1. Er nan ve se fe ser tom u geman ior hingir mbahenen ne ka tom u waren uuma mba iorovo?

TOM u geman ior hingir mbahenen la ka tom u waren uuma mba iorov! Er nan se fe nahana? Shighe u Yesu wa tindi u ken Mateu 28:19, 20 ne la, a kaa ér: “Za gema nen ior . . . ve hingir mbahenen . . . eren nen ve batisema.” Er nan ve i gbe hange hange u or a er batisema? Ka sha ci u aluer se soo ser i va yima se yô, saa se er batisema. Gba kpee u or u nan soo u eren batisema yô, nana na jighjigh ér Yesu yange kpe sha ci wase, shi i nder un. Man ka cii gbenda u se fatyô u zuan a uma u tsôron je la. Ka nahan ve apostoli Peteru kaa a mba ve civir Yehova a na imôngo la ér: ‘Batisema [ngu] waren ne hegen . . . sha mnder u shin ku u Yesu Kristu la ye.’ (1 Pet. 3:21) Shighe u orhenen nan er batisema yô, nan ngu a ishimaverenkeghen i va zuan a uma u tsôron.

2. Ka mbatesen mba nyi 2 Timoteu 4:1, 2 a kaa ér gba u se luu?

² Saa se lu ior mba “fan ityesen” ve se er tom u geman ior hingir mbahenen la tsembelee ye. (Ôr 2 Timoteu 4:1, 2.) Gba u a lu nahan sha ci u nyi? Ka sha ci u Yesu wa se tindi ér: “Za gema nen ior . . . ve hingir mbahenen . . . tesen nen ve.” Apostoli Paulu yange kaa ér: “De gbe uwer” sha tom ne ga, sha ci u “aluer u ngu eren nahan yô, u yima iyol you kua mba ve keghen ato a we la.” Ka nahan ve Paulu kaa ér: “Veren ishima sha . . . ityesen you hanma shighe cii” ye. (1 Tim. 4:16) Er i gbe u saa se tese ior ve se gema ve vea hingir mbahenen yô, se soo ser ityesen yase i lu i hemban doon cii.

3. Ka nyi se lu henen ken ngeren ne sha kwagh u henen Bibilo a ioro?

³ Se mba henen Bibilo a ior umiliôn imôngo sha tar. Kpa er yange i pase ken ngeren u a kar la nahan, se soo u fan er se er ve se wase mbahenen Bibilo mban kpishi ve er batisema yô. Ken ngeren ne, se seer timen sha akaa ataan a i gbe u hanma ortesen nana er ve nana wase orhenen Bibilo nana kuma u a er nan batisema yô.

4. Gba u or u nan lu tesen mbagenev Bibilo la, nana kôr iyol i nan tsaha shighe u nan lu henen Bibilo a ve la sha ci u nyi? (Nenge ngeren u shin kpe la kpaa.)

⁴ Akaa a se tesen ior ken Mkaanem ma Aôndo la doo se ishima tsung. Nahan aluer se wa ikyô ga yô, se lam sha akaa a a doo se ishima ne a za kar ikyaa inya. Doo u se fa ser, aluer se mba Hemen Iyoukura shin Bibilo i Henen ken Tiônnongo gayô se mba za henen Bibilo a or kpa, doo u se lam a za kar ikyaa inya ga. Aluer se soo ser, se de Bibilo i tese ior yô, a gba u se kôr iyol yase tsaha, se lamen kpishi ga shi ka hanma kwagh u se fe sha ma ivur Bibilo shin sha ma itinekwagh cii i gbe u se lam sha mi ga. * (Yoh. 16:12) Hen ase sha akaa a yange u fa ken Bibilo shighe u u er batisema la, man aa u fe hegen ne. Alaghga hen shighe la, lu atesen a vesen a ka i gba u or a hii fan la tseegh yange u fa ye. (Heb. 6:1) Akaa a u fe nyian ne, u tôô anyom kpishi ve u hingir u fan a ye, nahan de nôngon wer u tese orhenen Bibilo akaa la cii kwa môm ga.

