1. Apostoli Paulu yange nenge mbashiren tiônnongo nena?

 MBASHIREN tiônnongo mba eren ityom i hange hange ken atôônanongo. Apostoli Paulu yange wuese kwagh u mbajighjigh mban je ka ashe tugh ga. Ikyav i tesen yô, shighe u lu ngeren washika hen Mbakristu mba ken Filipi la, a sugh mbashiren tiônnongo kua mbatamen jighilii.—Fil. 1:1.

2. Anmgbian Luis nenge tom na u orshiren tiônnongo la nena?

² Anmgbianev mba nomso kpishi mba ve er batisema yô, ka vea lu agumaior shin mbaganden kpa, ka i saan ve iyol u lun mbashiren tiônnongo. Ikyav i tesen yô, anmgbian ugen iti na ér Devan, yange hingir orshiren tiônnongo shighe u lu anyom 18 la. Anmgbian ugen di iti na ér Luis, un yô yange hingir orshiren tiônnongo shighe u hemba anyom 50 la. A nenge tom u lun orshiren tiônnongo la nena? A kaa ér: “Saan mo iyol kpishi u eren anmgbianev av mba nomso man mba kasev mba ken tiônnongo tom sha imba gbenda ne. Ka ve tese ér m doo ve ishima. Nahan hegen mo kpa me fatyô u tesen ve mer ve doom ishima!” Kape mbashiren tiônnongo mbagen kpishi kpa ve nenge je la.

3. Ka mbampin mba nyi se lu timen sha mini?

³ Wea lu anmgbian u nomso u u er batisema, kpa u lu orshiren tiônnongo ga yô, u fatyô u nôngon wer u kuma u eren tom la kpa? Ka nyi ia mgbegha u u eren nahana? Man ka aeren a nyi nahan, Bibilo i tese ér saa u lu a mi ve u kumaa? Ken ngeren ne, se lu timen sha mbamlumun mba sha mbampin mban. Kpa de se hii timen sha tom u orshiren tiônnongo nan eren yô.

TOM U ORSHIREN TIÔNNONGO

4. Ka ityom i nyi mbashiren tiônnongo ve erene? (Shi nenge foto kpaa.)

⁴ Orshiren tiônnongo ka anmgbian u nomso u nan er batisema, u icighan jijingi a tsough nan ér nana wase mbatamen u eren  ityom i hange hange ken tiônnongo yô. Mbashiren tiônnongo mbagenev ka ve nôngon sha er mbapasenkwagh vea lu a haregh u pasen kwagh her kua ityakeda i pasen kwagh a mi yô. Mbagenev ka ve wasen tom u sôron Ayou a Tartor sha u a lu sha ashe wang, man u sôron akaa a a vihi sha mi yô. Mbashiren tiônnongo mbagenev shi ka ve nengen sha mba ve ve mkombo la, shi ve eren tom a ikyav mbi samber a iliam man mbi tesen vidio ken mkombo. Ityom kpishi i mbashiren tiônnongo ve eren la ka ityom i nengen sha akaa a iyolough. Nahan kpa, mbashiren tiônnongo ka nomsombaiorov mba ve ver ikyav i dedoo sha akaa a ken jijingi kpaa yô. Yehova doo ve ishima, nahan ka ve eren kwagh u atindi a na a tese la vough vough. Shi anmgbianev vev mba nomso man mba kasev kpa doo ve ishima kpishi. (Mat. 22:37-39) Anmgbian u nomso u nan er batisema nana er nena ve nana kuma u lun orshiren tiônnongo?

5. Ka nyi i gbe u anmgbian u nomso nana er ve nana kuma u lun orshiren tiônnongo?

⁵ Bibilo ter aeren a anmgbian u nomso nana lu a mi ve, nana kuma u lun orshiren tiônnongo yô. (1 Tim. 3:8-10, 12, 13) Aluer u soo wer u lu orshiren tiônnongo sha er u wasen mbagenev yô, time sha aeren ne tsembelee, nahan nôngo sha afatyô wou cii lu a a. Kpa hiihii yô, hen sha ityôkyaa i u soo u lun orshiren tiônnongo la.

ER NAN VE U SOO U LUN ORSHIREN TIÔNNONGO?

