? Nenge ikyav i apostoli Paulu yange ver yô. A kaa ér: “M ngu gbidyen iyol yam, shi m gema i í hingir kpan.” (1 Kor. 9:25-27) Paulu yange una lu a isharen i eren kwagh u Yehova a soo ér a er la ga kpa, a kighir iyol na a er kwagh shon. Yehova yange lumun a tom u Paulu er sha ci na la kpa? Yange lumun a mi yum! Yange na un injar sha iniôngon na la.—2 Tim. 4:7, 8.

10. Aluer se mba nôngon ser se er kwagh u se tsough u eren la kua zum u se lu a isharen ga je kpaa yô, ka injar i nyi nahan se zua a mini?

¹⁰ Kape se kpa, Yehova ka una nenge sea kighir iyol yase u eren kwagh u se tsough u eren sha ci na shighe u se lu a isharen ga je kpaa ve, i doo un je la. Ka i saan un iyol sha ci u a fa je ér, er ashighe agen ka i doo se u eren kwagh u se tsough la ga nahan kpa, ka se za hemen u eren kwagh shon sha ci u un doo se ishima. Yehova una na se injar sha iniôngon yase la, vough er yange na Paulu nahan. (Ps. 126:5) Se zuan a injar i Yehova yô, alaghga se hii u lun a isharen je kpaa. Anmgbian u kwase ugen ken tar u Poland iti na ér Lucyna, a kaa ér: “Ashighe agen ka i lum pe duen kwagh pasen ga cii, hemban je yô shighe u i tumem iyol yô. Nahan kpa, ka mea due yô, i saan mo iyol kpishi. Msaanyol u ka m zua a mi la ka iyua i kpilighyol.” Sha nahan yô, de se nenge nen kwagh u se fatyô u eren zum u se lu a isharen ga yô.

11. Yehova una wase se u seer lun a ieren i kôron iyol tsaha la nena?

¹¹ Sôn Yehova a wase u u kôr iyol you tsaha. Iyolkôrontsaha ka ieren i kighir iyol you shin kôôm mbamhen kua aeren a ou. Ishember ne ka i hemban ôron kwagh u kighir iyol yase sha er se er kwagh u bo ga yô. Nahan kpa, ka i gba u se kighir iyol yase sha er se er kwagh u dedoo, hemban je yô kwagh u a lu se ican kpishi u eren, shin se lu a isharen i eren ga yô. Umbur wer iyolkôrontsaha ka vegher u ityamegh ki jijingi. Nahan sôn Yehova wer a na u icighan jijingi na, sha er una wase u u lu a ieren i hange hange ne yô. (Luka 11:13; Gal. 5:22, 23) David u se vande teren kwagh na la pase er msen yange wase un yô. Yange soo ér una gema henen kwagh sha tseeneke na hanma shighe cii. A kaa ér: “Yange m sôn Yehova mer a wasem me lu a ieren i kôron iyol tsaha la. Man sha iwasen na yô, m hii u henen kwagh sha tseeneke wam hanma shighe cii.”

12. Kwagh u i ôr ken Orpasenkwagh 11:4 la, una wase se u eren akaa a se tsough la nena?

¹² De keghen wer saa i va due u i doo ga. Ken tar ne, mayange mbamlu asev vea fatyô u doon been ga. Nahan aluer se mba keghen ser i va due se i doo man se er kwagh yô, mayange se fatyô u eren kwagh u se tsough la ga. (Ôr Orpasenkwagh 11:4.) Anmgbian ugen iti na ér Dayniel, a kaa ér: “Shighe môm kpa mbamzeyol mba banen ga. Nahan doo u se kegh ser mbamzeyol asev cii ve bee man se hii kwagh u se we ishima u eren la ga.” Anmgbian ugen ken tar u Uganda, iti na ér Paul, a pase ityôkyaa igen i i doo u se waan a wa ahô ga yô. A kaa ér: “Aluer se hii u eren kwagh u se we ishima u eren la shighe u akaa a taver je kpaa yô, Yehova una wase se.”—Mal. 3:10.

13. Er nan ve i doo u se hii u eren akaa a se tsough u eren la cuku cuku?

¹³ Hii u eren cuku cuku. Alaghga se lu a isharen i eren kwagh u se tsough la ga sha ci u se nenge ser kwagh shon ngu ican u eren gande. Aluer kape kwagh wou a lu la yô, hii u eren kwagh u u  tsough la cuku cuku. Aluer u ngu nôngon wer u lu a ieren i Orkristu yô, hii u tesen ieren shon sha akaa a kiriki. Aluer awashima wou ka u ôron Bibilo jimin cii been yô, hii u tôôn shighe kpuaa kpuaa ôron i. Tomáš u se ter kwagh na ken mhii u ngeren ne la, yange lu nôngon ér una kure awashima na u ôron Bibilo jimin cii been ken inyom môm la, kpa lu fantyô ga. A kaa ér: “Yange m nenge mer mtom ma Bibilo ma m tsua u ôron la ngee gandem. Nahan shi m hide m hii u ôron ken ityô na. Kpa hen shighe ne, m hii u ôron avur kpuaa kpuaa ken hanma ityough, shi m lu ôron henen sha mi. Kwagh ne na yô, Bibilo i ôron hii u doon mo.” Bibilo i ôron gbe doon Tomáš yô, hii u tôôn shighe kpishi ôron i. Ken masejime yô, a ôr Bibilo jimin cii a bee. c

