NGEREN U TIMEN SHA MI 44
ICAM 33 Haa Akaa a Zan We Iyol Cii sha Yehova
Kwagh u Una Wase U u Wan Ishima Shighe u I Nzughul a We Yô
“De deen wer iferkwagh i hemba u ga, kpa za hemen u hemban iferkwagh sha u eren kwagh u dedoo.”—ROM. 12:21.
KWAGH U SE LU HENEN YÔ
Ken ngeren ne, se lu timen fan kwagh u u er shighe u mbagenev ve lu nzughul a we, man er u er ve ayôôso aa due ga yô.
1-2. Ka sha igbenda i nyi nahan a fatyô u nzughul a vese?
YESU yange ôr injakwagh igen sha kwagh u kwasecôghol u zer zan orjir ugen iyol ér a ôr un ijir sha mimi yô. Mbahenen mba Yesu yange vea fatyô u kaven er lu kwase u i ôr kwagh na la ken ishima yô. Sha ci u sha ayange la, kape i nzughul a ior kpishi je la. (Luka 18:1-5) Se kpa se fatyô u kaven er lu kwase la ken ishima yô, sha ci u se cii ashighe agen ka i nzughul a vese.
2 Sha ayange ne, ior kpishi mba a ieren i sangen a sange la, shi mba eren kwagh a mbagenev kundu kundu ga, shi ve wa hua. Sha nahan yô, se fa ser se kpa ashighe agen a fatyô u nzughul a vese. (Orpa. 5:8) Kpa anmgbian u nomso shin u kwase ka nana er kwagh a vese dang yô, i hemba vihin se cii. Nahan kpa, anmgbianev asev mba nomso man mba kasev yô, ka ve soo a soo u nzughul a vese sha apera, er ior mba ve tôvon se a ican shin ve hendan a vese la nahan ga. Anmgbianev asev vea fatyô u eren kwagh nahan sha ci u ve yina. Se fatyô u henen akaa kpishi ken gbenda u Yesu yange er kwagh shighe u mbaaferev mba hendan a na lu nzughul a na yô. Aluer mbahendan a vese mba ve lu nzughul a vese la je kpa se mba wan ishima a ve yô, hemba doon u se wa ishima a anmgbianev asev mba se lu civir Yehova a vese imôngo la cii! Yehova ka una nenge mba ken inya shin mba ken tiônnongo vea er kwagh a vese dang nahan, i lu un ken ishima nena? Kwagh ka a gba un sha mi jee?
3. Er nan ve se fe ser Yehova soon ér i nzughul a mbacivir un ga?
3 Yehova soon ér i nzughul a vese ga. Nahan hanma shighe u i er kwagh a vese dang cii yô, ka a fa. “Kwagh u mimi doon TER ishima.” (Ps. 37:28) Yesu kaa a vese ér shighe a va kuman vough yô, Yehova una “ôr ijir . . . fefa.” (Luka 18:7, 8) Nahan ica a kera gba ga tsô, una kar a atsan a ase cii kera, shi mayange una kera de ér i nzughul a vese ga.—Ps. 72:1, 2.
4. Yehova wasen se nyian nena?
4 Gba u se kegh shighe u Yehova una va kar a mbamzeyol asev cii kera la. Man hegen je kpa, ka a wase se u wan ishima shighe u mbagenev ve lu nzughul a vese yô. (2 Pet. 3:13) Ikyav i tesen yô, ka a tese se er se er kwagh shighe u mbagenev ve lu nzughul a vese la ve mbamzeyol vea due ga yô. Gbenda môm u ka a er kwagh ne yô, ka a tese se ken Bibilo er Wan na yange er kwagh shighe u i lu nzughul a na yô. Yehova shi ka a wa se kwagh ken Bibilo er se er kwagh shighe u i lu nzughul a vese yô.
WA IKYO SHA GBENDA U U ER KWAGH SHIGHE U I LU NZUGHUL A WE YÔ
5. Gba u se wa ikyo sha gbenda u se er kwagh shighe u i lu nzughul a vese la sha ci u nyi?
5 Shighe u i lu nzughul a vese yô, alaghga ishima ia vihi se kpishi shi se ure. (Orpa. 7:7) Mbacivir Aôndo mbajighjigh mbagen, er Yobu man Habaku nahan kpa, kape yange lu ve je la. (Yobu 6:2, 3; Hab. 1:1-3) Se cii kape ka i lu se je la. Nahan kpa, gba u se wa ikyo sha er se er ibumekwagh ga yô.
