1-2. Alaghga ashighe agen se nenge mbamsen mba se eren la nena?

 ASHIGHE agen ka i lu u er Yehova ngu ungwan mbamsen ou ga yôô? Aluer ka nahan yô, ka we tseegh ga. Anmgbianev mba nomso man mba kasev mbagenev kpishi kpa kaa ér ka i lu ve nahan, hemba je yô shighe u ve tagher a mbamzeyol yô. Aluer se mba yan ican yô, se kpa alaghga a taver se u nengen er Yehova a lu ungwan mbamsen asev la.

² De se nenge er i hii ve se ne jighjigh ser Yehova ongo mbamsen mba ior nav yô. (1 Yoh. 5:15) Shi se time sha mbampin mban: Alaghga ashighe agen a lu se er Yehova ngu ungwan mbamsen asev ga nahan sha ci u nyi? Ka sha igbenda i nyi nahan Yehova a ongo mbamsen asev nyiana?

3. Er nan ve Yehova a soo ér se eren msen hen a naa?

³ Ruamabera pase se wang ér se doo Yehova ishima kpishi, shi se gba un kwagh je zua ga. (Hag. 2:7; 1 Yoh. 4:10) Ka nahan ve a kaa ér se eren msen hen a na se sônon un iwasen ye. (1 Pet. 5:6, 7) A soo ér una wase se, se za hemen u lun vea na kôôsôô, shi se wa ishima a mbamzeyol mba se tagher a mi la.

4. Er nan ve se fe ser Yehova ongo mbamsen mba ior nava? (Shi nenge foto kpaa.)

⁴ Hanma shighe ka se ôr ken Bibilo er Yehova yange ungwa mbamsen mba ior nav yô. U umbur or môm ken a ve kpa? De se tese ikyav sha kwagh u Tor Davidi. Yange tagher a mbahyomov kpishi mba keren un a ku. Nahan hanma shighe yô, a er msen hen Yehova ér a wase un. Kwagen la zamber a Yehova ér: “Ungwa msen wam, TERE, ver ato sha uzamber av; ungwam sha jighjigh Wou man sha perapera Wou kpaa.” (Ps. 143:1) Yehova  yange ungwa msen u Davidi zamber a na ér a yima un la. (1 Sam. 19:10, 18-20; 2 Sam. 5:17-25) Nahan Davidi fatyô u ôron vangertiôr ér: “TER ngu ikyua ikyua a mba ve yer Un cii, mba ve yer Un sha mimi la cii.” Se kpa se fatyô u lun a vangertiôr ser Yehova ngu ikyua a vese.—Ps. 145:18.

5. Mbacivir Yehova mba sha ayange a tsuaa la yange vea er msen yô, Yehova a ungwa hanma msen ve er ve ver ishima laa? Tese ikyav. (Shi nenge foto kpaa.)

⁵ Shighe ugen yô, alaghga Yehova una ungwa mbamsen asev er se ver ishima la ga. Ka kwagh u yange er apostoli Paulu je la. Yange sôn Aôndo ér a dugh un “asaa ken iyol” kera. Paulu er msen sha zayol ne jighilii kuma kwa tar. Nahan Yehova ungwa mbamsen mbara kpa? Een. Kpa lu sha gbenda u Paulu ver shima la ga. Yehova yange kar a zayol la kera ga, kpa gema na Paulu agee a una za hemen u civir un sha mimi yô.—2 Kor. 12:7-10.

6. Ashighe agen a lu se inja er Yehova ngu ungwan mbamsen asev ga nahan, sha ci u nyi?

⁶ Se kpa alaghga ashighe agen Yehova una ungwa msen wase er se ver ishima la ga. Kpa se fa dedoo ser Yehova fa gbenda u u hembe doon u una wase se yô. Una fatyô u “eren kwagh sha tahav nav mbu mbu eren tom ken a vese la ngeen je hemban akaa a se sônon shin se henen cii la” je kpaa. (Ef. 3:20) Sha ityôkyaa ne yô, ashighe agen una er kwagh sha mbamsen asev hen shighe shin sha gbenda u se ver ishima ser una er la ga.

