Hii shighe u i gba uumace la je, Aôndo u a gbe se la lamen a ior sha ikyev i mbatyomov man uprofeti. Heela tseegh ga, yange na i nger mkaanem nam kua uityendezwa nav. Uityendezwa mba Aôndo a er la vea na a saan we iyol. Nahan, ka han u fatyô u fan kwagh u uityendezwa mba Aôndo nyiana?

Uityendezwa mbara mba ken mkaanem ma Aôndo a ne i nger sha ci wase la, ka Icighan Ruamabera je la. (2 Timoteu 3:16) Aôndo yange na uprofeti nger mkaanem nam nena? (2 Peteru 1:21) Aôndo yange wa mbamhen nav ken asema a nomsombaiorov mba ve nger Icighan Ruamabera la, nahan lu mbamhen nav ve nger ye. Ka di vough er nyian kpa, aluer orvesen u kômpeni nan kaa a akawe u nan ér a nger washika sha ci u nan nahan; se fatyô u kaan ser ka orvesen u kômpeni la a nger washika la ye. Nahan Icighan Ruamabera kpa kape i lu je la. Shin er Aôndo yange na nomsombaiorov nger mkaanem mara nahan kpa, ka un jighilii a nger ma ye.

Mkaanem ma Aôndo ma hange hange je yô, a soo ér ior cii ve ôr ma ve kav. Nyian ne, “loho u dedoo u tsôron” u a Aôndo a ne i nger la ngu aren a “hanma ikyurior man hanma ipyaven man hanma zwa.” (Mpase 14:6) Sha iwasen i Aôndo yô, i gber Icighan Ruamabera jimin cii kua avegher a i̱ ken ijô i hemban 3,000; takeda ugen môm sha tar ngu ken ijô kpishi nahan ga.