ANMGBIANEV mba nomso man mba kasev kpishi mba yange ve yem ken ityar igen sha u vea za ker inyaregh yô, ve cin ve hide ken ityar ve. Er Yehova man ior mbagen ve doo ve ishima yô, kwagh ne mgbegha ve, ve yem sha ajiir a kwagh a hembe gban sha mbapasenkwagh u Tartor yô. (Mat. 22:37-39) Ka akaa a nyi nahan ve de a kar ve, man ka averen a nyi Yehova a ne ve? De se nenge kwagh u anmgbianev mban, mba ken tar u Cameroon, tsô se fa.

Ken inyom i 1998 la, anmgbian ugen u i yer iti na ér Onésime yô mough ken Cameroon ape i lu tar na la, yem ken tar ugen. Yange tsa ken tar la kuma anyom 14. Iyange igen la ze mkombo yô, a ungwa i ôr injakwagh igen sha kwagh u tom u pasen kwagh. Ornankwaghôron la kaa wener, “Aluer iorov uhar mba ve lu azende yô, za ishu i kôron hen ajiir kposo kposo man u môm ngu hemban kôron ishu a ugen la nahan, u hen wer or u a lu kôron kpishi ga la, una yem ape ijende na u a lu hemban kôron la a lu la gaa?”

Injakwagh ne yange i kôr Onésime ken ishima, nahan gba henen sha kwagh u hiden yemen ken Cameroon ape ior kpishi soo u henen Bibilo yô, sha er una za wase mbapasenkwagh tom ker yô. Nahan kpa, ishima lu nyian un sha akaa agen. Er un za tse ken tar ugen ica i gbe ne, shi una hide ken tar na nahan, a hoghol un a uma u ker la je kpa? Onésime soon ér una fa, aluer ka u una hide kpa una fatyô u lun ker yô, a va ken tar u Cameroon, va tsa iwer ateratar. Ken inyom i 2012 la, maa kura ikyav hide.

Onésime kaa wener: “Yange gba u me hide me nôngo a hoghol mo iyol a iceenyolough kua uma u ken tar wase. Ken Iyou i Tartor kpa gba u me hide me hen u teman sha ubenci mba i var kwagh u leghem sha mi ga yô.” Kpa a se teghelee man a kaa ér, “nahan kpa er m lu hemban veren ishima sha mbamkombo yô, kwagh u mkônom ma kundu kundu ma yange m teman sha mi ken Ayou a Tartor agen la, hii u hungur mo.”

Ken inyom i 2013 la, Onésime vôso Géraldine. Un di yange tsa ken tar u Frans anyom ataankaranyiin cii ve hide ke tar u Cameroon ye. Ka averen a nyi nahan anmgbian ne vea kwase na ve zough a mi sha u veren tom u Yehova hiihii ken uma ve? Onésime kaa wener: “Mo vea kwase wam yange se za Makeranta u Mbapasen Ivangeli i Tartor imôngo shi se er tom shin Betel. Ken inyom i i kar ne, iorov 20 mbahenen Bibilo ken tiônnongo wase er batisema. Hegen ne m nenge mer, m ngu hen ijiir i hemban doon i ‘kôron ishu’ i sha injakwagh la.” (Mar. 1:17, 18) Géraldine di kaa wener: “M zua a averen kpishi hemba er yange m hen la.”

Judith di yange mough ken tar na yem ken tar u Amerika, nahan cii kpa sar un tsung u ma un seer u eren Yehova tom. A kaa wener, “Hanma kwa u yange mea va sôr tsombor wam ken Cameroon a kuman u me yem yô, m gba vaan sha ci u i gba u  me hide me yem, me undu ior mba m va hii u henen Bibilo a ve yô.” Nahan cii kpa, lu taver Judith u hiden ken Cameroon. Yange eren tom u i kimbin un inyaregh tsembelee ki una fatyô u nengen sha ter na u lu dedoo ga ken Cameroon la yô. Kpa Judith suur sha Yehova, nahan a cin hide ken Cameroon. Judith kaa ér, m kera zough a akaa agen heen er yange i lu ken Amerika ve, kpem iyol la ga. Nahan a er msen ér Yehova a wase un sha er a hoghol un yô, shi ortamen u sôron atôônanongo vea kwase na kpa ve taver un ishima nahan kwagh la wase un.

