1. Ka nyi i gbe u se fa, kpa se na jighjigh ser nyi?

 SHIGHE u se lu pasen kwagh yô, gba u se fa ser ka keng mbagenev vea hendan a vese. Ken hemen je yô, a va hemba hendan a vese cii. (Dan. 11:44; 2 Tim. 3:12; Mpa. 16:21) Nahan kpa, se na jighjigh ser Yehova una wase se. Sha ci u nyi? Sha ci u kera je, Yehova wasen mbatomov nav u eren ityom i a ne ve yô, ka a lu ityom i taver kpishi je kpaa. Ikyav i tesen yô, de se time sha akaa agen a yange er profeti Esekiel, u yange pasen Mbayuda kwagh shighe u ve lu uikyangen ken Babilon la yô.

2. Yehova kaa ér ior mba Esekiel pasen kwagh hen haregh ve la lu unô ioro? (Esekiel 2:3-6)

² Ka anza a nyi nahan ior mba hen haregh u Esekiel pasen kwagh la lu a mini? Yehova kaa ér ve lu ior ‘mbawan kwagh ikyo ga,’ man ‘mbacighir asema,’ kua ‘mbahendan kwagh.’ Lu ior mba vihin tu kpishi je yô, i tôô ve i kar sha usaa man ayese. Ka nahan ve Yehova ôr a Esekiel kwa kimbir kimbir ér a de cie ga ye. (Ôr Esekiel 2:3-6.) Esekiel yange fatyô u eren tom na u pasen kwagh la sha ci u (1) lu Yehova tindi un ye, (2) jijingi u Aôndo na un agee, shi (3) mkaanem ma Aôndo wase un seer lun a jighjigh u nan. Akaa a atar ne wase Esekiel nena? Man nga wasen se nyian nena?

3. Ka mkaanem ma han yange ma wase Esekiel seer nan jighjigh, man Yehova ôr nyi u tesen ér una wase unu?

³ Yehova kaa a Esekiel ér: “M ngu tindin we.” (Esek. 2:3, 4) Ka keng mkaanem mara yange ma a wase Esekiel una seer nan jighjigh. Sha ci u nyi? Yange umbur er Yehova vande ôron imbakwagh la a Mose shighe u tsua un ér a lu profeti na la,  man er ôr kwagh shon a Yesaia kpaa shighe u tsua un ér a lu profeti na la yô. (Eks. 3:10; Yes. 6:8) Esekiel shi fa er Yehova wase uprofeti mba uhar mbara er ityom i taver kpishi yô. Nahan Yehova ôron a Esekiel kwa har ér: “M ngu tindin we” yô, profeti ne na jighjigh je ér Yehova una wase un. Heela tseegh ga, i nger mkaanem man kwa imôngo ken takeda u Esekiel la, ér: “Kwaghôron u TER va her a mo.” (Esek. 3:16; 6:1) Nahan Esekiel na jighjigh je ér ka Yehova a tindi un ye. Shi kwagh ugen yô, Esekiel lu wan u pristi, nahan ka keng ter na yange una tese un er Yehova a ndera wasen uprofeti nav ica i gbe yô. Yehova yange ôr mkaanem man a Isaka man Yakob kua Yeremia, ér: “M ngu a we.”—Gen. 26:24; 28:15; Yer. 1:8.

4. Ka mkaanem ma han yange ma na Esekiel agee?

⁴ Mbaiserael kpishi yange ve ungwa loho u Esekiel nahan, ve er nena? Yehova kaa ér: “Ya u Iserael yô, una ver ato her a we ga; gadia ve rumun u veren ato her a Mo ga.” (Esek. 3:7) Er Mbaiserael lu vendan Esekiel yô, lu Yehova je ve lu vendan ye. Mkaanem mara yange ma a wase Esekiel u fan je ér ikyurior la venda un lu sha ci u un er tom na u profeti la sha inja ga yum ga. Yehova shi pase un wang ér ka shighe u ior vea va nenge akaaôron a ijirigh a na aa kure sha mi la vea mase ‘fan er profeti lu hen atô ve’ ye. (Esek. 2:5; 33:33) Ka keng mkaanem ma surun ishima mara na Esekiel agee a eren tom na zan zan kuren.

