1. Ka icin i nyi apostoli Paulu yange ta Mbakristu mba ve lu civir Aôndo vea na imôngo laa? (Nenge foto u a lu sha mhii u ngeren ne la.)

ALAGHGA tsô apostoli Paulu yange nger Mbakristu mba ken Kolose washika shighe u zurum u una due ken purusu u za sha kwa hiihii ken Roma la, shin nger ve washika ne er ken inyom i 60 zan zan 61 la nahan. Yange pase ve er lu hange hange u vea lu a “mkav u ken jijingi” yô. (Kol. 1:⁠9) Paulu shi kaa ér: “M ngu ôron nahan sha u ma or nana̱ de kera tsughun ne sha kwaghôron u sha msendegh ga. Ver nen ishima, or nana̱ de ker ne yemen a ven sha kwaghfan shin sha atseregh a gbilinigh ga. Akaa ne ka sha inja i ukaaer mba ior la, shi ka sha inja i ujijingi mba taregh mba hiihii, kera ka sha inja i Kristu a lu ga.” (Kol. 2:​4, 8) Maa Paulu za hemen u pasen er i hii ve mbamnenge mbagenev mba ior kpishi ve lumun a mi la yange ve doo ga yô, kua er i hii ve mhen u taregh a doo uumace mba ve yen ne ishima la kpaa. Ikyav i tesen yô, alaghga mhen u taregh una na or nana nenge ér nan fa kwagh shin nan hemba mbagenev. Yange nger washika la sha u wasen anmgbianev u vendan mhen u taregh man aeren a kpeegh.​—⁠Kol. 2:​16, 17, 23.

2. Se lu timen sha igbenda i tar u henen kwagh la sha ci u nyi?

² Mhen u taregh ka a nenge akaawan a Yehova ér a gba kwagh ga, shi ngu a tahav mbu mbua fatyô u vihin jighjigh wase u nan kure kure yô. Nyian ne, se cii se mba tagher a mhen u taregh ne. Mba samber a mhen ne sha televishen man sha Intanet man hen ijiirtom kua ken makeranta kpaa. Ken ngeren ne, se lu timen sha kwagh u se fatyô u eren sha u mhen la a de nyer ken a vese, hôngor asema a ase ga yô. Se lu timen  sha igbenda itian i i tese er tar u henen kwagh la, kua er se fatyô u vendan i la kpaa.

3. Ka mnenge u nyi a doo ior kpishi ishima, man ka sha ci u nyi?

³ “Me fatyô u lun or u injaa a u nan jighjigh mer Aôndo ngu shio.” Ken ityar kpishi ka u ungwa ior kpishi ve kaa ér ve na jighjigh ér Aôndo ngu ga; ka ve nenge ayol a ve ér ve mba ior mba eren kwaghaôndo ga. Ka ve ôr nahan sha ci u alaghga ve vande timen sha kwagh u Aôndo ngu la zulee ga, kpa gema doo ve u lun sha tseeneke ve, eren kwagh sha ishima ve. (Ôr Pasalmi 10:⁠4.) Shi alaghga mbagenev vea nenge ér aluer ve kaa ér, “Me fatyô u eren akaa sha inja a u mo nan jighjigh mer Aôndo ngu shio” yô, a tese ér ve mba a kwaghfan u taregh la.

4. Aluer or kaa ér Aôndo u a gbe akaa cii la ngu ga yô, se fatyô u wasen nan nena?

⁴ Kwagh u mbananjighjighga ve kaa ér Aôndo u a gbe akaa cii ngu ga la, tese kwaghfan je he? Aluer or yem timen sha akaa a mbasainsi ér nana fa aluer uma gba duen tsô shin i gba un a gba yô, kwagh la una tsume a nan kpishi. Kpa jighilii yô, kwagh ne taver u fan ga cii. Aluer iyou i gbe lun tsô ga, saa or nana maa i yô, hide akaauma ve aa gba duen tsô yee! Jighilii yô, aveghemakaa a nderan uma a a lu ken tar ne la wa ker kpelegh kpelegh hemba hanma iyou cii yem ica je sha ci u aveghemakaa ne nga fetyô u tseren aveghemakaa agen, kpa iyou i môm ngi i ia fatyô u eren kwagh ne ga. Aveghemakaa ne nga a gbenda u nga a koso mkaanem ma nderan uma la, maa a va kura mkaanem ma shon a wa ken aveghemakaa a he, sha er aveghemakaa a he la kpa, a a tser ayol a a yô. Ka an yange nan gba aveghemakaa nee? Bibilo na mlumun ér: “Hanma ya yô, or maa un a maa, kpa u A maa akaa cii yô, ka Aôndo.”​—⁠Heb. 3:⁠4.

