HANMA inyom yô, ka i hide a iyôngo kpishi i doon Yehova ishima ken tiônnongo u Kristu. Hen ase er hanma ve ka nana hide ve i “ember sha” kpishi la. (Luka 15:7, 10) Aluer i hide a we ken tiônnongo yô, fa wer saan Yesu man mbatyomov kua Yehova iyol kpishi u nengen er u hide u lu ilyeegh ki tiônnongo yô. Nahan kpa, er u lu nôngon wer u hide u lu ijende i Yehova ne, u tagher a mbamtaver. Ka mbamtaver mba nyi nahana, man ka nyi ia wase u nôngon a ve?

Anmgbianev mba nomso man mbakasev mbagenev ka vea hide ken tiônnongo je kpa ishima i naan ve ibo her. Alaghga u fa er yange lu Tor Davidi ken ishima yô. Shin er i de un asorabo a na nahan cii kpa kaa ér: “Aferakaa [a am] hembam agee.” (Ps. 40:12; 65:3) Orgen ka nan hide hen Yehova anyom a kar imôngo je kpa, ishima i naan nan ibo her shin nan nengen iyol i nan ér nan hee. Anmgbian u kwase ugen iti na ér Isabelle. Yange i dugh u ken tiônnongo kera tsa hemba anyom 20. * A kaa ér, “Yange taver mo kpishi u nan jighjigh mer Yehova una dem kwaghbo la.” Aluer u de iyol kpe u yô, u hide shi u pav ijende a Yehova. (Anz. 24:10) De deen wer kwagh la a er u ga.

Mbagenev ishima ka i za ve iyol ér alaghga vea fatyô u eren akaa a i gbe u vea er ve vea hide a ya ijende a Yehova kangenaa la cica cii ga. Anmgbian u kwase ugen iti na ér Antoine, yange mba hiden a na ken tiônnongo yô, kaa ér: “Akaa kpishi a yange m hen shin m eren shighe u m lu Orshiada la hungur mo.” Mbagenev ka ve hen nahan, maa ve kera eren kwagh er ve fetyô la cii sha ci u Yehova ga.

De se tese ikyav. Aluer zege uraahumbe vihi ya u doonashe kaca kaca yô, orya la nana hen sha shighe u nana tôô man tom u nana er u hiden maan ya shon la ua yuhwa nan je a gande. We  kpa, aluer u er ma isholibo i vesen, nahan mlu wou vea Yehova vihi kpishi yô, alaghga u lu nengen wer akaa a i gbe u u er ve u hide u lu ijende i Yehova her la yuhwa je gande. Kpa ka sha tahav ou i gbe u u er kwagh ne ga.

Yehova ngu yilan se ér: “Va nen ase, sé hen nen kwagh imôngo.” (Yes. 1:18) U vande nôngon kpoghuloo wer u “hen kwagh.” U doo Yehova ishima sha iniôngon you la. Fa wer: Er u hide hen Yehova yô, una fatyô u tilen sha kwagh u u er ne kaan a Diabolo ér, ngu oraie!—Anz. 27:11.

Er u hidi hen Yehova yô, un kpa una kporom hen a we, er a tôndo zwa nahan. (Yak. 4:8) Doo kpishi u mbagenev vea nenge er u hide u lu ken tiônnongo yô. Kpa kwagh ugen kpa ngu u i gbe u u er yô. Gba u Teru man Ijende you Yehova una za hemen u doon we ishima seer. Kpa u er nan ve una za hemen doon we ishima seere?

Nôngo tsua u eren akaa a u nenge wer u fatyô la. A shi nan kpa u ngu umbur akaa a yange u hii fan sha kwagh u Yehova man a a tôndozwa u va eren ken hemen la her. Kpa hegen ne, gba u u hide u eren akaa a yange u eren vea tiônnongo la vough vough, er u duen kwaghpasen hanma shighe nahan, man u zan mbamkombo shi zuan a shighe u lun vea anmgbianev ou mba nomso man mba kasev. U fatyô u tsuan wer u er akaa a a dondo ne.

