KA I taver we u henen kwagh sha tseeneke wou hanma kasuaa? Ashighe agen uwer ka u gba u u henen Bibilo? Se cii ka i lu se nahan ashighe agen. Kpa hide hen sha akaa agen a se eren ayange ayange la, er u ôôn iyol nahan. Ka i gba u u tôô shighe shi u er tom u ôôn iyol. Kpa ka wea ôôn iyol kera yô, i kundu u iyol kpishi. Bibilo i henen kpa ka i na i kundu se iyol er i “ôô [se iyol] sha mnger” nahan. (Ef. 5:26) Nenge ase akaa a aa fatyô u wasen we ne:

• Ver shighe jighilii u u henen kwagh yô. Se fa er u henen Bibilo sha tseeneke wase la i lu kwagh u vesen ugen ken “akaa a a hembe lun a inja,” a i gbe hange hange u Orkristu nana eren yô. (Fil. 1:10) Kwagh u u er ve shighe wou u henen kwagh la una hungur we ga yô, nger iyange la man shighe shon sha kwa pipaa, var hen ijiir i u nengen a mi hanma shighe yô. Gayô u fatyô u veren alarm ken hanseeti u umbur we shighe shon.

• Tsua shighe kua gbenda u henen kwagh u u hembe doon we la. U soo wer u henen kwagh nena? Ikyav i tesen yô, ka wea tôô ihwa i môm wea hen kwagh nahan, u hemba veren ishimaa? Shin u soo wer u tôôn shighe kpuaa kpuaa u henen kwagh ayange imôngo ken kasua? Ka we u fe gbenda u u hembe doon we u henen kwagh la ye. Nahan aluer u ngu tsuan shighe u u henen kwagh sha tseeneke wou yô, lu a kwagh ne ken ishima. Aluer shighe wou u henen kwagh la va kuma man ka lun we ape henen kwagh ga yô, nôngo hen kwagh miniti pue tseegh. Guda u henen kwagh miniti pue a u henen ga kuaa la. Shi aluer u hen kwagh miniti pue mbara bee je kpa, alaghga kwaghhenen la una maa u iyol, nahan u soo wer ma u seer henen.—Fil. 2:13.

• Vande tsuan atineakaa a u soo u henen la. Aluer shighe wou u henen kwagh la va kuma cii ve u lu keren itinekwagh i u hen yô, u lu ‘eren kwagh a shighe wou sha inja’ ga. (Ef. 5:16) Nôngo nger atineakaa a u soo u henen la ken takeda. Ikyav i tesen yô, aluer u ngu a mpin sha ma kwagh u u kav tsembelee ga yô, nger mpin la. Shi hanma shighe u hen kwagh u bee yô, u fatyô u seer ngeren akaa agen sha akaa a u soo u henen la.

• Nyôôso akaa shighe u i gbe u u er nahan yô. Nôngo u nyôôso akaa sha shighe u u ver u henen kwagh la. U fatyô u nyôôso shighe u ka u tôô u henen kwagh la, shin atineakaa a u tsough u henen la. Kwagh u vesen yô, ka u we henen kwagh hanma kasua. Man kwagh u una wase u u eren kwagh ne yô, ka u nyôôso shighe wou man iyange you i henen kwagh la, gayô shighe u ka u tôô u henen kwagh la, shin atineakaa a u tsough u henen la, shighe u i gbe u u er nahan yô.

Aluer se mba henen kwagh sha tseeneke wase hanma kasua yô, akaa a dedoo aa due ker. Se seer kporom hen Yehova, shi se fa u eren kwagh sha kwaghfan, shi se zua a ishimataver.—Yos. 1:8.