NGEREN U TIMEN SHA MI 44
Dooshima u Yehova A Tesen We la Geman Ga!
“Erdoo [u Yehova] ka u tsôron gbem sha won.”—PS. 136:1.
ICAM 108 Dooshima u Mimi u Aôndo La
KWAGH U I TIM SHA MI KEN NGEREN NE YÔ *
1. Yehova ngu taver se ishima ér se er nena?
DOOSHIMA u a geman ga la gba Yehova kwagh kpen kpen. (Hos. 6:6) Yehova ngu taver se ishima ér se kpa se nengen dooshima ne ser ka kwagh u injaa kpishi. Yange tindi profeti Mika ér a kaa se yô, se “soon u zungwen mhôônom.” (Mika 6:8) Kpa cii man se er kwagh ne yô, a gba u se fa kwagh u dooshima u a geman ga la a lu la.
2. Dooshima u a geman ga la ka nyi kwagha?
2 I ter ishember i “dooshima u geman ga” la ken Icighan Bibilo i Tar u He la jimin cii kuma kwa 230 nahan. Ken Ubibilo mbagenev yô, i gema ishember i ken zwa Heberu i i ôr kwagh u “dooshima u geman ga” la ér “erdoo” shin “mhôônom ma zungwen.” Nahan aluer avur a Bibilo a ken ngeren ne kua u a dondo la ter ishember i “erdoo” shin “mhôônom ma zungwen” la yô, ka dooshima u geman ga la i lu ôron ye. Kpa dooshima shon ka nyi kwagha? Aluer or ngu a dooshima u a geman ga la yô, nana soo orgen kpishi shi nana lu vea nan kôôsôô sha mimi gbem. Ka i ter ishember ne sha u pasen dooshima u Aôndo a tesen uumace yô. Uumace kpa mba tesen mbagenev dooshima ne. Yehova hembe tesen dooshima u geman ga la sha won cii. Ken ngeren ne, se lu timen sha igbenda i Yehova a tesen uumace dooshima shon yô. Ken ngeren u dondon la di se time se nenge er se mbacivir Aôndo se fatyô u dondon ikyav na sha u tesen hanma wase dooshima u a geman ga la yô.
YEHOVA HEMBE TESEN DOOSHIMA U A GEMAN GA LA SHA WON CII
3. Yehova yange pase iyol na hen Mose kaa ér nyi?
3 Mbaiserael yange ve due ken Igipiti ve lu a za ica ga je maa Yehova pase iyol na hen Mose sha u yôôn iti Na man aeren a na. A kaa ér: “TERE, TERE, Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je, u eren a ior udubu imôngo dedoo, u deen ifer man tindi u peren man isholibo.” (Eks. 34:6, 7) Ken mkaanem ma kundun iyol ma Yehova ôr sha kwagh u aeren a Na ne, a pase Mose kwagh u vesen ugen ken dooshima Na u a geman ga la. Kwagh shon ka nyi?
4-5. (a) Yehova pase iyol kaa ér nyi? (b) Ka mbampin mba han se lu timen sha mini?
4 Yehova pase iyol na kaa ér un ngu a dooshima u a geman ga la tseegh ga, kpa ér un ngu a mi “wuee.” I ôr kwagh ne kwa imôngo ken Bibilo. (Num. 14:18; Neh. 9:17; Ps. 86:15; 103:8; Yoel 2:13; Yona 4:2) Man hanma kwa yô, ka i lu Yehova i ôron nahan ye, mayange ka lu uumace ga. Er Yehova a ôr kwagh u dooshima na u a geman ga la var var nahan, tese ér ka ieren i doon tsung gaa? Ieren la ngi un a inja kpishi je ka ashe tugh ga. * Ka nahan ve Tor Davidi yange ôr mkaanem man ye, ér: “TERE, erdoo Wou ngu je, ar sha Usha . . . Aôndo, erdoo Wou ngu a inja je gande cii; ônov mba iorov mba yeren ken mure u akper a Ou.” (Ps. 36:5, 7) Dooshima u Aôndo u a geman ga la ngu se a inja kpishi, er lu Davidi nahan kpa?
