U soo wer u seer zuan a iwasen shighe u u lu henen kwagh sha tseeneke wou yôô? U fatyô u dondon akaawan ne sha er u hemba veren ishima shighe u u lu henen kwagh yô:

• Tsua ijiir i injaa. Wea fatyô yô, ker ijiir i iwanger i lu her shi i lu her tsembelee yô. U fatyô u teman hen tebul, gayô keren ijiir i kundun iyol ken won teman her.

• Ker ijiir i u lu her tswen yô. Yesu yange a nder “pepe pepe” a za er msen “hen ijiir i or môm [nan] lu her ga yô.” (Mar. 1:35) Aluer ijiir ngi i u fatyô u lun her tswen ga yô, ôr mba hen tsombor wou, shin mba u lu hen ya vea ve la, ve de eren kwagh u danen we shighe u u lu henen kwagh la ga.

• Ver ishima zulee. Palegh akaa a danen we. Aluer u ngu henen kwagh ka sha hanseeti shin tableeti yô, tule un imo, gayô ver un sha gbenda u or a yila u shin nana tindi u a loho kpa, kwagh la una dan u ga yô. Wea va umbur kwagh u i gbe u ma u er kpa, nger un shin inya, sha er u umbur u eren un zum u u hen kwagh u bee yô. Aluer ka taver we u veren ishima sha kwagh u u lu henen la yô, mough zende sha daalaa shin nalegh iyol.