5. (a) Ka nyi se soo ser or u se lu henen Bibilo a nan la nana fa sha kwagh u Bibilo i nan lu henen la, u zuan sha kwagh i ôr ken 1 Mbatesalonika 2:13 laa? (b) Se taver or u se lu henen Bibilo a nan ishima u lamen sha akaa a nan lu henen la nena?

⁵ Se soo ser or u se lu henen Bibilo a nan la, nana fa wang ér kwagh u nan lu henen la due ken Mkaanem ma Aôndo. (Ôr 1 Mbatesalonika 2:13.) Se er kwagh nena? Taver nan ishima wer nana ôron mbagenev akaa a nan lu henen la. Shi shighe gen nea ôr ma ivur Bibilo nahan, de te nan iwanger sha mi ve ga, kpa ôr nan, nana pase u inja i kwagh u ivur Bibilo shon i ôr la. Wase orhenen Bibilo la, nana nenge a igbenda i nana fatyô u dondon kwagh u Mkaanem ma Aôndo ma er la ken uma u nan yô. Pine nan mbampin mba vea mgbegha nan u ôron kwagh yô, er u pinen nan mnenge u nan sha ma kwagh u Bibilo i ôr nahan, gayô er ishima i lu nan ker sha kwagh shon yô. (Luka 10:25-28) Ikyav i tesen yô, u fatyô u pinen nan wer: “Ivur Bibilo ne wase u u nengen a ma ieren i Yehova igen nena?” “Kwagh u u hen ken Bibilo ne una wase u nena?” “U nenge kwagh u hen ne nena?” “Shin u hen kwagh ne nahan ka u nena?” (Anz. 20:5) Ka kwagh u orhenen Bibilo nan fe la, a hembe lun kwagh u vesen ga, ka er kwagh u nan fe la a doo nan ishima shi nan lu eren tom a mi ken uma u nan la.

6. Er nan ve i doo u se za a or u nan fe ityesen tsema tsema, zum u se lu za henen Bibilo a oro?

⁶ Ka wea henen kwagh a or nahan, u ze her vea mbapasenkwagh mba ve fe ityesen tsema tsema la wer ne za hen kwagh a nan kpa? Aluer u eren nahan yô, pine ve ve ôr u mnenge ve sha gbenda u u hen kwagh a or shon la, kua er u er tom a Bibilo la. Aluer u soo u seer fan ityesen yô, a gba u u hide a iyol you ijime. (Nenge Aerenakaa 18:24-26.) Shi pine orpasenkwagh u nan er tom ne ica i gbe la, aluer orhenen Bibilo la nan ngu kaven kwagh u nan lu henen la yô. Shi aluer u ngu lun her ga kasua môm shin uhar nahan yô, u fatyô u ôron  orpasenkwagh shon wer, nana za hen kwagh a or shon. Aluer u er nahan yô, kwaghhenen la una lu zan hemen shi orhenen Bibilo la, nana fa er kwaghhenen la i lu beerkwagh ga yô. De nengen wer “ka mo” m henen kwagh a or la yum, nahan orgen nana fatyô u henen kwagh a nan ga ze. Kera ga je kpa kwagh u vesen yô, ka er u wase orhenen Bibilo la u henen mimi ne seer a seer la, man ka kwagh u dedoo u u vande soon sha ci u nan je la.

7. Ka nyi ia na ve a maa orhenen Bibilo iyol a kwagh u nan lu henen laa?

⁷ Gba u orhenen Bibilo nana kav wang ér akaa a u tesen ken Bibilo la doo u ishima shi u na jighjigh a mi kpaa. (1 Tes. 1:5) Aluer nan nenge nahan yô, a hemba maan nan iyol a kwagh u nan lu henen la. U fatyô u ôron nan er we iyol you u dondo akaawan a Bibilo ken uma wou ve, kwagh shon a wase u yô. Sha nahan yô, nana kav wang ér Bibilo ngi a kwaghwan u nan kpa una wase nan yô.

