Bibilo wa kwagh ér: “Inyaregh ki saren ki̱ de luun ken uma wen ga. Kwagh u ne lu a mi yô, a̱ kuma ne.”—Mbaheberu 13:5.

Nyian ne akaa nga kpishi a ior ka ve kaa ér saa se lu a mi keng yô. Nahan kpa Bibilo kaa ér, “kwagh u ne lu a mi yô, a̱ kuma ne.” Nena yô?

Palegh “inyaregh ki saren.” Ior ka ve ta mkpeyol ve man tsombor ve kera man ikyar yan ve a mbagenev man aeren a dedoo kua icivir iyolough ve sha ci u “inyaregh ki saren.” (1 Timoteu 6:10) Nenge imba injar i ka ve kimbi la shawono! Ken masejime yô, or u inyaregh ki doo nan la, ka ki kera “kuma nan ga.”—Orpasenkwagh 5:10.

Ior ve hemba gban we kwagh a akaa a iyolough. Ka mimi, akaa er uhanseeti man ukômputa nahan cii nga a inja. Kpa akaa ne a a fatyô u soon se shin wuese se ga; ka ior tseegh vea fatyô u eren nahan ye. Aluer se mba a “huror” u mimi yô, nana wase se u zuan a mkom ken uma.—Anzaakaa 17:17.

Bibilo wa kwagh ér: “Ishima i saan saan ka icigh ki dedoo.”—Anzaakaa 17:22.

Ishima i saan saan ia wase se u wan ishima a angev, er ka icigh ki dedoo nahan. Kpa se er nan ve se zua a msaanyol, shighe u se lu uange laa?

Tesen iwuese. Aluer se hemba veren ishima sha zayol wase yô, ‘ayange cii’ a a lu a bo. (Anzaakaa 15:15) Kpa Bibilo kaa ér, “lu nen a ishughun.” (Mbakolose 3:15) Hen u tesen iwuese sha akaa a dedoo a ken uma la, a lu a cuku je kpaa. Akaa, er shighe u iyange i lu zan u za miren man ahan a wese wese a or u doon we ishima man ahumbe a kundu kundu la cii, aa fatyô u nan uma wou una lu u a inja.

Eren akaa sha ci u mbagenev. Aluer se mba dedoo ga je kpa, “u nan a na kwagh hembe saan iyol a u ngohol a ngohol kwagh.” (Aerenakaa 20:35) Shighe u mbagenev ve sugh se sha ma kwagh u se er yô, ka i hemba saan se iyol, nahan se tôô ishima sha zayol wase la kera. Aluer se wase mbagenev uma ve hemba doon yô, uma wase kpa una hemba doon.

Bibilo wa kwagh ér: “Fa akaa a a hembe lun a inja yô.”—Mbafilipi 1:10.

Noov man kasev mba ve lun imôngo sha anshighe kpuaa tseegh yô, kwagh la una fatyô u vihin ivese ve. Noov man kasev mba ve vese ayol ave la, ve nenge ér ivese ve kpa ngi ken akaa a a hembe lun a inja ken uma ve yô.

Eren nen akaa imôngo. U we keren u eren akaa a a doo u tswen la yô, er nan ne sôr ian ne ver sha u eren akaa imôngo ga? Bibilo kaa ér, “guda uhar a u môm.” (Orpasenkwagh 4:9) Ne fatyô u eren kwaghyan imôngo, shin anumbe, shin duen sha won za man ankwagh gayô eren ma kwagh u ka a doo ne u eren la.

Tese wer or u ú vôso nan la, nan doo u ishima. Bibilo taver nom man kwase ishima ér ve soo ayol ave shi ve naan ayol a ve icivir. (Mbaefese 5:28, 33) U kuven or u ú vôso la shin sen a nan wese wese shin nan nan aniyua la una wase ivese you ia taver. Shi jighilii yô, mba ve vese ayol ave la, ve tesen isharen i yaven a or u ve vese la tseegh.—Mbaheberu 13:4.