6. Ka sha ityôkyaa i nyi nahan i doo u u tsua u eren anmgbianev ou mba nomso man mba kasev tomo? (Mateu 20:28; shi nenge foto u sha igbende.)

⁶ Hen sha kwagh u Yesu Kristu u a ver se ikyav i hemban cii la. Hanma kwagh u yange eren ken uma na cii, lu sha ci u Ter na doo un ishima shi ior kpa doo un ishima. Dooshima la yange na yô, a er tom kpoghuloo shi a er akaa sha ci u mbagenev je kpaa, man i lu akaa a ior mba i nengen ér ve gba kwagh ga la eren yô. (Ôr Mateu 20:28; Yoh. 13:5, 14, 15) Aluer awashima wou u lun orshiren tiônnongo la ka sha ci u Yehova kua anmgbianev doo u ishima yô, Yehova una na u iveren, shi una wase u u kuma u lun orshiren tiônnongo.—1 Kor. 16:14; 1 Pet. 5:5.

7. Gba u anmgbian nana palegh u keren ér nana lu orshiren tiônnongo a awashima u i nengen nan ér nan gba kwagh la sha ci u nyi?

⁷ Ken tar yô, mba ve tesen ér ve gba kwagh la ka i doo ior a ve. Kpa ior mba Yehova yô mba eren nahan ga. Anmgbian u mbagenev ken tiônnongo ve doo nan ishima, er Yesu kpa yange ior doo un ishima nahan la yô, nan keren ér nana  hemen mbagenev shin nana lu a tahav sha mbagenev, shin i nengen nan ér nan gba kwagh ga. Aluer i ver anmgbian u nan soo ér mbagenev ve nengen nan ér nan gba kwagh la sha iantom ken tiônnongo yô, alaghga nana nyagh u eren ityom i gban kwagh ga i ka i gba u a er sha u nengen sha iyôngo i Yehova, i i doo un ishima la. Alaghga nana nenge ér nan gande u eren ityom i ngira nahan. (Yoh. 10:12) Aluer anmgbian nan soo u lun sha ma iantom ken tiônnongo sha u i nengen nan ér nan gba kwagh yô, mayange Yehova una ver iniôngon i nan la ga.—1 Kor. 10:24, 33; 13:4, 5.

8. Ka kwaghwan u nyi Yesu yange wa mbaapostoli nava?

⁸ Mba yange ve lu kôôsôô a Yesu la je kpa, ashighe agen yange ve soo ér i na ve ityom, kpa ve gema ve lu a awashima u vough ga. Hen ase sha kwagh u apostoli Yakobu kua Yohane yange ve er la. Ve kaa a Yesu ér a ver ve sha iantom i hemban ken Tartor. Kpa Yesu kaa a ve ér kwagh u ve sôn la ka shami ga. Kpa a gema a kaa a mbaapostoli mba 12 mbara cii ér: “Or u nan soo u lun or u hemban ken a ven yô, a gba u nana lu or u eren ne tom. Shi hanma or u nan soo u lun or u hiihii ken a ven yô, a gba u nana lu kpan wen cii.” (Mar. 10:35-37, 43, 44) Anmgbianev mba i sar ve u lun mbashiren tiônnongo sha ci u ve soo u eren mbagenev tom la ka ve lu tiônnongo a iwasen kpishi.—1 Tes. 2:8.

KWAGH U UNA NA VE U SOO U EREN TOM SHA CI U ANMGBIANEV OU YÔ

9. U er nan ve u lu a isharen i eren tom sha ci u mbageneve?

⁹ Ka mimi, Yehova doo u ishima shi u soo u eren tom sha ci u mbagenev. Kpa alaghga u ngu a isharen i eren tom u orshiren tiônnongo la ga. Nahan u er nan ve u lu a isharen i eren tom nee? Hen er aluer u ngu eren anmgbianev ou mba nomso man mba kasev tom ve a saan we iyol yô. Yesu kaa ér: “Or u nan ne kwagh la ka i hemba saan nan iyol a or u nan ngohol la.” (Aer. 20:35) Yesu yange er kwagh u ôr ne, nahan saan un iyol kpishi u eren tom sha ci u mbagenev. Kape we kpa a lu u je la.