Lamen a Yehova. Teru fa dedoo ér aluer ishima zer nan we ibo sha kwaghbo u yange u er yô, kwagh la una na a taver we kpishi u eren msen hen a na. (Rom. 8:26) Nahan kpa, “taver ishima sha msen u eren,” ôron Yehova er i sar u kpishi u lun ijende na yô. (Rom. 12:12) Orgen iti na ér Andrej, a kaa ér: “Yange ishima zer nan mo ibo gbem shi m nenge mer m hee kpishi. Kpa yange mea er msen je ishima i seer pever mo.” Aluer u fa kwagh u u er msen sha mi jighilii ga yô, hen sha mbamsen mba Tor Davidi er shighe u gema ishima sha asorabo a na, i nger ken Pasalmi 51 man 65 la.

Henen Bibilo hanma shighe. Kwagh ne una wase u u seer lun a jighjigh u nan shi Yehova una seer doon we ishima. (Ps. 19:7-11) Orgen u yange ér nahan yô, iti na ér Felipe, a kaa ér: “Yange m soo mer me er Yehova kwaghbo sha kwa har ga, nahan m tsua mer me kura mlu wam vea na sha u henen kwagh sha tseeneke wam.” We kpa u fatyô u eren nahan. Aluer u soo wer i wase u u tsuan atineakaa a u hen kwagh sha mi sha tseeneke wou yô, u fatyô u kaan a ma ijende you i nan lu vea Yehova kôôsôô yô wer nana wase u.

Hide ya ijende vea anmgbianev ou mba nomso man mba kasev. Mbagenev ka ve hide ken tiônnongo ica i gba je kpa, i lu ve er doo mbagen a ve ga nahan. Kwase ugen u lu un nahan yô, iti na ér Larissa, a kaa ér: “Yange kunya kôrom a iyol yam kpishi. Tsa gbem je kpa m lu henen her di tsô mer m er anmgbianev av kwagh u vihin shi m na ve kunya.” Fa wer mbatamen kua mbagenev mba vian ken jijingi soo u wasen we ér u hide u lu ijende i Yehova. (Nenge ngeren u kiriki u a lu a itinekwagh ér, “ Ka Nyi Mbatamen Vea Fatyô u Erene?” la.) U hide nahan doo ve kpishi, nahan ve soo u wasen we sha er a saan we iyol yô!—Anz. 17:17.

U er nan ve anmgbianev ou mba ken tiônnongo vea seer doon we ishima? Eren akaa a anmgbianev ve lu eren la; zaan mbamkombo shi duen kwaghpasen vea ve hanma shighe. Kwagh ne una wase u nena? Orgen iti na ér Felix, a kaa ér: “Yange sar tiônnongo u m hide je gande. Nahan m nenge mer m gba kwagh. Hanma or cii yange nan wasem u hiden lun ken tiônnongo shi nengen mer Yehova dem kwaghbo shi me fatyô u zan hemen u civir un.”—Nenge ngeren u kiriki u a lu a itinekwagh ér “ Ka Nyi U Fatyô u Erene?” la.)

Satan una zer van we a mbamzeyol mba lun er ka zege uraahumbe nahan gbem, sha u uwer u gba u u nôngon wer u hide u lu ijende i Yehova. (Luka 4:13) Wa iyol kegh a kegh sha u eren akaa a u hide u lu ijende i Yehova her taveraa yô.

Yehova tôndo zwa sha kwagh u iyôngo na ér: ‘Me ker i i saa yô, man Me hide a i i tsum kera la, man Me kange i i kever yô, man Me taver i i gbe angev yô.’ (Esek. 34:16) Yehova wase mbagenev kpishi u hiden sôron mlu vea a na. Fa wer we kpa a soo u wasen we ér we u za hemen u nôngon sha er u hide u hemba yan ijende vea na taveraa yô.