6. Kwagh u Abesalom er la tese se nyi? (Shi nenge foto kpaa.)
6 Shighe u i nzughul a vese, shin i er kwagh a or wase dang yô, alaghga a lu se ape oron iyev. Kpa aluer se er kwagh nahan yô, kwagh la una seer van a mbamzeyol. Nenge ase ikyav sha kwagh u wan u Tor Davidi, Abesalom. Zum u anmgbian na u sha ter, Amnon, yav a anmgbian na u kwase Tamar sha apera yô, ishima vihi un a Amnon kpishi. Tindi u Mose la tese ér Amnon yange kuma ku sha kwagh u er la. (Lev. 20:17) Abesalom yange lu a ityôkyaa i vihin ishima, kpa i na un ian i oron iyev ga.—2 Sam. 13:20-23, 28, 29.
Shighe u i nzughul a anmgbian u Abesalom u kwase, Tamar yô, Abesalom fatyô u wan ishima ga (Nenge ikyumhiange i sha 6)
7. Orpasalmi ugen yange nenge i lu nzughul a ior nahan, a er nena?
7 Aluer ka se inja er mba ve eren afer la mba zuan a mtsaha sha aferakaa ve ga yô, alaghga se hii u henen ser ka a inja u eren kwagh u vough ga. Nenge ase ikyav sha kwagh u orpasalmi ugen. Yange nenge mbaaferev lu nzughul a mbaperapera, kpa gema lu inja er mbaaferev mbara mba zan ikyura sha ieren ve la nahan. Nahan a kaa ér: ‘Nenge, kape mbaaferev ve lu je ne, kwagh ze ve iyol ga.’ (Ps. 73:12) Yange ishima vihi un ker kpishi sha ci u i lu nzughul a ior, nahan a nenge ér ka a inja u civir Yehova ga. A kaa ér: “Zum u m gba nôngon u me fa kwagh ne yô, gema lum kwagh u zan iyol.” (Ps. 73:14, 16) Jighilii yô, a kaa ér: “Kpa mo yô, shi kpuaa tsô angahar a am ma a kera lu ga, shi kpuaa tsô angahar a am ma a dolough kera.” (Ps. 73:2) Kwagh ne yange er anmgbian ugen, iti na ér Alberto.
8. Yange i er kwagh a anmgbian ugen sha mimi ga nahan, a er nena?
8 Anmgbianev mbagenev yange ve wa Alberto kwagh iyol ér a ii inyaregh ki tiônnongo. Kwagh ne na yô, i ngohol Alberto ityom i ken tiônnongo, shi Alberto hee sha ishigh ki anmgbianev kpishi mba ve naan un icivir yô. A kaa ér: “Yange ishima vihim kpishi shi iyol kpem.” Yange ishima vihi un je de u zan mbamkombo, shi kera pase kwagh ga je kuma anyom ataan. Kwagh ne tese kwagh u aluer se wa ikyo ga ve, una er se shighe u i nzughul a vese yô.
WA ISHIMA SHIGHE U I NZUGHUL A WE YÔ, ER YESU NAHAN
9. Yange i nzughul a Yesu nena? (Shi nenge foto kpaa.)
9 Yesu ver se ikyav i dedoo sha u wan ishima shighe u i nzughul a na yô. Nenge ase er ior mba hen tsombor na man mba ken inya yange ve er kwagh a na sha mimi ga yô. Anmgbianev nav lu kaan ér a nyôr ihyundugh. Mbahemenev mba kwaghaôndo di lu kaan ér a zua a tahav nav hen ujijingi mba bov. Shi shoja i Mbaroma naha un tar shi gbidye un, maa ve mase wuan un. (Mar. 3:21, 22; 14:55; 15:16-20, 35-37) Shin er i lu nzughul a Yesu nahan kpa, mayange er isholibo ga. Ka nyi se hen ken ikyav i Yesu nee?
Yesu ver se ikyav i vough er se er kwagh shighe u i lu nzughul a vese yô (Nenge ikyumhiange i sha 9-10)
10. Yesu yange wa ishima a iferkwagh nena? (1 Peteru 2:21-23)
10 Ôr 1 Peteru 2:21-23. a Yesu ver se ikyav i doon kpishi er se er kwagh shighe u i nzughul a vese yô. Yange fa shighe u i gbe u una lu ving man shighe u una lam yô. (Mat. 26:62-64) Mbagenev yange vea wa un akaa iyol je kpa, a bugh zwa ga. (Mat. 11:19) Yange una lam kpa, a tuhwa mba ve lu tôvon un a ican la, shin a ta hwa ga. Yesu kôron iyol na tsaha hanma shighe sha ci u yange “wa iyol na sha ikyev i Un u a ôron ijir sha perapera la.” Yesu yange fa er Yehova nenge er i lu nzughul a na yô. Shi yange na jighjigh ér Yehova una va kar a iferkwagh la kera sha shighe vough.