10. Yesu yange tese ér saan un iyol u eren mbagenev tom nena? (Marku 6:31-34)

¹⁰ Nenge ase ikyav i i tese ér yange saan Yesu iyol u eren tom sha ci u mbagenev yô. (Ôr Marku 6:31-34.) Shighe ugen la, Yesu man mbaapostoli nav er tom vôr. Nahan ve lu yemen ér vea za mem henpe or lu ga yô. Kpa ikpelaior kar za vande nyôron her a ve, sha er Yesu una tese ve yô. Yange una soo yô, ma venda ér ve yem, sha ci u un man mbaapostoli nav “lu zuan a shighe u memen shin yan kwaghyan tsô kpaa ga.” Shin Yesu yange una soo yô ma tese ve akaa kpuaa tseegh, maa ma kaa ér ve yem. Kpa er ve doo un ishima yô, “a gba tesen ve akaa kpishi.” Shi a za hemen u tesen ve zan zan ‘shighe za.’ (Mar. 6:35) Yange er kwagh ne lu sha ci u gba u una er tsô ga, kpa lu sha ci u “kunya kôr un a ve.” Yange soo u tesen ve sha ci u ve doo un ishima. Yesu yange una eren tom sha ci u mbagenev yô, i saan un iyol kpishi.

11. Yesu yange a wase ior mba ve keghen ato a na la nena? (Shi nenge foto kpaa.)

¹¹ Yesu yange a wase ior sha u tesen ve kwagh u Aôndo, shi a wase ve u kuren mbamgbe vev mba iyolough kpaa. Yange er kwaghyan sha ivande na mbahenen nav ér ve kar ior. (Mar. 6:41) Kwagh u er ne tese mbahenen nav er vea eren tom sha ci u mbagenev yô. Shi tese ve ér ityom i nengen sha akaa a iyolough, er ityom i mbashiren tiônnongo ve eren la nahan, ka ityom i hange hange. Hen ase er yange a saan mbahenen mbara iyol u eren tom imôngo vea Yesu u nan ior kwaghyan u i er sha ivande, “ior cii ya kuma ve” la sha wono! (Mar. 6:42) Nahan kpa, lu shighe la tseegh Yesu hemba wan mbamgbe mba ior mbagen ikyo a mba nav ga. Yange na uma na jimin cii u eren ior tom shighe u lu shin tar la. (Mat. 4:23; 8:16) Yange i saan Yesu iyol kpishi u tesen mbagenev shi nengen sha mbamgbe vev. We kpa, aluer u  kegh iyol u eren tom u orshiren tiônnongo la sha er u er mbagenev tom yô, a saan we iyol.

12. Gba u se palegh u henen ser se fatyô u wasen tiônnongo ga sha ci u nyi?

¹² Aluer u nenge wer u fa u eren akaa ga kpa, iyol i de kpen we ga. U ngu a aeren a dedoo a u fatyô u wasen tiônnongo je ka u henen a hen ga. Hen sha kwagh u Paulu a ôr ken 1 Mbakorinte 12:12-30 la, nahan sôn Yehova a wase u u nengen er kwagh u Paulu a ôr la a zough sha kwagh wou yô. Mkaanem ma Paulu mara tese wang ér we kpa u fatyô u eren akaa a wasen tiônnongo vough er mbacivir Yehova mbagen kpa ve eren nahan. Aluer u ngu a lu a aeren agen a i gbe u anmgbian nana lu a mi ve nana er tom u orshiren tiônnongo la ga kpa, de yen ishima ga. Er kwagh u u fetyô la cii, u civir Yehova shi wasen anmgbianev ou. Fa wer, mbatamen fa mlu wou, nahan vea na u tom u u fatyô u eren yô.—Rom. 12:4-8.

13. Ka nyi i gbe u u fa sha kwagh u aeren kpishi a i gbe u anmgbian nana lu a mi ve nana kuma u eren tom ken tiônnongo laa?

