Anmgbianev mba shin Betel yange ve er tom kpoghuloo nôngo u hemban inyom sha er vea tim ityôgh ki redio ki WBBR ki yange i tim hen Staten Island, New York City la yô. Yange mba sôron ijiir la mba been yô, ve maa iyou i mbatomov vea tsaan ker yô, shi ve er ijiir i veren ikyav. Anmgbianev mban mba been tom ne yô, ve hii u van a ikyav mbi gba u vea lu a mi ve, vea fatyô u samber a iliam sha ityôgh ki redio shon yô. Kpa ve lu a mbamzeyol kpishi mba gba u vea nenge sha mi yô.

Yange lu anmgbianev mbara zange u timin ityôgh ki samber a iliam la ga. Yange gba u vea tim ityôgh ki ki lihe je kuma angahar 300 ne sha mtom mhar ma taven kuman angahar 200. Sha hiihii la, ve nôngo kpa ve fatyô ga. Kpa er anmgbianev mban suur sha Yehova yô, ve va fatyô u eren kwagh ne. Anmgbian ugen ken mba ve er tom ne yô, iti na ér Calvin Prosser, a kaa ér: “Luun er yange se fatyô u timin ityôgh kin sha hiihii la yô, ma se nenge ser ka sha tahav asev.” Anmgbianev mbara yange ve wuese Yehova er a wase ve yô. Kpa lu zayol ve cii la ga.

Ityôgh ki redio lu kwagh u he hen shighe la, shi ikyav nav lu zange u zuan a mi ga. Nahan anmgbianev mban za yam ikyav mbi tsev hen orgen u lu a ityôgh ki redio yô. Kpa ve yam maikrofon ga, ve gema ve yam telefon. Maa sha iyange igen tugh ken uwer u Febewari, anmgbianev mbara kaa ér vea kar iyol vea nenge, aluer ikyav mbira doo yô. Nahan ve tsua ér vea wa atsam a Tartor sha redio. Ernest Lowe ôr kwagh u hômon u yange za hemen sha iyange la yô, a kaa ér, yange ve mba ngur wan atsam yô, Judge Rutherford b u lu ken Brooklyn, ica a ve je kuma ukilomita  25 nahan la za ungwa atsam a ve lu wan la sha redio na, maa a yila ve.

Anmgbian Rutherford kaa a ve ér, “De nen u zan or ato. Ne mba ngoron a ngor!” Yange ve nenge ér ve hee, maa fese je ve pir ityôgh ki redio, kpa ve lu a vangertiôr ér ikyav mbi redio mbira mbi eren tom tsembelee, nahan ve fa je ér vea fatyô u hiin kwaghpasen sha redio.

Sha iyange i Febewari 24, 1924, shighe u se lu pasen kwagh sha redio sha kwa u hiihii la, Anmgbian Rutherford kaa ér, a lu eren tom u Kristu u a lu Tor la a ne se la, a ityôgh ki redio kira. Yange kaa ér awashima u timin ityôgh ki redio kin yô, ka “u wasen ior u nengen a iwanger i Bibilo, sha er ve fa shighe u se lu ker ne yô, vea lu ken nyi kwaghaôndo shin côôci je kpaa.”

Yange i lam sha ityôgh ki redio kin sha kwa hiihii la a zayol shio. I za hemen u nan akaaôron a nongo u Yehova sha ityôgh ki redio ki WBBR ne kuma anyom 33.

Ken uwer u Julai 1924 la, Mbahenen Bibilo er mkohol u vesen hen geri u Columbus hen kpentar u Ohio. Yange ior mba sha ajiir kposo kposo sha tar va mkohol ne. I na akaaôron sha mkohol ne ken zwa Arabic man Buter man French man German man Greek man Hungarian, kua zwa Italian man Lithuanian man Polish, kua zwa Russian man ijô i hen haregh u Scandinavia la, kua Ukrainian. I lu samber a akaaôron a hen mkohol ne agen sha redio, nahan mbagenev lu ungwan sha ajiir a ve, shi anmgbianev ôr a mbatôôn abaver mba Ohio State Journal ér ve duen a abaver sha akaa a yange lu zan hemen hen mkohol la hanma iyange.

Sha iyange i Tomanyiin, Julai 24 la, iorov mba hemban 5,000 ken anmgbianev mba ve va mkohol la due kwaghpasen. Ve na ior ityakeda nôngo u kuman ukôpi 30,000, shi ve hii u henen Bibilo a iorov udubu imôngo. Iyoukura igen kaa ér iyange ne “lu iyange i hemban saan iyol sha mkohol la.”