7. Alaghga a gba u se gema kwagh u se lu eren msen sha mi la sha ci u nyi? Tese ikyav.

⁷ Shighe u se va kav kwagh u a lu awashima i Yehova wang yô, a gba u se de u eren msen sha kwagh u se sônon la, se gema eren msen sha kwagh u a zough sha awashima na shon yô. Nenge ikyav sha kwagh u anmgbian ugen, iti na ér Martin Poetzinger. Anmgbian Poetzinger yange er kwase ica lu a gba ga maa Mbanazi kôr un za wuhe ken afo a mbakwarev. Sha hiihii la, anmgbian ne er msen ér Yehova ma a due a na ken afo a mbakwarev la kera, sha er una nenge sha kwase na shi una hide a hii u eren tom u pasen kwagh la yô. Nahan kpa ukasua mba karen uhar yô, a nenge a ikyav i tesen ér Yehova una bugh ian ér i pase un ga. Maa a hide a hii u eren msen ér: “Yehova, wea lumun yô, tesem kwagh u u soo wer mo m er yô.” Maa a hide a gba henen sha atsan a anmgbianev mbagen lu yan hen afo a mbakwarev la yô. Mbagenev kpishi ishima lu zan ve iyol sha kwagh u kasev vev man mbayev vev. Anmgbian Poetzinger maa er msen ér:  “Yehova, m sugh u sha tom u he u u nem ne, wasem sha er me fatyô u suen anmgbianev av shi taver ve asema yô.” Anmgbian Poetzinger yange tsa hen afo a mbakwarev la anyom ataankaranyiin, man lu kwagh u lu eren vough je la.

8. Ka kwagh u vesen u nyi i gbe u se umbur shighe u se lu eren msene?

⁸ Gba u se umbur ser Yehova ngu a awashima, shi una va kure awashima na shon sha shighe u a soo la. Man awashima shon yô, ka u va karen a mbamzeyol mba ve na ve ican i ngee nyian yum la cii kera, er uaahe man angev man ku nahan. Yehova una kure awashima na ne sha shighe u Tartor na ua lu hemen tar cii la. (Dan. 2:44; Mpa. 21:3, 4) Nahan kpa, Yehova ngu den ér Satan a hemen tar zan zan shighe la. b (Yoh. 12:31; Mpa. 12:9) Sha ci u, aluer Yehova kar a mbamzeyol mba tar ne kera hegen yô, a lu inja er hemen u satan doo nahan. Sha nahan yô, er i gbe keng u se kegh shighe Yehova una va kure uityendezwa nav la nahan kpa, kwagh la tese ér ngu wasen se hegen ga ze. De se time sha akaa agen a Yehova ka a er u wasen se yô.

9. Shighe u i gbe u se tsua akaa a se soo u eren yô, Yehova una wase se nena? Tese ikyav.

⁹ Ka a na se kwaghfan. Yehova tôndo zwa a vese ér una na se kwaghfan sha er se fatyô u tsuan akaa sha inja yô. Shighe u se lu tsuan akaa a se er, shin se lu tsuan akaa a aa wase se ken uma wase, er u lun kwav shin vôson nom shin vôson kwase nahan yô, gba hange hange u se lu a kwaghfan u Aôndo la. (Yak. 1:5) Nenge ase kwagh u yange er anmgbian u kwase ugen u lun kwav yô, iti na ér Maria. c Shighe u lu eren pania u keke ve va zua a anmgbian u nomso la, yange saan un iyol kpishi. A kaa ér: “Yange se ya ijende, nahan er ijende yase lu taver seer a seer yô, dooshima wase kpa lu seer a seer. Yange m fa je mer gba u me tsua kwagh. Nahan m er msen kpoghuloo sha kwagh ne acin imôngo. Yange gba u me dondo kwaghwan u Yehova. Kpa shi m fa mer Yehova una tsua kwagh ne sha ci wam ga.” Yange nenge ér Yehova na un kwaghfan u un sôn un la. Sha nyi gbenda? Yange za tôv sha akaa a yange tsume un yô, ken ityakeda yase, nahan zua a iwanger sha akaa shon. Shi yange ungwa kwaghwan u ngô na u civir Yehova la kpaa. Kwaghwan la yange wase Maria u hiden gbidyen kwar sha akaa a yange lu henen ken ishima la. Nahan kwagh la wase un tsua kwagh u una er la sha inja.