¹³ Ityôkyaa igen i i ne ve i gbe u u nôngo u lu orshiren tiônnongo yô, ka sha ci u aeren kpishi a i gbe u orshiren tiônnongo nana lu a mi la ka aeren a i gbe u Mbakristu cii vea lu a mi yô. Gba u Mbakristu cii vea kporom ikyua a Yehova, shi vea naan mbagenev kwagh sha er a saan ve iyol, shi vea eren akaa ken uma ve sha gbenda u a doo Aôndo yô. Nahan ikyav tese ér u vande ngun a aeren kpishi a i gbe u or a lu a mi ve nana kuma u eren tom u orshiren tiônnongo yô. Nahan ka nyi jighilii i gbe u anmgbian nana er ve nana kuma u eren tom ken tiônnongo?

AEREN A U LU A MI VE U KUMA U LUN ORSHIREN TIÔNNONGO YÔ

14. U lun or u “wan ahumbe ga” la inja na ér nyi? (1 Timoteu 3:8-10, 12)

¹⁴ De se time sha aeren shon agen a i ter ken 1 Timoteu 3:8-10, 12 la. (Ôr.) Gba u orshiren tiônnongo nana lu or u “wan ahumbe ga.” A fatyô u geman ishember ne sha gbenda ugen ér, “or u nan kom icivir,” shin “or u lun pe pe pe ga.” Kpa ngula tese ér gba u u seen ma shighe môm ga shin u eren akaa a nan we msaanyol gaa? Ei, ka nahan ga. (Orpa. 3:1, 4) Kpa gba u u nengen ityom i i ne u la beelee ga. Aluer u ngu eren ityom i i ne u ken tiônnongo la tsembelee yô, anmgbianev vea fatyô u nan we jighjigh shi nan we icivir kpaa.

15. U lun or u “ôron kwagh shi hiden geman zwa ga” la inja na ér nyi, man or u “eren hua sha u keren mtsera sha anyighe ga” la di inja na ér nyi?

¹⁵ U lun or u “ôron kwagh shi hiden geman zwa ga” la inja na yô, ka u ôron kwagh sha mimi shi  lun or u mbagenev vea na u jighjigh yô. Ka wea ôr kwagh yô, u er kwagh shon, u tsughun or ga. (Anz. 3:32) U lun or u “eren hua sha u keren mtsera sha anyighe ga” la di inja na yô, ka u we eren kwagh a mbagenev sha mimi shighe u kwagh u inyar a zough ne, kua shighe u u lu nengen sha inyar yô. Aluer u ngu imbaor la yô, u nenge ian i lun kôôsôô vea anmgbianev mba ken tiônnongo la wer ka gbenda u zuan a inyaregh ga.

16. (a) U lun or u “man msôrom kpishi ga” la inja na ér nyi? (b) U lun a “imoshima i wang” la inja na ér nyi?

¹⁶ U lun or u “man msôrom kpishi ga” la di inja na yô ér, u me msôrom ka karen ikyaa inya ga, shi ior fa u ér u me msôrom kpishi ga. U lun a “imoshima i wang” yô, ka u dondon akaawan a Yehova ken uma wou. Er u lu a mbamyen nahan kpa, u ya ijende vea Yehova kôôsôô, nahan kwagh la na u ngu a bem.

17. Anmgbian nana tese ér nan kuma u a na nan tom shighe u i lu karen nan la nena? (1 Timoteu 3:10; shi nenge foto kpaa.)

¹⁷ Bibilo shi ôr kwagh u mbashiren tiônnongo ér “i̱ hii karen ve i̱ nenge, aluer ve kuma yô.” Inja i kwagh ne ér nyi? Inja na yô, a gba u u eren akaa a mbatamen vea na u jighjigh, shi vea nenge ér u kuma u a na u ityom igen yô. Nahan shighe u mbatamen ve ne u tom ér we u er yô, dondo kwagh u ve kaa ér we u er la, kua gbenda u nongo u Yehova u tese ér i er tom shon la. Fa kwagh u i gbe u u er la tsembelee, shi fa shighe u i gbe u u er tom shon u bee la kpaa. Aluer u ngu eren tom wou tsembelee man sha gbashima yô, anmgbianev mba ken tiônnongo vea nenge er u lu vesen, hingir or u injaa u a na nan jighjigh yô. Mbatamen, tsaase nen anmgbianev mba nomso mba ve er batisema la. (Ôr 1 Timoteu 3:10.) Anmgbianev mba nomso mba ve er batisema mba ken tiônnongo wou, mba ve lu anyom pue kar a kar, shin ve lu iyev i hemba nahala yôô? Mba henen kwagh sha tseeneke ve shi mba we iyol sha mbamkombo kpa? Mba ne ikyaa ken mbamkombo hanma shighe shi mba duen kwaghpasenee? Aluer ka nahan yô, na ve ityom i vea fatyô u eren, shi i kom sha anyom a ve yô. Ne er nahan yô, kwagh la una wase ne u fan, aluer agumaior ne aa kuma u ne na ve ityom yô. Nahan vea va zurum anyom 20 yô, alaghga vea kuma u eren tom u mbashiren tiônnongo.