5 Kwagh u una wase se u fan dooshima u a geman ga la tsembelee yô, de se time sha mbampin mba uhar mban: Ka unô Yehova a tesen ve dooshima u a geman ga laa? Yehova ka una tese se dooshima shon nahan, kwagh la a wase se nena?
KA UNÔ YEHOVA A TESEN VE DOOSHIMA U A GAMAN GA LAA?
6. Ka unô Yehova a tesen ve dooshima u a geman ga laa?
6 Ka unô Yehova a tesen ve dooshima u a geman ga laa? Bibilo kaa ér akaa kpishi ka a doo se, er “sule” man “tsaha” man “wain kua mkurem” man “mfe” man “kwaghfan” nahan, kua akaa agen kpishi. (2 Kron. 26:10; Anz. 12:1; 21:17; 29:3) Nahan kpa, ka ambaakaa la i tesen a dooshima u geman ga la ga; ka uumace tseegh i tesen ve un ye. Kpa shi ka hanma or Yehova a tesen nan dooshima na ne ga. Ka mba ve ye ijende vea na kangenaa la a tesen ve dooshima ne ye. Aôndo undun azende a na ga. Ngu a awashima u doon tsung sha ci ve, shi ka u vea doo un ishima gbem sha won.
Yehova eren akaa a dedoo kpishi sha ci u uumace jimin cii, kua mba ve civir un ga la je kpaa (Nenge ikyumhiange i sha 7) *
7. Yehova tese ér uumace jimin cii doo un ishima nena?
7 Yehova tesen uumace jimin cii dooshima. Yesu yange ôr orgen u i yilan iti na ér Nikodemu la ér: “Tar ne [ka uumace je la] doo Aôndo ishima kpishi je yô, a na Wan na u môm môm la, sha u hanma or u nan ne un jighjigh cii nana̱ de timin ga, kpa nana̱ zua a uma u tsôron.”—Yoh. 3:1, 16; Mat. 5:44, 45.
Tor Davidi man profeti Daniel cii yange ve kaa ér ka mba ve fe Yehova shi ve cian un shi a doo ve ishima shi ve kuran atindi a na la, a tesen ve dooshima u geman ga la ye (Nenge ikyumhiange i sha 8-9)
8-9. (a) Yehova tesen mbacivir un dooshima u a geman ga la sha ci u nyi? (b) Ka nyi se lu timen sha mi hegene?
8 Er se vande teren sha heen nahan, ka mba ve lu vea Yehova kangenaa shin ve civir un la tseegh a tesen ve dooshima u a geman ga la ye. Ikyav tese nahan ken mkaanem ma Tor Davidi kua profeti Daniel ôr yô. Davidi kaa ér: “Zer eren erdoo Wou a mba ve fe U yô.” “Erdoo u TER yô, ngu sha mba ve cie Un.” Daniel di kaa ér: “Tere, Aôndo u hemban, [U we] mhôônom ma zungwen ikyo a mba U doo ve ishima man mba ve eren sha atindiakaa a Ou kpaa yô.” (Ps. 36:10; 103:17; Dan. 9:4) Mkaanem ma Bibilo man cii kaa ér, Yehova tesen mbacivir un dooshima u a geman ga la sha ci u ve fa un, shi mba cian un, shi a doo ve ishima, shi mba kuran atindi a na. Ka mba ve civir Yehova sha gbenda u a lumun a mi la tseegh, a tesen ve dooshima na u geman ga la ye.
9 Yehova yange tesen se dooshima u a tesen uumace jimin cii la shighe u se lu a hii u civir un ga la. (Ps. 104:14) Kpa er hegen se lu civir un yô, ngu tesen se dooshima na u a geman ga la kpaa. Jighilii yô, Yehova ngu pasen mbacivir un cii wang ér: “Erdoo Wam a we yô, una kar hen a we kera ga.” (Yes. 54:10) Sha kpôô yô, er Davidi nenge nahan, ‘TER una tsegha or u i doo Un a nan la sha ci Na iyol Na.’ (Ps. 4:3) Er Yehova a tsegha se sha ci na iyol na nahan, doo u se kegh iyol u eren nyi? Orpasalmi nger ér: ‘Or u nan lu a kwaghfan yô, nana ver ishima sha akaa ne shi nana ver ishima sha uerdoo mba TER kpaa.’ (Ps. 107:43) Kwaghwan u injaa ne due ken hen Yehova. Nahan hegen se time sha igbenda itiar i Yehova a tesen dooshima na u a geman ga la yô, man er ka una tese se dooshima shon ve i wase se la.
