Ivur Bibilo la kaa ér: “Aluer wea nenge mkighir u i kighir icanor man mvihi u ijirôron kua mimi ken ipaven ugen yô, kwagh shon a̱ de kpiligh we iyol ga, gadia u a hembe tahav ngu kenger u a lu a tahav la, man shi mbagenev mba hemban ve kpaa mba.”—Orpa. 5:8.

Aluer se za sha mnenge u or yô, ka inja er ivur ne ngi ôron kwagh u uumace mba ve lu a tahav ken gomoti la tseegh nahan. Nahan kpa aluer se seer henen sha mi zulee yô, i ôr mimi ugen sha kwagh u Yehova u una sur se ishima yô.

Orpasenkwagh 5:8 ngu ôron kwagh u orhemen u nan nzughul a atsanaior shi nan eren kwagh a ve sha mimi ga yô. Doo u imba orhemen la nana umbur ér, a shi nan kpa orgen ngu kenger nan man or shon nan hemba ngun sha ian i vesen shi nan hemba ngun a tahav a nan ken gomoti kpaa. Man jighilii je yô, alaghga mbagen vea lu mba ve hembe lun sha aan a vesen a ve mbara cii yô. Kpa kwagh gema er vihi yô, ken gomoti u orumace yô alaghga mbahemenev mbara cii vea lu aferaior nahan ior vea gema a ya ican kpishi sha ci u ifer ve la.

Kpa aluer akaa vihi nan nan ka inja er a tsa a gema kposo ga je kpa, doo u se fa ser Yehova ngu ‘kenger mba ve lu a tahav’ ken gomoti u uumace la, man er se fe nahan yô, ka kwagh u surun se ishima kpen kpen. Se fatyô u zamber a Aôndo ser a wase se nahan se haa akaa a zan se iyol cii sha a na. (Ps. 55:22; Fil. 4:6, 7) Se fa nahan ser “ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.”—2 Kron. 16:9.

Sha nahan yô, Orpasenkwagh 5:8 umbur se kwagh u a lu ken gomoti u uumace yô; ér hanma shighe cii or ka nan hemba lun a tahav a orgen. Kpa u hemban cii yô, ivur la i umbur se er i lu Yehova a lu Uhemban Tahav sha Won Cii yô. Ngu hemen hegen sha ikyev i Wan na, Yesu Kristu u a lu Tor u Tartor na la. Un u a Hembe sha Won Cii la vea Wan na mba perapera shi mba kenger hanma or kua hanma kwagh u a lu zan hemen cii.