1-2. Er i ôr ken 1 Timoteu 6:20 nahan, ka nyi yange i wa Timoteu sha ikyeve?

ASHIGHE kpishi ka se wa mbagenev akaa ase a injaa sha ikyev ser ve nengen se sha mi. Ikyav i tesen yô, ashighe agen ka se za wa inyaregh ken banke. Ka sea za wa inyaregh yasegh ken banke yô, se ver ishima ser a koso ki tsembelee, ki a saa shin or a ii ki ga. Sha nahan yô, se kav inja i kwagh u a lu u nan orgen kwagh wase u injaa ser nana koso se, shin nana nengen sha mi la tsembelee.

² Ôr 1 Timoteu 6:20. Yange i wa Timoteu kwagh u injaa sha ikyev, nahan apostoli Paulu umbur un ér a de hungur ga. Kwagh shon yô, lu mfe u vough u kwagh u Aôndo a we ishima u eren sha ci u uumace yô. Yehova shi yange na Timoteu ian i icivirigh i “pasen loho u Aôndo” shi ‘eren tom u orpasenivangeli.’ (2 Tim. 4:2, 5) Paulu yange wa Timoteu kwagh ér a kura kwagh u i we un sha ikyev la. Se kpa i wa se akaa a injaa sha ikyev er Timoteu nahan. Akaa a injaa shon ka nyi? Man er nan ve i gbe u se kura akaa a injaa a Yehova a ne se laa?

3-4. Ka atôôkyaa a nyi a ne ve mimi u Bibilo la a lu kwagh injaa yumu?

³ Yehova er kwagh a vese doo kpen kpen, a na se mfe u vough u mimi u a lu ken Bibilo i i lu Mkaanem nam la. Mimi u Bibilo la ka kwagh u injaa kpishi, sha ci u ngu a tese se kwagh u se er ve se ya ikyar kangenaa a Yehova yô. Shi ngu a pase se kwagh u una fatyô u nan se msaanyol u mimi ken uma la. Ka sea na akaa a mimi a Bibilo i tese la jighjigh yô, kwagh la wase se i kera tsugh se sha atesen a aiegh ga shi se palegh aeren a dang kpaa.—1 Kor. 6:9-11.

⁴ Ityôkyaa igen i i ne ve mimi u Mkaanem ma Aôndo la a lu kwagh u injaa yô, Yehova pasen un hen mbahiden a iyol ijime, mba ve lu a “ishima i mimi i zuan a uma u tsôron” la tseegh. (Aer. 13:48) Ambaaior la, ka a na jighjigh je ér ka wanakiriki u jighjigh man u fan kwagh Yehova a lu eren tom a na nyian u  tesen se Bibilo ye. (Mat. 11:25; 24:45) Se fatyô u kaven Bibilo sha tseeneke wase ga, man kwaghmôm ngu a inja kuma sha mfe u Bibilo la ga.—Anz. 3:13, 15.

5. Ka nyi igen kpa Yehova a ne se?

⁵ Yehova shi na se ian i icivirigh i tesen mbagenev mimi sha kwagh na, kua mbaawashima nav. (Mat. 24:14) Loho u Yehova u se pasen la ka kwagh u injaa kpishi, sha ci u ka u wase ior u va lun ken tsombor u Yehova, shi u bugh ve gbenda u vea fatyô u zuan a uma u tsôron yô. (1 Tim. 4:16) Aluer se mba eren tom ne kpoghuloo, shin se fatyô u eren kpuaa tseegh kpa, se mba suen tom u injaa u hemban cii u i lu eren hen shighe ne yô. (1 Tim. 2:3, 4) Sha mimi yô, ka kwagh u icivirigh kpishi u lun mbaeren tom a Aôndo imôngo!—1 Kor. 3:9.

6. Ka nyi yange i er ior mba ve de u kuran akaa a i na ve laa?

⁶ Sha ayange a Timoteu la, ian i icivirigh i eren tom a Aôndo imôngo la, gba Mbakristu mbagen kwagh ga. Er Dema soo tar u hegen ne yum yô, a gema ian i icivirigh i eren tom vea Paulu la ta kera. (2 Tim. 4:10) Ikyav tese ér Fijelu man Hemojini kpa de tom u pasen kwagh la sha ci u ve lu cian ér, a va tôv ve a ican er Paulu nahan. (2 Tim. 1:15) Hamenio man Alekezanda kua Filetu di yange ve de u civir Yehova ve hingir mbavendan mimi. (1 Tim. 1:19, 20; 2 Tim. 2:16-18) Ikyav tese ér ior mban lu ior mba sha hiihii la, Yehova doo ve ishima yô, nahan kpa ve va de u veren ishima sha akaa a injaa a Yehova na ve la.

