1. Ka mnenge u nyi mbacivir Aôndo sha mimi kpishi ve lu a mi sha kwagh u asorabo a ve?

APOSTOLI Paulu yange kaa ér un ngu “or u gban kera”! (Rom. 7:24) Mbacivir Aôndo sha mimi kpishi kpa lumun a mkaanem nam mara. Dyako u isholibo i se ye la na yô, se cii se mba yan ican, nahan aeren a ase nga a zua sha isharen yase i eren ishima i Yehova la ga yô, alaghga se nenge ser se gba kera. Mbakristu mbagenev mba ve er isholibo i vesen la je yô, nenge ér Aôndo a fatyô u den ve a kwaghbo ve ga.

2. (a) Pasalmi 34:22 pase er i gbe u mbacivir Aôndo vea de ér ibo i ken ishima i hemba ve ga nena? (b) Ngeren ne una time sha nyi? (Nenge ngeren u kiriki u a lu a itinekwagh ér “ Ka Akav a Agar a Waren Ker la A Til sha Mi la I Doo u Se Time sha Mi Shinii, Ka Akaa a Se Fatyô u Henen Ker laa?”)

² Nahan cii kpa, Ruamabera pase se wang ér gba u mba ve yeren ken Yehova la vea de ér ibo i ken ishima i hemba ve ga. (Ôr Pasalmi 34:22.) Kwagh u yeren ken Yehova la wa nyi kere? Ka igbenda i nyi i gbe kpee u se dondo ve Yehova una zungwe se mhôônom shi una de se a kwaghbo? Se zua a mbamlumun sha mbampin mban sha u timen sha kwagh u agar a yeren ker, a yange i ver sha ayange a Iserael u tsuaa la. Jighilii yô, yange i eren kwagh ne sha ikyev i ikuryan i Tindi, u kwagh na bee sha Pentekosti u inyom i 33 la. Kpa umbur  wer lu Yehova na Tindi la ye. Sha nahan yô, agar a yeren ker, a yange i ver sha ayange a tsuaa la, wase se u fan mnenge u Yehova a lu a mi sha kwagh u isholibo man mbaasorabo kua mgemshima la. Kpa hiihii yô, yange i ver agar ne sha ci u nyi, man lu nyi i eren kere?

3. Yange or a wua orgen sha apera yô, Mbaiserael ve er nena?

³ Sha ayange a Iserael u tsuaa la, Yehova nenge kwagh u ior haan awambe a or inya la cii beelee ga. Or yange nana wua orgen sha apera yô, anngô u or u i woo nan la u nomso, u nan lu ikyua ikyua la, nan wua or u nan woo or la. I yilan or ne ér “or u oron iyev.” (Num. 35:19) Ieren ne yange i wam awambe a orshôô a i hee inya la. Yange a wua or u nan woo orgen la fese yô, kwagh ne a na Tar u Ityendezwa la, u kera hôngor ga, sha ci u Yehova wa tindi ér: “Nahan yô, de hôngor nen tar u ne tem ker ne ga; gadia awambe [a orumace a i hee inya la] nga a hôngor tar.”​—⁠Num. 35:​33, 34.

4. Yange or a wua orgen abu yô, Mbaiserael ve er nena?

⁴ Kpa yange or a wua orgen abu yô, Mbaiserael ve er nena? Er nan woo or abu nahan cii kpa, yange nan lu a ibo i haan awambe a orshôô inya. (Gen. 9:⁠5) Nahan kpa, yange i zungwe nan mhôônom, sha u nan nan ian i yevese or u oron iyev i awambe la yemen hen môm ken agar ataratar a a lu ajiir a waren la. Nana za nyôron hen ijiir i waren la yô, nan zua a mkor. Maa i gba u or u nan woo orgen abu la nana lu ken gar u waren la zan zan zegepristi una kar kpen.​—⁠Num. 35:​15, 28.

5. Agar a waren ker a yange i ver la, aa fatyô u wasen se u seer kaven kwagh u Yehova nena?

⁵ Yange lu uumace ve due a mhen u veren agar a waren ker la ga. Yehova iyolna yange kaa a Yoshua ér: “Ôr kwagh a Mbaiserael, kaa ve wer: Ver nen agar a waren ker.” Agar ne lu ajiir a i “tsegha” yô. (Yos. 20:​1, 2, 7, 8) Er lu Yehova iyolna tsegha agar ne hingir ajiir a eren icighankwagh her yô, se fatyô u pinen ser: Kwagh u yange i sôr i ver ne wase se u hemban kaven mhôônom ma zungwen ma Yehova wang nena? Shi kwagh ne tese se nyi sha kwagh u se er ve se kpa se fatyô u yeren ken a na nyiana?

