Yehova yange na ior mba ve kegh a kegh iyol u pasen kwagh mban agee. Ken inyom shon la, iyenge i colporteurs shin upania mough 225 yem 350. Shi mbapasenkwagh mba hemban er 8,000 nahan na ripoti ve shin afishi a shin itine man lu hiin je iyenge i mbapasenkwagh nyôr nahan la. Yehova yange ver tom ve la doo doo, nahan ior kegh ato a loho u ve lu pasen la.

Sha iyange i Maaci 21 inyom i 1920 la, Joseph F. Rutherford u lu hemen annongo u Mbahenen Bibilo la, na kwaghôron u lu a itinekwagh ér “Millions Now Living Will Never Die” (Ior Umiliôn Imôngo mba Ve lu Uma Hegen ne Vea Kpe Mayange Ga) la. Mbahenen Bibilo yange ve lôhô ior sha gbashima ér ve va ungwa kwaghôron la. Yange ve za haya ijiir i tesen senema i hemban keghen cii hen geri u New York City la shi ve na ior ityakeda i lôhôn ve nôngo u kuman 320,000 nahan.

Yange ior va mkombo ne je hemba er Mbahenen Bibilo mban ver ishima la. Yange ior nyôr hen ijiir la hemba 5,000 nahan maa ijiir la iv; mba kuman 7,000 nahan fatyô u nyôron ga. Iyoukura yange i ôr kwagh u mkombo ne ér, “lu môm ken mbamkombo mba hemban kehen mba Mbahenen Bibilo sha tar er yô.”

Yange sur ior asema kpishi. Shi i hingir u fan Mbahenen Bibilo wuee sha itinekwagh i ve pasen ér: “Millions Now Living Will Never Die” (Ior Umiliôn Imôngo mba Ve lu Uma Hegen ne Vea Kpe Mayange Ga) la. Hen shighe la, Mbahenen Bibilo mban lu a fa er i gbe u a seer pasen loho u Tartor ne wuee ga. Nahan kpa, gbashima u ve lu a mi la kpilighyol. Kwase ugen u yange hii u zan mbamkombo ken inyom i 1902 yô, mba yer iti na ér Ida Olmstead. A umbur nahan ér: “Yange se fa er i lu u uumace cii vea va zua a averen a vesen ken hemen yô. Nahan mayange se gba uwer u ôron ior mba se zough a ve ken kwaghpasen cii loho u dedoo ne ga.”

Yange anmgbianev mba shin Betel hii u gberen ityakeda yase igen sha er kwaghyan u ken jijingi una ban ga yô. Yange ve yam akeke shi ve za haya iyou sha namba 35, Myrtle Avenue Brooklyn, New York, ikyua ikyua a iyaagh ki Betel, ve wa ikyekye igen her.

Anmgbian Leo Pelle man Walter Kessler yange ve hii tom shin Betel ken uwer u Janawari inyom i 1920 la. Walter kaa ér: “Yange se mba za nyer yô, anmgbian u hemen gbartom u gberen ityakeda la kenger se maa kaa ér, ‘Mase shin ihwa i môm man tiôn nahan a due ahumbe a za ya kwagh.’ Maa a kaa ér se za kura ukôtôn mba ityakeda mbagen shin iyou i shin inya la se due a mi.”

Leo umbur kwagh u yange za hemen kpernan yô. A kaa wener, yange i kaa a vese ér: “Tom wase yô, gba u se kire ukpekpe mba kpoyou u hiihii la. Ken uma wam cii, m lu a vande eren tom u lun côu côu nahan ga. Kpa er lu tom u Ter yô, saan mo iyol u eren u.”

 Yange ukasua kar di kpuaa tseegh maa, anmgbianev mba tseen ishima mba ve na ayol a ve mban hii u gberen Iyoukura. Yange i gber ukôpi mba Iyoukura i Febewari 1, inyom i 1920 la, ukôpi dubu akunduatar sha ikyekye i gberen ityakeda i flatbed i i wa sha kpoyou u sha uhar la. Shin iyou i shin inya la di, anmgbianev mban wa ikyekye i gberen ityakeda i ve yilan ér Battleship la shimi. Mba va ngur gberen Iyoukura i Aipor 14, inyom i 1920 la yô, ve gber magazin u The Golden Age la kpaa. Kwagh ne tese wang ér Yehova yange ver iniôngon i mbatomov mba ve na ayol a ve ne doo doo.