5. Ka nyi i ôr ken Yesaia 44:8 ér ia fatyô u nan se agee?

⁵ Se kpa ka sea umbur er i lu Yehova a tindi se ér se pase kwagh yô, se zua a agee. A na se icivir sha u yilan se ér “mbashiada” nav. (Yes. 43:10) Ka kwagh u icivirigh kpen kpen! Er Yehova ôr a Esekiel ér: ‘De cie ga’ nahan, se kpa  ngu ôron a vese ér: “De cie nen ga.” Gba u se cia mba ve hendan a vese la ga sha ci u nyi? Sha ci u ka Yehova a tindi se ye, shi ngu wasen se, er Esekiel kpa yange tindi un shi wase un nahan.—Ôr Yesaia 44:8.

6. (a) Yehova tôndo zwa u wasen se nena? (b) Ka nyi ka i wase se u taver ishima?

⁶ Yehova tôndo zwa a vese ér una wase se. Ikyav i tesen yô, Yehova kaa ér: “Zum u wea peren gidamnger yô, Me lu a we; wea peren uifi kpaa, vea uve u ga; wea zenden ker atô usu kpaa, ua hia u ga; nomborusu kpaa ua kôr u ga.” (Yes. 43:2) Yange ôr kwagh ne been maa kaa ér: “Ka ne ne lu mbashiada av ye.” Ka sea due kwaghpasen yô, shighe ugen se tagher a mbamzeyol mba se fatyô u tôôn karen sha mngerem ma saren avenge, kua atsan a se fatyô u tôôn karen sha usu yô. Nahan kpa, sha iwasen i Yehova yô, ka se za hemen u pasen kwagh. (Yes. 41:13) Ior kpishi ka ve venda u ungwan loho wase, er sha ayange a Esekiel la nahan. Kpa u ngu wer ka ve venda sha ci u se fa u pasen u tsembelee ga ze. Kpa er se fe ser ka sea za hemen u pasen kwagh a ishima i môm i doo Yehova a vese yô, kwagh la ka a wase se u taver ishima. Apostoli Paulu kaa ér: “Hanma or nana ngohol injar sha tom u nan er la.” (1 Kor. 3:8; 4:1, 2) Anmgbian ugen u a er pania ica i gbe yô kaa ér: “Er m fe mer Yehova ne se injar sha tom wase la yô, ka i saan mo iyol.”

7. Hanma shighe u Esekiel yange una hen sha mpase u nenge a mi la cii yô, kwagh la a wase un nena? (Nenge foto u sha igbende.)

⁷ Esekiel yange nenge ken mpase er jijingi u Aôndo a lu a tahav kpishi yô. Mpase la wase un u nengen er icighan jijingi lu wasen mbatyomov mbaageev shi ningir akaver a zege ikyekyeutya yô. (Esek. 1:20, 21) Nahan Esekiel er nena? A nger kwagh u yange er la ér: “Zum u m nenge a mi yô, m gba, m kuma ityough inya.” Yange iondo haa Esekiel iyol je gba. (Esek. 1:28) Shighe u kwagh ne er kar kera la, Esekiel yange una hide a hen sha mpase u sha mnenge u kpilighyol kpishi la yô, ka keng una seer nan jighjigh ér jijingi u Aôndo una wase un, nahan una fatyô u eren tom na.

8-9. (a) Yehova yange kaa a Esekiel ér a mough a tile sha nahan, lu nyi i er Esekiel? (b) Yehova yange seer Esekiel agee a pasen kwagh hen haregh u ior soo u keghen ato ga la nena?

