Profeti Mose yange kaa ér aluer se mba eren kwagh u atindi a Aôndo a kaa la yô, se zua a iveren i Aôndo. (Duteronomi 10:13; 11:27) Se mba ongo imo i Aôndo ka sha ci u, aluer se er nahan ga yô, una tsaha se yum ga. Aeren a Aôndo a doon tsung la na yô, se mba ungwan imo na sha ci u a doo se ishima, shi se soo ser se palegh u eren nyityôkwagh i nan un ishimavihin cii. “Ka kwagh u se er ve se tese ser Aôndo doo se ishima je ne, ka u se kuran atindi a na; man atindi a na yuhwa ga.”—1 Yohane 5:3.

Aluer or ngu ungwan imo i Aôndo yô, una na nan iveren nena? De se time sha igbenda ihiar.

“Mo M ngu [Yehova] Aôndo wou, M tese u kwagh u una lu u a inja yô, M hemen we sha gbenda u ú zenden sha mi la.”—YESAIA 48:17.

Yehova Aôndo u a gbe se la fa se shi tesen se kwagh u i gbe u se er yô. Aluer se soo ser kwaghwan na a wase se u eren akaa a injaa yô, a gba u se time ken Icighan Ruamabera se fa kwagh u a soo ér se er la, shi se eren akaa a se henen la kpaa.

“Saan mba ve ungwan mkaanem ma Aôndo shi ve eren sha mi la iyol!”—LUKA 11:28.

Nyian ne, ior umiliôn imôngo mba ve lu ungwan imo i Aôndo la cii, saan ve iyol sha mimi. Ikyav i tesen yô, nenge ase kwagh u orgen ken tar u Ishpania, u yange ngôôr vihin ishima ga shi eren kwagh a ior sha tswam, kua kwase na je kpaa yô. Iyange igen la, ôr kwagh ugen u profeti Mose nger sha kwagh u Yosev, wan u Yakob, u a tese ér yange lu ishima legh legh yô. Yange i tee Yosev za lu kpan, shi i kôr un i wuhe a ishô na iyol; nahan kpa, za hemen u lun ishima legh legh, shi keren bem shi deen mbagenev kwaghbo. (Genese, ityough 37-45) Orishpania la kaa ér: “M henen sha kwagh u Yosev la yô, m nenge mer doo u me hen u lun ishima legh legh, shi me eren kwagh a ior kundu kundu, shi me kôron iyol tsaha. Kwagh ne na yô, saan mo iyol hegen.”

Icighan Ruamabera seer tesen er se eren kwagh a mbagenev yô. Seer timen sha kwagh ne vighe vighe ken ngeren u a dondo ne.