10. Mbafilipi 4:13 kaa ér Yehova una er nyi sha ci u mba civir unu? Tese ikyav. (Shi nenge foto kpaa.)

¹⁰ Yehova ka a na se agee a wan ishima. Yehova una na se agee a wan ishima a mbamzeyol asev, vough er yange na apostoli Paulu nahan. (Ôr Mbafilipi 4:13.) Nenge ase er Yehova yange  wase anmgbian ugen u wan ishima a mbamzeyol nav yô, iti na ér Benjamin. Shighe u Benjamin lu wanye la, un vea tsombor na ve lu hen afo a mbayevese ityav, ken veghertar u Afrika. Benjamin kaa ér: “Yange m lu eren msen hen Yehova hanma shighe cii mer a nam agee a me fatyô u eren kwagh u doon un yô. Yehova yange ungwa mbamsen av sha u nan mo bem u ken ishima kua ishimataver sha er me za hemen u pasenkwagh, shi nam ityakeda yase i ia wasem u lun vea na kôôsôô yô.” Shi a kaa ér: “Er m lu ôron akaa a Mbashiada mbagenev ken ityakeda yase shi nengen er Yehova yange wase ve u wan ishima la yô, m seer zuan a agee a zan hemen u civir un sha mimi.”

11-12. Yehova una fatyô u ungwan mbamsen asev sha ikyev i anmgbianev asev mba nomso man mba kasev nena? (Shi nenge foto kpaa.)

¹¹ Yehova ka a ungwa mbamsen asev sha ikyev i anmgbian asev mba nomso man mba kasev mba ken tiônnongo. Yesu yange er msen kpoghuloo hen tugh mbu mbu mase karen maa na nagh sha uma na la. Yange zamber a Yehova ér a de deen ér ior ve nenge un ér un ngu or u tuhwan Aôndo, nahan ve wua un sha ityôkyaa la ga. Kpa Yehova er nahan ga, gema wase Yesu sha gbenda ugen, tindi ortyom na ugen ken mbatyomov mba ve lu anmgbianev mba Yesu la, va taver un ishima. (Luka 22:42, 43) Se kpa Yehova una fatyô u wasen se sha ikyev i anmgbianev asev mba nomso shin mba kasev. Shighe ugen una mgbegha anmgbian u nomso gayô u kwase, nana yila se sha fon gayô nana va sôr se sha u taver se ishima. Se cii se fatyô u keren aan a ôron “kwaghôron u saan saan” a anmgbianev asev.—Anz. 12:25.

¹² Nenge kwagh u yange er anmgbian u kwase ugen yô, iti na ér Miriam. Nom u Miriam yange kpe ukasua mba kar kpuaa yô, Miriam hingir tswen hen ya. Miriam nenge ér kwagh hemba un, nahan a ure kpishi. Yange vaa je lu fantyô u den ga, nahan soo ér ma un lam a or. A kaa ér: “Yange m lu a agee a yilan or môm ga, nahan m er msen hen Yehova. Er m lu vaan shi eren msen la, or yilam sha fon, lu ijende yase je.” Miriam yange zua a ishimataver ken iliam i anmgbian la vea kwase na. Nahan na jighjigh ér ka Yehova je a mgbegha anmgbian la ér a yila un ye.

13. Ôr kwagh u a tese ér Yehova una fatyô u ungwan mbamsen asev sha ikyev i mba ve civir un ga la.

 ¹³ Yehova una fatyô u ungwan mbamsen asev sha ikyev i mba ve civir un ga yô. (Anz. 21:1) Ashighe agen yô, Yehova ka a ungwa mbamsen mba ior nav sha u mgbeghan mba ve lu ior nav ga la ér ve er kwagh sha ci ve. Ikyav i tesen yô, Tor Artashaseta yange na Nehemia ian ér a hide a yem ken Yerusalem a za wase tom u hiden maan gar la. (Neh. 2:3-6) Nyian kpa, Yehova una fatyô u mgbeghan mba ve civir un ga je kpaa, vea va yima se shighe u kwagh a tser se yô.

14. Ka nyi i doo u sha kwagh u yange er Soo Hing laa? (Shi nenge foto kpaa.)

¹⁴ Anmgbian u kwase ugen iti na ér Soo Hing, yange nenge ér Yehova wase un sha ikyev i ortwer na. Wan na yange ya ican a iangev mbi ken ityou atô kposo kposo. Yange er aikyôr u vihin kpishi. Nahan Soo Hing vea nom na ve de tom ér vea nenge sha a na. Kwagh ne na yô, ve nyôr ken ican i nyar. Soo Hing kaa ér yange uma taver un je, lu un inja er una kera fatyô u wan ishima a ican ga nahan. Nahan maa er msen hen Yehova, pase un er i lu un ken ishima la jighilii, shi sôn un ér a wase un. Ortwer u lu nengen sha zayol u wan shon la, ker gbenda u wasen ve. Kwagh ne na yô, gomoti hingir u nan ve iwasen, shi ve zua a ya u vea fatyô u kimbin yô. Shighe karen yô, Soo Hing kaa ér: “Yange se nenge er lu Yehova iyol na je wase se yô. Sha mimi yô, Yehova ‘ongo msen.’ ”—Ps. 65:2.