Kwagh u vesen ugen yange er sha mkohol la sha iyange i Tomataan, Julai 25. Anmgbian Rutherford yange ôr ngeren u puun mbahemenev mba kwaghaôndo a mciem shio. A kaa ér ator kua mbahemenev mba kwaghaôndo man mbakpengav mba lun a ikyômpeni mba yangen ior u fan mimi sha kwagh u Tartor u Aôndo, u Aôndo una va uumace a averen sha ikyev i u la. Shi a kaa ér ior mban mba eren kwagh u shami ga,  sha ci u mba suen Mzough u Ityar Sha Won Cii (League of Nations) shi kaan ér akaa a mzough shon a lu eren la ka gbenda u Aôndo a lu hemen tar yô. Yange gba u Mbahenen Bibilo vea taver ishima ve vea pase ior loho la ye.

Iyoukura igen pase er mkohol ne yange wase ior kpishi yô, ér: “Yange ikyumutya i Ter i kpuaa, i i va mkohol u i er hen Columbus la cii seer nan jighjigh . . . , nahan ve za hemen u pasen kwagh a mciem shio, shin er i lu hendan a ve nahan kpaa.” Anmgbian ugen u un kpa za mkohol ne yô, lu Leo Claus, a kaa ér: “Yange se mba hidi mkohol ne yô, maa se iyol kpishi u samber a loho la hen haregh wase.”

Yange i gber trak u mkaanem ma Anmgbian Rutherford la ukôpi umiliôn imôngo, i yilan ér Ecclesiastics Indicted. Nahan mba ker ken uwer u Oktoba yô, Mbahenen Bibilo hii u nan ior trak shon. Frank Johnson yange na ior trak ne hen geri u Cleveland, hen kpentar u Oklahoma bee, kpa lu u saa una kegh a kuma miniti 20 cii ve mbapasenkwagh mbagen vea va kohol un ye. Kpa lu u una kegh ve hen ijiir i ior a nenge a na ga yô, sha ci u loho u lu pasen la doo ior mba hen geri la ga, nahan ve lu keren un. Nahan Anmgbian Johnson za yer ken côôci igen her ikyua. Nengen a or môm ken côôci la ga yô, a wa trak u Ecclesiastics Indicted la ken Bibilo i orpasen adua la, shi a ver kôpi môm môm sha hanma ikyônough. Yange er kwagh ne fele fele. Er lu a shighe her yô, shi za ken ucôôci mbagenev uhar za er nahan vough.

Frank yange hide ayem va hen ape lu u anmgbianev vea va kohol un la. A hide a va yer ken ijime i ijiir i haan peturuu, lu nengen, aluer ior mba ve lu keren un la vea lu van yô. Ior mbara va kar her sha mato kpa ve nenge a Frank ga. Ve yem ica lu a gba ga maa, anmgbianev mbagenev mba ve lu pasen kwagh her ikyua, mba Frank lu keghen ve la za va, va tôô un ve yem.

Anmgbian ugen ken mba yange ve lu vea Frank la kaa ér: “Er se lu yemen la, se kar ikyua a ucôôci mba utar mbara cii. Hanma côôci yô, se nenge ior tile her kuma iorov 50 nahan. Mbagenev lu ôron trak shon, mbagenev di lu tesen orpasen adua ve. Kpa yange se mba va tôôn Frank je maa se kera timbir hen ijiir la ga, sha u palegh nyityô zayol cii! Nahan kpa, se wuese Yehova Aôndo wase kpishi er yange kura se shi na se kwaghfan se hemba lun tsev tsev a mbahyomov mba Tartor mbara yô.”

Ken ityar igen kpa, Mbahenen Bibilo lu pasen kwagh a mciem shio. Ken vegher u ken imbusutarimese i tar u France la, Józef Krett yange pase loho u Tartor hen ior mba ken tar u Poland mba ve va lu hen ijiir ne, ve lu eren tom u dughun awen a injaa shin inya la. Yange i ver iyange ér a na kwaghôron ugen. Kwaghôron shon lu a itinekwagh ér, “The Resurrection of the Dead Soon” (“Ica a Kera Gba Ga Tsô A Nder Ior Shin Ku”). Kpa anmgbianev mba ne ior kwatakeda u lôhôn ve mkombo shon yô, fada u hen ijiir la kaa a mbazan adua mba ken parishi na cii ér ve de ze ga. Kpa ve wa icintan na la ikyo ga. Yange ior za mkombo la hemba iorov 5,000, kua fada la iyol na! Maa Anmgbian Krett kaa a fada la ér a pase akaa a a ne jighjigh a mi la. Kpa a venda. Anmgbian Krett yange na ior ityakeda i lu a mi la cii, sha ci u nenge ér sar ior mba lu pasen ve kwagh la u fan Mkaanem ma Aôndo.—Amo. 8:11.

