1. Kwagh u 2 Mbakorinte 3:1-3 a er la wase se u fan ér aluer se hen Bibilo a or zan zan nan er batisema yô, kwagh la ka ian i civirigh nena? (Nenge foto u sha igbende) la.

KA WEA nenge orhenen Bibilo u hen tiônnongo wou nana er batisema nahan i lu u nena? Ka i saan we iyol je ka u henen a hen ga. (Mat. 28:19) Man aluer ka we u hen kwagh a nan je yô, a saan we iyol kpishi u nengen er nan er batisema yô! (1 Tes. 2:19, 20) Mbahenen mba ve sember eren batisema mban, ka “uwashika mba i wuese” mba ve hen kwagh a ve la tseegh tsô ga, kpa ka tiônnongo jimin cii.—Ôr 2 Mbakorinte 3:1-3.

2. (a) Ka mpin u hange hange u nyi i gbe u se hen sha mi, man ka sha ci u nyi? (b) Ka nyi i lu u henen Bibilo a oro? (Nenge ngeren u shin kpe.)

² Kwagh er doo kpishi yô, ken anyom anyiin a a kar ne, aluer i gba kwar yô, hanma uwer ka i hen Bibilo a ior i kuma 10,000,000 nahan. * Shi ken anyom shon, aluer i gba kwar yô, hanma inyom iorov mba hemban 280,000 nahan, ka ve er batisema ve hingir Mbashiada mba Yehova. Se er nan ve se seer wasen mbahenen Bibilo mba ve lu umiliôn imôngo la vea er batisema? Er Yehova a lu wan ishima a ior her sha er ve zua a ian i hingir mbahenen mba Kristu yô, se nôngo sha afatyô wase cii se wase ve fele fele ve nôngo ve kuma mba a er ve batisema yô. Gba u se er nahan sha ci u shighe kera ngu ga!—1 Kor. 7:29a; 1 Pet. 4:7.

3. Ka nyi se lu timen sha mi ken ngeren ne sha kwagh u henen Bibilo a ioro?

³ Er tom u geman ior hingir mbahenen la u lu kwagh u hange hange hegen yô, Mbahemenev mba Shin Itine yange ve pine  ubranci kwagh u a er ve a wase mbahenen Bibilo kpishi vea hen kwagh a er batisema yô. Ken ngeren ne man u a dondo la, se nenge kwagh u se fatyô u henen ken upania man mbamishen kua mbatamen mba sôron atôônanongo mba ve er tom ne ica i gbe yô. * (Anz. 11:14; 15:22) Ve tese kwagh u or u nan lu henen Bibilo a or kua or u i lu henen Bibilo a nan la cii vea er, sha er kwaghhenen la una hemba wasen orhenen Bibilo la yô. Ken ngeren ne se lu timen sha akaa ataan a i gbe u hanma orhenen Bibilo nana er sha er nana hen kwagh zan zan nana kuma u a er nan batisema yô.

4. Ka nyi i gbe u se fa sha kwagh u Bibilo i henen a or sha hunda?

⁴ Anmgbianev asev kpishi ka ve tile vea orya sha hunda ve hen Bibilo a nan. Shin er kwaghhenen ne i lu gbenda u dedoo u wasen or seer lun a isharen i henen Bibilo nahan kpa, ngu a lu tiônôô, shi alaghga je yô, a lu hanma kasua kpaa ga. Anmgbianev mbagen ka ve ngohol adereshi man namba u or u nan tese isharen yô, vea hiden yô, ve yila nan gayô ve tindi nan a loho, ve ôr nan ma kwagh u ken Bibilo sha er nana seer lun a isharen yô. Shighe gen ka ve za hemen u lamen nahan iwer imôngo, kpa iliam la i lu a za hemen i hingir Bibilo i henen jim jim i ia wase orya la ga. Aluer orhenen Bibilo la nan seer shighe u nan shi nan na ishima u henen Bibilo ga nahan, nana tsa a hen kwagh a kuma u eren batisema kpa? Mayange ga.

5. Ka nyi Yesu yange ôr ken Luka 14:27-33, i se fatyô u eren tom a mi u wasen mba se henen Bibilo a ve laa?

⁵ Shighe ugen la, Yesu ôr injakwagh i tesen kwagh u i gbe u or a er keng aluer nan soo u hingir orhenen na yô. Yange ôr kwagh u or u nan soo u maan iyou i taven gôgônan, man tor u a soo u zan ityav yô. Yesu kaa ér a gba u or u maan iyou la, “nana vande teman gbidyen kwar fan” kwagh u nana tôô u maan gôgôyou la yô, shi tor la kpa a gba u nana “vande keren kwaghwan” sha er nana fa aluer ka u shoja i nan ia fatyô u za hemban ityav mbira yô. (Ôr Luka 14:27-33.) Nahan Yesu fa je ér or u nan soo u hingir orhenen na la kpa, a gba u nana tôv nana fa kwagh u i gbe u nana er yô. Sha nahan yô, gba u se taver mba ve soo u va hingir mbahenen mba Yesu mban ishima ser, ve henen Bibilo hanma kasua. Se er kwagh ne nena?

