Aluer i pine u ér “U soo u lun uma gbem sha wonoo?” nahan, u kaa wer nyi? Ior kpishi vea kaa ér, een, kpa ve nenge ér kwagh a fatyô u lun nahan ga. Or môm nana tsôr ga. Ku ka gbaaôndo.

Nahan kpa, aluer i gema i pine u ér, “U soo u kpenee” di ye? Jighilii yô, ior kpishi vea kaa ér, ei. Kwagh ne tese ér nyi? Shin er se lu tagher a atsan man mbamtaver nahan kpa, se cii se mba a isharen i lun uma sha gbaaôndo wase je. Bibilo tese ér Aôndo gba uumace a isharen i lun uma. I̱ pase ér, “A ver mtsôr ken asema a ve.”​—⁠Orpasenkwagh 3:⁠11.

Nahan kpa, uumace mba tsôron ga. Lu nyi i za iyolo? Man Aôndo er ma kwagh u karen a zayol ne kera je he? Mbamlumun mba Bibilo i ne la kôr ken ishima tsung, shi ve pase ityôkyaa i yange na ve Yesu ya ican shi kpe yô.

I pase se ken mtom ma Bibilo ma mtar ma hiihii ma takerada u Genese la ér Aôndo yange na nomsoor man kwase u hiihii la, Adam man Ifa ian i lun uma gbem sha won, shi pase ve kwagh u vea er ve vea tsôr yô. Ngeren la pase er yange ve venda u ungwan imo i Aôndo, ve ian i lun uma gbem sha won la kar ve yô. Bibilo ôr kwagh la tiônôô je yô, mbagenev ka ve hure kera ér ka kwaghahii. Kpa akaa a i er ken Genese la cii tese ér yange er nahan mimi, vough er akaa a i pase ken ityakerada i Ivangeli la nahan. *

Adam yange venda u ungwan imo i Aôndo nahan, ka nyi yange i due kere? Bibilo na mlumun kaa ér: “Er isholibo nyôr shin tar sha or môm [Adam], man ku gema va sha ci u isholibo yô, nahan ku va sha ior cii sha ci u ve cii ve er isholibo yô.” (Mbaromanu 5:12) Er Adam venda u ungwan imo i Aôndo yô, lu isholibo je er ye. Nahan kera lu u una lu uma gbem sha won ga, kpa lu u shighe a karen yô, una kpe. Er se lu ônov mba Adam yô, se ya dyako u isholibo na la. Ka nahan ve ka se gba angev, se bee iyol shi se kpe ye. Kwagh ne zua sha gbenda u mbatwerev ve pase ér mbayev mba dugh a mlu shin aeren a mbamaren vev ken uya la. Kpa Aôndo er ma kwagh u karen a zayol ne kera je he?

Aôndo er kwagh u duen a vese ken mlu ne kera, shin hiden a kwagh u yange saa Adam ve ônov nav kpa saa ve la, ka ian i  lun uma gbem sha won je la. Aôndo er kwagh ne nena?

Bibilo ôr ken Mbaromanu 6:23 ér: “Injar i isholibo i kimbin yô, ka ku.” Inja na yô, isholibo ka i va a ku. Adam yange er isholibo, nahan kpe. Se kpa se er isholibo, nahan gba u se zua a injar i isholibo, ka ku je la. I mar se ken mlu u isholibo ne, kpa ka sha ibo yase ga. Nahan Aôndo tindi Wan na, Yesu, va ngohol “injar i isholibo” la sha ci wase. Kwagh ne wase se nena?

Er or môm tseegh, Adam, u lu orumace u vough la yange va a isholibo man ku sha a vese sha ihyembeato na la yô, gba u orumace ugen u lun vough shi wan imo i Aôndo ikyo zan zan ku, nana paa se sha er se due ken zayol la kera yô. Bibilo pase ér: “Er ior kpishi ve hingir mbaasorabo sha ihyembeato i or môm yô, kape ior kpishi di ve hingir mbaperapera sha ikyo i wan i Or môm kpaa la.” (Mbaromanu 5:19) Ka Yesu yange lu “Or môm” la ye. Yange undu ya na u sha la, hingir orumace u vough *, shi kpe sha ci wase. Kwagh ne na yô, se fatyô u lun mbaperapera sha ishigh ki Aôndo shi lun a ishimaverenkeghen i va lun uma gbem sha won.

