Paulu ôr kwagh u orgen ken 2 Mbakorinte 12:2, 3 u yange “i feese nan i za a nan sha Sha u sha utar la” yô. Or shon lu ana? Paulu yange nger washika ne hen tiônnongo u ken Korinte la, pase ve wanger wanger er Aôndo a lu eren tom a na sha ian i apostoli yô. (2 Kor. 11:5, 23) Maa a ter kwagh u “akaa a nengen a mi sha ashe kua mbampase mba Ter kpaa.” Kwaghôron u Paulu ken avur la cii tese ér Paulu ter kwagh u anmgbian ugen ga. Nahan ikyav tese wang ér Paulu lu ôron kwagh na iyolna ér ka un i tese un akaa a nengen a mi kua mbampase mba sha mnenge mbara ye.—2 Kor. 12:1, 5.

Nahan ka Paulu a lu or u yange “i feese nan i za a nan sha Sha u sha utar” shi “i za a nan ken Paradiso” la ye. (2 Kor. 12:2-4) Yange ter ishember i “mbampase” la, nahan tese ér kwagh u i ôr un la lu kwagh u una va er ken hemen yô.

Ka nyi i lu “Sha u sha utar” u Paulu nenge a mi laa?

Ken Bibilo yô, “sha” una fatyô u lun kwavaôndo. (Gen. 11:4; 27:28; Mat. 6:26) Kpa a fatyô u eren tom a ishember i “sha” la sha igbenda igen kpaa. Ashighe agen ishember la ka i ôron kwagh u hemen u uumace. (Dan. 4:20-22) Tseegh ga, shighe gen a lu kwagh u hemen u Aôndo, er kwagh u Tartor na nahan.—Mpa. 21:1.

Paulu yange nenge a ‘Sha u sha utar la.’ Inja i kwagh la ér nyi? Ashighe agen Bibilo ka i kimbir kwagh kwa tar sha u tesen er kwagh shon i lu beerkwagh ga shin i lu kwagh u hange hange gayô u vesen yô. (Yes. 6:3; Esek. 21:27; Mpa. 4:8) Nahan ka inja er Paulu ôr kwagh u ‘Sha u sha utar la’ u tesen hemen u u hembe hanma hemen ugen cii yô; ka Tartor u Mesiya u Yesu Kristu man mba 144,000 vea lu hemen je la. (Nenge takerada u Insight on the Scriptures la, Tihi u Hiihii, peeji 1059 man 1062.) Ka Tartor u Mesiya shon Peteru lu ôron kwagh u u shighe u a nger ér se mba keghen “Usha mba hev” mba Aôndo a tende zwa u van a mi la ye.—2 Pet. 3:13.

Nahan “Paradiso” u Paulu ter la di, inja na ér nyi?

Ishember i “paradiso” la kpa ia fatyô u lun akaa kposo kposo: (1) Ishember i “paradiso” la ia fatyô u tilen sha ityough ki Paradiso kpôô kpôô u una va lu shin tar ne la, sha ci u ka kwagh u yange lu ya u uumace sha hiihii je la. (2) Ishember la shi ia fatyô u tilen sha ityough ki bem u hemban cii u Aôndo una va na ior nav ken tar u he la. (3) Shi ishember la ia fatyô u tilen sha ityough ki mlu u doon tsung u Sha la. I yila Sha shon ken Mpase 2:7 ér ka “Paradiso u Aôndo.”—Nenge Iyoukura i Julai 15, 2015, peeji 8 ikyum. 8.

Se fatyô u kaan ser Paulu lu ôron kwagh u paradiso mba utar mban cii zum u ôr mkaanem ma ken 2 Mbakorinte 12:4 shighe u lu ôron kwagh na la.

U hiden saven yô:

A shi nan kpa “Sha u sha utar” u i ter ken 2 Mbakorinte 12:2 la ka Tartor u Mesiya u Yesu Kristu kua mba 144,000 vea hemen la, ka “Usha mba hev” je la.—2 Pet. 3:13.

Ka “Sha u sha utar” sha ci u Tartor la hemba hanma hemen ugen cii ica je.

“Paradiso” u i feese Paulu ‘i za a na ker’ sha mpase u sha mnenge la una fatyô u tilen sha ityough ki (1) Paradiso u kpôô kpôô u una va lu shin tar la, (2) paradiso u ken jijingi shin bem u hemban cii u Aôndo una va na ior nav, u a hemba u hegen ne yô, man (3) “Paradiso u Aôndo” u sha tartor u una lu shighe môm vea paradiso u shin tar ken tar u he la.

Sha nahan yô, tar u he la a lu di kwagh u shin tar tsô ga, kpa a lu usha mbahev man tar u ua lu paradiso la. A lu kwagh u he kuaa je; a lu gomoti u Tartor u sha la man uumace mba vea lu civir Yehova ken paradiso shin tar la.