18. U lun mba “i nenge ve a zayol ga” la inja na ér nyi?

¹⁸ Mbashiren tiônnongo ve lu mba “i nenge ve a zayol ga yô.” Inja na yô, gba u u eren kwagh ken uma wou sha inja i or môm nana fatyô u kaan ér we u er kwaghbo ga yô. Kpa a fatyô u wan Orkristu kwagh iyol. Yange i wa Yesu akaa iyol  kpishi, nahan a kaa ér mbadondon un kpa, kape a er a ve je la. (Yoh. 15:20) Nahan kpa, aluer u za hemen u lun a aeren a wang er Yesu nahan yô, u lu a iti i dedoo ken tiônnongo.—Mat. 11:19.

19. Kwagh u Bibilo i kaa ér Orkristu nana “lu a kwase môm” la inja na ér nyi?

¹⁹ Bibilo shi kaa ér, aluer orshiren tiônnongo ka or u nan er ivaa yô, nana̱ “lu a kwase môm.” Shighe u Yehova hii kwagh u ivesegh la, a kaa ér gba u a lu nomsoor môm man kwase môm vea vôso ayol a ve ye. Nahan ka tindi u i gbe u Mbakristu cii vea dondo yô. (Mat. 19:3-9) Gba u mayange Orkristu nana er idya ga. (Heb. 13:4) Kwagh ne tese ér gba u nana eren kwagh a kwase u nan sha mimi hanma shighe cii. Sha nahan yô, gba u mayange nana hian a kasev mbagenev ga.—Yobu 31:1.

20. Orkristu nana nenge sha tsombor u nan sha “gbenda u dedoo” nena?

²⁰ Shi Bibilo kaa ér mbashiren tiônnongo ve lu ior “mba ve hemen ônov vev man uya vev sha gbenda u dedoo yô.” Aluer u ngu ityough hen tsombor wou yô, de tôôn kwagh u nengen sha tsombor wou la beelee ga. Eren mcivir u hen tsombor la hanma shighe. Duen kwaghpasen vea kwase wou man mbayev ou er u fetyô la cii. Wase mbayev ou ve ya ijende a Yehova kôôsôô. (Ef. 6:4) Or ka nana nengen sha tsombor u nan tsembelee yô, kwagh la a tese ér nana fatyô u nengen sha tiônnongo kpaa.—Nenge 1 Timoteu 3:5.

21. Aluer u ngu a hingir orshiren tiônnongo ga yô, ka nyi u fatyô u erene?

²¹ Anmgbianev mba nomso, aluer ne mba a hingir mbashiren tiônnongo ga yô, ôr nen ngeren ne zulee, shi sôn nen Yehova sha kwagh ne. Time sha aeren a i gbe u Orkristu nana lu a mi ve nana kuma u lun orshiren tiônnongo la, shi nôngo kpoghuloo lu a a. Hen er Yehova man anmgbianev ou mba nomso man mba kasev ve doo u ishima yô. Anmgbianev ou ve seer doon we ishima, shi hen sha ityôkyaa i i ne ve u soo u eren ve tom la. (1 Pet. 4:8, 10) Nôngo hingir orshiren tiônnongo, nahan zua a msaanyol u or ka nan zua a mi sha u eren anmgbianev tom ken tiônnongo la. Yô, Yehova a ver u doo doo er u lu nôngon wer u hingir orshiren tiônnongo ne!—Fil. 2:13.