Nahan kpa, er nan ve yange gba u Yesu una ya ican shi una kpe keng ve una paa se? Aôndo Uhembanagee cii la ngu a tahav mbu yange ma gba kaan tsô ér ônov mba Adam ve lu uma gbem sha won gaa? Ngu a tahav mbu kaan nahan je ka u henen a hen ga. Kpa yange una kaa nahan yô, ma tese ér a kera wa ikyo sha tindi u a kaa ér injar i isholibo ka ku la ga. Tindi la ka u beelee ga, nahan una fatyô u wuan un kera shin geman a mi sha ci u zayol va nyôr un atô yum ga. Ka tindi u hange hange sha ci u ijirôron i mimi.​—⁠Pasalmi 37:⁠28.

Luun er Aôndo dugh kwagh u ijirôron la ver ken inya sha ikyaa ne yô, ior ma ve hen ér alaghga una er nahan sha akaa agen kpaa. U tesen ikyav yô, una fatyô u tsuan ônov mba Adam mbagenev mba ve kom u zuan a uma u tsôron la sha mimi je kpa? A fatyô u nan un jighjigh ér una kure uityendezwa navaa? Er  Aôndo a til sha mimi sha u eren kwagh u van se a myom yô, kwagh la tese se wang je ér una er kwagh u vough hanma shighe cii.

Ku u Yesu la na yô, Aôndo bugh se gbenda u va lun uma gbem sha won ken Paradiso shin tar. Hen ase sha mkaanem ma Yesu ma i nger ken Yohane 3:16 la, a kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” Sha nahan yô, ku u Yesu la ngu tesen ér Aôndo er ijir sha mimi hanma shighe tseegh tsô ga, kpa shi ngu tesen ér uumace doo un ishima kpishi.

Nahan kpa, er nan ve yange gba u Yesu una ya ican shi una kpe ku u nyoon er i pase ken ityakerada i Ivangeli la nahana? Er Yesu ya ican i nyoon tsung kpa za hemen u tilen a Aôndo sha mimi yô, Yesu tese wanger wanger ér kwagh u Diabolo kaa ér orumace môm kpa nana za hemen u civir Aôndo sha mimi shighe u nan tagher a ican ga la, ka mimi ga. (Yobu 2:​4, 5) Shighe u Satan mee or u vough, Adam er isholibo la, alaghga yange a lu er kwagh u Satan kaa la ka mimi nahan. Kpa Yesu u lu or u vough er Adam nahan la yange za hemen u ungwan imo i Aôndo, shin er lu yan ican i nyoon tsung nahan kpaa. (1 Mbakorinte 15:45) Sha nahan yô, Yesu tese ér Adam kpa yange ma fatyô u ungwan imo i Aôndo, yange una tsough u eren nahan yô. Er Yesu wa ishima a ican zan zan mkur yô, a ver se ikyav i se dondo yô. (1 Peteru 2:21) Er Yesu wa imo i Aôndo ikyo sha mimi yô, Aôndo na Wan na injar sha uma u sha, u kpen ga la.

Yesu yange kpe kpôô kpôô. Nahan gbenda bugh u zuan a uma u tsôron. U soo u lun uma gbem sha won kpa? Yesu yange pase se kwagh u i gbe u se er yô. A kaa wener: “Uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”​—⁠Yohane 17:⁠3.

Mbagberen magazin ne mba kaan a we ér we u hen kwagh u Yehova, Aôndo u mimi la, kua kwagh u Wan na Yesu Kristu. A saan Mbashiada mba Yehova mba hen ijiir you la iyol kpishi u wasen we u eren kwagh ne. Shi u fatyô u zuan a iwasen hen ijiir yase i sha Intanet i www.pr418.com/tiv la kpaa.