5. Se fatyô u kaan ser nyi sha kwagh u ior ve kaa ér or a fatyô u tsuan kwagh u vough a u nan Aôndo jighjigh shio laa?

⁵ Se fatyô u kaan ser nyi sha kwagh u ior ve kaa ér or a fatyô u tsuan kwagh u vough a u nan Aôndo jighjigh shio laa? Mkaanem ma Aôndo tese ér mbananjighjighga vea fatyô u eren akaa agen sha gbenda u vough. (Rom. 2:​14, 15) Ikyav i tesen yô, alaghga mbamaren vev vea doo ve ishima shi vea naan ve icivir. Kpa aluer or venda ér Aôndo u a gbe se shi se doo un ishima la, ngu a ian i wan se atindi sha kwagh u a lu u vough man u bo ga nahan, akaa a nan tsough u eren sha ishima i nan la, aa lu sha inja je kpa? (Yes. 33:22) Ior kpishi mba lun a kwaghfan nyian vea lumun ér mbamlu mba vihin tsung mba ve lu zan hemen ken tar ne la, tese ér gba u Aôndo una wase uumace. (Ôr Yeremia 10:23.) Sha nahan yô, gba u mayange se hen ser or a fatyô u fan kwagh u dedoo tsembelee a u or shon nan Aôndo jighjigh shin kuran atindi a na shio ga.​—⁠Ps. 146:⁠3.

6. Ka mnenge u nyi ior kpishi ve lu a mini?

⁶ “Aluer u ngu ken kwaghaôndo ga kpa, a saan we iyol.” Mhen u taregh ne doo ior kpishi ishima sha ci u ve nenge ér kwagh gba sha kwaghaôndo ga, shi ka kwagh u nan or msaanyol ga. Shi ukwaghaôndo kpishi mba tesen ityesen i igyamusu la, shi mba ngohol môm ken upue shi mba suen pati u eren, nahan kwagh ne na ior kpishi kera soo kwagh u Aôndo ga. Sha nahan yô, kera kpiligh se iyol er i hii ve ior kpishi ve nenge ér aluer ve mba ken ma kwaghaôndo ga kpa, a saan ve iyol la ga! Alaghga ambaaior la a kaa ér: “Kwagh u akaa a ken jijingi doom, kpa m soo u lun ken ma kwaghaôndo ga.”

7. Kwaghaôndo u mimi ka a na bem a seer lun nena?

⁷ Mimi je, or a fatyô u lun ken kwaghaôndo ga kpa, a saan nan iyolo? Sha kpôô yô, aluer or ngu ken kwaghaôndo u aiegh ga yô, a saan nan iyol, kpa nana fatyô u zuan a msaanyol u mimi ga, saa nana ya ikyar a Yehova, u Bibilo i er kwagh na ér ngu “Aôndo u sar sar” la. (1 Tim. 1:​11, NW) Hanma kwagh u Aôndo a eren cii ngu uumace a iwasen. Ka i saan mbacivir un iyol sha ci u ve hemba veren ishima sha u wasen mbagenev. (Aer. 20:35) Ikyav i tesen  yô, nenge ase er mcivir u mimi ka a na msaanyol a seer lun hen tsombor yô. Mcivir u mimi ka a tese se u nan nom shin kwase wase icivir, shi nengen iceghzwa i ivesegh yase la ser ka icighankwagh shi palegh idya shi yesen mbayev mba nan ior icivir shi tesen dooshima u mimi. Sha nahan yô, mcivir u mimi ne ngu wasen ior mba Yehova tar sha won cii, mba eren tom ken bem shi tesen dooshima ken tiônnongo.​—⁠Ôr Yesaia 65:​13, 14.

