Ashighe agen ka i taver we u umbur kwagh u u sember henen yôô? Se cii kwagh la ka a er se ashighe agen. Nahan ka nyi ia wase u-we? Hide sav akaa a vesen a u hen la.

Shighe u u lu henen kwagh la, nôngon u tamber hiden henen sha akaa a vesen u u sember henen yô. Nenge er apostoli Paulu yange wase mba ve lu ôron washika na la u eren kwagh ne yô, a nger ér: “Nahan kwagh u vesen ken kwagh u se lu ôron yô, ka un ne.” (Heb. 8:1) Kwagh u ôr ne wase mba nger ve washika la u kaven kwagh u lu ôron la, man er hanma kwagh a zough sha itinekwagh i lu lamen sha mi la yô.

Shighe u u hen kwagh u bee yô, u fatyô u tôôn shighe er miniti pue nahan, hiden henen sha akaa a vesen a u hen yô. Aluer u fatyô u umbur akaa a vesen a u hen la ga yô, hide nenge atineakaa a kiriki la, gayô ôr hwange u hiihii u hanma ikyumhiange, sha er u umbur akaa a u hen la yô. Aluer u hen kwagh u he yô, nôngo u hiden pasen un ken mkaanem ou. Aluer u ngu hiden saven akaa a vesen a u hen la yô, kwagh la una wase u u umbur akaa shon tseegh tsô ga, shi u hemba kaven er kwagh shon una wase u ken uma wou la tsembelee.