6, 7. (a) Pase tom u mbatamen yange ve lu a mi u ôron or u nan woo orgen abu la ijir yô. (Nenge foto u a lu sha mhii u ngeren ne la.) (b) Yange lu sha inja u or u yevese la nana za hen mbatamen sha ci u nyi?

⁶ Yange i gba u or u nan woo orgen abu la, “nana̱ pase mbavesen [shin mbatamen]” mba ve lu hen hunda gar u waren, u nan yevese nan yem her la. Yange i gba u a ngohol nan doo doo. (Yos. 20:⁠4) Shighe a karen yô, i hide i yem a nan hen mbatamen mba hen gar u yange na wua or her la, nahan mbatamen mbara ve ôr nan ijir. (Ôr Numeri 35:​24, 25.) Mbatamen mbara vea ôron or u yevese ne ijir, vea kuren ér nan wua or abu yô, i mase hiden a nan ken gar u waren ker la.

⁷ Yange i wa mbatamen tom ne sha ci u nyi? Sha ci u ve wase nongo u Iserael u za hemen u lun wang shi ve wase or u a woo orgen abu la nana nenge er Yehova a zungu mhôônom tsung yô. Ortimen sha akaa a ken Bibilo ugen nger wener, aluer or u yevese la nan za hen mbatamen ga yô, “kwagh a tser nan tsung.” Shi a kaa ér: “Awambe a nan a hide sha ityough ki nan, sha ci u nan lumun mkor u Aôndo a ne nan la ga yô.” Iwasen yange lu sha ci u or u nan woo orgen abu la, kpa gba u nana ker i shi nana lumun i kpaa. Aluer nan za yer hen môm ken agar a Yehova tsegha ér a lu ajiir a yeren la ga yô, anngô u or u nan woo nan la, nana lu a ian i wuan nan.

8, 9. Gba u Orkristu u nan er isholibo i vesen la, nana za ker iwasen hen mbatamen sha ci u nyi?

⁸ Nyian ne kpa, aluer Orkristu nan er isholibo i vesen yô, gba u nana ker iwasen hen mbatamen mba ken tiônnongo sha er nana hide a civir Yehova sha mimi yô. Kwagh ne ngu  hange hange sha ci u nyi? Kwagh u hiihii yô, ka Yehova a ne mbatamen tom u ôron mba ve er asorabo a vesen la ijir, er i tese ken Mkaanem nam nahan ye. (Yak. 5:​14-16) Kwagh u sha uhar yô, kwagh ne ka a na Aôndo a za hemen u kuran mbaasorabo mba ve gem ishima la, shi ve palegh isholibo. (Gal. 6:1; Heb. 12:11) Kwagh u sha utar yô, i na mbatamen tom ne, shi i tsaase ve sha er vea taver mbaasorabo mba ve gem ishima la ishima, shi vea wase ve u panden mnyoon man ibo ve i ken ishima la yô. Yehova yila nomsombaiorov mba ve vie ken jijingi mban ér “ijiir i yeren uraahumbe.” (Yes. 32:​1, 2) U nenge wer kwagh ne ka gbenda u tesen mhôônom ma zungwen ma Aôndo ga he?

⁹ Mbacivir Aôndo kpishi zua a myôhôryol u or ka nana ker iwasen hen mbatamen shi nana lumun i ve, nan zua a mi la. Ikyav i tesen yô, anmgbian ugen u i yer un ér Daniel yô, yange er isholibo i vesen, kpa taver un u pasen mbatamen isholibo na la iwer kar imôngo je. A kaa nahan ér: “Shighe yange karen kpishi yô, m nenge mer kwaghmôm kera ngu u mbatamen vea fatyô u eren sha u wasen mo ga. Nahan hanma shighe ishima i nyian mo sha akaa a a va due ken ieren yam la. Shi shighe u mea eren msen hen Yehova yô, m hii sha u zamber a na mer a yam anyi sha kwaghbo u m er la.” Ken masejime yô, Daniel za ker iwasen hen mbatamen. Daniel hidi henen sha hanma kwagh u za hemen la cii yô, a kaa ér: “Mimi yô, yange cier mo iyol u zan hen a ve. Kpa shighe kar yô, lum inja er or nan shirim zegeuikya u m tee nahan. Hegen yô, m nenge mer me fatyô u sônon Yehova ken msen gbar gbar, a kwaghmôm u yangen mo shio.” Nyian ne, Daniel ngu a imoshima i wang, shi semberee ne, i na un diakon.