8. Mateu 5:3 una fatyô u wasen se u fan kwagh u ka a va or a msaanyol la nena?

⁸ Se fatyô u timen sha mhen u taregh u a kaa ér aluer or ngu civir Aôndo ga kpa, a fatyô u saan nan iyol la nena? Nenge ase sha mpin ne, Ka nyi ka i va or a msaanyolo? Mbagenev ka ve zua a msaanyol sha u eren ma tom shin anumbe shin ma kwagh ugen u ka ve er shighe u ve lu a akaa ave kpishi ga yô. Mbagenev di ka ve zua a msaanyol sha u nengen sha tsombor ve shin azende a ve. Akaa ne cii aa fatyô u nan se msaanyol, kpa kwagh u vesen ngu u ka a va or a msaanyol u tsôron yô. Er se lu annyamev ga yô, se fatyô u fan Aôndo u a gbe se la shi civir un sha mimi. I gba se sha gbenda u saa se er kwagh ne keng ve, se zua a msaanyol ye. (Ôr Mateu 5:⁠3.) Ikyav i tesen yô, mbacivir Aôndo sha mimi ka ve zua a msaanyol man ishimataver kpishi sha u kohol imôngo civir Yehova. (Ps. 133:⁠1) Shi ka i doo ve er ve lu ken mzough vea anmgbianev vev tar sha won cii shi ve lu a uma u dedoo shi ve lu a ishimaverenkeghen i sagher iyol yô.

9. (a) Ka mhen u nyi ior kpishi ken tar ne ve lu a mi sha kwagh u yaven a or laa? (b) Mkaanem ma Aôndo venda kwagh u nomsoor shin kwase yaven a or u nan vese nan ga la sha ci u nyi?

⁹ “Hii nan i vende ér or a vôso nom shin kwase ga yô, nana de yaven a nan ga?” Alaghga ior vea kaa a vese ér: “Se mba uma sha ci u i saan se iyol. Hii nan i vende ér or a vôso nom shin kwase ga yô, nana de yaven a nan ga?” Mhen u i dugh a mi ér aluer Orkristu er idya kpa ka kwaghbo ga la, ka u shami ga. Ka u shami ga sha ci u nyi? Sha ci u Mkaanem ma Aôndo yange idya i eren. * (Ôr 1 Mbatesalonika 4:​3-8.) Yehova ngu a ian i wan se atindi sha ci u ka un a gbe se ye. Tindi u Aôndo u a kaa ér saa or a er kwase shin nom keng ve nana yav a nan la, ka môm ken akaa a i gbe u a er ken ivese yô. Aôndo wa se atindi sha ci u se doo un ishima. Atindi ne ka a wase se. Icombor i i kor atindi ne la cii, ka i lu ken dooshima shi i lu ken mkor shi mba hen icombor shon ve naan ayol a ve icivir. Kwagh u peren atindi a Aôndo sha apera la, doo un ga.​—⁠Heb. 13:⁠4.

10. Orkristu nana fatyô u palegh idya nena?

¹⁰ Mkaanem ma Aôndo tese se er se palegh idya yô. Gbenda môm u se fatyô u eren kwagh ne yô, ka u kôron iyol yase tsaha sha kwagh u se kenger la. Yesu kaa ér: “Hanma or u nana kenger kwase sha u nana tôm un yô, nan er idya a na ken ishima je ve. Man aluer ishe you i ken iyan ia na u anzughul yô, dugh i, ta kera.” (Mat. 5:​28, 29) Sha nahan yô, gba u Orkristu nana palegh u nengen ufoto mba ijimbagh shin ungwan ityogholov mbi idyaa. Apostoli Paulu yange nger Mbakristu mba ve lu civir Aôndo vea na imôngo la washika kaa ér: “Wua nen alegh a en a shin tar la kera, ka idya” je la. (Kol. 3:⁠5) Heela tseegh ga, gba u se kôr iyol yase tsaha sha kwagh u se henen sha mi shi se lamen sha mi la.​—⁠Ef. 5:​3-5.

11. Alaghga se soo ser se lu a tom u injaa sha ci u nyi?

¹¹ “Kwagh u vesen u ka a va or a msaanyol yô, ka tom u uke.” Ior kpishi ka ve taver se ishima ér se hemba nan ishima yase sha kwagh u eren tom u uke la. Ka ve nenge ér aluer se er  imba tom la yô, ia fatyô u nan se due iti shi se lu a tahav shi se lu yôughyôugh kpaa. Er ior kpishi ve nengen tom u uke ér ka kwagh u hemban cii ken uma yô, alaghga Orkristu kpa nana hingir u lun a mhen ne.