11. Ka sha igbenda i nyi nahan se fatyô u kôron zwa wase tsaha? (Shi nenge ufoto kpaa.)
11 Shighe u mbagenev ve er kwagh a vese sha mimi ga yô, doo u se dondo ikyav i Yesu, se kôr iyol tsaha sha er se ôr kwagh u vihin ga yô. Ashighe agen a er kwagh a vese sha mimi ga kpa, ityôkyaa a lu i se ôr kwagh shin se er ma kwagh ga, sha ci u kwagh la a lu kwagh u cuku. Shin alaghga a gba u se ôr kwagh ga sha er kwagh u se ôr la una va seer van a mbamzeyol ga yô. (Orpa. 3:7; Yak. 1:19, 20) Ashighe agen yô, a gba u se ôr kwagh u kuran or u i lu nzughul a nan yô. Shin alaghga a gba u se ôr kwagh u pasen mbagenev atesen a Bibilo. (Aer. 6:1, 2) Nahan kpa, shighe u se lu lamen yô, gba u se nôngo kpoghuloo se lam sha imo i legh legh man sha icivir kpaa.—1 Pet. 3:15. b
Shighe u i lu nzughul a vese yô, se fatyô u dondon ikyav i Yesu sha u veren ishima zulee, nahan fan shighe u se ôr kwagh, man er se ôr kwagh shon ve a doo yô (Nenge ikyumhiange i sha 11-12)
12. Ka se wa iyol yase sha ikyev i “Un u a ôron ijir sha perapera la” nena?
12 Shi se fatyô u dondon ikyav i Yesu la sha u wan uma wase sha ikyev i “Un u a ôron ijir sha perapera la.” Shighe u mbagen ve ôr se ijir sha mimi ga, shin ve nzughul a vese kpa, ka se na jighjigh ser Yehova fa hanma kwagh cii. Er se fe ser Yehova una va sôr mbamzeyol asev cii yô, kwagh la ka a wase se u wan ishima shighe u i lu nzughul a vese yô. Aluer se suur sha Yehova shi se mba keghen ser a va sôr mbamzeyol ase cii yô, ishima a zer vihin se a mbagenev shin se kôr ve ihyom ga. Sha ci u aluer ishima za hemen u vihin se a mbagenev yô, a kera saan se iyol ga, shi kwagh la una vihi mlu wase vea Yehova.—Ps. 37:8.
13. Ka nyi ia wase se ve se fatyô u wan ishima shighe u i lu nzughul a vese?
13 Nahan kpa, se fatyô u eren kwagh er Yesu yange eren la aa mshi shio ga. Ashighe agen se ôr kwagh shin se er akaa a se va vaa afanyô ken hemen yô. (Yak. 3:2) Ashighe agen gbenda u mbagen ve er kwagh a vese dang la ua na yô, ishima a vihi se ker ken ayange a uma wase cii. Aluer kape i lu u la yô, fa wer Yehova fa kwagh u u lu tagher a mi yô. Shi fa wer Yesu fa kwagh u u lu tagher a mi la, sha ci u un kpa yange i nzughul a na. (Heb. 4:15, 16) Yehova pase se kwagh u yange er Yesu la tseegh ga, kpa shi a ôr akaa agen ken Bibilo a aa wase se shighe u i lu nzughul a vese yô. De se time sha avur ahar ken takeda u Mbaroma a aa wase se yô.
“DE NEN AÔNDO A VA A IYUGH NA”
14. U ‘den ér Aôndo a va a iyugh na’ la inja na ér nyi? (Mbaroma 12:19)
14 Ôr Mbaroma 12:19. Apostoli Paulu yange kaa a Mbakristu ér ve ‘de Aôndo a va a iyugh na.’ Se er kwagh ne nena? Ka se de ser Yehova a va a iyugh na sha u wan ishima keghen ser a ôr ijir yase sha shighe na man sha gbenda u a nenge ér doo u una ôr la. Anmgbian ugen u yange i nzughul a na yô, iti na ér John, a kaa ér: “Yange ishima vihim kpa m kôr iyol tsaha, sha er me er kwaghbo ga yô. Kpa lu zange u eren kwagh ne ga. Yange m ôr Mbaroma 12:19 nahan kwagh la wasem u wan ishima keghen Yehova.”