6. Ka nyi a gba u se nôngo se er u wasen orhenen Bibilo sha er kwaghhenen wase a nan la, una hemba zan hemen tsembelee?

⁶ Hii seer shighe u ka ne tôô u henen Bibilo sha hunda la. Ikyav i tesen yô, hanma kwa u u ze yô, ne fatyô u lamen sha avur a Bibilo ahar nahan, a kera lu i môm tseegh ga. U hiin u  lamen vea orya shighe gôgônan a hiin u hoghol nan yô, pine nan aluer anijiir ngu u wea va ve ne tema her ne lam yô. Mlumun u orya la nana na u la, una tese aluer nan ngu a gbashima u henen Bibilo kpa u fa. Shi aluer u soo wer u wase nan nana za hemen leva leva je yô, u fatyô u pinen nan aluer ka u ne henen kwagh kwa har ken kasua yô. Nahan cii kpa, gba u se er kwagh a hemba di u henen kwagh kwa môm shin kwa har ken kasua la.

7. Or u nan lu henen Bibilo a or la, nana wa agoyol tsembelee sha hanma kwaghhenen nena?

⁷ Aluer u ngu henen Bibilo a or yô, gba u hanma shighe yô, u waan agoyol sha kwagh u i gbe u ne za hen la tsembelee. U fatyô u vanden ôron kwagh u i gbe u ne za hen la, kua avur a Bibilo a a lu ker la kpaa. Fa atôôkyaa a vesen a a lu ken kwaghhenen shon la tsembelee. Hen sha itinekwagh i ngeren la man atineakaa a kiriki man mbampin kua avur a Bibilo a i tese ér i ôr la man ufoto kua vidio i i seer pasen itinekwagh shon la cii. Hen sha mlu u or u u henen Bibilo a nan la, nahan fa er u za pase nan kwagh u ne lu timen sha mi la sha gbenda u taver ga, er nana kav kwagh u ne lu henen la wang shi nana dondo yô.—Neh. 8:8; Anz. 15:28a.

8. Mkaanem ma apostoli Paulu ma i nger ken Mbakolose 1:9, 10 la tese se nyi sha kwagh u eren msen sha ci u mba se henen Bibilo a ve laa?

⁸ Shighe u u lu wan agoyol la, sôn Yehova sha ci u or u u lu za henen Bibilo a nan la kua mbamgbe mba nan. Zamber a Yehova a wase u sha er u za tese or u u lu henen Bibilo a nan la Mkaanem nam sha gbenda u ma a kôr nan ken ishima yô. (Ôr Mbakolose 1:9, 10.) Hen sha kwagh u alaghga a za taver orhenen Bibilo la u kaven shin lumun a mi yô. Umbur wer awashima wou yô, ka u wasen nan zan zan nana kuma u a er nan batisema yô.

9. U wase or u u henen Bibilo a nan la u wan iyol sha kwaghhenen nena? Ta iwanger.

⁹ Se na jighjigh ser aluer u ngu henen Bibilo a or hanma shighe yô, kwagh la una wase orhenen Bibilo la, u lun a iwuese sha kwagh u Yehova man Yesu ve er la nahan ishima ia mgbegha nan u seer henen kwagh ve. (Mat. 5:3, 6) A gba u orhenen Bibilo la, nana ver ishima zulee sha kwagh u nan lu henen la, sha er kwaghhenen la una wase nan yô. Sha nahan yô, pase nan er i gbe hange hange u nana waan iyol cii ve ne va mase teman kwaghhenen yô. Nana vande ôron ngeren shon shi nana hen er nana fatyô u dondon kwagh shon ken uma u nan yô. Kpa u wase orhenen Bibilo la u wan agoyol nena? Tema vea orhenen Bibilo la, wa nen iyol sha ma iaven shin  ityough ki kwaghhenen imôngo, sha er u tese nan er ka i wa agoyol sha kwaghhenen yô. * Tese nan er nana fatyô u zuan a mbamlumun sha mbampin mba i pin la jighilii yô. Shi tese nan er aluer nan ver ikyav sha asemberatii a hange hange la ve, a wase nan u umbur mlumun shon yô. Maa kaa nan, nana na mlumun shon ken mkaanem ma nan. Nana eren nahan yô, u nenge er nan kav kwaghhenen shon i za kighir la. Kpa kwagh ugen kpa ngu u i doo u u taver or u u henen Bibilo a nan la ishima wer nana er yô.