12. Kwagh u zan ikyura ken tom u uke la, ka kwagh u a ve or a msaanyol yôô?

¹² Aluer or za ikyura ken tom u uke, u ua na nana hingir u lun a tahav man icivir yô, nana zua a msaanyol u tsôron mimii? Ei. Umbur wer isharen i keren ser se hemen mbagenev shi i wuese se la ka akaa a yange mee Satan yô. Er a zough a kwagh u lu keren la nahan kpa, a gema a nyôr ken ishimavihin, shi saan un iyol kpaa ga. (Mat. 4:​8, 9; Mpa. 12:12) Ka se zua a msaanyol u tsôron u or ka nan zua a mi sha u wasen ior ve kav kwaghfan u Aôndo, sha er vea zua a uma u tsôron la, kpa tom u uke yô, ua fatyô u van se a msaanyol cuku tseegh. Heela tseegh ga, gesa ngee ken tar ne kpishi. Gesa ne ka a mgbegha ior ve nôngon ér vea hemba zan ikyura a mbagenev shi ve gbaan ve iyuhe, kpa ken masejime yô, kwagh ne cii a lu u “zendan di ahumbe ityô tsô.”​—⁠Orpa. 4:⁠4.

13. (a) Gba u se nenge kwagh u tsuan tom u uke la nena? (b) Er Paulu a tese ken washika na u nger hen Mbatesalonika la nahan, ka nyi yange i na un msaanyol tsung-nu?

¹³ Mimi yô, gba u se nenge sha ayol a ase, shi kwaghbo ngu ken kwagh u tsuan tom u ua doo se u eren la ga. Kpa gba u tom u se tsough u eren la ua hingir kwagh u hemban cii ken uma wase ga. Yesu kaa ér: “Or môm môm ngu u nana fatyô u eren uter uhar tom ga; gadia nana kôr ugen ihyom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.” (Mat. 6:24) Ka sea hemba nan ishima yase cii sha u civir Yehova shi tesen mbagenev Mkaanem nam yô, se zua a msaanyol u kwaghgen môm una fatyô u van se a mi ga yô. Ka imbakwagh u yange er apostoli Paulu je la. Shighe u lu gumor la, tsua u eren tom u ua na una za ikyura ken kwaghaôndo u Mbayuda la yô, kpa ka er yange va hingir or u geman ior hingir mbahenen la, shi nenge er ve lu ungwan loho u Aôndo shi u lu geman uuma vev la ve, saan un iyol sha mimi ye. (Ôr 1 Mbatesalonika 2:​13, 19, 20.) Tom ugen môm kpa ua fatyô u nan se imba msaanyol la ga.

14. Alaghga mhen u uumace vea fatyô u sôron mbamzeyol vev ayol a ve la, una doo ior sha ci u nyi?

¹⁴ “Uumace vea fatyô u sôron mbamzeyol vev ayol a ve.” Alaghga mhen u taregh ne una  doo ior kpishi. Sha ci u nyi? Sha ci u aluer kwagh ngu nahan yô, tese ér gba u Aôndo una hemen uumace ga, shi vea fatyô u eren kwagh u ve soo u eren la cii. Shi mhen u a kaa ér uumace vea fatyô u sôron mbamzeyol vev ayol a ve la, alaghga una kuma mbagenev ken ato sha ci u akaatôvon agen tese ér ityav man iferkwagh man angev man ican cii mba panden. Kwaghtôvon ugen kaa ér: “Ityôkyaa i i ne ve kwagh a lu zan a uumace doon yô, ka sha ci u ve tsua ér vea gema tar ne u hingir ijiir i dedoo.” Mkaanem mara tese ér uumace mba nôngon u sôron mbamzeyol mba ve tagher a mi ica i gbe hegen kpishi nee? De se time sha mbamzeyol mban zulee, sha er se zua a mlumun sha mpin ne yô.