DOOSHIMA U YEHOVA U A GEMAN GA LA WASEN SE NENA?
Akaa a dedoo a Yehova a eren mbacivir un la saa sha a a eren sha ci u uumace jimin la tseegh ga, eren ve akaa a dedoo agen seer sha a ngara (Nenge ikyumhiange i sha 10-16) *
10. Ka sea fa ser dooshima u geman ga u Yehova a tesen se la ka u tsôron yô, kwagh la a wase se nena? (Pasalmi 31:7)
10 Dooshima u Aôndo u a geman ga la been mayange ga. I ôr kwagh u dooshima u a geman ga ne ér ka u tsôron kuma kwa 26, ken Pasalmi 136. Ken ivur i hiihii la, i kaa ér: “Wuese nen TER, gadia A doo, gadia erdoo Na ka u tsôron gbem sha won.” (Ps.136:1) I ter ishember i “erdoo Na ka u tsôron gbem sha won” la ken hanma ivur zan zan ivur i sha 26 la. Ka sea ôron Pasalmi ne yô, i kpiligh se iyol u nengen igbenda kpishi i Yehova a tesen dooshima na u a geman ga ne, shi a gbe uwer u eren nahan mayange ga yô. Kwagh u i ôr kwa kimbir kimbir ér “erdoo Na ka u tsôron gbem sha won” la pase se wang er dooshima u Aôndo a tesen mbacivir un la a geman ga yô. Saan se iyol kpishi er se fe ser mbacivir Yehova ka ve doo un ishima gbem nahan yô! Ka una tesen or u civir un dooshima yô, kenden nan ga, hemban je yô shighe u kwagh a tser nan yô. Er kwagh ne a wasen se yô: Ka sea fa ser Yehova kenden se ga yô, i saan se iyol kpishi shi se zua a agee a nôngon a mbamzeyol asev shi civir un her.—Ôr Pasalmi 31:7.
11. Pasalmi 86:5 kaa ér ka nyi i ne ve Yehova a den kwaghbo?
11 Ka dooshima u Aôndo u a geman ga la a ne ve a den kwaghbo ye. Yehova ka una nenge orsholibo nana gema ishima shi nana venda u hiden eren asorabo a nan er la yô, a den nan asorabo shon sha ci u dooshima Na u a geman ga la. Orpasalmi yange ôr kwagh u Yehova kaa ér: “A or se iyev sha asorabo ase ga, A na se injar i sha aferakaa ase la kpaa ga.” (Ps. 103:8-11) Davidi yange fa er or ka nana lu a imoshima i wang ga ve, ishima i naan nan ibo shi nan ure kpishi yô. Kpa shi fa er Yehova a “kegh iyol u den kwaghbo” yô. Ka nyi i ne ve Yehova A den kwaghbo? I nger mlumun ken Pasalmi 86:5. (Ôr.) Sha kpôô yô, er Davidi ôr ken msen nahan, Yehova den kwaghbo sha ci u dooshima na u a geman ga la ngee je yô, mba ve zamber a na ér a de ve kwaghbo ve la kpa tesen ve dooshima ne.
12-13. Aluer ishima ngi nan se ibo shi se ure sha akaabo a yange se er kpa Yehova a de se yô, ka nyi ia wase se?
12 Shighe u se er isholibo yô, ishima ia vihi se kpa a lu kwaghbo ga. Shi doo u se vaa afanyô sha kwagh u se er la je kpaa. Kwagh ne una na yô, se gema ishima shi se zamber ser i de se kwaghbo la, shi se kera kimbir un ga. Nahan kpa, mbacivir Aôndo mbagenev de ishima ngi nan ve ibo her sha asorabo a yange ve er kpa Yehova a de ve yô. Ibo la na yô, ve na jighjigh ér, aluer ve zamber a Yehova nan nan, shi ve de u eren akaabo la je kpa, mayange una de ve ga. Aluer kape u henen la yô, fa er Yehova a kegh iyol u tesen mbacivir un dooshima na u geman ga la yô, nahan kwagh la una wase u kpishi.