10. Er nan ve i lu hange hange u orhenen Bibilo nana ôron Bibilo hanma iyange, man ka nyi i gbe u nana er sha er nana hemba zuan a mtsera ken Bibilo i ôron shono?

¹⁰ Dugh u henen Bibilo hanma kasua la sha yô, akaa agen kpa nga a i gbe u orhenen Bibilo nana eren sha tseeneke u nan hanma iyange a aa wase nan yô. Gba u nana lamen vea Yehova. Nena ase? Sha u keghen ato a Yehova shi lamen vea na. Nana kegh ato a Aôndo sha u ôron Bibilo hanma sev. (Yos. 1:8; Ps. 1:1-3) Tese nan “Aaven a Bibilo i Ôron” a i ver sha jw.org la. * Taver nan ishima nana henen sha kwagh u Bibilo i lu ôron nan sha kwagh u Yehova yô, kua er nana dondo kwagh u nan lu henen la ken uma u nan yô. Aluer nan er nahan yô, kwagh la una wase nan nana hemba zuan a mtsera ken Bibilo i nan lu ôron la.—Aer. 17:11; Yak. 1:25.

11. U wase or u u henen Bibilo a nan la nana fa u eren msen tsembelee nena, man er nan ve i lu hange hange u nana eren msen hen Yehova hanma shighe?

¹¹ Taver or u u henen Bibilo a nan la ishima nana lamen a Yehova hanma yange sha u eren msen. Hanma kwa u ne tem kwaghhenen yô, hii sha msen shi kure sha msen. Er msen vea or u u henen Bibilo a nan la a ishima i môm shi ter nan ken msen shon kpaa. Er nan lu keghen ato ungwan er ka u er msen la, nan kpa nana hen u eren msen a ishima i môm hen Yehova Aôndo ken iti i Yesu Kristu. (Mat. 6:9; Yoh. 15:16) Nenge ase er aluer or u u henen Bibilo a nan la, nan ngu ôron Bibilo hanma sev (ka u keghen ato a Yehova je la) shi nan ngu eren msen (ka u lamen a Yehova je la) ve kwagh la una wase nan u kporom ikyua a Aôndo yô. (Yak. 4:8) Aluer nan ngu eren akaa ne hanma iyange yô, a a wase nan, nana za hemen zan zan nana hingir u va tseghan iyol i nan sha ci u Yehova shi eren batisema. Ka nyi igen kpa ia fatyô u wasen nana?

12. Orpasenkwagh nana wase orhenen Bibilo u yan ijende a Yehova nena?

¹² Gba u orhenen Bibilo nana fa ér doo u kwagh u nan lu henen la, una saa nan ken ityo  tseegh tsô ga, kpa una nyôr nan ken ishima kpaa. Sha ci u nyi? Sha ci u ka ishima yase i i lu asaren ase man mbamnenge asev la ka i mgbegha se u eren kwagh ye. Yesu yange a tese ior akaa kpishi shi i doo ve u ungwan ityesen na kpaa. Nahan kpa, ior yange ve dondo un sha ci u ityesen na la i kôr ve ken ishima. (Luka 24:15, 27, 32) Doo u or u u henen Bibilo a nan la, nana nenge Yehova ér ngu Or kpôô kpôô u nana fatyô u yan ijende a Na yô. Shi doo u nana nenge Yehova ér ngu Ter u nan kua Aôndo u nan man Ijende i nan kpaa. (Ps. 25:4, 5) Shi zum u u lu henen kwagh a nan yô, nôngo nana kav aeren a Aôndo a doon tsung la tsembelee. (Eks. 34:5, 6; 1 Pet. 5:6, 7) Hanma itinekwagh i ne lu henen yô, nôngo nana fa Injaor i Yehova a lu jim jim la. Wase orhenen Bibilo la, nana kav aeren a Yehova a doon tsung, amba er dooshima man erdoo kua mhôônom nahan. Yesu yange kaa ér “tindi u hemban cii man u hiihii” yô, ka u “Yehova Aôndo wou a̱ doo u ishima” la. (Mat. 22:37, 38) Nôngo tese or u u henen Bibilo a nan la, Aôndo a doo nan ishima tsung.

