Aluer or ngu a kôr u ihyom ga kpa, alaghga u nenge ior kôr mbagenev ihyom sha igbenda kposo kposo. Hanma shighe yô, ka i due a abaver sha kwagh u ihyom i abuter vea ior-il, man ihyom i mbagenev ve kôr nomso mba yaven a nomso kua kasev mba yaven a kasev la, kua ihyom i ior mba ken ityar igen ve kôr ushirmbaiorov mba ve lu ken ityar ve shon la. Kwagh ne na yô, ugomoti mba ken ityar igen kpishi mba wan atindi a yangen afer a ior ka ve eren ma nongoior u ve kôr u ihyom la.

Ior ka vea nenge ér i kôr ve ihyom yô, ve di kpa ve kôr mbagenev ihyom. Sha ci u ishima ka i vihi ve, nahan ve soo ér vea or iyev. Kwagh ne ka a na yô, ihyom i samber wuee.

Alaghga u nenge wer mbagenev soo kwagh wou ga, shin ve na u iti i bo, shin mba nahan we tar gayô mba lahan we, shin mba anger we a ku. Kpa ihyom i kôron hemba vihin a akaa la. Ior ka vea kôr mbagenev ihyom yô, ve eren tswam a ve fele fele, shin ve bamen ve, gayô ve vihin ve akaa, shin ve taan num sha a ve shin ve yaven a ve sha igyosough gayô ve wuan ve; ka a lu ma nongoior yô, ve soo u timin u kera kuaa.

Magazin ne una na mlumun sha mbampin mba ve dondo ne, shi una tese er se er ve ihyom ia bee sha tar yô:

• Er nan ve ihyom i ngee sha tar yum nahana?

• Se er nan ve ihyom ia de u samber sha tara?

• Shighe ngu u ihyom ia va kera lu sha tar ga gbem sha won yôô?