⁸ Yehova yange kaa a Esekiel ér: “Wan u or, mough, tile sha angahar a ou, M̱ ôr kwagh a we.” Tsô kwagh u ôr la kua jijingi Na maa na Esekiel agee a una fatyô u moughon tilen sha yô. Esekiel nger ér: “Jijingi nyôr ken a mo . . . , A er m tile sha angahar a am.” (Esek. 2:1, 2) Shighe u Esekiel lu eren tom u pasen kwagh la cii, “uwegh” ku Aôndo, ka icighan jijingi u Aôndo je la, lu hemen un. (Esek. 3:22; 8:1; 33:22; 37:1; 40:1) Jijingi u Aôndo na Esekiel agee a eren tom u i na un la, ka tom u pasen “mbatavertyough man mbakehenasema” mba hen haregh na la kwagh je la. (Esek. 3:7) Yehova kaa a Esekiel ér: “M taver ishigh yough er ishiv vev nahan man ityough yough kpaa er ityouv vev nahan. M taver ityough yough er daimondi nahan, taver hemba vande kpaa; de cie ve ga, man ishima i̱ de nyian we sha mdugh u ve dughun we ashe ga.” (Esek. 3:8, 9) Inja na yô, Yehova lu kaan a Esekiel ér: ‘Er ior ve ongo kwagh ga nahan kpa, iyol i de kpeen we ga. Me wase u.’

⁹ Ka been kera yô, jijingi u Aôndo er tom a Esekiel hen haregh u lu pasen kwagh her la cii. Esekiel nger ér, “uwegh ku TER lu sha a mo taveraa.” Esekiel tôô kasua jimin time sha loho u yange gba u una pase ior la sha er una kav  u tsembelee, una pase kwagh vangertiôr yô. (Esek. 3:14, 15) Yehova maa kaa a na ér a yem hen pev u gburumaa ugen, ape “jijingi nyôr ken a [na]” la. (Esek. 3:23, 24) Hen shighe ne, Esekiel wa iyol i hiin tom na u pasen kwagh la bee.

10. Gba u a wase se nena ve se fatyô u eren tom wase u pasen kwagh la, man ka sha ci u nyi?

¹⁰ Gba u a wase se nena ve se fatyô u eren tom wase u pasen kwagh laa? Hen sha kwagh u er Esekiel la tsô u zua a mlumun sha mpin ne. Jijingi u Aôndo yange na Esekiel agee a eren tom u pasen kwagh la cii ve mase hiin u ye. Nyian kpa, saa jijingi u Aôndo una wase se ve se fatyô u eren tom u pasen kwagh la ye, er Esekiel nahan. Sha ci u nyi? Sha ci u Satan ngu tan ityav sha a vese ér una yange tom wase u pasen kwagh la. (Mpa. 12:17) Sha mnenge u or yô, se yina u nôngon ityav a Satan. Kpa tom u pasen kwagh u se eren la na yô, se mba hemban un ityav! (Mpa. 12:9-11) Sha nyi gbenda? Ka sea pasen kwagh yô, se tese ser se cia kume u Satan a lu tan la ga. Nahan hanma shighe u se pase kwagh yô, ka se hemba Satan. Er i lu hendan a vese kpa se lu eren tom wase u pasen kwagh la her yô, se fatyô u kaan ser nyi? Se kaa ser ka icighan jijingi a lu nan se tahav ye, shi Yehova lumun se.—Mat. 5:10-12; 1 Pet. 4:14.

11. Ka nyi icighan jijingi una er sha ci wase, man se er nan ve Aôndo una za hemen u nan se unu?

¹¹ Ka sea hen sha gbenda u Yehova na Esekiel agee a eren tom na u pasen kwagh la nahan, ka nyi igen kpa ka se nenge a mi i taver se ishima? Jijingi u Aôndo una na se agee a aluer se tagher a mbamtaver ken tom wase u pasen kwagh la nan nan kpa se hide ijime ga yô. (2 Kor. 4:7-9) Ka nyi igen kpa se er ve Aôndo una za hemen u nan se jijingi naa? A gba u se eren msen hen Yehova nduuluu, se sônon un a jighjigh u nan ser una ungwa mbamsen asev. Yesu kaa a mbahenen nav ér: “Sônon nen her, . . . Keren nen her, . . . Manden nen uwegh her.”—Luka 11:9, 13; Aer. 1:14; 2:4.