15. Er nan ve i doo u se kegh Yehova ser a va sôr zayol u se lu tagher a mi laa?
15 Ka sea wa ishima sea kegh Yehova ser a sôr ma kwagh yô, kwagh la a wase se kpishi. Ka sea er nahan yô, se palegh mbamzeyol mba ma se nyer ker sha u nôngon ser se sôr zayol wase iyol yase la. Yehova kaa ér una wase se. Ka inja er ngu kaan ér, ‘Aluer mba nzughul a we kpa, de we ikyo ga, mo me er kwagh sha zayol wou la’ nahan. Aluer se na jighjigh a ityendezwa i Yehova a er a vese ér “Mo Me kimbi” la yô, a nzughul a vese kpa, se gba den tsô. Se na jighjigh ser Yehova una nenge sha zayol la sha gbenda u hemban doon. Ka kwagh u yange wase John u se vande teren kwagh na la je la. A kaa ér: “Aluer m kegh Yehova yô, una hemba nengen sha zayol la doon a gbenda u mo ma m nenge sha mi la.”
“ZA HEMEN U HEMBAN IFERKWAGH SHA U EREN KWAGH U DEDOO”
16-17. Msen una wase se se “za hemen u hemban iferkwagh sha u eren kwagh u dedoo” nena? (Mbaroma 12:21)
16 Ôr Mbaroma 12:21. Shi Paulu yange kaa a Mbakristu ér ve “za hemen u hemban iferkwagh sha u eren kwagh u dedoo.” Yesu yange ôr ken Ityesen na i sha Uwo la ér: “Mbahyomov enev ve za hemen u doon ne ishima, shi eren nen msen sha ci u mba ve tôvon ne a ican la.” (Mat. 5:44) Man ka kwagh u yange er vough je la. Kwagh ne umbur se ican i Yesu yange ya shighe u shoja i Mbaroma mande un sha kon la. Yange i er kwagh a Yesu caveraa, kpa a wa ishima a mnyoon la. Se fatyô u fan vindi vindi er Yesu yange ya ica za kighir la ga.
17 Shin er Yesu ya ican kpishi nahan kpa, Yehova za hemen u doon un ishima shi lu ungwan imo na. Yange wa ushoja mbara ifyan ga, kpa a er msen ér: “Tere, de ve isholibo ve, sha ci u ve fa kwagh u ve lu eren ga.” (Luka 23:34) Aluer se sôn Yehova ser a wase mba ve lu nzughul a vese la yô, kwagh la una wase se u wan ishima, shi ishima ia kera vihi se kpishi ga. Shi kwagh la una wase se u geman gbenda u se nengen ve la kpaa.
18. Pase er msen yange wase Alberto man John ve ve fatyô u wan ishima shighe u i nzughul a ve la.
18 Msen yange wase anmgbianev uhar mba se vande teren kwagh ve ken ngeren ne la u wan ishima shighe u i lu nzughul a ve yô. Alberto kaa ér: “Yange m er msen sha ci u anmgbianev mba ve er kwagh a mo dang la. M sôn Yehova acin imôngo mer a wasem me hungur a kwagh u ve er a mo la.” Kwagh er doo yô, Alberto hide ngu civir Yehova hegen sha mimi. John di kaa ér: “Yange m er msen acin imôngo sha ci u anmgbian u erem kwagh u vihin la. Nahan kwagh la wasem, m kera za hemen u vihin ishima a na ga. Shi m hingir u nengen un sha gbenda u vough. Nahan kwagh shon nam bem.”
19. Er se lu ken tar u ifer ne her yô, ka nyi i gbe u se ere? (1 Peteru 3:8, 9)
19 Er tar u ifer ne u lu a kar kera ga ne, a fatyô u nzughul a vese ashighe agen. Aluer ka nyi je se tagher a mi kpa, mayange se de u eren msen hen Yehova ser a wase se ga. Shi se dondo gbenda u Yesu er kwagh shighe u mbagenev nzughul a na la. Heela tseegh ga, shi se za hemen u dondon akaawan a Bibilo. Aluer se er nahan yô, se lu a vangertiôr ser Yehova una ver se doo doo.—Ôr 1 Peteru 3:8, 9.
ICAM 38 Una Taver We
a Ken Peteru u hiihii ityough 2 man 3 la, apostoli Peteru pase igbenda kposo kposo i mbavesen mba lun a ior sha ikyev kua noov mbafan Aôndo ga lu nzughul a Mbakristu mba sha ayange la yô.—1 Pet. 2:18-20; 3:1-6, 8, 9.
b Nenge vidio i sha jw.org/tiv, i i lu a itinekwagh ér Er Dooshima Ngu A Va a Bem u Mimi Yô la.