13 Er kwagh ne a wasen se yô: Er se lu a mbamshi nahan kpa, se fatyô u civir Yehova a iember man a imoshima i wang. Se fatyô u eren kwagh ne sha ci u “awambe a Wan na Yesu aa kire isholibo yase.” (1 Yoh. 1:7) Aluer ishima ngi vihin we sha ma mshi wou ugen kpa, umbur wer Yehova kegh iyol sha mimi u den we kwaghbo, aluer u gema ishima yô. Nenge er Davidi yange tese er i lu dooshima u a geman ga la ka a na Yehova a de kwaghbo yô. A nger ér: “Er Sha a gbe ca a kar tar sha nahan, kape erdoo Na kpaa a kehe a mba ve cie Un la. Er ica i ityoughkitaregh a ityôtar nahan, kape ngu A pav akaabo ase a vese la.” (Ps. 103:11, 12) Sha kpôô yô, Yehova kegh iyol u ‘den kwaghbo wuee.’—Yes. 55:7.
14. Tor Davidi yange pase ér dooshima u Yehova u a geman ga la kuran se nena?
14 Dooshima u Aôndo u geman ga la kuran se sha er kwagh a tser se nan kpa se civir un sha mimi her yô. Tor Davidi yange er msen hen Yehova kaa ér: “Ka We, U lu ijiir yam i yeren ye, U kuram sha mzeyol, U kasem a atsam a myom. . . . [Or] u nan suur sha TER yô, erdoo Na una wa nan atô.” (Ps. 32:7, 10) Er girgar yange a kura ior mba ve lu ker la sha ayange a tsuaa la nahan, kape akaa a Yehova a eren u tesen se dooshima na u geman ga la kpa a kase se er ka girgar, a lu kuran se sha er kwagh a tser se nan nan kpa se civir un sha mimi her je la. Heela tseegh ga, dooshima u Yehova u a geman ga la ka a na Yehova a urugh se a va a mi hen a na.—Yer. 31:3.
15. Dooshima u Yehova u a geman ga la ngu er ijiir i yeren man iyouutya nahan sha ci u nyi?
15 Tor Davidi yange tôô gbenda u Aôndo a kuran mbacivir un la kar sha akaa agen kpaa. A nger ér: “Aôndo ka gôgôyou wam, Aôndo u A eren a mo dedoo ne.” Davidi shi ôr kwagh u Yehova ér: “Erdoo wam man iyouutya yam, gôgôyou wam, man Oryiman wam kpaa, perutya wam, man Un u m suur sha a Na.” (Ps. 59:17; 144:2) Er nan ve Davidi tôô dooshima u Yehova u a geman ga la kar sha gôgôyou man iyouutya? Hanma ijiir i se lu sha tar cii, aluer se mba civir Yehova yô, una kura se sha hanma gbenda cii sha er, se lu vea na kangenaa yô. I pase nahan wang ken Pasalmi 91. Orngeren pasalmi la kaa ér: “Me kaa a TER mer: U ngu ijiir yam i yeren man iyouutya yam.’ ” (Ps. 91:1-3, 9, 14) Mose kpa yange ôr kwagh u tesen ér Yehova kuran se er ka ijiir i yeren nahan. (Ps. 90:1) Heela tseegh ga, shighe u zurum Mose una kpe la kpa, shi ôr kwagh ne sha gbenda ugen u surun ishima kpishi. A nger ér: “Aôndo u tsôron ka ijiir you i teman, vegher u shin yô, ave a tsôron nga.” (Dut. 33:27) Ishember i “vegher u shin yô, ave a tsôron nga” la ngi wasen se u fan nyi sha kwagh u Yehova?
16. Yehova wasen se nena? (Pasalmi 136:23)
16 Aluer se na jighjigh ser Yehova una kura se yô, kwagh la una sur se ishima. Kpa ashighe agen yô, se ure je se fatyô u saan ga. Shighe u kwagh a lu nahan yô, ka nyi Yehova una er sha ci wase? (Ôr Pasalmi 136:23.) Una kôr se, una kende a vese kure kure, una mough a vese sha. (Ps. 28:9; 94:18) Er kwagh ne a wasen se yô: Ka sea fa ser kwagh wase gba Aôndo ishima nahan yô, se fa ser mimi je se fatyô u suur sha na hanma shighe cii. Kwagh ne ngu a wase se sha igbenda ihiar. Hiihii yô, ka se fa ser hanma ijiir i se lu cii Yehova una kuran se hanma shighe cii. Sha uhar yô, ka se fa ser Ter wase u sha u se doo un ishima la wa se ikyo kpishi.