12. Esekiel 2:9–3:3 kaa ér ihyurenruamabera la yange i due hana, man lu nyi i nger kere?

¹² Jijingi u Aôndo yange na Esekiel agee, shi Mkaanem ma Aôndo wase un seer lun a jighjigh u nan. Esekiel nenge a uwegh ku orough kôr ihyurenruamabera ken mpase. (Ôr Esekiel 2:9–3:3.) Ihyurenruamabera la due hana? Lu nyi i nger kere? I wase Esekiel nena ve seer nan jighjighi? De se nenge. Ihyurenruamabera la due hen ikyônough ki torough ki Aôndo. A shi nan kpa lu ortyom ugen ken mbatyomov mba unyiin mba Esekiel vande nengen a ve la, Yehova kaa ér a kôr ihyurenruamabera la a na Esekiel ye. (Esek. 1:8; 10:7, 20) Lu Mkaanem ma Aôndo i nger ken ihyurenruamabera la ye; lu loho u ijirigh u zan shimi, u Esekiel una ôr ior mba hendan kwagh mba ve lu uikyangen la. (Esek. 2:7) I nger loho la sha ihyurenruamabera la vegher u ken ishi man u ken ijime cii.

13. Ka nyi Yehova yange kaa a Esekiel ér a er a ihyurenruamabera la, man yange i nyoho un sha ci u nyi?

¹³ Yehova kaa a profeti na ér a ya ihyurenruamabera la a ‘iv gbor na a mi.’ Esekiel maa ya ihyurenruamabera shon vindi vindi sha imo i Aôndo. Inja i kwagh ne ér nyi? Inja na yô, yange gba u Esekiel una kav loho la vindi vindi, cii una za mase pasen u ye. Gba u una na u jighjigh sha er ishima a taver un u pasen u yô. Tsô kwagh u kpilighyol er. Esekiel we ihyurenruamabera la ken zwa yô, i ‘nyoho er iyough nahan.’ (Esek. 3:3) Sha ci u nyi? Sha ci u icivir i ôron ior loho u Yehova la nyoho Esekiel, shin doo un kpishi. (Ps. 19:8-11) A wuese er Yehova a lumun ér una lu profeti na yô.

14. Ka nyi yange i wase Esekiel wa iyol kegh a kegh u hiin tom na u pasen kwagh laa?

¹⁴ Shighe karen yô, Yehova kaa a Esekiel ér: “Akaaôron Am a Me ôr u cii, ngohol a ken ishima you, man ungwa a sha ato ou kpaa.” (Esek. 3:10) Inja na yô, Yehova lu kaan a ér Esekiel ér a kôr mkaanem ma i nger ken ihyurenruamabera la ken ityou, shi a henen sha ma. Esekiel eren nahan yô, kwagh la wase un u seer nan jighjigh. Shi kwagh shon wase un u fan loho u hange hange u yange gba u una pase ior la tsembelee. (Esek. 3:11) Er Esekiel lu a loho u Aôndo la ken ishima kua sha ityumbuzwaa na yô, wa iyol kegh a kegh u hiin tom na shi eren u.—Nenge Pasalmi 19:14.

15. Ka nyi i gbe u se ‘ngohol ken ishima’ yase ve se taver ishima?

¹⁵ Se kpa kwagh u una wase se u taver ishima eren tom wase u pasen kwagh la yô, saa se de ser Mkaanem ma Aôndo ma za hemen u seer taver jighjigh wase u nan. Akaaôron a Yehova a ôr se cii, gba u se “ngohol a ken ishima” yase. Nyian ne, Yehova lamen a vese sha Mkaanem nam ma a ne i nger la, ka Bibilo je la. Se er nan ve Mkaanem ma Aôndo ma a za hemen u geman gbenda u se henen kwagh la, kua mnenge wase sha akaa, man mbaawashima aseva?