Ior mba Yehova mban yange ve hide ve lu eren tom kpoghuloo u civir Aôndo imôngo. Nahan kpa, ken atô u inyom i 1917 man inyom i 1919, zum u mbamzeyol va ta sha mbacivir Aôndo la, Mbahenen Bibilo mbagen undu nongo u Yehova. Nahan lu nyi i er sha er a fatyô u wasen ve?

Yange i gber ngeren ugen ken Iyoukura i Aipor 1, inyom i 1920 la, lu a itinekwagh ér: “Let Us Dwell in Peace” (Se Lu Nen ken Bem). Ngeren la yange taver ve ishima ér: “Se mba a vangertiôr ser . . . hanma or u nan lu a jijingi u Ter ken a nan yô . . . nan kegh iyol u hungur a akaa a a er ken ijime a kar la . . . sha er se cii, se lu ken mzough shi se eren kwagh gungur môm yô.”

Ve mbagen mkaanem ma kundu kundu man mgbegha ve u hiden. Orgen vea kwase na nger ér: “Yange se kav ibo yase er inyom jimin cii se kera pasen kwagh ga, se wa ave se lu kenger a kenger er mbagenev lu eren tom la yô. . . . Nahan se kange ishima ser mayange se kera er ibumegh kira ga.” Yange tom lu kpishi u anmgbianev mba ve hide ve kôr tom ave mban vea er yô.

Sha iyange i Jun 21, inyom i 1920 la, Mbahenen Bibilo hii kyampen i nan ior takeda u The Finished Mystery u u lu a igbende i taver ga la, tihi u sha utaankaruhar u Studies in the Scriptures la. Shighe u gomoti wa tindi ken inyom i 1918 ér i kera soo u nengen a takeda ne ga la, yange i kura ukôpi mba takeda ne kpishi i za koso.

Yange i lôhô mbapasenkwagh cii kyampen i nan ior takeda ne, lu upania tseegh ga. “Yange i kaa ér hanmaor u pasen kwagh u ken tiônnongo u  nan tsegh iyol i nan, nan er batisema shi nana fatyô u eren kyampen ne cii, nana er i saan saan. Hegen yô, hanma or i lu awashima u nan je ne: ‘Kwagh u m lu eren yô, ngu môm’ ka u nan ior takeda ne sha afatyô wam cii.” Anmgbian ugen u i yer iti na ér Edmund Hooper yô, umbur nahan ér mbagenev kpishi kyampen ne lu kwa ve u hiihii u ve hii duen kwaghpasen sha uya uya yô. Shi a kaa ér: “Lu hen shighe ne se hii u kaven ser tom ngu se inya kpôô kpôô ye, sha ci u tom la hemba kwagh u se vande lun a mi ken ishima la ica je.”

Er yange i taver u lamen a Mbahenen Bibilo mba ken ityar igen shighe u i lu nôngon Ityav mbi Tar cii Mbi Hiihii la yô, Anmgbian Rutherford soo ér una za taver anmgbianev mbara asema shi una seer nyôôso gbenda u eren tom u pasen kwagh la. Nahan sha iyange i Agusutu 12, inyom i 1920 la, un man anmgbianev mbagen unyiin, ve mough ve za zende ken tar u Ingila shi ve kar ve za ken ityar igen kpaa.

Shighe u Rutherford za ken tar u Britain la, Mbahenen Bibilo er mbamkohol mba vesen utar kua mbamkombo mbagen 12. Ior mba ve za mbamkohol kua mbamkombo mban ne la nôngo u kuman 50,000 nahan. Iyoukura igen sav ôron kwagh u zende ne nahan ér: “Yange anmgbianev zua a ishimataver man ishimasurun kpen kpen. Ve seer doon ayol ave, shi lun kangenaa ken tom u ve lu eren la, mba asema lu vihin ve la kpa, hide saan ve iyol.” Ken geri u Paris kpa, Anmgbian Rutherford shi za lam sha itinekwagh i “Millions Now Living Will Never Die” (Ior Umiliôn Imôngo mba Ve lu Uma Hegen ne Vea Kpe Mayange Ga) la. Shighe u hii kwaghôron ne la, ijiir i i kumba her la iv poo. Iorov deri utar nahan, kaa ér ve soo u seer zuan a mfe u Bibilo.