7. Ka igbenda i nyi Satan ngu a er tom a mi sha u meen se?

⁷ Satan ka a nôngo ér una mee se, se gema akaa a injaa a Yehova a ne se la se ta kera nena? Nenge ase igbenda igen i Satan ngu a er kwagh ne yô. Ngu a er tom a akaa a i tesen sha televishen yô, man ufiim kua Intanet man pipambaabaver kua ityakeda man umagazin nahan, sha er una na se hii u henen shi eren akaa aa na kure kure maa Yehova una kera doo se ishima ga, shi se de u kuran atindi a na yô. Ngu a nôngo ér una ta se mciem iyol sha er se cia kwagh u ior vea hen shin vea ôr sha iyol yase la, gayô a anger se a tôvacan sha er se de u pasen kwagh yô. Shi ngu a nôngo ér una mee se, se kegh ato a atesen a mbavendan mimi ve samber a mi la, sha ér se undu mimi yô.—1 Tim. 6:20, 21.

8. Ka nyi u hen ken kwagh u er anmgbian ugen u i yer un ér Daniel laa?

⁸ Aluer se wa ikyo ga yô, se hii u undu mimi kure kure. Nenge ase kwagh u yange er Daniel * u soo ugyeem mba sha vidio kpishi yô. A kaa wener: “Yange m hii u gbidyen ugyeem mba sha vidio shighe u m zurum anyom pue la. Sha hiihii  la, m gbidyen ugyeem mbabov ga. Kure kure maa m hii u gbidyen ugyeem mba tesen ipila kua akaa a mbaimev.” Shighe kar yô, Daniel a gbidyen ugyeem mba sha vidio i kuma ahwa 15 nahan hanma iyange. A kaa ér: “Ken ishima yam yô, yange m fa er ugyeem mba m lu gbidyen la, kua shighe u m lu vihin sha u gbidyen ve la na m kera lu lun kôôsôô a Yehova ga yô. Kpa m kure ikyar a ishima yam mer ka keng saa me er kwagh u Bibilo i ôr la ga.” Sha nahan yô, aluer se wa ikyo ga yô, akaa a nan msaanyol a a dan se fese maa se hii u undun mimi kure kure. Aluer kwagh er se nahan yô, se hingir u geman akaa a injaa a Yehova a ne se la haan kera.

9. Kwagh u i er ken 1 Timoteu 1:18, 19 la tese ér Paulu yange kaa a Timoteu ér a er nyi?

⁹ Ôr 1 Timoteu 1:18, 19. Paulu yange tôô Timoteu kar sha orshoja, shi kaa a na ér a “za hemen u nôngon ityav mbi dedoo.” Paulu lu ôron kwagh u ityav mbi nôngon a ushoja kpôô kpôô ga, kpa lu mbi ken jijingi. Ka sha igbenda i nyi nahan Mbakristu ve lu er ushoja mba ve lu ken utya nahana? Ka aeren a nyi i gbe u se shoja i Kristu se lu a mini? De se nenge akaa ataan a se fatyô u henen ken injakwagh i Paulu ôr ne yô. Akaa a se hen ne a a wase se, se kusu mimi gbang.

10. Ka nyi i lu u civir Aôndo, man er nan i gbe hange hange u se er nahana?

¹⁰ Tsaase iyol you u civir Aôndo. Orshoja u dedoo ka nan eren kwagh sha mimi. Ka nan nôngo kwagh kpoghuloo sha er nana kura or u nan doo nan ishima gayô, ma kwagh u a gbe nan kwagh yô. Paulu yange taver Timoteu ishima ér a tsaase iyol na u civir Aôndo, inja na yô, ka u varen a Aôndo sha mimi je la. (1 Tim. 4:7) Aluer Aôndo ngu doon se ishima seer a seer shi se mba civir un a ishima i môm yô, se hemba lun a isharen i kôron mimi gbang gbang.—1 Tim. 4:8-10; 6:6.