14. Ka mbamtaver mba nyi nahan se fatyô u tagher a mini?

¹⁴ Kwagh er vihi yô, sea lu a isharen, shin sea kôr iyol yase tsaha nan nan kpa, ka keng se tagher a akaa a aa na a taver se u eren kwagh u se we ishima la yô. Ikyav i tesen yô, shighe u zayol a va te sha a vese kpoo yô, alaghga zayol shon una ya se shighe je se kera zua a shighe kpishi u eren kwagh u se we ishima la ga. (Orpa. 9:11) Alaghga se tagher a mtaver u una na iyol ia kpe se, shi se kera lu a agee kpishi ga yô. (Anz. 24:10) Shi er se yen yô, se fatyô u eren akaa agen shami ga, nahan kwagh la una na a taver se kpishi u eren kwagh u se we ishima la. (Rom. 7:23) Gayô shighe ugen a tume se iyol. (Mat. 26:43) Iyange i se tagher a kwagh nahan yô, se er nan ve a hemba se u eren kwagh u se we ishima la ga?

15. Aluer se tagher a mtaver yô maa tese ér kwagh u se we ishima u eren la hemba see? Ta iwanger. (Pasalmi 145:14)

¹⁵ Umbur wer, aluer u tagher a mtaver kpa tese ér kwagh u u we ishima u eren la hemba u ga. Bibilo kaa ér se fatyô u tagher a mbamtaver shin mbamzeyol kwa kimbir kimbir. Nahan kpa, shi i pase se wang ér se fatyô u nôngon eren akaa a se we ishima u eren la, hemban cii je yô sha iwasen i Yehova. (Ôr Pasalmi 145:14.) Anmgbian Philip u se vande teren  kwagh na la kaa ér: “M hembe veren ishima sha ashighe a m nôngo mer me kure awashima wam kpa m fatyô ga la ga. Kpa ka m hemba veren ishima sha ashighe a m hide m hii u eren kwagh shon la.” David u se vande ôron kwagh na la, kaa ér: “M nengen mbamtaver mer ka akaa a yangen mo u eren kwagh u m we ishima la ga. Kpa shighe u m tagher a mbamtaver yô, ka m nenge mer ka ian i tesen Yehova mer a doom ishima kpishi.” Sha kpôô yô, aluer u za hemen u eren kwagh u u we ishima la shighe u u tagher a mtaver je kpaa yô, u ngu tesen Yehova wer u soo u eren ishima na. Nahan a saan Yehova iyol kpishi u nengen er u lu nôngon kpoghuloo wer u er kwagh u u we ishima u eren sha ci na la yô!

16. Shighe u se tagher a mtaver yô, ka nyi se fatyô u henen kere?

¹⁶ Shighe u u tagher a mtaver yô, hen kwagh ker. Hen sha kwagh u a er la. Nahan pine iyol you wer, ‘Ka nyi me er ve kwagh ne una kera kimbir ga?’ (Anz. 27:12) Kpa ashighe agen yô, mbamtaver ka ve tese ér kwagh u se we ishima u eren la ka kwagh u a gande se yô. Aluer u nenge wer alaghga tsô we kpa kwagh wou ngu nahan yô, hide hen sha kwagh u u we ishima u eren la, sha er u nenge aluer ka kwagh u u fatyô u eren yô. d Aluer u fatyô u eren kwagh u u we ishima u eren la ga sha ci u kwagh shon hemba u agee kpa, Yehova una nenge ér kwagh hemba u ga.—2 Kor. 8:12.

17. Er nan ve i doo u se umbur akaa a se hila fetyô u eren sha ci u Yehova laa?

¹⁷ Umbur akaa a u vande eren sha ci u Yehova la. Bibilo kaa ér “Aôndo ban a perapera ga, nahan una hungur a tom wen [ga].” (Heb. 6:10) We kpa akaa a u vande eren la a de hungur we ga. Hen sha ma kwagh u u vande eren yô. Alaghga u fatyô u yan ijende a Yehova, shin ôron mbagenev kwagh na, shin u er batisema. Er yange u za hemen zan zan u er akaa a u tsua u eren sha ci u Yehova ne ken ijime la nahan, kwagh u u tsough u eren hegen ne kpa, kape u zan hemen u nôngon zan zan u kar eren un je la.—Fil. 3:16.

18. Aluer se mba nôngon kpoghuloo ser se er kwagh u se we ishima u eren la yô, ka nyi i gbe u se umburu? (Shi nenge foto kpaa.)

¹⁸ Sha iwasen i Yehova yô, u fatyô u eren kwagh u u we ishima u eren sha ci na la, vough er or u nahan tso u nan za nyer hen ijiir i nan lu zan la saan saan nahan. Kpa umbur wer, mbanahantso mbagenev kpishi kpa ka i saan ve iyol a zende ve. Nahan we kpa, hanma shighe yô, nôngo u nengen er Yehova a lu wasen we la. U er nahan yô, a saan we iyol u nôngon eren kwagh u u we ishima u eren sha ci na la. (2 Kor. 4:7) Aluer u yina ishima ga yô, u zua a averen kpishi je a neer we a neer.—Gal. 6:9.