YEHOVA UNA ZA HEMEN U TESEN SE DOOSHIMA U A GEMAN GA LA
17. Dooshima u Yehova u a geman ga la na yô, se fatyô u lun a jighjigh u nan ser nyi? (Pasalmi 33:18-22)
17 Er se time se nenge nahan, shighe u se tagher a ican i karen jighjigh wase yô, se fatyô u lun a jighjigh u nan ser Yehova una er kwagh sha ci wase, u una wase se se civir un sha mimi her yô. (2 Kor. 4:7-9) Profeti Yeremia yange kaa ér: “Ka sha erdoo u TER man i tim se ga ye, sha ci u mhôônom Nam ma zungwen ma been mayange ga.” (Ukwe. 3:22) Se fatyô u nan jighjigh ser Yehova una za hemen u tesen se dooshima na u a geman ga la, sha ci u Bibilo kaa a vese ér, “ashe a TER nga sha mba ve cie Un, mba ve ver ishima ve keghen erdoo Na yô.”—Ôr Pasalmi 33:18-22.
18-19. (a) Ka nyi i gbe u se umburu? (b) Ka nyi se lu timen sha mi ken ngeren u dondon laa?
18 Ka nyi i gbe u se umburu? Yehova Aôndo hii u tesen se dooshima na u a tesen uumace cii la shighe u se lu a hii u civir un ga la je. Kpa er se lu civir un hegen yô, ngu tesen se dooshima na u a geman ga la kpaa. Dooshima ne ka a na Yehova a kuve se sha u kuran se. Una za hemen u lun a vese kôôsôô shi una kure uityendezwa nav a vese. A soo ér se lu azende a na gbem sha won! (Ps. 46:1, 2, 7) Sha nahan yô, sea tagher ican nan nan kpa, Yehova una na se agee a se za hemen u civir un sha mimi yô.
19 Se nenge er Yehova a tesen mbacivir un dooshima na u a geman ga la sha igbenda kposo kposo yô. Un di a gema a soo ér se tesen hanma wase dooshima u geman ga la. Se er kwagh ne nena? Ngeren u a dondo la una time sha kwagh u hange hange ne.
ICAM 136 Zua a ‘Injar i Vesen’ hen Yehova
^ Ikyum. 5 Dooshima u a geman ga la ka nyi kwagha? Ka unô Yehova a tesen ve dooshima laa, man dooshima shon wasen mba a tesen ve un la nena? Se lu timen sha mbamlumun mba sha mbampin mban ken ngeren ne, ka ngeren u hiihii ken mba uhar mba ve pase kwagh u ieren i doon tsung ne yô.
^ Ikyum. 4 I ôr kwagh sha kwagh u dooshima u Aôndo u a geman ga la ken avur a Bibilo a gen kpaa.—Nenge Nehemia 13:22; Pasalmi 69:13; 106:7 kua Ukwelegh 3:32.
^ Ikyum. 54 NGEREN U PASEN FOTO: Yehova tesen uumace jimin cii dooshima na, kua mbacivir un kpaa. Hanma an-ikyav u ken ahwa u i kpera vegher u sha ityough ki or yô, ngu tesen gbenda u Yehova a tesen se dooshima yô. Gbenda u hemban cii u a tese se dooshima na yô, a na Wan na, Yesu va kpe sha ci wase.
^ Ikyum. 62 NGEREN U PASEN FOTO: Mba ve hingir mbacivir Yehova shi ve ne nagh ku paan se, ku Yesu na sha uma na la jighjigh yô, Yehova Aôndo una tese ve dooshima na sha gbenda ugen u vesen. Yehova tesen mbacivir un dooshima u a tesen uumace jimin cii la, kua dooshima na u a geman ga la kpaa. Ka igbenda i a tesen dooshima na u a geman ga la je i tese ken ufoto mban la.