13. Tese ikyav er u fatyô u wasen orhenen Bibilo nana hen kwagh u aeren a Yehova yô?

¹³ Shighe u u lu lamen vea or u u henen Bibilo a nan yô, pase nan er i hii ve Yehova a doo u ishima tsung yô. Kwagh la una wase orhenen Bibilo la nana kav er i doo u nan kpa, nana ya ijende vea Aôndo shi nana hen u soon un yô. (Ps. 73:28) Ikyav i tesen yô, ma hwange kwaghôron ngu ken ngeren u ne lu henen la, shin ken ivur Bibilo u u er kwagh u aeren a Yehova er dooshima man kwaghfan man ijirôron i sha mimi gayô tahav sha gbenda u kwagh shon a ker u ken ishima yôô? Aluer ka nahan yô, ôr or u u henen Bibilo a nan la, shi pase nan wer ka ityôkyaa i môm i i ne ve Ter wase u sha la a doo u ishima yum je la. Shi kwagh ugen kpa ngu u i gbe u hanma orhenen Bibilo yô, nana er ve nana kuma u a er nan batisema yô.

14. Ka nyi i ôr ken Mbaheberu 10:24, 25 sha kwagh u mbamkombo mba tiônnongo u una wase orhenen Bibilo u vesen ken jijingi?

¹⁴ Se cii ka se soo ser mba se henen Bibilo a ve la ve hen kwagh zan zan ve kuma u eren batisema. Gbenda môm u se fatyô u wasen ve yô, ka u taver ve ishima ser ve zaan mbamkombo mba tiônnongo. Mba ve hen Bibilo a ior ica i gbe yô, kaa nahan ér mbahenen Bibilo mba ve ngôôr ga je, ve hii u zan mbamkombo la, ka ve hemba vesen ken jijingi leva leva. (Ps. 111:1) Mbapasenkwagh mbagenev ka ve kaa a mbahenen Bibilo je ér akaa nga kpishi a vea fatyô u za henen ken mbamkombo a vea fatyô u henen shighe u ve lu henen kwagh la ga yô. Ôr Mbaheberu 10:24, 25 vea or u u lu henen Bibilo a nan la, shi  tese nan akaa a dedoo aa nana va mbamkombo ve nana zua a mi yô. Tese nan vidio i Ka Nyi I Eren hen Iyou i Tartor? la. * Wase orhenen Bibilo la nana fa er i gbe hange hange u nana bunden mbamkombo mba tiônnongo ga yô.

15. Ka nyi se fatyô u eren sha er se taver orhenen Bibilo ishima nana zaan mbamkombo mba tiônnongo hanma shighe?

¹⁵ Aluer or u u henen Bibilo a nan la, nan ngu a vande zan mkombo ga, shin nan fe zan ga nahan u er nena? Ôr nan kwagh u u sember henen ken mkombo sha gbenda u a sar nan yô. Nana nengen er kwagh u mbamkombo a maa u iyol yô, nan kpa a sar nan u zan. Na nan Iyoukura gayô, Uma Wase u Mbakristu man Tom Wase Antakerada u Mkombo u i lu henen zan a mi a ve ken mkombo la. Tese nan kwagh u a lu henen ken mkombo u una dondo la, maa pine nan kwagh u a hembe doon nan ker la. Kwagh u or u u henen Bibilo a nan, nana za mkombo sha kwa u hiihii ve nana zua a mi la, una hemba doon nan a nyityôkwagh igen i nan vande ungwan shin nengen ken ukwaghaôndo mbagen mba nan vande zan cii. (1 Kor. 14:24, 25) Nana zua a ior mbagen mba nana fatyô u henen akaa a dedoo ken ve, mba vea wase nan, nana za hemen zan zan nana kuma u eren batisema yô.

16. Ka nyi i gbe u u er sha er u hen Bibilo a or nana kuma u a er nan batisema, man ka nyi se lu henen ken ngeren u a dondo nee?

¹⁶ Se er nan ve se hen Bibilo a or nana kuma u a er nan batisema? Se wase hanma orhenen Bibilo nana de tôôn kwaghhenen beelee ga, sha u taver nan ishima ser se henen kwagh a nan hanma kasua shi nana waan iyol sha hanma kwaghhenen. Shi se taver nan ishima ser nana lamen a Yehova hanma iyange shi nana ya ijende a na kôôsôô. Shi doo u se taver nan ishima ser nana zaan mbamkombo mba tiônnongo. (Nenge ngeren u kiriki u sha peeji 12, u a lu a itinekwagh ér “ Kwagh u i Gbe u Mbahenen Bibilo Vea Er ve Vea Za Hemen a Kuma u Eren Batisema Yô” la.) Nahan kpa, akaa agen shi nga ataan a mbapasenkwagh vea er sha er vea wase mbahenen Bibilo vea kuma u eren batisema yô. A lam sha mi ken ngeren u a dondo ne.