11. Er nan ve i gbe u se tsaase iyol yase?

¹¹ Tsaase iyol you u eren kwagh u dedoo. Ka i gba u orshoja nana tsaase iyol i nan sha er hanma shighe yô, nan wa iyol nan keghen a kegh ityav yô. Timoteu yange fatyô u hemban ameen a Satan sha ci u dondo kwaghwan u Paulu la, shi nôngo kwagh kpoghuloo hemba asaren a bo, gema lu a aeren a dedoo shi kohol imôngo a anmgbianev nav mba ken Kristu. (2 Tim. 2:22) Yange tsaase iyol na ve fatyô u eren akaa la ye. Se kpa, gba u se tsaase iyol yase ve, se fatyô u hemban ityav mbi se lu nôngo a asaren a bo la ye. (Rom. 7:21-25) Heela tseegh ga, shi gba u se tsaase iyol yase ve se za hemen u nôngon éren or u tse la kera geman haan or u he la iyol ye. (Ef. 4:22, 24) Shi zum u ka sea er akaa sea va hide her yô, i tume se iyol, nahan i gba u se kighir iyol yase ve se fatyô u zan mkombo ye.—Heb. 10:24, 25.

12. Se er nan ve se hemba fan u eren tom a Bibilo?

¹² Ka i gba u orshoja nana karen iyol aa ikyav mbi tswamev mbi nan. Ka i gba u nana eren kwagh ne hanma shighe, ve nana fa u eren tom a mbi tsembelee ye. Se kpa, gba u se fa u eren tom a Mkaanem ma Aôndo tsema tsema. (2 Tim. 2:15) Se fatyô u henen igbenda igen i se er kwagh ne yô, ken mbamkombo asev. Kpa a lu se soo ser, se wase mbagen ve na jighjigh ér mimi je, mimi u Bibilo la ka kwagh u injaa yô, a gba u se henen Bibilo sha tseeneke wase hanma shighe. Gba u se er tom a Mkaanem ma Aôndo sha u taver jighjigh wase. Kwagh ne hemba u ôron Bibilo tseegh la. A gba u se henen sha kwagh u se ôr la zulee, shi se tôvon sha mi ken ityakeda yase i pasen Bibilo la, sha er se kav inja i kwagh shon vough shi se fa u dondon kwagh u Ruamabera a kaa la yô. (1 Tim. 4:13-15) Aluer se er nahan yô, se fa u eren tom a Mkaanem ma Aôndo u tesen mbagen. Nahan kpa, a gba u se er kwagh a hemba di u za bughun avur a Bibilo ôron ve la. Se soo  ser, se wase ior mba se lu lamen a ve la, ve kav kwagh u avur a Bibilo shon a lu ôron la, kua er vea dondo kwagh shon la kpaa. Aluer se mba henen Bibilo sha tseeneke wase hanma shighe yô, se hemba fan u eren tom a Mkaanem ma Aôndo u tesen mbagen tsembelee.—2 Tim. 3:16, 17.

13. Ka nyi Mbaheberu 5:14 a ôr ér gba u se er sha u se fa mkposo u kwagh u dedoo man kwagh u bo?

¹³ Eren kwagh sha kwaghfan. Ka i gba u orshoja nana lu tsevaa sha er nana nenge a kwaghbo shi nana palegh yô. Se kpa, gba u se lu tsevaa sha er se fa akaa a a fatyô u bulan se la, er se palegh a yô. (Anz. 22:3; ôr Mbaheberu 5:14) U tesen ikyav yô, gba u se tsua iemberyolough kua akaa a nan se msaanyol la sha kwaghfan. Ashighe kpishi, akaa a ka i tesen sha televishen kua ken ufiim la, ka a tese ieren i hôngorough. Aeren la ka i lu a vihin Aôndo ishima shi i lu a a va or a zayol kpee yô. Ka se palegh ambaakaa la, sha ci u ka a na yô, Yehova a kera doo se ishima ga, man kwagh ne ka a hii kure kure.—Ef. 5:5, 6.

14. Daniel yange er kwagh sha kwaghfan nahan, kwagh la wase un nena?

¹⁴ Daniel u se vande teren kwagh na la, va hii u nengen er u gbidyen ugyeem mba ve tese ipila man kwagh u mbaimev la, i lu kwagh u bo yô. Yange tôv sha kwagh ne ken Watchtower Library, sha u una zua a ngeren mba vea wase un u nôngon a zayol na ne yô. Nahan kwagh la wase un nena? Yange de u gbidyen ugyeem mbabov mbara. Shi pav ijende a ior mba yange ve gbidyen ugyeem mbabov mbara sha Intanet la. Daniel kaa wener: “Yange m de u gbidyen ugyeem mba sha vidio la, m gema eren akaa agen shi lun imôngo vea azende am a ken tiônnongo.” Hegen ne Daniel ngu eren pania shi ngu ortamen.