8. Ka nyi igen kpa u fatyô u eren sha er u wase orhenen Bibilo, man er nan ve i doo u u er nahana?

⁸ Zum u u lu henen Bibilo a or yô, ôr nan kwagh u anmgbianev mba yange ve tagher a akaa a orhenen Bibilo shon kpa nan lu tagher a mi, kpa ve hemba mbamtaver mba shon la. U fatyô u zan a ma anmgbian u ken tiônnongo u ikyav i nan ia fatyô u wasen orhenen Bibilo la yô. Gayô ôr nan akaa a a er Mbashiada mba Yehova a ka i gber sha jw.org/tiv la. Ngeren mbara ka ve lu a itinekwagh ér “Bibilo Gem Ior.” * Ngeren man uvidio mbara nahan, vea wase orhenen Bibilo nana nenge er i doo u nana dondo akaawan a Bibilo ken uma u nan yô.

9. U taver orhenen Bibilo ishima wer, nana hii u ôron mba hen tsombor u nan kua azende a nan kwagh u nan lu henen la nena?

⁹ Aluer orhenen Bibilo la nan er kwase shin nom yô, ve uhar cii mba henen Bibilo? Aluer ka nahan ga yô, lôhô orgen la kpaa nana kohol ne ken kwaghhenen la. Taver orhenen Bibilo la ishima, nana ôron mba hen tsombor u nan kua azende a nan kwagh u nan lu henen la. (Yoh. 1:40-45) U er kwagh ne nena? U fatyô u pinen nan wer: “U fatyô u pasen mba hen tsombor wou kwagh u Bibilo i tese ne nena?” shin “Ka hanma ivur Bibilo u fatyô u eren tom a mi u tesen ma ijende you wer kwagh u hen ne ka u mimi?” Aluer u ngu eren a orhenen Bibilo nahan yô, u ngu wan nan agoyol u va hingir ortesen. Nana va kuman yô, nana hii u duen kwaghpasen vea tiônnongo, nana lu orpasenkwagh u nan lu a er batisema ga yô. Shi u fatyô u pinen orhenen Bibilo la, aluer nan fa orgen u nana soo u henen Bibilo yô. Aluer nan fa yô, nôngo zua a or shon fese shi kaa a nan  wer, u va wer u va hen Bibilo vea nan. Tese or shon vidio i Ka i Hen Bibilo a Or Nena? la. *

10. Orhenen Bibilo a ior nana fatyô u dondo ikyav i Paulu la er i pase ken 1 Mbatesalonika 2:7, 8 nahan nena?

¹⁰ Gba u ior mba ve lu henen Bibilo a ior la, vea wa mbahenen mbara ikyo tsung shi kwagh ve una gba ve ishima kpaa. Tôô wer ica a gba ga tsô, vea hingir anmgbianev mba ken tiônnongo (Ôr 1 Mbatesalonika 2:7, 8.) Ka zange u ve paven a azende a ve a ken tar la shi sôron uma ve sha er vea va civir Yehova ga. Sha nahan yô, gba u se wase ve, ve zua a azende a mimi ken tiônnongo. Nahan kôr ijende a or u u henen Bibilo a nan la, zaan hen nan i de lun sha ashighe a ne henen Bibilo la tseegh ga, kpa kua sha ashighe agen kpaa. U fatyô u yilan nan sha hanseeti gayô tindin nan a loho shin zan hen ya u nan kpase sha ayange a ne henen kwagh ga la, sha u tesen wer kwagh u nan gba u ishima.

