Gbenda u Ieren i Mimi Ga Ka i Bende a We La

KUHWA

“Ashighe kpishi ka u tagher a zayol ugen je i gba u u pande u er aie ve u due ker sha ye.”—⁠Mkaanem ma Samantha, kwase u shin South Africa.

U lumun a kwagh u Samantha a er laa? Se cii se mba tagher a mbamzeyol sha ashighe ashighe er Samantha nahan. Gbenda u ka se er kwagh shighe u se tagher a mbamlu mba vea na se er aie la ua fatyô u tesen kwagh u se nenge ser ngu se a inja la. Ikyav i tesen yô, aluer ka u palegh ihyeen la i hemba lun se kwagh u vesen yô, kwagh la una na se nenge ser gba keng u se er aie. Mbagenev ka vea va nengen a mimi ken kwagh u se er ve la ga yô, kwagh ne a gema a va se a mbamzeyol. Nenge ase kwagh u ngu a due ker ne.

IEREN I MIMI GA KA I NA IOR VE KERA NA AYOL A VE JIGHJIGH GA

Ior ka ve na ayol a ve jighjigh ve, ve ya ijende ye. Iorov uhar ka vea na ayol a ve jighjigh yô, ve nenge ér kwagh u zan ve iyol ngu ga. Mba gbe nan or jighjigh gaegh ga. Ior ka ve na ayol a ve jighjigh shighe u ve lu imôngo, ve lu ôron kwagh sha mimi shi ve lu tangen iyol u wasen ayol a ve ga yô. Nahan kpa, ieren i mimi ga i môm tseegh kpa ka i vihi jighjigh u ior ve ne ayol a ve la. Man shighe u kwagh a lu nahan yô, ka i taver ve kpishi u hiden nan ayol a ve jighjigh.

I lu nahan ma or u u hen wer nan ngu ijende you i dedoo nan tsugh u vee? Aluer nan tsugh u yô, yange lu u nena? A̱ shi nan kpa yange vanger var u ker, shi u nenge wer nan bume u je kpaa. Kape hanmaor je kpa a lu nan je la. Kwagh ne tese wang je ér ieren i mimi ga ia fatyô u paven or a azende a nan a dedoo.

IEREN I MIMI GA TSAREN

Profesôr ugen u tesen ayenge a inyar hen yunivasiti i California, Robert Innes yange tôv sha ieren ne, nahan kaa ér “ieren i mimi ga tsaren kpôô kpôô.” Sha nahan yô, se fatyô u tôôn ieren i mimi ga karen sha angev mbu tsaren. Aluer u ngu biishi a or u nan we aie yô, we kpa ieren i nan i mimi ga la ia fatyô u “tsaren” we kpee je.

U er nan ve u palegh u gban ken imeen i eren kwagh sha mimi ga laa? Bibilo ia wase u. Nenge ase akaawan a Bibilo kpuaa.

Aeren A A Lu a Mimi Ga Yô

Aie u eren

KA NYI? Ka u tsughun or u i gbe u u yer nan mimi ga la. Ka u ôron kwagh jighilii ga shin goom a mimi sha u tsumen a or, man u daan akaa a hange hange cirin sha u tsughun nan, man u kehen a kwagh sha u ior ve nenge ér kwagh shon vihi.

KWAGH U BIBILO I KAA YÔ: “Iferor ka kwagh u ndôhôr TER ishima je, kpa mzough Na yô, ngu a mbaperapera.” (Anzaakaa 3:32) “Dugh nen aie kera, hanma or nana̱ ôron kwagh sha mimi a or u nan we ndor a nan yô.”—⁠Mbaefese 4:⁠25.

Angereke

KA NYI? Ka u ôron kwagh u mimi ga sha iyol i or shin kaan a nan sha u vihin nan iti.

KWAGH U BIBILO I KAA YÔ: “Iferor nan samber a num, man or u angeregh paven ahuraior.” (Anzaakaa 16:28) “Ikyon ia lu ga yô, usu ua pir, henpe orangeregh nan lu ga yô, num kpaa ka u mem.”—Anzaakaa 26:⁠20.

Anyighe

KA NYI? Ka u meen yan or inyaregh shin saan nan a kwagh sha ayom.

KWAGH U BIBILO I KAA YÔ: “Ortom u sha tôndo u a lu icanor, or u i ban ave yô, de eren nan ican ga.” (Duteronomi 24:14, 15) “Or u nan nzughul a icanor yô, nan laha u A gbe nan la, kpa u nan zungu oribanave mhôônom yô, nan ngu civir Un.”—⁠Anzaakaa 14:⁠31.

Iv

KA NYI? Ka u tôôn or kwagh a u pinen nan ian shio.

KWAGH U BIBILO I KAA YÔ: “Or u iin nana̱ de kera shi iin ga, kpa guda yô nana̱ nôngo tsung, nana̱ er tom u mimi sha ave a nan, tsô nana lu a kwagh u panden nan orgen u kwagh a gbe nan yô.” (Mbaefese 4:28) “I̱ de tsughun ne ga, . . . mbaiv shin mbahuav shin mbahundenmsôrom shin mbauityuhwanev shin mbanumungbenda kpaa, vea ya dyako u tartor u Aôndo je ga.”—⁠1 Mbakorinte 6:9, 10.

IYOUKURA