ER IHEMBEATO i Adam man Ifa, mbamaren asev mba hiihii mbara, i ve a isholibo man ku sha uumace cii nahan kpa, kwagh ne gema awashima u Aôndo sha ci u tsombor u uumace la ga. Ken Bibilo i i lu Mkaanem ma Aôndo a ne i nger la cii, a pase ker kwa kimbir kimbir ér awashima na gema ga.

• “Mbaperapera vea ya dyako u tar, vea lu ken u gbem.”—Pasalmi 37:29.

• “Una tim ku sha won kera; Ter AÔNDO Una ese mliam sha ishiv mbi iorov cii.”—Yesaia 25:8.

• “Orihyom u masetyô u á tim un kera yô, ka ku.”—1 Mbakorinte 15:26.

• “Ku ua kera lu ga, shin ijungwen shin mliam shin ican kpaa ia kera lu je ga.”—Mpase 21:4.

Aôndo una va “tim ku sha won kera” shin una va kar a ku kera nena? Er se vande ôron nahan, Bibilo pase wang ér “mbaperapera . . . vea lu ken u gbem.” Kpa shi i kaa ér, “ma orperapera môm u shin tar u nan eren kwagh u dedoo nan eren isholibo ga, nan ngu ga.” (Orpasenkwagh 7:20) Kwagh ne tese ér, Aôndo una va wua atindi a na kera, sha ci u a soo ér, uumace mba ve yen ne ve kuma u va lun uma gbem shawon yumuu? Gba u se hen kwagh nahan cuku kpaa ga! Mayange una er kwagh nahan ga, sha ci u “Aôndo . . . eren aie ga.” (Titu 1:2) Nahan ka nyi Aôndo una va er sha u kuren awashima na u dedoo u lu a mi ve gba uumace laa?

Yehova Aôndo yange er kwagh sha dooshima, sha u yiman uumace sha ikyev i kuugh; ka ipaan i yange kimbi je la. Kwagh u a lu ipaan yô, ka u kimbin kwagh u a lu kwaghmôm, a u i vihi la shin nan kwagh u i kur ijir ér i kimbi la vough. Er uumace cii ve lu mbaasorabo shi i kur ve ijir ér ve kuma ku yô, Bibilo kaa sha mimi nahan ér: “Or u nan fetyô u paan anngô u nan, nan ngu je ga, shin u nan Aôndo kwagh u á paa nan a mi kpaa ga, —gadia mpaa u uma ve taver ishe tsô, yina gbem shawon.”—Pasalmi 49:7, 8.

Zum u orumace u nan yen ne nan kpe yô, nana fatyô u kimbin injar i asorabo a nan la tseegh; nana fatyô u yiman iyol i nan ga shin kimbin injar i asorabo a orgen la kpaa ga. (Mbaromanu 6:7) Yange kwagh gba se a or u vough man u nan lu a isholibo ga, u nana na uma u nan, a lu sha asorabo ase, a lu sha a nan ga yô.—Mbaheberu 10:1-4.

Lu kwagh u Aôndo er vough je la. Yange tindi Wan na, Yesu, sen sha, i va mar un shin tar ne lu or u vough, u lun a isholibo iyol shio. (1 Peteru 2:22) Yesu yange kaa ér, un va sha u “Una na uma Na a̱ hingir ipaan sha ci u ior kpishi.” (Marku 10:45) Yange kpe yima se sha asorabo ase man sha ikyev i kuugh, sha er se fatyô u lun uma yô.—Yohane 3:16.

Nyian ne, er kwaghôron u profeti u Bibilo a lu kuren yô, se mba ken ‘ashighe a ican shi uma taver,’ sha u tesen ér se mba ken “ayange a masejime” a tar u bo ne. (2 Timoteu 3:1) Ayange a masejime ne aa kuusu sha “iyange i ijirigh man mtim u mba ve vende Aôndo” la. (2 Peteru 3:3, 7) Kpa mba Aôndo a doo ve ishima yô, vea war mtim la shi Aôndo una na ve “uma u tsôron.”—Mateu 25:46.

Ior umiliôn imôngo mbagenev mba a va nder ve la, vea zua a ian i lun uma gbem shawon. Yesu yange nder or shin ku zum u za vannya ken gar u Nain la. Wan u kwasecôghol u môm môm la kpe, man er “mhôônom kôr” Yesu yô, a nder wan shon shin ku. (Luka 7:11-15) Shi Apostoli Paulu kaa ér: “M  ngu a ishimaverenkeghen sha Aôndo . . . ka mnder u mbaperapera kua mba ve lu perapera ga vea nder shin ku la.” Ishimaverenkeghen i bunden ga ne, ka gbenda u kpilighyol u Aôndo a tese uumace dooshima na yô.—Aerenakaa 24:15.

Ior ubiliôn imôngo vea fatyô u veren ashe u va lun uma gbem shawon. Bibilo kaa ér: “Mbaperapera vea ya dyako u tar, vea lu ken u gbem.” (Pasalmi 37:29) Hen shighe la, a saan ve iyol tsung shi vea zua a ishimataver, er vea nenge mkaanem ma apostoli Paulu yange nger anyom a kar 2,000 la, ma a kure sha mi yô, ér: “Ku, mhembe wou ngu hana? Ku, soho wou ngu hana?” (1 Mbakorinte 15:55) A va kar a ku u u lu orihyom u uumace u hemban cii la kera!