11. Ka nyi se soo ser mba se henen Bibilo a ve la ve zua a mi ken tiônnongo man ka sha ci u nyi?

¹¹ I ôr injakwagh igen ér: “Or tsahan wan tswen ga.” Nahan se fatyô u kaan ser: “Ka tiônnongo jimin cii ngu a er tom u geman or hingir orhenen la ye.” Ka nahan ve mbapasenkwagh mba ve fe u henen Bibilo a ior tsema tsema la ka ve tese mbahenen Bibilo mbara anmgbianev mba ken tiônnongo, sha er mbahenen Bibilo mban vea fatyô u henen akaa a injaa hen a ve ye. Kwagh la ngu a na yô, i saan mbahenen Bibilo mban iyol u lun imôngo a ior mba Aôndo, nahan i lu u anmgbianev mban vea fatyô u wasen ve u seer lun kôôsôô a Yehova shi taver ve ishima shighe u ve tagher a mbamzeyol yô. Se soo ser hanma orhenen Bibilo yô nana nenge ér nan gba kwagh ken tiônnongo shi nana fa ér nan ngu ken tsombor u se mba civir Yehova ne. Se soo ser hanma or u henen Bibilo yô, tsombor wase u se anmgbianev mba nomso man mba kasev mba se civir Yehova ne, u doo nan ishima tsung. Aluer kwagh ngu nahan yô, a hemba lun nan zange u paven ijende a ior mba vea fatyô u wasen nan u soon Yehova ga la. (Anz. 13:20) Aluer ior mba ngise ve lu azende a nan la gema palegh nan kpa, nana fa je ér nana fatyô u zuan a zende a mimi ken nongo u Yehova.—Mar. 10:29, 30; 1 Pet. 4:4.

12. Er nan ve i gbe u se ôron or u se henen Bibilo a nan la kwagh u Orkristu tseghan iyol i nan shi eren batisema?

¹² Gba u hanma shighe yô, u ôron er i gbe hange hange u or a tsegha iyol i nan sha ci u Yehova shi nana er batisema yô. Bee kera yô, ityôkyaa i se henen Bibilo a or yô, ka sha u se wase nan, nana er batisema nana civir Yehova yô. Shighe u i hen Bibilo a or iwer i wa karen, man hemban je yô, nan hii u van mba mkombo yô, gba u orhenen Bibilo la nana kav wang ér ityôkyaa i i lu henen Bibilo a nan yô, ka sha u a wase nan nana hii u civir Yehova, nana hingir Orshiada na.

13. Ka akaa a nyi nahan ka i gba u orhenen Bibilo nana er, sha er nana kuma u eren batisema?

 ¹³ Akaa nga kpishi a ka i gba u orhenen Bibilo u nan soo u eren batisema nana er yô. Hiihii yô, ka i gba u nana va fa Yehova shi Una doo nan ishima shi nana nan Un jighjigh kpaa. (Yoh. 3:16; 17:3) Orhenen Bibilo la nan hingir u yan ijende a Yehova kôôsôô kua anmgbianev mba ken tiônnongo kpaa. (Heb. 10:24, 25; Yak. 4:8) Shi ka nan zungwe tsung sha asorabo a nan, nan gema ishima shi nan de a. (Aer. 3:19) Shi jighjigh u nan ne la, ngu a mgbegha nan, nan hii u pasen mbagen mimi u nan lu henen la. (2 Kor. 4:13) Maa nan tsegha iyol i nan sha ci u Yehova shi nan tese ikyav i iyoltseghan i nan la, sha u eren batisema. (1 Pet. 3:21; 4:2) Hanma or cii ka i saan na iyol sha iyange la tsung! Er orhenen Bibilo la, nan lu tôôn angahar ne vough vough sha u va eren batisema la, za hemen u wuese nan sha mimi, shi taver nan ishima wer nana za hemen a kwagh u dedoo u nan lu eren la.

14. Orpasenkwagh nana fatyô u tôvon fan mzehemen u orhenen Bibilo nena?

¹⁴ Shighe u se lu wasen orhenen Bibilo sha er nana kuma u tseghan iyol i nan sha ci u Yehova shi eren batisema yô, gba u se waan ishima. Nahan kpa, shighe a karen yô, a gba u se tôv se fa aluer mimi je sar nan u civir Yehova Aôndo yô. U nenge a akav a tesen ér orhenen Bibilo la nan ngu nôngon tsung u kuran atindi a Yesu kpa? Shin u nenge wer, nan soo di tsô ér nana hen Bibilo nana lu a mfe?