10. Ka kwagh u nyi nahan, yange gba u or u nan woo orgen abu la nana er cii ve a zungwe nan mhôônomo?

¹⁰ Yange i gba u or u nan woo orgen abu la nana er kwagh ve a zungwe nan mhôônom ye. Yange i gba u nana yevese a yem hen gar u waren ker, u a lu ikyua ikyua a nan la. (Ôr Yosua 20:⁠4.) Lu u or u yevese la nana fatyô u nengen kwagh ne ashe ashe ga, sha ci u aluer nan yevese fele fele nan za nyôr ken gar la ga, shi  nan lu ker ga yô, a wua nan! Yange gba u nana de akaa agen a kar nan. Yange gba u nana undu tom u nan man mkpeyol u hen ya u nan shi nana de zende, zan zan zegepristi a kar kpen. * (Num. 35:25) Kpa yange nana er akaa ne yô, nan war. Aluer or u yevese la nan undu gar la yô, nana lu tesen ér nan ngu a ikyo i wan sha awambe a uma, a nan hee inya la cuku tsô kpaa ga, nahan uma u nan una hingir u lun sha zongo.

11. Ka aeren a nyi aluer Orkristu u nan gem ishima la nana lu a mi ve a tese ér nan ngu nengen mhôônom ma zungwen ma Yehova la beelee ga?

¹¹ Mbaasorabo mba ve gem ishima nyian la kpa, gba kpee u vea er kwagh ve Aôndo una zungwe ve mhôônom ye. Gba u se undu gbenda wase u bo la vindi vindi, inja na yô, se de u eren isholibo i vesen tseegh tsô ga, kpa shi se palegh asorabo a kiriki a ashighe kpishi nga a na or hingir u za eren isholibo i vesen la kpaa. Icighan jijingi yange mgbegha apostoli Paulu pase akaa a Mbakristu mba ken Korinte mba ve gema asema la er yô. A nger wener: “Imbashima i veren i ken ven ne, ka ishima i vihin i i dugh her Aôndo la i ne ne i ye, man shi iyolpalegh man mvihi u kwagh a vihi ne ishima la man mciem, man gbashima man ishima i tseen man mtsaha u nan cii.” (2 Kor. 7:​10, 11) Aluer aeren a ase tese ér se mba veren ishima sha er se palegh isholibo yô, kwagh ne una tese Yehova ér se haa iyol inya ga, shi mhôônom nam ma zungwen la kpa, se nenge ma beelee ga.

12. Ka nyi alaghga a gba u Orkristu nana de ér i kar nan sha er Aôndo una za hemen u zungwen nan mhôônomô?

¹² Ka nyi alaghga a gba u Orkristu nana de ér i kar nan sha er Aôndo una za hemen u zungwen nan mhôônomô? Gba u nana kegh iyol u den ér kwagh u a doo nan ishima tsung la je kpa a kar nan, aluer ka u kwagh la una na nan nana gba ken isholibo yô. (Mat. 18:​8, 9) Aluer azende a ou agen nga nôngon ér, aa kighir we u er akaa a a doo Yehova ishima ga nahan, u fatyô u paven ijende a ve je kpa? Aluer u ngu nôngon wer u maan ikyôhô akuma akuma yô, u kegh iyol u palegh ashighe a a na u fatyô u man kwagh karen ikyaa inya la je kpa? Aluer u ngu nôngon wer u hemba asaren a idyaa la yô, u ngu palegh ufiim shin ajiir a sha Intanet shin akaa agen a a fatyô u nan we u henen sha akaa a wang ga la kpa? Umbur wer, hanma kwagh u se de a kar se sha er se za hemen u civir Yehova sha mimi yô, ka kwagh u dedoo je se er ye. Kwaghmôm kpa vihi kuma sha kwagh u se nengen ser Yehova kende se la ga. Kpa shi ka sea nenge ser ‘erdoo na u tsôron’ la ngu sha a vese yô, kwaghmôm a na se mkom i kuma sha kwagh la ga.​—⁠Yes. 54:​7, 8.

13. Pase er hii ve or u yevese la yange nan nenge ér kwagh ngu u eren nan ga, shi nan zua a msaanyol ken gar u waren ker la yô.

¹³ Yange or u yevese la nana za nyôron ken gar u waren ker la yô, kwagh u eren nan a kera lu ga. Yehova ôr kwagh u agar la, kaa ér: “A̱ hingir ne ajiir a waren.” (Yos. 20:​2, 3) Yehova yange kaa ér i ôr or u a woo orgen abu la ijir kwa môm tseegh, shi i na or u oron iyev la kpa ian i nyôron ken gar la za wuan or u yevese la ga. Sha nahan yô, mayange or u yevese la nan lu a mciem ér a va wua nan ga. Shighe u nan lu ken gar ne la cii, kwagh u eren nan a lu ga, sha ci u Yehova ngu kuran nan. Gar u yeren la lu purusu ga, sha ci u i na or u yevese la ian i eren tom shi wasen mbagenev shi civir Yehova ken bem. Sha mimi yô, yange lu u nana fatyô u zuan a msaanyol man mkom ken uma!

