Aôndo yange tôndo zwa a Aberaham ér or a va due ken tsombor na, a lu nan “akuraior a sha won cii” aa zua a iveren ken a nan ye. (Genese 22:18) Or shon la a lu ana?

Aôndo yange na Yesu, u due ken tsombor u Aberaham la tahav er uivande mba vesen, anyom kar nôngo u kuman er 2,000 nahan hegen. Uivande mbara tese ér lu u akuraior aa zua a iveren i Aôndo tôndo zwa a Aberaham la sha ikyev i Yesu.—Mbagalatia 3:14.

Uivande mba Yesu er la wase mba ve nenge la u fan er i lu un Aôndo a tsough ér uumace ve zua a averen sha ikyev na yô, shi ve tese er i lu sha ikyev i Yesu uumace vea zua a averen a tsôron, a Aôndo a tende zwa la yô. Nenge er uivande mba Yesu er la ve tese aeren a na agen a doon tsung yô.

Yesu yange eren a ior kundu kundu—Yange bee ior angev.

Kwagen la, orimande zamber a Yesu ér a bee un imande. Yesu bende or shon uwegh iyol maa kaa ér: “M lumun!” Her ave ave je maa imande na bee.—Marku 1:40-42.

Yesu yange naan ior kwagh wuee—Yange na mba ijen kôr ve la kwaghyan.

Yesu yange soon ér ior ve va hen a na ve yem ijen ga. Yange na ior udubu imôngo kwaghyan sha ivande kuma kwa har, sha ikpenberedi man ishu kpuaa; yange a er kwaghyan u kpuaa ne a hingir kpishi. (Mateu 14:17-21; 15:32-38) Yange ve ya i kuma ve, shi kwaghyan shon a neer her kpishi.

Yange mhôônom kôron Yesu a ior—Yange nder mbakpenev.

Yange mhôônom shin “kunya kôr” Yesu a kwasecôghol u lu vaan ku u wan na u nomso yô, man lu cii wan na je la, shi lu a orgen môm u nengen sha a na ga. Nahan Yesu nder wan na shon.—Luka 7:12-15.