Zum u Judith hide umbur er yange un hide ken Cameroon ve akaa lu la yô, a kaa ér, “Saan mo iyol kpishi er m wase iorov unyiin ve er batisema ken atô u anyom atar yô.” Judith yange hingir ikpur pania. Hegen ne, un man nom na Sam-Castel mba eren tom u sôron atôônanongo. Nahan kpa, kwagh u ter u Judith la di za nena? Judith vea tsombor na yange ve zua a iyouci ken tar ugen, i i lumun u eren ter na twer gbilin yô. Kwagh er doo yô, yange i pav un shi kwagh za iyol ga.

Anmgbian ugen u i yer iti na ér Victor yô, yange yem ken tar u Kanada. Yange er ngeren ugen ken Iyoukura sha kwagh u makeranta u vesen yô, a hide hen sha kwagh u makeranta u lu zan la. Nahan a de yunivasiti i lu zan la, hide za hii u henen tomaveegh. A kaa wener: “Kwagh ne yange wasem m ngôôr zuan a tom ga, shi m tôô pania u vande lun kwagh u sarem tsung u eren la.” Shighe kar yô, Victor vôso Caroline, maa ve va zende ken tar u Cameroon. Mba ve zende ne yô, ve kar ve za shin iyagh ki branci, nahan anmgbianev mbagen za taver ve ishima ér ve nenge aluer ka u vea fatyô u va eren tom u pasen kwagh ken Cameroon yô. Victor kaa wener: “Yange se nenge a ityôkyaa i vendan ga, kera ga je kpa se vanden eren kwagh akuma akuma ken uma wase, nahan se lumun.” Er Caroline lu a akaa a nyoon a yange a zaan un iyol nahan kpa, ve hide ken tar u Cameroon.

Victor man Caroline maa hii u eren pania u keke sha er vea wase ior kpishi mba ve zua a ve mba ve lu a isharen i henen Bibilo la yô. Yange ve vande eren tom koson inyaregh, nahan ve lu a kwagh u kuren mbamgbe vev. Shighe kar yô, ve hide ve yem ken tar u Kanada ve za er tom iwer kpuaa, nahan ve zua a inyaregh shi ve hide ken tar u Cameroon ve va za hemen a tom pania ve. Ka averen a nyi nahan ve zough a mi? Yange ve za Makeranta u Mbapasen Ivangeli i Tartor shi ve er tom u ikpur pania, hegen ne mba wasen tom u maan akaa a nongo u Yehova. Victor kaa wener, “Yange se pande akaa ken uma wase se gema se suur sha Yehova, nahan nenge sha a vese doo doo.”

Ken inyom i 2002 la, gumor ugen u i yer iti na ér Alain yô, lu zan yunivasiti igen ken tar u Jamani. Yange ôr trak u Ikyaior—Ne Er Nyi a Uma Wene? la. Kwagh u ôr ken trak ne la wase un u tsuan akaa a una er yô. Ken inyom i 2006 la, a za Makeranta u Tsaase Mbashiren Tom nahan i kaa ér a za er tom u pasen kwagh ken tar na, ken Cameroon.

Alain za nyer ken Cameroon yô, a zua a tom u una eren sha ashighe ashighe yô. Shighe kar yô, a zua a tom ugen u i lu kimbin un inyaregh tsembelee yô, kpa ishima gema lu zan un iyol ér tom ne ua va yange un u eren tom u pasen kwagh er un soo la. Nahan yange mba va lôhôn un ér a za er tom ikpur pania yô, orti kar a kar. Ior mba ve tôô un tom la ve kaa ér vea seer un inyaregh, kpa Alain ti venda, nahan yem za hingir ikpur pania. Shighe kar yô, Alain vôso Stéphanie, un di yange tsa ken tar u Frans anyom imôngo. Ka mbamtaver mba nyi nahan Stéphanie hide ken Cameroon ve tagher a mi?