14. Orkristu u nan gem ishima la nana fatyô u lun a vangertiôr u nyi?

¹⁴ Ior mba Aôndo mbagenev, mba yange ve er isholibo i vesen kpa ve gema ishima yô nenge ér, ibo ve i ken ishima la wuhe ve ken “purusu” je yô, ve nenge ér Yehova una za hemen u nengen ve ér isholibo i vesen i ve er la, hôngor ve gbem sha won. Aluer ka mnenge u u  lu a mi la yô, fa wang wer Yehova ka una de u a kwaghbo yô, mhôônom nam ma sha a we! Daniel, u se vande ôron mkaanem nam la, kav ér mimi je kwagh ka a lu nahan. Mbatamen yange mba kôôm un shi mba wasen un u hiden lun a imoshima i wang yô, a kaa ér: “Ishima yange i gbam shimi. Yange mba nengen sha ikyaa la tsembelee mba been yô, ityôkyaa kera lu i ishima ia zer nan mo ibo ga. I nenge sha isholibo la, nahan kwagh u i bee. Er Yehova a kaa nahan, ka a shir u ikyav, a za har ica a we. Shi a tsa kpa u kera nenge a mbi ga.” Yange or u yevese la nana za nyôron ken gar u waren ker la je, ityôkyaa i kera lu i ishima ia lu nyian nan sha kwagh u or u oron iyev i awambe la ga. Kape Yehova kpa ka una de se a isholibo yase ve, i kera gba u se cia ser ngu keren ityôkyaa i una va nder isholibo la, shin una va kimbir u ôron se ijir sha isholibo shon i môm ga je la.​—⁠Ôr Pasalmi 103:​8-12.

15, 16. Tom u Yesu u Orpaan man Zegepristi la na u ngu a vangertiôr wer Aôndo una zungwe u mhôônom nena?

¹⁵ Jighilii yô, se hemba mban a ityôkyaa i vesen a Mbaiserael, i lun a vangertiôr ser Yehova una zungwe se mhôônom. Paulu yange pasen er un nôngo sha afatyô na cii ér una er ishima i Yehova vough, kpa un kanshio cii yô, a kaa ér: “I̱ wuese Aôndo sha Yesu Kristu Ter wase!” (Rom. 7:25) Mimi yô, er Paulu nôngo kwagh a isholibo kua asorabo a ngise er, kpa gema ishima sha mi la nahan kpa, yange lu a vangertiôr ér Aôndo de un a asorabo a na la ken Yesu. Er Yesu a lu Orpaan wase yô, ka a wanger imoshima yase shi a na se bem u ken ishima la. (Heb. 9:​13, 14) Er a lu Zegepristi wase yô, “mba ve lu van hen Aôndo ve karen hen Na yô, Un fatyô u yiman ve been cii, gadia ngu lun uma gbem sha u Una er msen sha ci ve yô.” (Heb. 7:​24, 25) Aluer tom u zegepristi la, na Mbaiserael vangertiôr ér a de ve a asorabo a ve yô, tom u Zegepristi wase Yesu la na yô, se hemba mban a vangertiôr cii ser, “sé ngohol mhôônom ma zungwen man shi i̱ lumun se sha mhôôn, i̱ wase se sha shighe vough.”​—⁠Heb. 4:​15, 16.

¹⁶ Nahan cii man se fatyô u yeren ken Yehova yô, gba u se na naagh ku Yesu kura jighjigh. De nengen wer naagh ku ipaan kura ku a inja sha ci u ku wasen ior kpishi tseegh tsô ga. Kpa na jighjigh wer naagh ku ipaan kura bende a we jighilii. (Gal. 2:​20, 21) Fa wer ka naagh ku ipaan kura ku ne ve i gbe u a de u asorabo a ou ye. Shi fa wer naagh ku ipaan kura na u ishimaverenkeghen i va lun uma gbem sha won. Naagh ku Yesu kura ka iyua i Yehova a ne u yô.

17. U soo wer u yer ken Yehova sha ci u nyi?

¹⁷ Agar a waren ker la, ka ikyav i tesen mhôônom ma zungwen ma Yehova. Kwagh ne yange na yô, Aôndo pase wang er uma a lu icighankwagh tseegh tsô ga kpa, shi kwagh ne tese er mbatamen ve wasen se man kwagh u a lu mgemshima u mimi, man er i hii ve i gbe u se lu a vangertiôr ser Yehova de kwaghbo vindi vindi yô. U ngu yeren ken Yehova kpa? Ijiir igen i yeren i i hembe ingin yô ngi ga! (Ps. 91:​1, 2) Ken ngeren u dondon ne, se lu nengen er agar a waren ker la aa fatyô u wasen se u dondon ikyav i hemban cii, i Yehova a ver sha kwagh u ijirôron i mimi man mhôônom ma zungwen yô.