15. Ka nyi yange i wase anmgbian u kwase ugen nenge ér Yehova ungwa mbamsen nava?

¹⁵ Ka hanma shighe Yehova a ongo mbamsen asev sha igbenda i kpiligh iyol ga. Kpa akaa a ka a er u tesen ér a ungwa mbamsen asev la, ka i lu akaa a aa wase se se za hemen civir Ter wase u sha la sha mimi yô. Sha nahan yô, ver ishima sha er zum u Yehova a ongo mbamsen ou kpa u fa yô. Anmgbian u kwase ugen iti na ér Yoko, yange nenge ér Yehova ngu ungwan mbamsen nav ga. Nahan maa gema ngeren akaa a yange lu eren msen sônon Yehova la. Shighe karen yô, hide nenge akaa a yange nger shin takeda la, nahan mase kaven er Yehova a ongo mbamsen nav kpishi, kua akaa agen a yange er msen sha mi kpa hungur un kera je kpaa yô. Gba u se henen sha igbenda i Yehova a ongo mbamsen asev la sha ashighe ashighe.—Ps. 66:19, 20.

16. Se tese ser se mba a jighjigh u nan sha kwagh u msen u eren nena? (Mbaheberu 11:6)

 ¹⁶ Ka se tese ser se mba a jighjigh u nan sha u eren msen hen Yehova tseegh tsô ga, kpa kua sha u lumun a nyityô kwagh i a er u tesen ér a ungwa mbamsen asev la cii. (Ôr Mbaheberu 11:6.) Nenge ase ikyav sha kwagh u anmgbian ugen, iti na ér Mike, vea kwase na Chrissy. Yange ve lu a awashima u za eren tom shin Bethel. Mike kaa ér: “Mo vea kwase wam cii yange se wa uwegh shin foom u zan Bethel acin imôngo, shi se er msen hen Yehova sha kwagh shon kwa kimbir kimbir. Kpa i lu yilan se shin Bethel sha won ga.” Mike vea kwase na Chrissy yange ve za hemen u lun a vangertiôr ér Yehova hemba fan ape i doo u vea civir un yô. Nahan ve za hemen u eren kwagh u ve fatyô la cii. Ve lu eren pania u keke hen ijiir i kwagh hemba gban sha mba pasen kwagh yô, shi suen tom u maan kwagh u nongo u Yehova u eren la. Nyian mba eren tom u zenden sôron atôônanongo. Mike kaa ér: “Ka hanma shighe cii Yehova a ongo mbamsen asev sha gbenda u se ver ishima la ga. Kpa ka a ungwa ve sha igbenda i hemban doon a igbenda i se ver ishima ser una ungwa la ica je.”

17-18. Pasalmi 86:6, 7 kaa ér se fatyô u lun a vangertiôr ser nyi?

¹⁷ Ôr Pasalmi 86:6, 7. Orpasalmi Davidi yange na jighjigh ér Yehova ungwa mbamsen nav shi er kwagh sha mi. We kpa u fatyô u nan jighjigh nahan. Ikyav i ior mba se ôr kwagh ve ken ngeren ne la tese ér, Yehova una na se kwaghfan kua agee a se fatyô u wan ishima a mbamzeyol asev yô. Una fatyô u wasen se sha igbenda igen sha ikyev i anmgbianev asev mba nomso man mba kasev mba ken tiônnongo, shin mba ve civir un ga je kpaa.

¹⁸ Er i lu hanma shighe Yehova a ongo mbamsen asev sha gbenda u se ver ishima la ga nahan kpa, se fa ser shighe u se er msen hen a na yô, una ungwa. Una na se kwagh u una wase se la vough man sha shighe vough kpaa. Yô za hemen u eren msen shi na jighjigh wer Yehova una ungwa mbamsen ou. Lu a vangertiôr wer hegen kpa Yehova una nenge sha a we, shi ken tar u he u u lu van la, una ‘na hanma kwagh u uma sha isharen na, a kuma un.’—Ps. 145:16.