16. Ka nyi i gbe u se er a Mkaanem ma Aôndo, man se er nan ve se kav ma shi jighjigh wase una seer tavera?

¹⁶ Ka sea ya kwaghyan yô, kwaghyan shon a za sough shin uya tsembelee, maa iyol yase i ngohol. Nahan se vesen se seer a seer. Kape ken jijingi kpa i lu je la. Ka sea henen Mkaanem ma Aôndo shi sea gbidyen kwar sha mi tsembelee yô, jighjigh u nan wase a seer a seer. Se umbur kwagh u ihyurenruamabera la i tese yô. Yehova soo ér se ‘iv gbor wase’ a Mkaanem nam. Inja na yô, a soo ér se kav ma tsembelee. Se fatyô u kaven ma  tsembelee sha u eren msen, ôron ma, shi henen sha kwagh u se lu ôron ker la. Ka se hii eren msen ser se sôr ishima yase sha er se ngohol mhen u Aôndo yô. Maa se gba ôron Bibilo hen ijiir i i gbe u se ôr la. Sea ôron yô, se za mem sha er se gbidye kwar, se hen sha kwagh u se ôr la tsembelee yô. Aluer se mba eren nahan yô, ka nyi ia due kere? Aluer se mba tôôn shighe gbidyen kwar sha Mkaanem ma Aôndo yô, se hemba kaven ma tsembelee, nahan jighjigh u nan wase una seer taver.

17. Gba hange hange u se ôron Bibilo shi se henen sha kwagh u se ôr la sha ci u nyi?

¹⁷ Gba hange hange u se ôron Bibilo shi se gbidyen kwar shin se henen sha mi sha ci u nyi? Sha ci u kwagh la una na se agee a pasen loho u Tartor hegen, shi va pasen loho u ijirigh u ior vea ungwa ishima ia vihi ve kpishi yô. Shi aluer se mba henen sha aeren a Yehova a a doo yum la yô, se hemba lun vea na kôôsôô. Nahan kwagh ne una na yô, se zua a kwagh u injaa u a doo kpishi yô, man kwagh shon yô, ka bem u ken ishima man msaanyol.—Ps. 119:103.

18. Ka nyi a va gba u ior mba hen haregh wase vea fa, man ka sha ci u nyi?

¹⁸ I tindi se ér se ôron kwaghôron u profeti er Esekiel nahan ga. Kpa se soo ser se za hemen u pasen loho u Yehova u ken Mkaanem nam ma a kor ma ma lu her la, zan zan a kar eren tom u pasen kwagh kighir er a soo la. Nahan shighe u mtim la una va kuman yô, ior mba se pasen ve kwagh hen haregh wase la vea kera lu a ityôkyaa i nan Aôndo ibo ér a ta icin ga tsô ngu van a mtim, shin a wa ve ikyo ga, ga. (Esek. 3:19; 18:23) Kpa vea kav er loho u yange se pase ve la u dugh hen Aôndo yô.

19. Ka nyi ia na se agee a eren tom wase u pasen kwagh laa?

¹⁹ Ka nyi ia na se agee a eren tom wase u pasen kwagh laa? Ka akaa a atar a yange wase Esekiel seer lun a jighjigh u nan la. Se mba pasen kwagh her sha ci u se fa ser ka Yehova a tindi se ye, shi jijingi u Aôndo ngu nan se tahav, shi Mkaanem ma Aôndo ma wasen se u seer lun a jighjigh u nan. Yehova ngu wasen se, nahan se soo u eren tom wase u pasen kwagh la shi taver ishima “zan zan mkur.”—Mat. 24:13.