Ken ukasua mba ve dondo la, Anmgbian Rutherford man anmgbianev mbagenev mbara za ken geri u Atene man Kairo man Yerusalem. Yange ve zua a ior mba ve lu a isharen yô, nahan Anmgbian Rutherford bugh ijiir i va dughun ityakeda hen geri u Ramallah ikyua a Yerusalem, sha er a wase ior mba ve lu a isharen sha ajiir a ve za ne yô. Maa hide yem ken Yuropa, za bugh Afishi ken Central Europe, shi ker gbenda sha er a hii u gberen ityakeda ker yô.

Ken uwer u Setemba inyom i 1920 la, Mbahenen Bibilo due a magazin u The Golden Age, Namba 27. Magazin ne yange ôr kwagh u ican i i tôv Mbahenen Bibilo a mi ken inyom i 1918 la vindi vindi. Ikyekye i gberen ityakeda i anmgbianev yilan i ér Battleship  i se vande teren kwagh u i la, yange i er tom i mem ga, nahan i gber magazin kuma ukôpi miliôn unyiin a kwagh nahan.

Yange mbaôron magazin ne ve ôr kwagh u ijir i anmgbian u kwase Emma Martin ker. Anmgbian u kwase Martin lu colporteur u ken San Bernardino, ken kpentar u California. Sha iyange i Maaci 17, inyom i 1918 la, anmgbian u kwase Martin vea anmgbianev mba nomso mbagenev utar, ka Anmgbian E. Hamm man E. J. Sonnenburg man E. A. Stevens ve za mkombo u Mbahenen Bibilo.

Nahan kpa, orgen gema va mkombo ne a awashima ugen kposo, lu u va henen Bibilo ga. Shighe kar yô, or la va mase pasen ken masejime ér: “Yange lu afishi a gomoti a nengen sha kwagh u yilan ior ajir la, kaa ér m za mkombo ne ye. Nahan m za sha er me za zua a akaa a kôron ave sha mi sha er se wa Mbahenen Bibilo mbara ijir yô.” Nahan yange zua a a kôpi u takeda u The Finished Mystery la, man lu kwagh u ve lu keren je la. Ayange nga kar kpuaa yô, i va kôr anmgbian u kwase Martin kua anmgbianev mba nomso mba utar mbara. Yange i za wa ve ijir ér ve per tindi. I kaa ér mba nan ior takeda u gomoti a kaa ér un kera soo u nengen a mi ga yô.

Yange i kure Emma kua anmgbianev mba utar mbara ijir i na ve ibo, nahan gba u vea yem purusu anyom atar. Er anmgbianev mban wa apii acin imôngo nahan kpa, sha iyange i Mei 17, inyom i 1920 la, i za wuhe ve ken purusu. Kpa ica i gba ga tsô, akaa kôr gema.

Sha iyange i Jun 20, inyom i 1920 la, Anmgbian Rutherford ôr kwagh u anmgbianev mban sha mkohol u vesen u i er ken geri u San Francisco la. Kwagh u i er a anmgbianev mban la yange vihi ior mba ve za mkohol la kpishi, nahan ve nger loho ve tindi pesiden u Amerika a mi. Ve kaa ken loho la ér: “Ijir i i kur kwase u Martin . . . ér a per tindi nahan i ne un ibo la ka sha mi ga. Ieren i mbatomov mba gomoti ve er tom a tahav mbu afishi ve, ve nôngo ve zua a akaa sha ityough ki kwase u Martin . . . sha er vea za ôr un ijir vea wuhe un la ngi sha mi ga cii.”

Kpernan je maa Pesiden Woodrow Wilson na zwa ér i pase anmgbian u kwase Martin man Anmgbian Hamm man Sonnenburg kua Stevens. Purusu u gba u vea za anyom atar sha mimi ga la, maa kure.

Inyom i 1920 la i gbe yemen u za been yô, Mbahenen Bibilo nenge a akaa kpishi a yange er ve ken atô u shighe ne a nan ve msaanyol yô. Tom u i lu eren shin afishi a shin itine la, lu zan hemen seer a seer. Mbahenen Bibilo lu seer pasen ér ka Tartor u Aôndo tseegh ua va bee a zayol u uumace ye. (Mat. 24:14) Se ver ishima ser ken inyom i 1921 yô, se hemba yôôn mimi u Tartor la cii.