15. Ka akav a nyi nahan a a tese orpasenkwagh ér orhenen Bibilo nan ngu nôngon ér nana kuma u eren batisema?

¹⁵ Tôôn shighe henen sha kwagh u orhenen Bibilo la, sha er aluer nan ngu vesen ken jijingi kpa u fa yô. Ikyav i tesen yô, nan tesen ér Yehova doo nan ishima kpa? Nan eren msen hen Yehova kpa? (Ps. 116:1, 2) Nan soon u ôron Bibilo kpa? (Ps. 119:97) Nan ze mbamkombo hanma shighe kpa? (Ps. 22:22) Nan ngu tesen sha ieren i nan ér nan ngu dondon akaa a nan lu henen la kpa? (Ps. 119:112) Nan hii u ôron mba hen tsombor u nan kua azende a nan kwagh u nan lu henen la vee? (Ps. 9:1) U hemban cii yô, nan soo u hingir orshiada u Yehova kpa? (Ps. 40:8) Aluer u nenge wer orhenen Bibilo la, nan ngu nôngon eren akaa a se ter sha heen ne cuku cuku ga yô, nôngo fa er i hii ve kwagh a lu nahan la, shi lam sha kwagh shon vea nan kundu kundu, kpa de er nan kwagh ku ku ku ga. *

16. Ka nyi ia tese ér ityôkyaa kera ngi i zan hemen u henen Bibilo a or ga?

 ¹⁶ Gba u u tôôn shighe u pinen iyol you sha ashighe ashighe, aluer doo u u za hemen u henen kwagh a or yô. Pine iyol you mbampin mban: Orhenen Bibilo la, ka nan wa iyol sha kwaghhenen la gaa? Kwagh gbe nan sha kwagh u zan mbamkombo gaa? Nan ngu a aeren a a doo ga yô hereghee? Nan ngu ken ma nongo u kwaghaôndo u aiegh hereghee? Aluer mlumun u sha mbampin mbara ka een, man u za hemen u henen kwagh a nan heregh yô, ka inja er u ngu nôngon wer u tese or u nan soo u benden a mngerem ga, uwe ôôn nahan! Aluer or la nan soo kwagh u nan lu henen la ga, shi nan kegh iyol u geman uma u nan ga yô, ityôkyaa ngi i u za hemen u henen kwagh a nan ga.

17. Ka nyi i gbe u mbahenen Bibilo a ior cii vea er u zuan sha kwagh u 1 Timoteu 4:16 a er laa?

¹⁷ Se mba eren beer sha tom u i we se sha ikyev u geman ior hingir mbahenen ne ga shi ka se soo ser, se wase mbahenen Bibilo ve za hemen ve kuma u eren batisema. Ka nahan ve i doo u se tesen ve ken Bibilo shi se tese ve ser kwagh u se lu tesen ve la doo se ishima shi se na jighjigh a mi kpaa ye. Heela tseegh ga, se taver or u henen Bibilo ishima ser nana kôr ijende a ior ken tiônnongo. Shi hanma shighe yô, se ôron nan kwagh u tseghan iyol i nan sha ci u Yehova shi eren batisema shi se nengen sha mlu u nan sha ashighe ashighe sha er aluer nan ngu zan hemen ken jijingi kpa se fa yô. (Nenge ngeren u kiriki u “ Kwagh u I Gbe u Orpasenkwagh Nana Er ve Nana Wase Orhenen Bibilo Nana Er Batisema Yô” u a lu sha peeji 13 la.) Doo se kpishi er se lu eren tom u waren uuma mba iorov ne nahan! Yô, se kange nen ishima se nôngo nen sha afatyô wase cii, u wasen mba se henen Bibilo a ve la, ve kuma u eren batisema.