Anmgbian Claude Brown yange yem ken Afrika ken tar u Gold Coast, u i yer hegen ér Ghana la, u za pasen loho u dedoo. Akaaôron a na kua ityakeda i yange na la, wase u samber a mimi fele fele ken tar la. John Blankson u lu henen tom  iyouci hen shighe la, yange ungwa kwaghôron ugen u Anmgbian Brown na yô. Fese je maa a nenge ér ka mimi je ne. John kaa ér: “Mimi ne yange na yô, saan mo iyol kpishi, nahan m pase mbagenev kwagh ken makeranta, ape m lu henen tom iyouci la.”

Iyange igen yô, John za ken côôci i Anglican igen ér una za pine pastô ve kwagh sha kwagh u ityesen i Triniti la, sha ci u va kav wang ér ityesen la due ken Bibilo ga. Kpa pastô la zenda un kera, lu ngoron kaan ér: “U ngu Orkristu ga; u ngu or u Diabolo. Due heen sha!”

John hidi ken ya yô, a nger pastô la washika ér a due ken igbar a va ta iwanger sha kwagh u ityesen i Triniti la, hanma or nana ungwa. Nahan pastô la kaa a John ér a za hen afishi a tica u vesen u makeranta u John zaan la. Ze yô, tica la pine un aluer una nger washika hen pastô la yô.

John yange kaa a na ér, “M nger un washika, Orvesen.”

Tica la maa kaa a John ér a nger washika u nan pastô la anyi a yan. Nahan John nger ér:

“Orvesen, tica wam kaa ér m nger washika u nan we anyi a yan. Nahan aluer u lumun u kaan wer akaa a u tesen la ka a mimi ga yô, me nger washika la.”

Yange kpiligh tica la iyol, nahan a pine ér: “Blankson, ka kwagh u u soo u ngeren nee?”

“Een, Orvesen. Ka kwagh u m soo u ngeren cii je ne.”

“Nahan mba zendan we hen makeranta ne kera. U fatyô u lamen dang sha pastô u côôci i gomoti shi henen wer u lu hen makeranta u gomoti her ga.”

“Kpa, Orvesen, . . . ka wea tese kwagh man akaa agen a wanger se ga yô, se pine u gaa?”

“Ka ne pine yum.”

“Orvesen, nahan ka kwagh u a ze hemen je la. Or la yange lu tesen se Bibilo, nahan m pine un mpin. Aluer a fatyô u nan mlumun sha mpin la ga yô, er nan ve i gbe u me nger un washika u zamber a na mer a yam anyi?”

Yange i kera zenda Blankson ga, shi na pastô la anyi a yan kpaa ga.

Iyoukura igen sav ôron kwagh u yange za hemen ken inyom la cii kaa ér: “Se fatyô u ôron er Davidi nahan ser: ‘U wam agee iyol sha u zan ityav.’ (Pasalmi 18:39) Se zua a ishimataver ken inyom ne kpishi, sha ci u se nenge a uwegh ku Ter ken tom na . . . Mbacivir un sha mimi . . . mba pasen kwagh saan saan.”

Inyom la ze ken atô yô, anmgbianev lu keren gbenda u timin ityôgh ki redio ki sha uhar. Yange ve tim ityôgh ki redio kira hen kpentar u Chicago. I yilan ityôgh ki redio ki hegh kin ér WORD. Kwa ne yô, ve yam ikyav mbi injaav mbi ior mba sha ajiir a icaa, er mba ken imbusutarimese i tar u Kanada nahan je kpa, vea fatyô u ungwan a ve yô.

Ken inyom i 1925 la, Yehova wase Mbahenen Bibilo u kaven akaa a he a doon a Mpase ityough 12 a ôr la. Mkav u he ne yange na yô, mbagenev de u civir Yehova. Kpa mbagenev kpishi doo ve u fan akaa a yange er sha la, man er akaa shon a bende a ior mba Aôndo shin tar yô.