15. Er nan ve u keghen ato a mbaaie la, i lu kwaghbo?

¹⁵ Se kpa gba u se fa kwaghbo u a lu ken mbaaie mba mbavendan mimi ve samber a mi la er Timoteu nahan. (1 Tim. 4:1, 7; 2 Tim. 2:16) Ikyav i tesen yô, alaghga vea lu samber a mbaaie sha iyol i anmgbianev asev, gayô vea lu nôngon ér se hii u hunan nongo u Yehova. Mbaaie mbara vea fatyô u tenger a jighjigh wase. Mayange se lumun a mbaaie mbara ga. Sha ci u nyi? Sha ci u “ka ior mba mhen ve a vihi shi ve te mimi kera” la ve samber a mbaaie mban ye. Awashima ve yô, ka u van a “ayôôso shi gban anyiman.” (1 Tim. 6:4, 5) Ka ve soo ér se lumun a mbaaie vev mbara, nahan se de u nan anmgbianev asev jighjigh.

16. Ka akaa a danen or a nyi, i gbe u se palegha?

 ¹⁶ Palegh akaa a danen we. Timoteu yange lu “orshoja u dedoo u Kristu Yesu,” nahan gba u una ver ishima sha tom u Aôndo, a lu sha u zendan akaa a iyolough shin veren ishima sha akaa agen ken uma ga. (2 Tim. 2:3, 4) Se kpa, doo u se er kwagh er Timoteu nahan, mayange se de ser isharen i zendan akaa a iyolough la i dan se ga. “Tahav mbu tsughun or mbu inyaregh ki lu a mi la” mbu a fatyô u nan Yehova kera doon se ishima ga, shi Mkaanem ma Aôndo kpa, maa a kera gba se kwagh ga, shi se kera lu a isharen i pasen ior ma kpaa ga. (Mat. 13:22) Gba u se eren akaa a kuma a kuma ken uma wase, shi se gema shighe wase kua agee ase cii se na sha u “keren Tartor u Aôndo hiihii.”—Mat. 6:22-25, 33.

17-18. Ka nyi se fatyô u eren sha er se kura ikyar i se ye vea Yehova laa?

¹⁷ Wa iyol u eren kwagh fefa. Ka i gba u orshoja nana vande wan agoyol tsuaa, sha er nana fa kwagh u nana er sha u kuran iyol i nan yô. Aluer se soo ser se kura akaa a Yehova a ne se la yô, a gba u se er kwagh fese zum u se nenge a kwaghbo yô. Ka nyi ia wase se u eren kwagh nee? Gba u se vande wan agoyol tsuaa sha er se fa kwagh u se er zum u se nenge a kwagh u una fatyô u bulan se yô.

¹⁸ Ikyav i tesen yô, ashighe agen ka a zua kwagh yô, i kaa a ior mba ve ve la ér ve vande yengen ahia fan ajiir a vea fatyô u duen hen ijiir i i kombo la fele yô, cii ve i mase hiin porogeram ye. Ka i er nahan sha ci nyi? Ka i lu sha ci u zum u kwagh a va er aburabur yô, vea fatyô u duen hen ijiir la kera fese yô. Se kpa, a gba u se vande wan agoyol tsuaa sha kwagh u se er zum u se za asegh sha kwagh u i lu tesen ijimba shin ipila gayô akaa a mbavendan mimi la aburabur yô. Kwagh ne a fatyô u lun shighe u se ze sha Intanet shin se lu nengen fiim gayô ma porogeram sha televishen yô. Aluer se vande wan agoyol tsuaa sha kwagh u alaghga se tagher a mi la yô, se fatyô u eren kwagh fese sha er se palegh kwagh u una vihi ikyar i se ye vea Yehova la, shi se za hemen u lun wang sha ishigh nagh yô.—Ps. 101:3; 1 Tim. 4:12.

19. Aluer se kura akaa a injaa a Yehova a ne se la yô, ka averen a nyi se zua a mi?

¹⁹ Gba u se kura akaa a injaa a Yehova a ne se la. Akaa shon yô, ka mimi u Bibilo i tese la, kua shi ian i icivirigh i tesen mbagenev mimi shon la. Aluer se er nahan yô, se lu a imoshima wang, shi uma wase una hemba lun a inja, shi se wase mbagenev vea va fa Yehova nahan a saan se iyol. Sha iwasen i Yehova yô, se fatyô u kuran kwagh u i we se sha ikyev la.—1 Tim. 6:12, 19