Stéphanie kaa wener: “Yange ankaam hii u nyoon mo atô kposo kposo shi mea ya akaa agen shin mea ungwa ihyuma i akaa agen yô, i kera doom iyol ga. Nahan kpa a hiin je m nôngo m zua  a icigh, nahan m zua a guda.” Alain man Stéphanie yange ve zua a injar sha ishimawan ve la. Alain kaa wener: “Yange se za kwaghpasen ken agar hen anijiir ugen u lu ica hiinii yô, i yilan un ér Katé. Nahan se zua a ior ker kpishi mba ve soo u henen Bibilo yô. Shighe kar yô, se lu henen Bibilo a ve sha fon. Maa iorov uhar ken mba se henen Bibilo a ve ne va er batisema shi i bugh annongo u pasen kwagh hen ijiir shon.” Stéphanie shi kaa wener: “Aluer u wase ior zan zan ve hingir u tseghan iyol ve sha ci u Yehova yô, kwagh môm u nan we iember kuman sha mi je kpa ngu ga. Er se lu eren tom hen ijiir ne la, se zua a iember ne acin imôngo.” Hegen ne, Alain man Stéphanie mba eren tom u sôron atôônanongo.

Gisèle yange er batisema shighe u lu henen makeranta u iyouci ken tar u Italia la. Anmgbian u lu pania vea kwase na u yange ve hen kwagh vea na la, ve eren kwagh ken uma ve akuma akuma. Uma ve ne yange doo Gisèle kpishi, nahan un kpa soo ér una seer eren tom u pasen kwagh. Gisèle maa hii u eren pania shighe u lu nôngon u been makeranta la.

Yange soo ér una hide una yem ken Cameroon sha er una za seer eren Yehova tom yô, nahan kpa ishima lu nyian un sha akaa agen. A kaa wener, “lu u takeda u i nam ian i lun ken tar u Italia la ua saam ishe shi me lu moughon undun azende am kua tsombor wam u u lu ken tar u Italia la.” Nahan cii kpa, ken uwer u Mei inyom i 2016 la, Gisèle mough hide ken Cameroon. Shighe kar yô, a vôso Léonce, maa branci u tar u Cameroon kaa ér ve za er tom ken geri u Ayos, ape kwagh hemba gban sha mbapasenkwagh u Tartor yô.

Nahan uma lu nena hen geri u Ayos nee? Gisèle kaa wener: “Ashighe kpishi yange usu latriki u lu ga i kuma ulahadi imôngo, i lu kwagh u se fatyô u chaaji uhanseeti asev kpaa ga. Nahan ashighe kpishi ve eren tom ga. Yange m hen u yôron sha ikyon, shi se yem mngerem ma kesen tugh a uwiibalo man utôôci. Yange se za hen shighe ne sha ci u ior ve kera lu shin uwagh kpishi ga.” Ka nyi yange i wase Gisèle vea nom na ve, ve wa ishima? Gisèle kaa wener: “Jijingi u Yehova yange a wase ve shi un vea nom na kpa ve wasen ayol a ve, shi tsombor ve kua azende a ve a taver ve ishima, ashighe agen je yô, ve na ve iwasen sha inyar kpaa, nahan kwagh la wase ve kpishi.”

Gisèle yange hide ken tar na nahan saan un iyol kpa? A kaa ér: “Saan un iyol je ka u ôron ga. Sha hiihii la, yange mbamtaver ban ga shi ashighe agen iyol i kpe se, kpa se mba hembe mbamtaver mbara yô, mo man nomom se nenge ser se er kwagh u gba u se er la vough. Yange se suur sha Yehova nahan se hemba lun kôôsôô a Na cii.” Léonce man Gisèle ve va za Makeranta u Mbapasen Ivangeli i Tartor. Hegen ne mba ikpur pania u hila la.

Er mbakôronishu ka ve taver ishima ken ashighe a ican kposo kposo sha er vea kôr ishu kpishi nahan, kape mbara mba ve cin ve hide ken ityar ve la kpa, ka ve kegh iyol u den ér akaa agen a kar ve sha er vea wase mba ve kegh ato a loho u Tartor ne je la. Nahan mayange Yehova una hungur a tom u mbapasenkwagh mba tseen ishima mban ve er la ga, shi una hungur a ieren ve i ve tese ér iti na doo ve ishima la kpaa ga. (Neh. 5:19; Heb. 6:10) Aluer u ngu ken tar ugen man kwagh gba sha mbapasenkwagh u Tartor ken tar wou nahan, u fatyô u cinin hiden kpa? Aluer u er nahan yô, Yehova una ver u.—Anz. 10:22.