Ken iwer i Hitoshi kera lu a tom ga la cii, yange ure kpishi sha ci u lu fan ape una za zua a tom ugen ga. Ikyav i tesen yô, yange za mtaviu u tom ugen, kpa za kaa ér una fatyô u eren tom u sha anyighe ga. Er nahan yô, or u lu eren un mtaviu la kaa ér, “Gbenda u u henen kwagh la taver mo tsôô!” Ior mba hen tsombor u Hitoshi man azende a na yange ve taver un ishima ér a za hemen u eren kwagh sha mimi er a kange ishima nahan, kpa va hii u tan akperan sha kwagh ne. Ikyav i tesen yô, yange kaa ér, “Lum er u tesen ieren i mimi sha ci u jighjigh u nan wam la ka kwagh u wasen ga nahan.”

Kwagh u er Hitoshi ne tese ér ka hanmaor cii ieren i mimi i gbe nan kwagh ga. Jighilii yô, ior mbagenev nenge ieren ne ér ka kwagh u van ve a mgbejime, hemban cii je yô mbaeren kpenga. Kwase ugen u a eren tom shin tar u South Africa yô kaa ér: “Ior mba ve eren tom vea mo cii ka mbawan anyighe, man ashighe agen ka ve kighir mo tsung ér m eren kwagh er ve nahan.”

Ieren i mimi ga i i samber nyian yum yô, ka aie u eren. Anyom a karen ken ijime la, profesôr ugen ken yunivasiti i Massachusetts Amherst, mba yer un ér Robert S. Feldman, yange tôv sha kwagh u aie u eren, nahan kaa ér, mbaganden kpishi ka vea lam a kuma miniti pue nahan yô, ve nôngo u eren aie keng. Feldman kaa ér, “Kwagh ne yange kpiligh se iyol kpishi. Yange se fa ser ior mba eren aie hanma iyange nahan ga.” Ior kpishi soo ér i tsugh ve ga, kpa mba gem mba tsughun mbagenev.

Er nan ve aie man iv kua aeren a mimi ga agen a ngee nyian yum nahana? Ieren i mimi ga bende a ior sha tar nyian nena? Kwagh u hemban cii yô, se er nan ve se palegh u nyôron iyol ken aeren a mimi ga nee?