15. Ka akaa a nyi a tese ér uumace mba tagher a mbamzeyol mba vesene?

¹⁵ Ityav: I ker ahaba nahan ér, ityav mbi tar cii mbi sha môm man mbi sha uhar la yange mbi wua ior miliôn 60, shin hemba nahan. Hii shighe u Ityav mbi Tar Cii Mbi sha Uhar bee la je zan zan hegen, uumace za hemen u nôngon ityav. Ken inyom i 2015 la nahan, ityav man mtev u sha ican na iyenge i mba ve undu uya vev la seer kuma iorov miliôn 65. I ker ahaba nahan ér, ken inyom i 2015 la tseegh, ior mba kuman er miliôn 12 man dubu deri unyiin nahan, undu uya vev. Iferkwagh: Er aferakaa agen a pande sha ajiir agen nahan kpa, aferakaa er iferkwagh i sha Intanet man ipila i hen ya man tswam nahan, nga seer sha gbenda u kpilighyol. Heela tseegh ga, ior kpishi na jighjigh ér, anyighe u i lu eren tar sha won cii la ngu seer a seer. Uumace ve fatyô u been a iferkwagh ga. Angev: Uumace ve fatyô u been iangev mbigenev ga. Kpa kwaghtôvon ugen ken inyom i 2013 la tese ér hanma inyom yô, iorov miliôn utaankarunyiin, mba ve yen anyom 60 yô, ka ve saa ku sha ci u ve gba angev mbu ishimav shin strooku shin kyansa shin shogaa gayô angev mbu sha ijôahan. Ican: Sha kwagh u World Bank a kaa yô, ken inyom i 1990 la, ior mba ve kungu ican ken Afrika tseegh kuma iorov miliôn 280 nahan, kpa mba va nyer ken inyom i 2012 la yô, iyenge ne seer kuma miliôn 330 nahan.

16. (a) Hii nan ve i lu Tartor u Aôndo tseegh ua fatyô u sôron mbamzeyol mba uumacee? (b) Ka averen a Tartor a nyi Yesaia man orpasalmi ve tsengapasen ér uumace vea va zua a mini?

¹⁶ Nyian ne, ior mba ve lu hemen iniongo i i lu nengen sha inyar man pati la soo ayol a ve tseegh. Kwagh ne tese wang ér, ambaaior la aa fatyô u been a ityav man iferkwagh man angev kua ican ga, ka Tartor u Aôndo tseegh ua fatyô u been a akaa ne kera ye. Nenge ase kwagh u Yehova una va er sha ci u uumace ne. Ityav: Tartor u Aôndo ua bee a akaa a vesen a a ve a ityav la cii kera; ua bee a Satan iyolna kera, kua anyighe man kwaghaôndo u aiegh man kwagh u or soon iyol i nan tseegh la, man kwagh u or soon tar u nan la, man ambaakaa la nahan. (Ps. 46:​8, 9) Iferkwagh: Hegen je kpa, Tartor u Aôndo ngu eren kwagh u gomoti ugen môm a fatyô u eren ga yô; ngu tesen ior umiliôn imôngo u lun a dooshima shi nan ayol a ve jighjigh. (Yes. 11:⁠9) Angev: Yehova una va bee ior nav hanma ityô i uange cii, nahan vea hingir gbong gbong. (Yes. 35:​5, 6) Ican: Yehova una va bee a ican shi una na ior nav vea hingir yôughyôugh ken jijingi, man mlu ne hemba doon a inyaregh yem ica je.​—⁠Ps. 72:​12, 13.

17. U fatyô u vendan mhen u taregh nena?

¹⁷ Aluer u ungwa mhen u taregh u una fatyô u vihin jighjigh wou yô, tôv sha kwagh u Mkaanem ma Aôndo ma er sha mhen shon la, shi lam vea orgen u nan vie ken jijingi u ne civir Yehova imôngo yô sha ikyaa shon. Time fa er i hii ve ior ve soo mhen shon la, man er i hii ve imba mhen la i doo ga yô, kua er u fatyô u vendan un la kpaa. Sha kpôô yô, se cii se fatyô u vendan mhen u taregh sha u dondon kwagh u Paulu yange wa tiônnongo u ken Kolose la, ér: “Zenden nen sha kwaghfan hen mba ve lu ken won la . . . Fa nen er i doo u nea ôr kwagh a hanma or yô.”​—⁠Kol. 4:​5, 6.